موضوعنا النهاردة اللي حنتكلم عنه هو (جاستن ترودو Justin Trudeau) .. اللي إنت بمجرد ما تشوف صورته حتعرفه علي طول إنه رئيس الوزراء بتاع كندا .. الحقيقة إن الFacebook و Social Media مليان بوستات عنه .. كلنا قلنا Wow إيه ده ايه الجمال ده! .. بنات كتير شافت صوره و كتبت أحلي رئيس وزراء ده ولا ايه! .. بصي لصورته هو و مراته و حتلاقي نفسك بتقولي جتنا نيلة في حظنا الهباب .. بص لصورته و هو عامل فورمة الساحل و إنت حتقول لنفسك ليه يارب خلتني بكرش؟ .. بإختصار (جاستن ترودو) هو الشخص اللي بتحلمي تتخطبي له عشان تعايري صحباتك علي Social Media و (جاستن ترودو) هو الشخص اللي إنت عايز توصله عشان البنات تحبك .. صوره هو و مراته لما تشوفها تحس إن الحب حيولع في الدرة .. ده أنا فاهمه كويس و مقدره .. السؤال دلوقتي .. (جاستن ترودو) مش ممثل ولا مغني .. (جاستن ترودو) شغلته إنه رئيس وزراء فدلوقتي فكك و سيبك خالص من صوره و شكله .. هل الرجل ده عارف يشوف شغله؟ .. ده اللي إحنا حنحاول نتكلم عنه في المقالة دي.
عشان تبدأ تشوف هل أي حاكم في الدنيا سواء في كندا أو في جزر الكناري شايف شغله ولا لا بتحاول تسأل نفسك 3 أسئلة:
- هل الوضع السياسي في البلد مستقر؟ يعني هل الناس كلها بتحب بعضها حتي لو بينها إختلاف في وجهات النظر ولا البلد فيها حالة إستقطاب سياسي مخليه الناس يا تشتم بعض يا ترفع السلاح علي بعض؟
- هل الوضع الإقتصادي في البلد مستقر ولا إنت مش عارف تدورها زي ما بنقول؟
- أخيراً و ليس أخراً لو إنت شخص سياسياً كفء و إقتصادياً إيدك تتلف في حرير فهل إنت شخص نظيف مفيش عليك شبهة إختلاس أو فساد أو تربح من منصبك؟ .. هل إنت مثلاً ليك فضايح جنسية ولا إنت شخص أنظف من القطنة البيضا و هي لسه جوه الكيس؟
خلينا نبدأ بالسؤال الأول: هو إيه أخبار الوضع السياسي لكندا؟
خليني أشبهلك الوضع في أميركا الشمالية عموماً بإن تخيل أميركا هي نادي الزمالك .. بلد ماسكها رجل لسانه طويل اللي هو (دونالد ترامب) اللي في التشبيه بتاعنا هو (مرتضي منصور) مش عارف يدير حاجة و مش عارف يحقق أي نجاح أو إنجاز و لو حد سأله إيه سبب الفشل ده؟ فهو بيعلق الفشل علي أي شماعة إلا نفسه .. علي الناحية الثانية كندا تقدر تشبهها بإنها النادي الأهلي .. ماسكها رجل محترم اللي هو (جاستن ترودو) اللي في تشبيهنا هو (محمود الخطيب) .. رجل محترم مؤدب الناس كلها بتحبه .. (جاستن ترودو) عنده 45 سنة .. لسه صغير نسبياً .. شكله أمور زي ما إنت شايف .. عارف يوظف الSocial Media كويس .. مجرد تبصله تحس إنك مرتاحله .. سياسياً هو رافع يافطة كندا المتسامحة المفتوحة المتقدمة اللي بترحب باللاجئين و بإتفاقيات التجارة الحرة و الأهم إنها بتملك إقتصاد بيحقق أكبر معدل نمو ضمن الدول السبع الإقتصادية الكبري .. دي نفس المجموعة اللي بتضم الصين و روسيا و أميركا و ألمانيا .. فإنت لو مكان (جاستن ترودو) من حقك تبص لنفسك في المراية و تقول أنا جامد طحن .. ده الوضع من بره .. ده اللي حضرتك شايفه و إنت قاعد في مصر بتسلي نفسك بإنك ماسك Smartphone بتاعك لحد ما تروح شغلك الصبح بتحلم باليوم اللي تركب فيه الطيارة و تهج من البلد .. جوه كندا الوضع مختلف شوية.
(جاستن ترودو) بقاله في الحكم سنتين و خلال السنتين دول بناء علي إستطلاع رأي عملته Canadian Broadcasting Corp فنسبة التأييد الشعبي له وصلت 37.9% .. السنة اللي فاتت كانت النسبة 50% .. إنت متخيل الفرق ده في سنة واحدة؟ .. متتخيلش إن الرقم ده وحش في كندا علي فكرة .. مش معني إن 37.9% بس من الشعب الكندي شايف إن (جاستن ترودو) شايف شغله إن الإنتخابات الجاية يبقي هو كده ماشي ماشي .. لا خالص .. كندا نظامها السياسي إن بيتناوب علي السلطة فيها 3 أحزاب فنسبة 37.9% لو قسمت الشعب الكندي كله علي 3 فإنت بتتكلم عن نسبة محترمة .. سبب أساسي في الإنهيار ده في شعبية (جاستن ترودو) له علاقة بإن الرجل بني حملته الإنتخابية علي إنه حيشتغل علي مجموعة إصلاحات سياسية كلها متحققتش .. كان ناوي يعمل إصلاحات كبيرة في قانون الضرائب عشان يزود الضرائب المستحقة علي الأغنياء و ده محصلش .. كان ناوي يعمل إصلاح شامل في قانون الإنتخابات و برده ده محصلش .. بس الإنهيار الرهيب في شعبيته ده له علاقة بالسؤال الثاني و هو أداء (جاستن ترودو) الإقتصادي.
فيه شوية معلومات عامة لازم تكون عارفها عن كندا قبل ما نتكلم بالتفصيل عن أداء حكومة (جاستن ترودو) الإقتصادي:
- كندا معرفش إنت عارف ولا لا دولة فيدرالية زيها زي أميركا و ألمانيا .. يعني دولة كل ولاية ليها قوانينها و نظامها و طريقة حكمها و إقتصادها المستقل و كمان قضاءها المستقل.
- كندا دولة مقسومة نصين: نص شرقي بيتكلم إنجليزي و نص غربي بيتكلم فرنساوي .. النص الفرنساوي شايف إن النص الإنجليزي هو اللي ممشي الحكومة و هو اللي بيتحكم في كل حاجة .. حاجة كده زي الصعايده في مصر شايفين إن الوجه البحري هو اللي بيشكل الحكومة و هو اللي بيتحكم في كل حاجة و عمال بس يستنفذ موارد الصعيد .. النص الفرنساوي بينه و بين النص الإنجليزي إختلافات كتير في كل حاجة مش بس اللغة .. بينهم إختلافات كبيرة حول رأيهم في برنامج التأمين الصحي و حماية البيئة و قانون الإنتخاب و تقنين الماريجوانا.
- ناس كتير برده متعرفش إن كندا هي المملكة العربية السعودية بتاعة أميركا الشمالية .. ده حقيقي .. إقتصاد كندا بيعتمد بشكل كبير علي البترول و البترول حزر فزر موجود فين؟ .. في النص الفرنساوي من كندا .. كندا كانت بتجيب فلوسها بإنها بتصدر البترول اللي بيطلع من النص الفرنساوي منها لدول كتير أهمها أميركا اللي بفكرك إن اللي بيحكمها دلوقتي النسخة الأمريكاني من (مرتضي منصور) .. الأساس اللي التجارة بين كندا و أميركا معتمدة عليه هو إتفاقية إسمها NAFTA و دي إختصار North American Free Trade Agreement و المشكلة إن (ترامب) عايز يلغي NAFTA و يكتبها من أول و جديد و ده لو حصل فحيبقي ضربة شديدة للإقتصاد الكندي.
كل الإحصائيات و التوقعات بتقول إن الإقتصاد الكندي بيتوسع بنسبة 4.5% و دي نسبة محترمة بس اللي أهم من نسبة التوسع هو نسبة النمو و اللي الحقيقة أكتر المتفائلين بيقولوا إن خلال السبع سنين الجايين الإقتصاد الكندي أخره إنه ينمو بمعدل 2% بس و هي دي المشكلة و ده السبب في إنخفاض شعبية (جاستن ترودو) .. بص علي ولاية زي ألبيرتا Alberta الكندية .. دي ولاية بتقع في النص الفرنساوي من كندا اللي خلينا نشبههم بإنهم صعايده كندا .. دي أغني ولاية كندية بلا منازع و السبب في كده إن الناس هناك بتاخد أعلي مرتبات و بتدفع أقل نسبة ضرائب و ده مخلي الولاية دي تشيل الإقتصاد الكندي علي كتافها .. الكلام ده فضل لحد سنة 2014 اللي إنهار فيها سعر بيع برميل النفط .. فجأة شركات البترول الكندية لقت نفسها مضطرة تمشي ناس و ده خلي الناس اللي في الولاية فعلاً عايشين علي أعصابهم .. فجأة لقوا واحد زي (جاستن ترودو) مرشح نفسه في الإنتخابات و باني حملته الإنتخابية علي فكرة Carbon Price Proposal إنه يدي إعفاءات ضريبية للشركات اللي مش بتلوث البيئة و رفضه التام لفكرة بناء أي خطوط أنابيب لنقل البترول و الغاز الطبيعي جوه كندا .. طبيعي إن ولاية زي ألبيرتا عايشه علي البترول تبص ل(جاستن ترود) و تعتبره بني أدم مبيفهمش و بيحاربهم في أكل عيشهم.
(جاستن ترودو) حاول يصلح الصورة دي بإنه يقول للناس إنه مش ضد العمال اللي شغالين في قطاع البترول بالعكس هو جاي يخدم الطبقة المتوسطة و ده عن طريق الأتي:
- إنه عمل قانون ضرائب جديد بداية من سنة 2016 بحيث إن لو إنت مواطن كندي مرتبك السنوي ما بين 35,000 و 70,000 دولار فإحنا حنقلل الضرائب المستحقة عليك بس لو إنت دخلك السنوي أعلي من 157,000 دولار فاحنا حنزود الضرائب المستحقة عليك.
- زود قيمة المساعدات المالية اللي الحكومة بتديها للناس العاطلين خصوصاً في الولايات المعتمدة علي قطاع النفط.
- الرجل ده عمل صندوق زي صندوق تحيا مصر كده بس سماه Canada Child Benefit هدفه إن لو انتوا إتنين متجوزين عندكوا طفل فالحكومة حتديكوا 417 دولار شهرياً لكل طفل .. الصندوق ده لوحده أكل 14% من إجمالي الميزانية العامة الكندية.
السؤال دلوقتي .. مين حيدفع ثمن كل ده؟ .. كندا دولة زيها زي غيرها عندها عجز في الموازنة و ده طبيعي و مفهوم و علي فكرة العجز بتاعهم مش كبير بس لما تلاقي إن بناء علي إستطلاع رأي عمله Nano Research Poll قال إن 40% من الشعب الكندي شايف إن الأولوية اللي المفروض (جاستن ترودو) يركز عليها هي خفض العجز في الموازنة في حين إن أقل من 20% بس شايفين إن الأولوية فعلاً هو اللي بيعمله (جاستن ترودو) إنه يصرف مليارات علي برامج الرعاية المجتمعية و ده فعلاً اللي بدأ (جاستن ترودو) يعمله .. في شهر أكتوبر 2017 الحكومة أعلنت إن ميزانيتها الجايه حتتقسم جزئين: تلت أرباع الموازنة حتروح في خطوات هدفها تقليل العجز في الموازنة و الربع اللي فاضل حيروح في برامج إجتماعية زي الإعانات اللي بتروح للعاطلين .. بدأت تلاحظ إنه يمشي في سكة يلاقي الناس مش راضيه يقوم لافف و راجع تاني؟ .. يمشي في سكة تانية شوية ناس تعترض يقوم لافف و راجع تاني.
أما بقي للسؤال الثالث: هو إيه أخبار الفضايح في كندا؟
في الوقت اللي أميركا كل يوم بتقوم تصحي علي مفاجأة إن حد مشهور سواء كان سياسي أو ممثل أو مقدم برامج الناس كلها بتحبه و بتتفرج عليه و لسنين بني Career محترمة فجأة نقوم نعرف إنه متحرش و مغتصب و إنه بني أدم سوري في الكلمة وسخ .. بس في كندا الحقيقة الوضع هادي من الناحية اللي تحت الحزام .. حكومة (جاستن ترودو) مفيهاش فضايح جنسية من النوع اللي كنا دايماً بنشوفه مع الحكام اللي شكلهم حلو زي (بيل كلينتون Bill Clinton) بس الحقيقة إن الفضايح في حكومة (جاستن ترودو) مالية أكثر:
- وزير المالية بتاعه (بيل مورنو Bill Morneau) الناس كلها زعلانه منه هناك عشان بالصدفة إكتشفوا إنه بيملك حصة كبيرة من أسهم شركة عيلته في البورصة عن طريق شركة وهمية Shell Company .. يعني الأسهم مش بإسمه إنما بإسم شركة محدش عارف هي شغاله في إيه بس الشركة دي مملوكة له .. علي فكرة ده في حد ذاته مش جريمة و الحقيقة إن الرجل قال إنه خلاص باع الأسهم بتاعته بس الكنديين زيهم زي الأمريكان عندهم حساسية أوي تجاه الجرائم المالية و الجنسية .. إنت ممكن تبقي وزير هناك و فجأة يتعرف إنك عنصري ضد السمر أو إنك مدمن كحول أو أي حاجة و بتعدي بس لو إتعرف إنك بتختلس أو إنك بتخون مراتك مع عشيقة فإنت فضيحتك حتبقي بجلاجل و حتاخد علقة في الإعلام لحد ما يطلعلك صحاب .. (جاستن ترودو) ملوش علاقة بالموضوع بس قدام الناس هو اللي جاب (بيل مورنو) و بالتالي إنت حتلبس إذا كان هو فعلاً حرامي.
- أكبر ممول للحملة الإنتخابية بتاعة (جاستن ترودو) هو رجل معاه فلوس إسمه (ستيفن برونفمان Stephen Bronfman) فجأة إسمه إتقال في التسريبات الصحفية اللي إسمها Panama Papers اللي بتفضح رجال الأعمال و السياسيين اللي بيغسلوا أموالهم في بنوك حول العالم .. المشكلة بدأت تكبر لما إتعرف إن (جاستن ترودو) قضي مرة أجازة كريسماس هو و عيلته في منتجع في جزيره أجا خان Aga Khan المملوك ل(ستيفن برونفمان) .. تاني برده ممكن (جاستن ترودو) بريء و ملوش ذنب و معملش حاجة غلط بس مجرد إن إسمك يتقال في نفس الجملة مع واحد زي (ستيفن برونفمان) ممكن يضرك.
خلاصة الكلام .. كندا دولة زي ما بنقول كده من براه هاللله هالله و من جوه يعلم الله .. بلد فيها مشاكل إقتصادية كتير و ده مفهوم و منطقي بس علي الأقل ماسكهم واحد دماغه مش ناشفه و مرن و بيغير رأيه بسهولة و الأهم إنه نظيف و ده في حد ذاته بيديك أمل.
المصدر:
مقالة بعنوان The Justin Trudeau Lovefest Gets a Reality Check نشرت في Website إسمه Bloomberg و ده لينك المقالة الأصلية:
https://www.bloomberg.com/news/articles/2017-11-21/the-justin-trudeau-lovefest-gets-a-reality-check
