سياسة الطفل الواحد في الصين .. لما المؤسسة العسكرية تخزوق جيل كامل.

لينك التسجيل الصوتي علي ساوند كلاود:
https://on.soundcloud.com/XmsJH

اللي أنا عايز أتكلم عنه النهاردة ويمكن باين أوي من العنوان هو سياسة الطفل الواحد في الصين .. صحيح إن الحزب الشيوعي الحاكم في الصين قرر وقف تطبيق السياسة دي سنة 2015 بس يمكن عشان أنا من الجيل اللي لحق برنامج تنظيم الأسرة بتاع ماما (سوزان مبارك) الله يمسيها بالخير والإعلانات اللي كانت بتنزل في القناة الأولي والتانية عن وسائل منع الحمل فأنا فاكر كويس أوي الخناقة اللي كنا بنسمعها في كل حتة في مصر .. الخناقة بمنتهي البساطة إن فيه ناس بتقول إن فكرة تنظيم الأسرة دي أصلاً حرام شرعاً لإن كل عيل بيجي برزقه قصاد ناس بتقول ما تشوفوا الصين بتعمل إيه ما هي أجبرت شعبها إن أي إتنين متجوزين ميخلفوش أكتر من عيل واحد وإتفرج علي النطة الإقتصادية اللي حققتها البلد .. وبعدين هو يعني الرئيس يأكلكوا منين .. علي فكرة الConcept بتاع أجيب منين ده مستخدم عندنا من زمان بس أنتوا اللي بتنسوا بس ما علينا مش موضوعنا دلوقتي .. اللي أنا عايز أتكلم عنه النهاردة هو الإجابة عن السؤال يا تري يا هل تري سياسة الطفل الواحد في الصين دي جابت نتيجة؟ .. يعني هل المواطن الصيني بعد ما السياسة دي اتطبقت بقي عايش في نغنغة ونعيم والفلوس مغرقاه؟ .. الحقيقة إن في رأيي الشخصي واللي ححاول أثبته ليك في المقالة دي إن السياسة دي (سوري في الكلمة يعني) فشخت المجتمع الصيني .. أيا كانت المبررات الإقتصادية اللي اتحطت عشان السياسة دي تتطبق بس لما ألاقي إن بعد تطبيقها ب30 سنة بقي عدد الرجاله في الصين أكتر من عدد الستات ب35 مليون يبقي أكيد أنتوا خربتوا الدنيا .. لما أمشي في مدن الصين وألاقي إن في حتت كتير عدد الولاد ضعف عدد البنات بسبب السياسة دي يبقي أكيد فيه حاجة غلط.

عشان مبقاش مفتري وجاي علي الإخوة في الحزب الشيوعي الصيني فخليني أبدأ معاك بإني أشرحلك وجهة نظرهم .. ليه سياسة الطفل الواحد دي اتطبقت من الأساس؟ .. الفكرة بمنتهي البساطة إن الزيادة السكانية بدأت تخرج بره سيطرة الحكومة خصوصاً في الستينات والسبعينات .. عدد الناس عمال يزيد وده بيخلي إن مستوي المعيشة عمال يقل .. الحل إنك تبدأ تخلي عدد السكان يقل وبالتالي الفلوس اللي في إيد أي إتنين متجوزين حتزيد وده حيسمع في مستوي المعيشة بتاعهم .. إسأل أي إتنين متجوزين ومخلفين عيلين كان ممكن يوفروا كام لو بس عرفوا يخلوا العيلين يلبسوا نفس البامبرز وبدل ما كانوا بيجيبوا علبتين بامبرز كانوا جابوا علبة واحدة .. فلوس البامبرز دي لوحدها ممكن تخلي الرجل يتجوز تاني علي مراته أصلاً .. لحد كده أنا أقدر أفهم الفكرة وأقدر استوعب المنطق .. المصيبة هي في الجهة اللي بقي في إيدها ملف تنظيم الأسرة في الصين .. لو أنا بحكم بلد وإتحط قدامي إني أختار الجهة اللي المفروض إنها تحط استراتيجيه تحديد النسل وتنظيم الأسرة فغالباً دماغي حتروح لوزارة الصحة لإن دي حاجة أولاً وأخيراً مرتبطة بصحة الأم وكلمة صحة جري العرف يعني إنها ترتبط بالدكاتره زي ما إنت كده مينفعش تاكل الكشري من غير ما يبقي معاه كبدة إسكندراني ولو إنت قاهري بتاكل الكشري سادة فأنا معرفش إنت عايش كده إزاي .. المشكلة إن الملف ده في الصين إتحط في إيد القوات المسلحة .. أيوه .. ملف تنظيم الأسرة إترمي قدام الهيئة الهندسية بتاعتهم .. صحة المرأة ملهاش علاقة لا من أول ولا من بعيد بالهندسة سواء بقي كنت مهندس عسكري ولا مدني .. إنت ممكن تبقي مهندس معاك خبرة عشرين سنة بس لو جيت سألتك تعرف إيه عن الدورة الشهرية للمرأة حلاقيك زي التور التايه في برسيمه وعمال تهبد .. أهو الهبد ده هو اللي خرب الدنيا .. وخليني هنا أمسك شوية هبدات عملتها المؤسسة العسكرية الصينية لما جت تطبق سياسة الطفل الواحد وهي كانت السبب في المصيبة اللي فيها الصين دلوقتي:

أول هبداية هي إن مكنش فيه خطوات واضحة وثابتة بتطبق بحذافيرها إنما الموضوع اتساب عايم للمحليات تطبقه زي ما هي شايفه:

مكنش فيه إجماع في الصين علي هي السياسة دي حتطبق إزاي .. فيه مناطق قالت مفيش عيل تاني ييجي مهما حصل وفيه مناطق تانية شافت إن لازم يبقي فيه استثناءات زي مثلاً إن بقي مسموح لأي إتنين متجوزين يخلفوا عيل تاني لو كان العيل الأولاني بنت .. بس الثابت في الموضوع إن المؤسسة العسكرية استخدمت الدعاية والإعلانات بشكل مكثف .. طول ما إنت ماشي بتشوف إعلانات بتقولك خلف عيل واحد خلف عيل واحد خلف عيل واحد .. نقطة كمان وهي إن المؤسسة العسكرية عشان تراقب تطبيق السياسة دي استخدموا نفس الإسلوب اللي أي وحدة عسكرية بتستخدمه .. خلي الصول اللي ماسك الوحدة يبلغ عن أي عسكري مش بينفذ الأوامر .. إتعين ملايين الموظفين اللي شغلتهم كانت إنهم يفضلوا يراقبوا أي إتنين متجوزين .. لو إنتي مثلاً واحدة شغالة في مصنع وكنتي متجوزة ومعروف في الشغل إنك متجوزة ففي واحدة في المصنع شغلتها إنها تراقبك .. تشوف مواعيد دورتك الشهرية منتظمة ولا لا عشان منها تحدد هل إنتي حامل ولا لا .. لو حصل وخلفتي طفلك الأول فساعتها العين بتبقي عليكي أوي عشان لو حصل وبقيتي حامل  تاني .. يمكن أنا أول واحد يعترف بإنه مبيعرفش يفهم دماغ الستات بس في نفس الوقت أنا ممكن أراهنك علي الخمسين جنيه اللي في جيبي إن مفيش واحدة ست عندها استعداد تتسأل علي مواعيد دورتها الشهرية من رئيستها في الشغل .. قد أكون غلطان بس معتقدش.

تاني هبداية وهي إن العقوبات الغير منطقية علي أي إتنين متجوزين يكسروا سياسة الطفل الواحد ردت في صدر المجتمع الصيني قتلته:

يمكن لإن المؤسسة العسكرية طبيعة شغلها هي حاضر ونعم من غير مناقشة ودي حاجة زي الفل لو إنت جوه وحدة عسكرية بس المجتمعات أعقد شوية من كده .. عشان المؤسسة العسكرية تخوف الناس من إنهم يفكروا ميمشوش علي سياسة الطفل الواحد فأي إتنين متجوزين يكسروا السياسة دي بيتعاقبوا بإنهم يدفعوا غرامات بتوصل لأضعاف مرتب الزوج والزوجة في السنة .. شوية والمحليات بدأت تستقصد الناس لإنها بقت بتعتمد علي فلوس الغرامات دي كمصدر دخل ليها .. ده سمّع مع الناس إن بقي فيه مواطنين صينيين بيسموا طلفهم الثاني باسم المبلغ اللي هم دفعوه كغرامة .. يعني مثلاً لو خلفوا طفل سموه (أحمد) مثلاً بيسموه في شهادة الميلاد (أحمد عشرين ألف) لإنهم دافعين فيه 20,000 يوان غرامة وعشان الناس كلها تعرف إزاي أبوه وأمه طلع عينهم عشان يربوه .. إنت متخيل حجم المأساة اللي طفل زي ده بيعيشها بسبب اسمه .. نقطة كمان وهي إن المجتمع الصيني زيه زي المجتمعات الشرقية كلها بتحب خلفة الولاد عن خلفة البنات .. يمكن السبب يكون إقتصادي إنك لما بتخلف ولد فإنت كأنك بتحط فلوسك في استثمار لإن الشحط ده لما يكبر إن شاء الله يبقي عنده دم ولما يتجوز مينساش أبوه وأمه ويخلي باله منهم من ناحية الفلوس لكن البنت أخرها حتتجوز وتقعد في البيت وجوزها اللي حيصرف عليها ومفيش رجل حيصرف علي بيته وكمان يصرف علي حماه وحماته .. عشان كده لما المتجوزين في الصين إتطبقت عليهم سياسة الطفل الواحد فكتير منهم بقي بيعمل المستحيل عشان يضمن إن الطفل اللي حيبقي حيلتهم يطلع ولد .. من ضمن الحاجات اللي بتتعمل إن بمجرد ما الأب و الأم يعرفوا جنس الجنين ويلاقوا إنه بنت الزوجة بتعمل عملية إجهاض عشان تخلص منها .. كتير منهم بعد الخلفة لما بيلاقوا إن المولود بنت بيرموها في أي ملجأ ويتبروا منها .. طب ده لو كان قرار الزوج والزوجة .. ممكن المحليات نفسها هي اللي تتدخل .. لو مراتك حملت في طفلكوا الثاني فممكن المحليات تُجبر مراتك إنها تعمل عملية إجهاض وممكن لما الطفل يتولد وإنت معاكش فلوس الغرامة يتاخد منك ويتباع لأي ملجأ .. بإختصار شديد دي سياسة حطها ناس ميعرفوش ربنا ومعندهمش أي رحمة ولا إنسانية وعشان كده جري الشريط لحد وقتنا ده وحتلاقي إن المجتمع الصيني من غير مبالغة إتخزوق أحلي خازوق في حياته.

المؤسسة العسكرية الصينية لما بدأت تشتغل علي سياسة الطفل الواحد قعدوا وقت طويل يفكروا إزاي يطبقوا السياسة دي بالإجبار علي الناس بس محدش فيهم سأل نفسه هو يا تري السياسة دي حتفرقع في وشنا في المستقبل؟ .. سياسة الطفل الواحد دي ليها أثار مسمعة في المجتمع الصيني ولسه حتسمع فيه في المستقبل وخليني عشان مخليش الدنيا توسع مني أحطلك الأثار دي في شوية نقط:

• من ضمن النتايج التافهة اللي يمكن متكونش مهمة أوي إن فيه جيل كامل في الصين من الأطفال اللي ملهمش أخوات .. ده معناه إن كتير منهم إتربوا متدلعين شوية ولإن (حزلقوم) الصغير مفيش غيره فكل طلباته مُجابه .. من ضمن نتايج ده كمان إن كتير من الأطفال دول بيعانوا من سمنة مفرطة وهم لسه صغيرين لإن الأب والأم موراهمش لا شغلة ولا مشغلة إلا العفريت الصغير أكل إيه النهاردة .. زي ما قلتلك دي نتيجة تافهة ممكن نضحك عليها ونطلع عليها كوميكس .. لو عايز النكد بقي خليك معايا في النقطة الجايه.
• فاكر لما قلتلك إن لو زوج وزوجة خلفوا طفل تاني فممكن المحليات تجبرهم إنهم يدفعوا غرامة بتتقدر بأضعاف مرتبهم هم الإتنين في السنة .. طيب لنفترض إن الإتنين معهمش فلوس ساعتها المحليات بتاخد الطفل تبيعه لأي دار أيتام .. طب لو الأب والأم عملوا فيها (ليام نيسون Liam Neeson) في فيلم Taken وهربوا الطفل عشان المحليات متلاقيهوش .. ساعتها الطفل ده حيتولد من غير شهادة ميلاد ومن غير بطاقة رقم قومي .. لا حينفع يخش مدرسة ولا حينفع يشتغل ولا حينفع يتجوز .. فيه 6.5 مليون بني أدم في الصين إتحطوا في خانة اليك دي .. لو إنت متخيل إنك يا عيني الدنيا دايسة علي وشك وحاسس بإكتئاب فتخيل إحساس أي واحد منهم .. أبسط حاجة يكون بيفكر فيها هو ليه أبويا وأمي خلفوني أصلاً طالما مكنش معاهم فلوس الغرامة وليه مسابونيش أترمي في أي ملجأ علي الأقل حيبقي ليا اسم وبطاقة وحعرف أعيش .. علي فكرة النكد لسه مخلصش.
• بس يمكن أهم نتيجة من نتايج سياسة الطفل الواحد في الصين هي الفجوة الفشيخة بين أعداد البنات والولاد .. حالياً في الصين الفرق وصل 34 مليون .. فكر فيها .. الصين حالياً فيها 34 مليون شاب سنجل مش حيتجوزوا .. مش لإنهم مش لاقيين بنت الحلال .. لإن مفيش أصلاً بنت حلال .. شوف أنا ممكن أفضل أسف علي النقطة دي وأقولك إن بسبب ده فيه شباب في الصين فتحوا سناتر بتدي كورسات في إزاي الولاد ممكن يجذبوا البنات ويعلموهم إزاي يلبسوا حلو وإزاي كمان يتعلموا شوية ألعاب سحرية عشان قال يعني البنت تنبهر به لما تقابله .. وممكن أقولك إن الفجوة الرهيبة بين أعداد البنات والولاد خلقت سوق جديد وهو سوق البنات اللعبة اللي هي زي العروسه اللي أي بنت صغيرة بتلعب بيها بس حجمها كبير عشان إنت تلعب بيها وأرجوك متخلينيش أشرح أكتر من كده عشان أفهمك يعني إيه شاب يلعب بعروسة بنت .. بس يمكن النكد فعلاً إن الفرق ده فتح الباب كمان لسوق تهريب البنات .. عارف فيلم Taken .. ده بيتعمل بحق وحقيقي في الصين .. بناء علي تقارير صحفية فيه 21,000 بنت مسلمة من الروهينجا في ميانمار إتخطفوا وإتباعوا كزوجات في ولاية واحدة بس في الصين .. الوضع إجتماعياً فعلاً صعب بس اللي أصعب منه هو الوضع الإقتصادي.

خليك فاكر إن لما إتطبقت سياسة الطفل الواحد في الصين إتقال إن السياسة دي مش عشان الحزب الشيوعي .. لا خالص .. دي عشانكوا أنتوا .. عشان الفلوس تجري في إيديكوا وتعيشوا وتتنغنغوا .. بس اللي أنا حابب أقوله ليك إن بعد كل الفشخ اللي إتعرضله المجتمع الصيني وبعد ما صحيوا الصبح لقوا إن 34 مليون شاب حيقضوا حياتهم فرجة علي الأفلام الثقافية من عند برايز فالوضع الإقتصادي للجيل الحالي في الصين أسّود من الليلة السودا .. معدل أعمار المجتمع الصيني عمال يزيد ومحدش عارف يفرمل اللي بيحصل .. لما حتيجي سنة 2025 إن شاء الله واحد من كل خمس مواطنين صينيين حيعدي سن الستين سنة .. سنة 2050 حتلاقي إن 30% من إجمالي تعداد سكان الصين عدي الستين سنة .. طب ده معناه إيه؟ .. معناه إن الصين دلوقتي عندها مصيبة بتتسمي 4-2-1 ودي مش تشكيلة فرقة كورة .. معني 4-2-1 إن خلال السنين الجايه لو إنت شاب عايش في الصين وبتشتغل فإنت المفروض تصرف علي نفسك وتصرف علي أبوك وأمك اللي طلعوا معاش وتصرف علي جدودك ربنا يديهم الصحة .. يعني مش بس إنت مش حتلاقي عروسة لا كمان مُطالب تصرف علي 6 عواجيز.

أنا بس حابب أختم بإحصائية قلبتلي دماغي بتقول إن خلال الفترة من 2012 لحد 2017 فيه 25 مليون بني أدم طلعوا معاش في الصين وده رقم بيعادل القوة العاملة لبلد زي أستراليا .. اه معاك إن سنة 2015 الحكومة الصينية قررت إنها تلغي العمل بسياسة الطفل الواحد بس هم ملغوهاش وفتحوها علي البحري .. هم لغوها وحلوا محلها سياسة جديدة وهي سياسة الطفلين .. وتبقي المشكلة إن الوضع دلوقتي في الصين إن لو إنت بقدرة قادر لقيت بنت الحلال وخلفتوا عيل واحد فإنت بتشتغل وهي بتشتغل وأنتوا الإتنين مش مستحملين تجيبوا عيل تاني .. معدل الإنجاب في الصين وصل لأقل مستوياته في تاريخ الصين ومش حيعلي تاني قريب .. تدري ليش؟ .. لإن الحكومة الصينية لسه مش فاهمه إن البشر مش عساكر في الجيش .. إنك تقول لست خلفي أو متخلفيش مش زي إنك تقول لعسكري روح هاتلي حاجة من الكانتين ويقولك تمام يافندم .. زمان كانت الصين بتتريق علي اليابان وبتقول عليهم بلد العواجيز بس الدنيا لفت لفت والصين حتلاقي نفسها هي اللي بلد العواجيز.

المصدر:

• حلقة من برنامج Last Week Tonight with John Oliver وده لينك الحلقة علي YouTube لو حبيت تتفرج عليها:
  http://ww.youtube.com/watch?v=SE_ccFHjL_w