لينك التسجيل الصوتي علي ساوند كلاود:
https://on.soundcloud.com/oyUdC4V3ZwZ21nnwd0
قصة النهاردة اللي حنحكيها بتبدأ بمشهد تحسه طالع من سلسلة جيمس بوند لياخت فخم عايم قدام ساحل جزيرة سردينيا في البحر المتوسط وفي الياخت ده اتعملت قعدة بين اتنين منهم بطل القصة بتاعتنا اللي هو يبقي الشيخ (طحنون بن زايد أل ناهيان) وده يبقي مستشار الأمن القومي لحكومة الإمارات العربية المتحدة زائد وظيفته الثانية وهي إنه المسئول عن صندق الثروة السيادية الإماراتي اللي قيمته 1.5 ترليون دولار .. اللي بيخلي مشهد القعدة فعلاً ينفع كحتة من فيلم لجيمس بوند إن الشيخ (طحنون) اللي عنده 56 سنة بالمناسبة عنده مشكلة في عنيه بتخليه دايماً لابس نظارة شمس حتي لو قاعد في أوضة منورة بلمض كهرباء وطبعاً شفاه الله وعافاه بس مش عارف ليه بيفكرني بشخصية (لو شيفر) في فيلم Casino Royal .. الطرف الثاني في القعدة كان (ستيف ويتكوف Steve Witkoff) وده يبقي مبعوث الرئيس الأمريكي (دونالد ترامب) للشرق الأوسط وده رجل علاقته بالإمارات زي علاقتك بصاحبتك اللي عارفه إنك متجوز ورغم كده ماشيه معاك عادي وحكلمك عن هي العلاقة التوكسيك دي بدأت ازاي .. التارجيت بتاع القعدة دي إن الاتنين يخلصوا تفاصيل صفقتين مش حبالغ لو قلتلك إنهم حيرسموا ملامح مستقبل الأمن القومي الإماراتي .. الصفقة الأولانية متعلقة بإن الإمارات حتضخ فلوس كتير كاستثمارات في شركة شغالة في بيزنس الكريبتو Crypto اللي هي العملات الأليكترونية الجديدة و الشركة دي متستغربش لو قلتلك إن اللي أسسها يبقي (ستيف ويتكوف) شخصياً ومشارك فيها عيلة (ترامب) اللي هو من كتر ما الموضوع ريحة الفساد فيه فايحه لو القعدة دي اتعملها موسيقي تصويرية حتبقي موسيقي فيلم الأب الروحي Godfather .. الصفقة الثانية ودي المهمة هي إن الإمارات حتستلم من أمريكا شرايح كومبيوتر بتشتغل بتكنولوجيا الذكاء الصناعي أوAI .. طبعاً هي ريحة الفساد فايحة لدرجة إن حتي لو مفيش دليل مادي علي إن الصفقة الأولانية هي رشوة ل(ترامب) عشان يوافق علي الصفقة الثانية فاحنا مش محتاجين نبقي المفتش كورومبو.
في مايو 2025 اتعمل مؤتمر صحفي في مدينة دبي أعلن فيه (زاك ويتكوف) اللي يبقي ابن (ستيف ويتكوف) تفاصيل الصفقة الأولانية .. اللي حيحصل إن واحدة من شركات صندوق الثروة السيادية الإماراتي حتضخ 2 مليار دولار في شركة اسمها ورلد ليبرتي فاينانشال World Liberty Financial ودي شركة لسه ناشئة بينقال عليها في البيزنس ستارت اب Startup وحتكون شغاله في بيزنس عملات الكريبتو Cryptocurrency وزي ما قلتلك فالشركة أسسها (ستيف ويتكوف) وداخل معاه شركاء عيلة (ترامب) .. بعدها باسبوعين بالضبط بيطلع قرار من البيت الأبيض بموافقة الحكومة الأمريكية إن الإمارات تستلم شحنات من Computer Chips ودي تقدر تقول عليها شبه البروسيسور بتاع الكومبيوتر بتاعك بحيث إن دي من Chips اللي بتستخدم في تكنولوجيا الذكاء الصناعي AI اللي هي اختصار Artificial Intelligence .. الشرايح دي اللي حيستلمها في الإمارات هي شركة G42 ودي شركة من شركات صندوق الثروة السيادية الإماراتي وتحت سيطرة الشيخ (طحنون) مباشرة.
عشان الصفقة دي تكمل فانت محتاج وسيط بين الشركات الأمريكاني اللي بتصنع Chips دي وبين البيت الأبيض والوسيط ده كان واحد اسمه (ديفيد ساكس David Sacks) .. (ديفيد ساكس) ده بيسموه في البيزنس Venture Capitalist اللي هو نفس الناس اللي انت بتشوفهم في برنامج شارك تانك اللي هو رجل معاه فلوس بيحطها كاستثمارات في شركات عشان ياخد نسبة من أرباحها وهو اغلب استثماراته بيحطها في شركات التكنولوجيا .. لما (ترامب) مسك الرئاسة في فترته الثانية الإدارة بتاعته اخترعت منصب حكومي اسمه مسئول الذكاء الصناعي والكريبتو AI & Crypto Czar وكلمة Czar دي معناها قيصر ودي كلمة الأمريكان بيحبوا يستخدموها للمناصب الحكومية الهلامية اللي هو مثلاً يعني يجيبوا حد يمسكوه تطوير كرة القدم فيسموه قيصر كرة القدم .. دور (ديفيد ساكس) كان إنه يبقي حلقة الوصل بين شركات التكنولوجيا الأمريكاني اللي قرروا في لحظة من الزمن يتجمعوا كلهم ويعملوا مقرات شركاتهم في حتة في ولاية كاليفورنيا اسمها سيليكون فالي Silicon Valley .. طبعاً زي ما انت شايف إن ريحة الشياط فايحه .. إزاي رجل أعمال يمسك منصب حكومي عشان يبقي سمسار صفقة بين شركات أمريكاني وبين حكومة أجنبية .. ده خلي ناس من جوه إدارة (ترامب) تبعت ايميلات إن يا جماعة الخير اللي بيتعمل ده قانوناً مش صح بس كله حط جزمة في بقه لما طلعت مذكرة ممضية من (ترامب) بإن الصفقة زي الفل ومحدش له دعوة.
دلوقتي انا عايز أرجع لبطل القصة بتاعتنا اللي هو الشيخ (طحنون) ويهمني انك تفهم هو الرجل ده مين وبيفكر ازاي و عايز ايه لإن مش طبيعي إنك تبعزقلك 2 مليار دولار رشوة لرئيس أمريكا من غير ما نحاول نفهم دماغك .. مبدأياً الرجل ده أهم حاجة تعرفها عنه هو إنه مهووس بحاجة اسمها مراقبة .. كنا اتكلمنا قبل كده عن برنامج التجسس الإماراتي والفضيحة بتاعته وحزر فزر مين كان ورا المصيبة دي .. شطورة الشيخ (طحنون) .. سنة 2023 لما الشيخ (طحنون) اتحط تحت ايده ملف إدارة صندوق الثروة السيادية هو حط عينه علي فكرة ليه لا نستخدم تكنولوجيا AI في إنك تخلي المخابرات الإماراتية عندها حاجة زي برنامج مراقبة متكامل .. حاجة شبه فيلم Eagle Eye ولو انت مشفتش الفيلم ده انصحك انك تتفرج عليه .. مشكلة الرؤية دي إنك محتاج يبقي عندك Computer Chips معقدة جداً ومبعتلمهاش غير شوية شركات تتعد علي الصوابع أهمهم شركة انفيديا Nvidia الأمريكية ولإن التكنولوجيا دي بنت ستين كلب ممكن تودي في داهية ففيه لوايح داخلية جوه وزارة الخارجية الأمريكية بتقول إن التكنولوجيا دي مينفعش تتصدر لدول معينة في الشرق الأوسط.
الشيخ (طحنون) حاول يتكلم مع إدارة الرئيس (جو بايدن) وجاب وزيرة التجارة الأمريكية (جينا رايموندو) في قعدة برده علي الياخت بتاعه وبرده ركنه علي ساحل سردينيا عشان يقولها طب ما تدونا الشرايح وخدوا اللي انتوا اللي عايزينه وعايز أقولك إن شركة Nvidia وقتها كانت متسربعه إن الصفقة تخلص لإن حيطلع ليها سبوبه حلوة بس الصفقة باظت بسبب زن الناس بتاعة المخابرات والأمن القومي جوه الفريق بتاع جدو (بايدن) والناس دي منطقها إن يا جدعان ازاي ندي الإمارات أحدث تكنولوجيا في تصنيع Computer Chips بتشتغل بAI وهم لسه عاملين مناورة عسكرية مع الصين وشركة G42 الإماراتية ليها بروتوكول تعاون تكنولوجي مع الصين .. طب أنا ايش ضمني إننا نبعت الشرايح من هنا يقوم الصينين مخترقين السيرفرات بتاعة الإمارات من هنا وهوبا سر الصنعة يبقي في ايد الصين .. اللي قدر الشيخ (طحنون) يطلع بيه إنه ياخد شوية شرايح عاملاها شركة مايكروسوفت Microsoft بس الصفقة اتحطلها قيود كتير متعلقة بهي الإمارات ممكن تعمل ايه بالشرايح دي.
فجأة أبوحنان كسب الإنتخابات وفجأة الدنيا بقت وردي في وش الشيخ (طحنون) والسبب في التفاؤال اللي ملي وشه كان (ستيف ويتكوف) .. (ستيف ويتكوف) يبقي صديق قديم لأبوحنان وشريكه من زمان وزي ما قلتلك هو طول عمره Venture Capitalist وعمره ما مسك منصب حكومي في حياته بس (ترامب) ضمه للفريق بتاعة وفي ديسمبر 2024 وأثناء ما لسه احنا في الفترة الإنتقالية ما بين إدارة جدو (بايدن) وإدارة ابوحنان تلاقي (ستيف ويتكوف) بيعمل أول زيارة رسمية ليه في منصبه الجديد وكانت للإمارات وهنا يمكن جه الوقت إني احكيلك هي علاقة (ستيف وتيكوف) بالإمارات بدأت ازاي .. حصلت مرتين مرة سنة 2013 ومرة سنة 2019 إن صندوق الاستثمار السيادي الإماراتي حط فلوسه كاستثمارات في فندق اسمه Park Lane في مدينة نيويورك بتملكه شركة التطوير العقاري بتاعة (ستيف ويتكوف) .. مش بس كده .. عشان الدنيا انت عارف اوضة وصالة تلاقي إن (ستيف ويتكوف) صاحب واحد اسمه (مارتي إيدلمان Marty Edelman) وده يبقي محامي مكتبه في نيويورك وكان هو سمسار صفقة شراء شركة (ستيف ويتكوف) في فندق Park Lane ودلوقتي هو المستشار القانوني لشركة G42 اللي ماسكها زي ما قلتلك الشيخ (طحنون).
الهدف المعلن من الزيارة الرسمية الأولي ل(ستيف ويتكوف) في منصبه الحكومي الجديد كان إنه يحضر مؤتمر في العاصمة الإماراتية أبوظبي عن Cryptocurrency وهناك وضمن فعاليات المؤتمر قعد مع واحد اسمه (جاستن صان Justin Sun) وده ملياردير اتولد في الصين وحزر فزر بعد القعدة دي ايه اللي حصل .. (جاستن صان) حط من فلوسه 30 مليون دولار كاستثمارات في World Liberty Financial .. ومش بس كده .. ضمن فعاليات المؤتمر برده اتعملت قعدة بين (ستيف ويتكوف) وبين الشيخ (طحنون) وفي القعدة دي الشيخ (طحنون) طلب منه يبقي سمسار الصفقتين اللي بنحكي قصتهم النهاردة.
في مارس 2025 الشيخ (طحنون) سافر العاصمة الأمريكية واشنطن علي أمل إنه يخلص الصفقة بحيث إن القعدات كلها تمت في مكتب المخابرات العامة الإماراتية اللي لاجل الصدف يعني الناحية الثانية من الشارع قصاد مقر وكالة المخابرات المركزية الأمريكية اللي انت عارفها باسم CIA .. في السفرية دي الشيخ (طحنون) قعد مع كل الناس اللي ممكن يبقي ليها يد في صفقة حصول بلده علي Computer Chips اللي عايزاها .. قعد مع وزير التجارة الأمريكي (هوارد لوتنيك Howard Lutnick) .. قعد مع (جيف بيزوس) بتاع شركة أمازون .. قعد مع (ساتيا ناديلا) المدير التنفيذي لشركة مايكروسوفت .. قعد مع (جينسين هوانج Jensen Huang) مؤسس شركة Nvidia .. في الأسبوع اللي الشيخ (طحنون) قعده في واشنطن اتعزم علي العشا في البيت الأبيض وقعد مع (ترامب) والنائب بتاعه (جاي دي فانس) وحضر الحفلة (ستيف ويتكوف) و (مارتي أيدلمان) .. القعدة دي اللي تمت في البيت الأبيض كانت عشان اللي موجودين يحاولوا يوصلوا لحل وسط في مشكلة الصين .. دلوقتي لسه مؤسسة المخابرات الأميريكية موقفها متغيرش .. الإمارات متصاحبه مع الصين واحنا مش ضامنين إن لو الإمارات خدت Computer Chips اللي هي عايزاها إن الصين متاخدش منها سر الصنعة وعلي فكرة فيه ناس مع الرأي ده كان (ترامب) بيثق فيها جداً زي (ديفيد فايث David Feith) اللي كان مهندس السياسة الخارجية الأمريكية تجاه الصين وهو اللي حط استراتيجية حرب التعريفة الجمركية معاها فتقدر تقول إن علاقته بالصين زي علاقتك بطليقتك كده اللي مبهدلاك في المحاكم .. اللي احنا عارفينه إن القعدة دي مخلصتش بنتيجة ترضي حد .. لا الشيخ (طحنون) قدم الضمانات اللي مؤسسة المخابرات الأمريكية عايزاها .. ولا هم قلبهم حن حتي لما اتقالهم ان الإمارات مستعدة تشخلل عشان تعدي.
في أول اسبوع من ابريل 2025 حصل اجتماع مدته نص ساعة بين (ترامب) و واحدة اسمها (لورا لومر Laura Loomer) ودي تبقي ست تقيلة أوي في التيار اليميني المحافظ في أمريكا ومعروف عنها إنها ضمن اللوبي بتاع الإمارات في واشنطن يعني هي بتاخد فلوس من الإمارات في مقابل إنها زي ما تقول تخلصلهم ورقهم في واشنطن .. المهم إن بعد القعدة دي الناس صحيت علي خبر إن (ترامب) رفد 6 أعضاء من مجلس الأمن القومي بتاعه ومن ضمنهم (ديفيد فايث) .. بمجرد ما أصوات المعارضة للصفقة جوه مجلس الأمن القومي اللي حولين (ترامب) ركبوا الزحليقة فالدنيا سلكت وهنا بدأ دور (ديفيد ساكس) بصفته قيصر حتة الذكاء الصناعي .. الرجل ده الحقيقة لما بدأ يخش في الصفقة باعتباره حلقة الوصل بين الإماراتيين وبين الشركات الأمريكية اللي شغالة في بيزنس الذكاء الصناعي بدأ تحوم حوليه سحابة سودا يمكن أسود من السحابة اللي كانت ماشيه فوق دماغ (ستيف ويتكوف) ومهم تفهم ليه .. سنة 2017 (ديفيد ساكس) بدأ اسمه يسمع في السوق لإنه كان من ضمن مؤسسي شركة اسمها Craft Ventures وحزر فزر مين أول ناس استثمرت فلوسها في الشركة دي؟ صندوق استثمارات أبوظبي اللي ماسكه وبيتحكم فيه الشيخ (طحنون) .. بالمناسبة يعني صندوق الاستثمارات العامة السعودي PIF ودي اختصار Public Investment Fund هو كمان كان من ضمن الجهات اللي حطت فلوسها في شركة Craft Ventures ولاجل الصدف برده يعني السعودية هي كمان زيها زي الإمارات عايزة تستلم Computer Chips من اللي بتشتغل بالذكاء الصناعي .. مش كده وبس .. (ديفيد ساكس) من ضمن المستثمرين في شركة تايوان لتصنيع أشباه الموصلات Taiwan Semiconductors Manufacturing Co. واللي يمكن انت عارفها باسم TSMC ودي الشركة اللي بتصنع Computer Chips بتاعة شركة Nvidia وهي كمان اللي بتصنع Computer Chips بتاعة شركات تانية برده شغالة في حتة الذكاء الصناعي زي Amazon و Meta اللي كان زمان اسمها Facebook.
واضح إن دخول (ديفيد ساكس) علي الخط مش حينفع .. لو مش فاهم ليه خليني أقولك .. إنت دلوقتي دورك تبقي الجهة الحكومية اللي دورها تراقب شغل ما يسمي Silicon Valley اللي شركات التكنولوجيا الأمريكاني الكبيرة فانت ازاي حتراقب شغلهم وتمارس دورك الرقابي عليهم وانت أساساً حاطط فلوسك معاهم ويهمك مصلحتهم مش مصلحة البلد .. إزاي حتبقي صارم جداً في موقفك مع الإمارات إنك لازم تقطعي علاقتك بالصين وإنت أساساً ليك نسبة من الصفقة لإنك حاطط فلوسك في شركة Nvidia اللي هي البايع في الصفقة .. ريحة الفساد بتسد مناخير أي حد يقرأ شوية في تفاصيل الصفقة .. ده السبب إن يوم 31 مارس 2025 محامي البيت الأبيض (ديفيد وورينتجون David Warrington) بعت جواب رسمي بيتيح ل(ديفيد ساكس) إنه يبقي هو وسيط الصفقة عشان الجواب ده يتحط في عين أي حد يتهم (ديفيد ساكس) بالفساد لإن مجرد إن التهمة دي تتقال فهي بشكل مباشر معناها إن اللي معينه هو كمان فاسد .. اللي هو أبوحنان.
خليني أختم معاك بحتة كده إن اللي يلاقي دلع وميدلعش ربنا يحاسبه .. الشيخ (طحنون) عشان عارف إنه شاري ناس بفلوسه جوه واشنطن فهو قالهم يفاتحوا (ترامب) في موضوع كده .. هو يجري حاجة لو شركة TSMC عملت ليها مصنع صغير كده في الإمارات .. الفكرة إن الشركة كانت وعدت (ترامب) إنها حتعمل مصنع ليها في أمريكا في ولاية أريزونا فالموضوع مش سهل بس الزن علي الودان أمر من السحر وبسم الله ما شاء الله الشيخ (طحنون) مأجر جوز زنانين مشغلين الزنانة اللي بالكهرباء سواء (ديفيد ساكس) أو (ستيف ويتكوف) .. الزن بتاعهم ده هو السبب ورا إن في مايو 2025 اتقال رسمي إن الإمارات بدل ما كان المفروض تستلم 100,000 شريحة كومبيوتر فهي حتستلم 500,000 بحيث 20% منهم حيروحوا لشركة G42 .. في مقابل ده فالإمارات حتدفع فوق 100 مليار دولار علي 10 سنين كاستثمارات مباشرة في قطاع الذكاء الصناعي الأمريكاني ولسه لحد دلوقتي مفيش رد رسمي علي حتة إن يتعمل مصنع لشركة TSMC في الإمارات .. كل الأصوات اللي كانت بتعارض الصفقة جوه أمريكا بحجة العلاقة المريبة اللي بين الإمارات والصين حطت جزمة في بقها وسكتت والصفقة حتتم في سلام.
المصدر:
- مقالة بعنوان Anatomy of Two Giant Deals: The U.A.E. Got Chips. The Trump Team Got Crypto Riches نشرت في جرنان The New York Times الأمريكاني وده لينك المقالة الأصلية:
In Giant Deals, U.A.E. Got Chips, and Trump Team Got Crypto Riches – The New York Times
