زي ما الموبايلات خلتنا نرمي التليفون الأرضي في الزبالة .. وزي ما Smartphones خلتنا نحط Nokia 3310 في الدرج لإن معادش له لازمة .. نفس الكلام حصل مع تنظيم القاعدة .. حد فاكر التنظيم ده أساساً؟ .. لو إنت من جيل الألفينات فخليني أحكيلك علي شخصية إنت ممكن تكون سمعت عنها بس معشتهاش أوي اللي هي (أسامة بن لادن) الله يرحمه .. إذا كنت إنت دلوقتي بتستني Trailer بتاع الجزء الجديد من سلسلة Avengers وبتفضل يا عيني تعد الأيام عشان تسمع الأغنية السينجل الجديدة بتاعة (عمرو دياب) فإحنا بقي جيل الثمانينات و التسعينات كنا بنستني فيديوهات (بن لادن) وهو بيهدد أميركا إنه حيخليها تنام من المغرب .. (بن لادن) كان له هيبة كده وهو قاعد مربع جوه كهفه المتواضع في سلسلة جبال هندو- كوش في أفغانستان وجنبه البندقية الكلاشينكوف بتاعته .. ده بيخليني أسأل هو راح فين تنظيم القاعدة؟ .. إزاي تنظيم ويا سيدي بلاش نقول إرهابي بس إزاي تنظيم كان الفيديو بتاع القائد بتاعه لما بينزل بيشتغل علي كل الفضائيات الإخبارية وكانت سيرته علي كل لسان من 2001 لحد 2011 يختفي فجأة كده؟ .. إزاي التنظيم اللي كان القائد بتاعه صورته بتتطبع علي التي- شيرتات وبتتباع في حواري أي بلد إسلامية ينتهي به الحال لمزبلة التاريخ بالشكل ده؟ .. خلال السنة اللي إحنا فيها دي إسم تنظيم القاعدة إتقال في جرنان محترم زي The Guardian البريطاني مثلاً 11 مرة بس منهم مرتين لما إتقال خبر إن إبن (أسامة بن لادن) اللي إسمه (حمزة) إتقتل في غارة أميريكية .. ده طلاق (سميه الخشاب) من (أحمد سعد) خد إهتمام إعلامي أكبر من كده .. تاني ده بيخليني أسأل: إيه اللي حصل؟
فيه ناس بتقول إن ده سببه إن الإهتمام الإعلامي دلوقتي رايح لداعش .. منطق الناس دي أنا ممكن أفهمه بسهولة .. داعش استخدمت Social Media عشان تنزل فيديوهات دموية بس الإعلام بيشوف الدم ده علي إنه سيكسي أوي و بيفضل يتكلم عنه ويعيد ويزيد في تغطيته وواحدة واحدة الناس كلها بقت مركزة مع داعش ونست القاعدة .. حط ده جنب إن تنظيم القاعدة وجوده علي Social Media بقي مجرد شوية حلقات شبه حلقات برنامج حديث الروح اللي كان بيتذاع علي القناة الأولي زمان عشان القائم بأعمال زعيم التنظيم (أيمن الظواهري) يفضل يكلمنا عن خواطره وذكرياته في الجهاد لحد ما إتقتل هو كمان في يوليو 2022 .. المنطق ده إنت تقدر تقتنع به لما تعرف إن تنظيم القاعدة وصل لأقصي انتشار ليه قبل عصر Social Media أيام ما كنا عشان نعرف إيه اللي بيحصل في الدنيا بنفتح قناة الجزيرة نتفرج علي نشرة الأخبار .. دلوقتي إحنا بناخد أخبارنا من بلاعة بكابورتات إسمها Facebook .. وجهة نظر تانية وهي إن بداية إنهيار التنظيم كانت يوم إغتيال (بن لادن) .. الرجل ده كان الكل في الكل في التنظيم .. هو كان الأب الروحي والزعيم .. لما مات المولد ده كله إتفض.
فيه نظرية تالتة بتقول إن كل ده جزء من استراتيجية جديدة للتنظيم .. الناس دي دلوقتي بقت بتفكر بإسلوب SWVL كده اللي هو إحنا عايزين ناخد حصة كبيرة من Market Share .. التنظيم دلوقتي مركز أوي علي نشر نفوذه ووجوده في منطقة جنوب الصحراء الكبري وسوريا واليمن وأفغانستان .. مبقوش بيفكروا انهم يفرقعولهم فندق ولا يوقعولهم طيارة .. لا خالص .. هم عارفين هم بيعملوا ايه كويس .. مهم تكون فاهم إن (اسامه بن لادن) هو كمان مكنش ماشي كده في نور الله .. لا هو كان بيخطط لكل حاجة بيعملها .. في عصر ما قبل Social Media هو كان عارف إن كل ضربة هو بيعملها للغرب بتعمل حاجتين: بتخلي الغرب يفكر فيه علي إنه عدو بس في نفس الوقت بتزود من عدد أنصاره أو علي الأقل المتعاطفين معاه .. دلوقتي الدنيا إتغيرت .. اللي كانوا زمان متعاطفين ومستعدين يدوا فلوس للقاعدة مبقوش موجودين أو بقوا خايفين وبناء عليه التنظيم بقي محتاج يغير من استراتيجيته .. أنا شخصياً مش عارف مستقبل تنظيم القاعدة إيه بس اللي أقدر أقوله ليك وأنا مطمن إن المسلسل ده لسه مخلصش.
المصدر:
- مقالة بعنوان No Longer Does Al-Qaida Grab the Headlines. That Might be the plan .. نشرت في جريدة The Guardian البريطانية وده لينك المقالة الأصلية:
https://www.theguardian.com/commentisfree/2019/aug/04/no-longer-does-al-qaida-grab-headlines-that-might-be-plan
