المهاجرين دول أقرب تشبيه بيعبر عنهم إن كل بلد بتاخد نصيبها منهم .. فيه دول عدد المهاجرين اللي عايشين فيها بيعدي نص تعداد سكان أهل البلد الأصليين .. في بلاد تانية عدد المهاجرين ميجيش عدد اللي بيشجعوا النادي الأوليمبي في مصر .. خلينا بس نتفق من دلوقتي إن المهاجر ده بني أدم إتولد في بلد و راح عاش في بلد تانية عشان أكل العيش أو الدراسة أو خوفاً علي حياته .. اللي أنا ححاول أعمله في المقالة بتاعة النهاردة إني أجاوب علي شوية أسئلة مهمة أوي .. مين أكتر بلد عايش فيها مهاجرين في العالم؟ .. و إيه أكتر بلد بتصدر مهاجرين علي مستوي العالم؟ .. و إزاي المهاجرين بيتوزعوا علي مستوي العالم؟ .. عشان مطولش عليكم خلينا نحاول نجاوب علي الأسئلة دي واحدة واحدة.
مين أكتر بلد عايش فيها مهاجرين علي مستوي العالم؟
بناء علي أرقام الأمم المتحدة فأميركا هي أكتر بلد في العالم عايش فيها مهاجرين .. سنة 2015 عدد المهاجرين اللي عايشين في أميركا و بفكرك بس إن المهاجر ده بني أدم إتولد بره أميركا بس دلوقتي هو عايش هناك وصلوا 48 مليون بني أدم .. كنوع من أنواع المقارنة ففي نفس السنة اللي هي 2015 كان عدد المهاجرين اللي عايشين في السعودية وصل 11 مليون بني أدم و في كندا الرقم وصل 7.6 مليون بني أدم .. لكن .. و خلي بالك من لكن دي .. لو قارنت الرقم بتاع عدد المهاجرين و قسمته علي عدد السكان حتلاقي إن الكلام إختلف خالص .. لو جيت قسمت ال11 مليون مهاجر اللي عايشين في السعودية علي عدد السكان تكتشف إن نسبة المهاجرين في السعودية وصلت 34% من إجمالي عدد السكان .. النسبة دي بتوصل 21% في كندا .. فجأة تلاقي إن اميركا اللي عايش فيها أكبر عدد مهاجرين في العالم بقت بلد نسبة المهاجرين اللي عايشين فيها متجيش غير 15% بس من إجمالي عدد السكان.
لما تيجي بقي تشوف نسبة عدد المهاجرين مقارنة بعدد أهل البلد تلاقي نفسك قدام تقسيمة جديدة .. حضرتك إنت ممكن تقسم دول العالم ل5 فئات:
- الفئة الأولي .. بلاد عدد سكانها الأصليين قليل بس ربنا عطاها موارد بترولية فتلاقيها بتستقبل عدد مهاجرين كبير لدرجة إن نسبتهم عدت نسبة أهل البلد .. سنة 2015 دول مجلس التعاون الخليجي كانت مسيطرة علي الفئة دي .. الإمارات لوحدها نسبة المهاجرين فيها كانت 87% من إجمالي السكان .. الكويت الرقم ده وصل 73% .. قطر كانت 68% .. السعودية والبحرين و سلطنة عمان نسبة المهاجرين فيها كانت بتروح و تيجي ما بين 34% ل51% من إجمالي عدد السكان.
- الفئة الثانية .. بلاد مساحتها صغيرة و عدد سكانها صغير بس عايش فيها مهاجرين كتير لإن البلاد دي قوانين الضرائيب فيها بتخلي أي حد معاه فلوس عايز يروح يعيش هناك زي مثلاً حتة إسمها ماكاو في الصين و دي عدد المهاجرين فيها بيوصل 57% من عدد السكان .. حتة تانية زي إمارة موناكو الفرنسية و اللي عدد المهاجرين فيها وصل 55% .. و بلد زي سنغافورة اللي عدد المهاجرين فيها وصل 46% .. ده معناه إن الفئة الأولي فيها عدد مهاجرين كتير بس دول مهاجرين غلابة جايين عشان يلاقوا لقمة العيش .. الفئة الثانية عايش فيها عدد مهاجرين كتير بس دي ناس معاها فلوس و مش عايزه تخسرها.
- الفئة الثالثة هي بلاد مساحتها واسعة أوي بس عدد سكانها قليل زي أستراليا اللي نسبة المهاجرين فيها وصلت 28% و كندا و اللي نسبتهم وصلت 21% من إجمالي تعداد السكان.
- الفئة الرابعة هي الدول الغنية اللي عدد سكانها مش قليل و كمان نسبة المهاجرين اللي فيها مش عالية و بتتراوح ما بين 9 ل17% من إجمالي عدد السكان .. مثال علي كده النمسا (17%) .. السويد (16%) .. أميركا (15%) .. بريطانيا و إسبانيا (13%) .. ألمانيا و فرنسا و هولندا (12%) .. بلجيكا (11%) .. إيطاليا (10%).
- الفئة الخامسة هي الدول اللي ربنا إبتلاها بإن الدولة اللي جنبها حصلت فيها حرب أهلية .. يعني مثلاً .. سنة 2015 كان فيه أكتر من مليون لاجيء سوري و عراقي عايشين في لبنان و الرقم ده بيمثل 20% من إجمالي تعداد سكان البلد .. كان عندك مثلاً 400,000 لاجيء سوداني عايش في تشاد و دول بيمثلوا 3% من إجمالي تعداد سكان البلد.
فيه كام قاعدة كده مهم تكون فاهمهم لما تيجي تتكلم عن الهجرة .. كل ما مساحة البلد و عدد سكانها بيقل كل ما حتلاقي إن نسبة المهاجرين فيها أعلي .. كنت قلتلك إن نسبة المهاجرين اللي عايشين في أميركا حوالي 15% من إجمالي تعداد السكان .. لو قارنت أميركا ببلد تانية زي سويسرا تكتشف إن نسبة المهاجرين في سويسرا بتعدي 29% .. في بلد تانية زي لوكسمبورج و دي بلد صغيرة لدرجة إن حي شبرا في القاهرة أكبر منها بتلاقي إن نسبة المهاجرين فيها بتوصل 46% .. اللي يؤكدلك القاعدة دي أكتر إن نسبة المهاجرين في الهند مثلاً كانت 0.4% بس من إجمالي تعداد السكان و في الصين الرقم بيقل أكتر يبقي 0.07% .. لكن .. و برده حط مليون خط تحت لكن الجاية دي .. الفرق بين الهجرة الداخلية و الخارجية مهم يكون في دماغك .. خد عندك بلد زي الصين مثلاً.
أنا قلتلك إن عدد المهاجرين اللي من بره الصين اللي عايشين فيها ميعديش 0.07% من إجمالي تعداد السكان .. بس في نفس الوقت الصين فيها أكتر من 12 ولاية عايش فيها أكتر من 50 مليون بني أدم .. من ال12 ولاية دول فيهم 3 ولايات اللي هم جوان-دونج و شان-دونج و هينان عايش فيهم أكتر من 100 مليون بني أدم .. دلوقتي الهجرة الداخلية بتزيد في الصين بمعدلات عالية أوي في السنين اللي فاتت بس لو إعتبرت الصين بلد واحدة مقفولة علي بعضها حتلاقي إن معدل الهجرة ليها واقع خالص .. نفس الكلام علي الدول الأوروبية .. لو إعتبرت دول الإتحاد الأوروبي كيان مقفول علي نفسه حتلاقي إن معدلات الهجرة ليه قلت جامد.
مين أكتر بلد بتصدر مهاجرين؟
المهاجر ده بني أدم قرر يسيب بلده اللي هو إتولد فيها عشان يروح يعيش في بلد تانية .. وجد أن عشان تحسب كام بني أدم بالضبط سابوا مصر مثلاً عشان يهاجروا بره فإنت مش حتلاقي جهة حكومية تقولك بالضبط فيه كام مصري سابوا البلد و راحوا أنهي بلاد بره .. بس لو رحت مثلاً للسويد تلاقيهم عارفين كويس أوي مين اللي هاجر ليهم؟ و من أي بلد؟ .. دي مشكلة عامة لما تيجي تبص علي الإحصائيات بتاعة الهجرة .. البلد اللي المهاجر بيمشي منها محدش فيها بيشغل باله هو رايح فين .. بس البلاد اللي فيها مهاجرين بيروحولها تلاقيهم مسجلين كل مهاجر جه منين؟ و إمتي؟ و الحقيقة المنطق ورا الحكاية دي أنا شخصياً فاهمه و مقدره .. إنت البلد بتاعتك شايفاك عبء عليها فلما تيجي تقولها أنا ماشي بتقولك غور في ستين داهية و تكسر وراك قلة .. و إن كان فيه ناس بتقول إن من مصلحة البلد إنها تراقب مين من ولادها هاجر بره و ده لسببين: السبب الأول إن فيه بلاد كتير من ضمنهم مصر بتدي للمهاجرين بتوعها اللي عايشين بره حق التصويت في الإنتخابات .. السبب الثاني إن المهاجرين دول بيبعتوا فلوس لأهاليهم هنا في مصر و دول كتير إقتصادها قايم علي الحكاية دي زي لبنان مثلاً .. أكتر بلد ليها ناس عايشين بره هي الهند ب16 مليون بني أدم و الكلام ده لحد سنة 2015 .. في المركز الثاني بتيجي المكسيك ب12 مليون مهاجر أغلبهم عايشين في أميركا.
دلوقتي إحنا عرفنا إن أكتر بلد مطلعه مهاجرين هي الهند و وارها المكسيك .. بس لو جيت تشوف مين أكتر بلد نسبة الناس اللي هاجرت منها عالية تلاقي إنك قدام لستة بلاد تانية خالص .. خد بلد زي البوسنة و الهارسك مثلاً .. قصاد كل إتنين عايشين في البلد فيه واحد مهاجر بره يعني بتتكلم عن إن بلد 30% من شعبها سابها و مشي .. حالة البوسنة و الهارسك هي هي بالكربون حالة ألبانيا .. فيه بلاد غريبة برده زي بريطانيا .. بريطانيا عايش فيها 8.4 مليون مهاجر و في نفس الوقت فيه 4.7 مليون بريطاني سابوا بلدهم وهاجروا .. أميركا برده زيها زي بريطانيا .. إذا كانت أميركا زي ما قلت في الأول عايش فيها 48 مليون مهاجر ففيه 2.9 مليون أمريكاني برده سابوا بلدهم و هاجروا .. فيه دول تانية قافلة علي نفسها بالضبة و المفتاح زي اليابان .. نسبة المهاجرين اللي عايشين في اليابان ميجوش 1.7% من إجمالي تعداد السكان .. و في نفس الوقت نسبة اليابانيين اللي سابوا بلدهم و هاجروا ميجوش 0.6%.
إزاي المهاجرين بيتوزعوا علي مستوي العالم؟
بناء علي إحصائيات الأمم المتحدة ففي سنة 2017 كان عدد المهاجرين علي مستوي العالم وصل 258 مليون بني أدم و دول حوالي 3.4% من إجمالي سكان العالم .. حضرتك الحقيقة اللي عايز أصدمك بيها إن نسبة المهاجرين علي مستوي العالم متجيش يدوبك غير قد نسبة الناس اللي شايفه إن شويبس رمان طعمها حلو .. أنتوا أقلية .. انتوا فاهمين .. أنتوا ولا حاجة .. نسبة المهاجرين خلال السنين اللي فاتت بتزيد ببطء شديد أوي ولا كأنهم (عبدالله السعيد) و هو بيجري في ماتشات المنتخب .. سنة 1990 نسبة المهاجرين علي مستوي العالم كانت 2.9% و سنة 1965 كانت 2.3% .. فمهم تكون فاهم إن الأغلبية العظمي من الناس بتتولد في بلد و بتموت فيها .. اللي بيتغير مش النسبة .. اللي بيتغير هو الإتجاه بتاع الهجرة.
بالوضع اللي إحنا شايفينه لحد سنة 2017 فإنت بسهولة أوي تقدر تقسم المهاجرين علي مستوي العالم ل3 مجموعات تقريباً قد بعض:
- الناس اللي كانت عايشة في الجنوب و جنوب هنا معناها الدول الفقيرة و دلوقتي الناس دي عايشة في الشمال و اللي معناها الدول المتقدمة .. الناس دي لحد سنة 2017 كان عددهم 89 مليون بني أدم بناء علي أرقام الأمم المتحدة.
- الناس اللي إتولدت في دول فقيرة و دلوقتي عايشة في دول تانية بس فقيرة برده يعني الناس اللي كانت عايشة في South أو الجنوب و دلوقتي عايشة في South برده .. ودول عددهم 97 مليون بني أدم.
- الناس اللي إتولدت في دول غنية و دلوقتي عايشة في دول غنية تانية .. أو زي ما بتتسمي North-North Immigration أو هجرة من الشمال للشمال .. و دول عددهم وصل 57 مليون بني أدم.
- تبقي المجموعة الرابعة و هي الناس اللي إتولدت في دول غنية و دلوقتي عايشين في دول فقيرة .. يعني ناس كانت عايشة في North و هاجرت لSouth .. زمان أيام الإستعمار الناس دي كانت كتير أوي .. دلوقتي عددهم سنة 2017 وصل 14 مليون بني أدم بس
أنا بس عايز أختم بحاجة التقرير ده جاب سيرتها و سمعت معايا أوي .. دلوقتي الشرق الأوسط في حالة ما يعلم بيها إلا ربنا بداية من 2015 .. حرب أهلية في اليمن .. حرب أهلية في ليبيا .. حرب أهلية في سوريا .. بس وسط كل الكلام عن خطر اللاجئين المسلمين العرب الوحشين الإرهابيين الحرامية تكتشف إن حركة الهجرة بتاعتهم بره بلادهم اللي إتدمرت بسبب الحرب معملتش أي تأثير يذكر في شكل الهجرة علي مستوي العالم .. خالص .. إحنا مجرد شماعة يا حضرات.
المصدر:
مقالة بعنوان Which Countries Have the Most Immigrants? .. نشرت في مجلة The Conversation و ده لينك المقالة الأصلية:
ttps://theconversation.com/which-countries-have-the-most-immigrants-113074
