موضوعنا النهاردة اللي حنتكلم عنه هو بني أدم إسمه (توم باراك Tom Barrack) و ده اللي عندك في الصورة و علي فكرة الصورة دي من المؤتمر اللي عمله الحزب الجمهوري عشان يعلن ترشيحه رسمياً ل(دونالد ترامب) إنه يدخل إنتخابات الرئاسة 2016 و ده لو حبيت توصفه خليني أقولك إنه التجسيد بتاع أغنية (أحمد شيبه) اه لو لعبت يا زهر و إتبدلت الأحوال و ركبت أول موجة في سكة الأموال .. عشان أخليك فعلاً تكمل المقالة دي لأخرها لإنها طويلة و قبل ما أبدأ أحكيلك الرجل ده بدأ حياته إزاي خليني أحلي بقك بقصة حصلت في إبريل 2016 قبل الإنتخابات الرئاسية الأميريكية اللي فاتت و اللي كسبها (دونالد ترامب) .. القصة إن في الوقت ده (ترامب) كان هو بقي المرشح بتاع الحزب الجمهوري في أميركا و كان وقتها الإعلام كله بيتكلم عن كلامه إنه لو بقي رئيس أول حاجة حيعملها إنه حيمنع المسلمين من دخول أميركا و هو نفذ الوعد الإنتخابي ده فعلاً بعد ما كسب .. اللي حصل إن سفير الإمارات العربية المتحدة (يوسف العتيبه) بعت E-mail ل(توم باراك) لإنهم كانوا صحاب و حتفهم إزاي هم بقوا صحاب بعدين بس هو إشتكاله إن صاحبك (ترامب) ده مخلي القيادة الإماراتية و السعودية قلقانه من كلامه عن إنه حيمنع المسلمين من دخول أميركا و كده .. رد عليه (توم باراك) بE-mail قاله إن (ترامب) صاحبه و هو بيقول الكلام ده بس عشان يكسب الإنتخابات بس بعد ما يبقي رئيس حيبقي حبيب الخلايجة و إنه حيبقي أكتر رئيس أميريكي حيضمن مصلحة دول الخليج.
أنا بس عايزك تستوعب إن دي سلسلة E-mails بين سفير الإمارات في أميركا و بين واحد إنت عمرك ما سمعت إسمه قبل كده بس الرجل ده يبقي أكتر حد جمع فلوس دعاية إنتخابية ل(ترامب) و أكتر حد (ترامب) بيثق فيه و هو كان حلقة الوصل بين (ترامب) قبل حتي ما يبقي رئيس و بين الإماراتيين و السعوديين و هو اللي نصح (ترامب) إنه يختار واحد إسمه (بول مانافورت Paul Manafort) عشان يخليه مدير حملته الإنتخابية و حتعرف بعدين برده إن (بول مانافورت) ده مصيبة من مصايب الزمن لوحده و إن (ترامب) شخصياً إختار (توم باراك) عشان يبقي هو اللي يمسك لجنة تنظيم حفلة تنصيبه كرئيس .. علي فكره (ترامب) كان عايز يعينه وزير ماليه و كان عايز يعينه سفير للمكسيك بس هو رفض لإنه علي حسب كلامه مبيحبش يشتغل في السياسة .. بعد الايميلات اللي بين (توم باراك) و بين (يوسف العتيبه) دي بشهر و في يوم 26 مايو 2016 قبل حتي ما الإنتخابات الأميريكية تبدأ إتعمل إجتماع نظمه (توم باراك) بين (يوسف العتيبه) و بين (جاريد كوشنر Jared Kushner) جوز بنت (ترامب) و اللي (ترامب) عينه دلوقتي مبعوث خاص له للشرق الأوسط و قبل الإجتماع ده ما يتعمل (توم باراك) بعت E-mail ل(يوسف العتيبه) قاله إنه حيحب (جاريد كوشنر) أوي لإنه مقتنع بكل الأفكار اللي الإماراتيين مقتنعين بيها .. بعدها يوم 24 يونيو كان حيتعمل إجتماع تاني حيشمل الرباعي (جاريد) و (يوسف العتيبه) و (بول مانافورت) و (محمد بن سلمان) و اللي كان وقتها مستشار أبوه و مكنش لسه إتعين ولي عهد و حزر فزر مين ضبط الإجتماع ده .. (توم باراك) .. بس الإجتماع لغاه (بول مانافورت) في أخر لحظة.
زيارة (ترامب) للسعودية خلال مؤتمر القمة العربية سنة 2017
بدأت تحس إن (توم باراك) ده شخص يستحق إنك تعرف عنه حاجة؟ .. علي الورق و قدام الناس (توم باراك) عنده شركه إسمها Colony NorthStar و دي شركة إستثمارات عقارية قدرت إن خلال السنتين اللي (ترامب) بقي فيهم رئيس إنها تجيب شغل ب7 مليار دولار منهم 24% تقريباً مشاريع في الإمارات و السعودية .. هو عنده 71 سنة زيه زي (ترامب) .. و زيه زي (ترامب) برده بيحب يدلع نفسه .. الرجل ده عنده عزبة عنب و مصنع نبيذ علي مساحة 700 فدان و مزرعة حصنة كبيرة في ولاية كاليفورنيا الأميريكية .. و عنده منتجع تزحلق علي الجليد دافع فيه 18 مليون دولار في مدينه أسبن .. سنة 2017 باع قصره في مدينة سانتا مونيكا الأميريكية ب38 مليون دولار و رغم كل ده هو بدأ حياته بداية بسيطة خالص بس الحظ هو اللي لعب معاه و هو شخصياً بيعترف بكده.
أبوه و أمه كانوا مهاجرين من لبنان قعدوا في مدينة لوس أنجيليس .. أمه كانت سكرتيره و أبوه كان شغال في محل بقالة و إتولد كاثوليكي بالمناسبة.. سنة 1972 إتخرج من جامعة Southern California بشهادة في الحقوق و لما إتخرج قدم علي Interview في مكتب المحامي (هيربيرت كالمباتش Herbert Kalmbach) اللي كان وقتها المحامي الخاص للرئيس الأميريكي (ريتشارد نيكسون Richard Nixon) السابق و اللي منكوا عارف ده الرئيس اللي إتعزل من منصبه بعد فضيحة ووترجيت Watergate .. و رغم إن اللي قدم في الوظيفة شباب متخرجين من كليات تقيلة أوي بس هو إتعين عشان في الInterview الكلام جاب كلام و إتكلم مع اللي بيمتحنه في كرة القدم و إتكلموا عن كتاب معين في كرة القدم و لما (توم باراك) خلص الInterview و هو مروح إشتري الكتاب و رجع تاني للمكتب عشان يدي الكتاب للرجل اللي إمتحنه و الحركة دي هي اللي خلته يتعين .. عشان هو بيعرف يتكلم عربي فالمكتب عينه عشان يمسك فرعهم في السعودية .. يدوبك هو راح السعودية و دور علي نوادي بيتلعب فيها إسكواش عشان هو بيحب يلعبها إذ بالصدفة في النادي ده محدش كان بيلعب سكواش غير واحد سعودي و إذ بالصدفة برده يطلع إبن الملك .. و هوبا الزهر لعب معاه .. لما كان لسه محامي صغير في السعودية إتعرف علي أبو (يوسف العتيبه) اللي كان وقتها وزير البترول الإماراتي و خلصله صفقة حفر أبار بترول و دي كانت بداية صداقة (توم باراك) مع (يوسف العتيبه) شخصياً لإن سنة 2009 (توم باراك) كان السمسار اللي خلص صفقة بيع فندق L’Ermitage Raffles Hotel في مدينة بيفرلي هيلز الأميريكية لشركة Joint Venture نصها بيملكها صندوق إستثمارات أبوظبي اللي كان ماسكه وقتها (يوسف العتيبه) و الفندق إتباع ب41 مليون دولار .. سنة 2012 (يوسف العتيبه) إستثمر مليون دولار في شركة إستثمارات عقارية ماسكها (توم باراك) كانت وقتها بتتشري بيوت في أميركا برخص التراب أيام إنهيار سوق العقارات في أميركا.
(ترامب) و هو بيسلم علي (توم باراك) رئيس لجنة تنظيم حفلة تنصيبه كرئيس و الصورة دي ملتقطة قبل خطاب (ترامب).
(توم باراك) فيه ميزة إنه بيعرف يصاحب أي حد لدرجة إنه مرة كان راكب الأوتوبيس مع واحد سعودي إتكلموا مع بعض و بقوا صحاب و إذ بالصدفة برده السعودي ده يطلع شغال حاجة كبيرة في شركة أرامكو Aramco و عرف إنه حيسافر أميركا عشان يتعالج كام شهر ف(توم باراك) عرض عليه يجي يقعد عنده في بيته في كاليفورنيا خصوصاً إن السعودي ده المستشفي اللي حيتعالج فيها هناك .. تلف الأيام و تدور الأيام و تحب شركة Aramco تشتري صفقة أوتوبيسات مدارس كانوا حوالي 375 أوتوبيس ماركة Blue Bird قام صاحبك السعودي مكلم (توم باراك) و خلاه هو سمسار الصفقة .. الناس اللي تعرفه كويس بتقول عنه إنك لو أمير خليجي عايز تشتري بيت أو قصر في أوروبا أو أميركا فإنت غالباً صحابك حيعرفوك عليه عشان يبقي هو السمسار اللي يلاقيلك حاجة علي ذوقك .. لو أنتوا عيلة خليجية من العائلات المالكة أبنكوا أو بنتكوا قالتلكوا إنها عايزة تاخد شلتها و تسافر فرنسا تتفسح شوية فغالباً حترفعوا سماعة التليفون تسألوا صحابكوا اللي برده حيجبولكوا نمرة (توم باراك) عشان يبقي عينكوا اللي تخاف علي بنتكوا و شلتها خصوصاً إنه عنده قصر في جنوب فرنسا .. (توم باراك) له صحاب في الخليج لدرجة إنه لما شركته إشترت فندق علي ساحل جزيرة سردينيا الإيطالية علي البحر المتوسط صحابه الخلايجة جم يباركوله كل واحد خد اليخت بتاعه لدرجة إن (توم باراك) بنالهم وقتها مطعم بيعمل أكل حلال في الفندق مخصوص عشان يعمل ولايم تكفي اليخوت اللي جايه تبارك.
علاقة (توم باراك) ب(ترامب) بقالها سنين و سنين .. الإتنين قابلوا بعض لأول مرة فالثمانينات .. أول مرة إتقابلوا كانت سنة 1985 لما (توم باراك) باعله 20% من أسهم سلسلة محلات Alexander في مدينة نيويورك بسعر وقتها كان مبالغ فيه الصراحة .. مرة تانية كانت سنة 1988 و وقتها (توم باراك) إدي (ترامب) علي قفاه لما خلاه يدفع 410 مليون دولار عشان يشتري فندق بلازا Plaza Hotel و الإتنين (ترامب) إضطر يبيعهم عشان يسدد الديون اللي عليه .. و رغم كده لما أي حد يسأل (توم باراك) عن الصفقتين دول يقول إن (ترامب) هو اللي ضحك عليه و خد منه الصفقتين بسعر قليل .. الحقيقة إن (توم باراك) و (ترامب) بينهم جمايل كتير .. عندك مثلاً اللي حصل سنة 2010 .. وقتها جوز بنت (ترامب) اللي هو (جاريد كوشنر) كان ماسك شركة عيلته و حط فلوس بالهبل في مشروع فاشل لشراء ناطحة سحاب في شارع 666 في نيويورك .. المهم المشروع باظ و (جاريد) بقي عليه ديون 1.8 مليار دولار لازم يردهم و إلا حيتحبس .. (ترامب) كلم ناس كتير من ضمنهم (توم باراك) اللي بنفسه سلف (جاريد) 70 مليون دولار عشان ينقذه من الإفلاس.
(جاريد كوشنر) واقف علي اليمين خلال لقاء (ترامب) مع ولي العهد السعودي (محمد بن سلمان) في المكتب البيضاوي.
اه كنت قلتلك إني حقولك ليه (بول مانافورت) يبقي مصيبة من مصايب الزمن و ركز معايا عشان تشوف تدابير ربنا و لما ربنا يحب يفضح حد الموضوع بيمشي إزاي .. دلوقتي إحنا شرحنا إزاي (توم باراك) كان بيحاول يعرف (يوسف العتيبه) و (محمد بن سلمان) علي (جاريد) و علي (بول مانافورت) و الموضوع ماشي في سكة سلسة و بسيطة .. وقتها كان فيه واحد تاني بس غشيم شوية مش بيفهم زي (توم باراك) إسمه (جورج نادر) رجل أعمال لبناني أميريكي برده و كان شغال مستشار شخصي لحاكم الإمارات بأمر من الاماراتيين لإنهم بيحيبوا يسعوا في كذا إتجاه و محبوش يعتمدوا بشكل كلي علي (توم باراك) فهم خلوا (جورج نادر) يحاول يقابل إبن (ترامب) اللي هو إسمه (دونالد ترامب الصغير Donald Trump Jr.) و فعلاً الإتنين إتقابلوا يوم 3 أغسطس 2016 برده قبل ما الإنتخابات الأميريكية تبدأ و في الإجتماع ده (جورج نادر) عمل الغلطة اللي كان مستحيل (توم باراك) يعملها و إنه قال بعضمة لسانه إن الإماراتيين و السعوديين مستعدين يعملوا أي حاجة عشان يخلوا (ترامب) يكسب الإنتخابات .. مشكلة الكلمتين دول و إن إبن (ترامب) كان قاعد و اللي كان وقتها ضمن فريق الحملة الإنتخابية لأبوه فده بيمثل خرق لقانون الإنتخابات الأميريكية .. برده أنا عارف إن فيه ناس كتير مش فاهمه المشكلة فين.
اللي حصل إن الأمريكان عينوا واحد إسمه (روبيرت مالر Robert Muller) كقاضي تحقيقات عشان يعرف هل فعلاً الروس إخترقوا الإنتخابات الرئاسية الأميريكية؟ و هل الإماراتيين و السعوديين إشتغلوا مع الروس عشان يخلوا (ترامب) هو اللي يكسب الإنتخابات ولا لا؟ .. الفريق بتاع (روبيرت مولر) قبض علي (بول مانافورت) بصفته اللي كان ماسك الحملة الإنتخابية ل(ترامب) .. و مش هو لوحده اللي إتقبض عليه .. (مايكل كوهين Michael Cohen) المحامي الخاص ل(ترامب) هو كمان إتقبض عليه .. و الإتنين إتحكم عليهم في قضايا فساد و تهرب ضريبي و إحتيال .. صحيح دي كلها تهم ملهاش علاقة بالإنتخابات قد ما ليها علاقة بالتهرب الضريبي و الإختلاس بس في نفس الوقت الفريق بتاع (روبيرت مولر) عرف بإن (جورج نادر) قابل إبن (ترامب) و حققوا مع (جورج نادر) و عرفوا إن (توم باراك) كان حلقة الوصل بين الإماراتيين و بين (ترامب) و برده الفريق بتاع (روبيرت مولر) حقق مع (توم باراك) في ديسمبر 2017
(يوسف العتيبه) سفير الإمارات لدي أميركا و هو بيتكلم مع رئيس البرلمان الأميريكي (بول رايان) اللي قاعد في النص و الصورة دي إتاخدت من العاصمة الإماراتية أبوظبي.
أظن اللي عايز أقوله ليك في الأخر إن الحبل عمال يلف حول رقبة (ترامب) و الناس القريبة منه عمال يتقبض عليهم واحد ورا التاني .. بس علي الناحية التانية (توم باراك) عمال يجيب في فلوس .. علاقاته مع الخلايجة و مع (ترامب) مخلياه يعمل فلوس حلوة أوي .. السنة اللي فاتت شركته حبت تشتري ناطحة سحاب في مدينة لوس اأجيليس إسمها One California Plaza ثمنها كان 400 مليون دولار و كان بيدور علي شركاء معاه جاب شركة تأمين إسرائيلي دفعت 70 مليون دولار و شركة إستثمارات إماراتية تانية دفعت 70 مليون دولار برده و الشركة دي مملوكة لولي عهد أبوظبي .. اه نسيت أقولك .. فاكر لما القطريين إشتروا نادي باريس سانجيرمان .. هو كان سمسار الصفقة .. (توم باراك) مبيعتقش .. طالما سكة فيها سبوبة حيسعي فيها و يمكن ده السبب إن (ترامب) و شلته بيقعوا و ده حيطلع منها زي الشعرة من العجين.
(بول مانوفورت) اللي ماشي في النص بقي رئيس حملة (ترامب) الرئاسية بناء علي توصية من (توم باراك).
المصدر:
مقالة بعنوان Who is behind Trump’s links to Arab Princes? A billionaire friend يعني مين اللي ورا علاقة (ترامب) بأمراء الخليج؟ واحد صاحبه ملياردير نشرت في جريدة The New York Times الأميريكية و ده لينك المقالة الأصلية:
https://www.nytimes.com/2018/06/13/world/middleeast/trump-tom-barrack-saudi.html
