تعديل إتعمل يوم 1 يناير 2021.. (جو بايدن) فعلاً كسب الإنتخابات الرئاسية في نوفمبر 2020 وبقي رئيس أميركا الجديد .. مجلس النواب أو Senate في أميركا طلع (ترامب) براءة من غير حتي ما تبقي محاكمة ولا عرض أدلة.
أميركا حالياً بتعيش واحدة من أسوأ أزماتها في تاريخها اللي ميجيش 150 سنة علي بعض .. عمر ما الأمريكان كانوا في الحالة اللي هم فيها دلوقتي واللي عشان تفهمها حاول تتخيل أيام التوتر الشديد أيام ما كان الرئيس (محمد مرسي) الله يرحمه هو اللي ماسك البلد أو حتي أيام ما كان المجلس الأعلي للقوات المسلحة هو اللي بيمشي الأمور .. لو الأيام دي بعيد عن ذاكرتك وإتمحت بأستيكة فأقرب حاجة ممكن تخليك تتخيل اللي بيحصل هناك هو الخناقة بين الأهلاوية والزملكاوية .. فعلياً الوضع السياسي في أميركا دلوقتي بقي عامل زي كومنتات أي صفحة أخبار كورة في مصر .. شتيمة وتريقة وتخوين وكل ده سببه هو كيس الشيتوس الحجم العائلي اللي إنت ممكن تكون عارفه بإسم (دونالد ترامب) .. الرجل ده فعلياً مخلي أميركا تعيش أسوأ أيامها في مسلسل مش بيخلص من فضايحه ومشاكله ومصايبه واللي أخرها هو اللي إنت بتسمعه في الأخبار عن عزله من منصبه أو زي ما الأمريكان بيسموه Impeachment .. أنا عارف كويس إن الحوار معقد وتفاصيله كتير وتخليك تتوه بسهولة وأنا شخصياً جبت سيرته قبل كده فخليني من غير ما أزود في مقدمات أقولك إن عشان تفهم هو فيه إيه فإحنا محتاجين نجاوب مع بعض علي 3 أسئلة:
- إيه اللي كيس الشيتوس هببه بالضبط ومخلي الدنيا قالبه عليه أوي كده؟
- إشمعني الغلطة دي يعني اللي هم ماسكينله فيها علي الواحدة؟
- الدنيا حتمشي إزاي بعد كده؟
خلينا نبدأ بالإجابة عن السؤال الأول .. إنت هببت إيه يا كيس الشيتوس؟
الموضوع بدأ في يوليو 2019 بمكالمة تليفون بين (دونالد ترامب) وبين الرئيس الأوكراني (فلاديمير زيلينسكي Volodymyr Zelensky) وفي المكالمة دي (ترامب) قال للرئيس الأوكراني إن صحيح بلدك كانت متفقة معانا إننا نديها صفقة صواريخ جافلين Javelin المضادة للدبابات واللي القوات المسلحة بتاعتك محتاجاها عشان تقف قصاد روسيا بس أنا مش حديك الصواريخ مع إن الكونجرس وافق إنه يوفرلها 250 مليون دولار إلا لما تعملي خدمة صغيرة والخدمة دي إن أنا عايزك تخلي النائب العام بتاعك يحقق في إحتمالية تورط واحد إسمه (هانتر بايدن Hunter Biden) في قضايا فساد .. يطلع مين الواد ده؟ .. ده يبقي إبن واحد إسمه (جو بايدن Joe Biden) وده كان النائب بتاع (باراك أوباما) واللي نازل الإنتخابات الرئاسية عن الحزب الديموقراطي وإحتمال كبير الحزب يختاره عشان ينزل الإنتخابات قصاد (ترامب) وإبنه (هانتر) بإعترافه شخصياً كان متعين بالواسطة في شركة غاز طبيعي في أوكرانيا والشركة فلست .. مش كده وبس .. (ترامب) كان عايز (زيلينسكي) لو النائب العام بتاعه وصل لحاجة تدين (هانتر بايدن) ميبعتهاش للنائب العام الأميريكي (وليام بار William Barr) .. لا هو كان حيبعت المحامي الشخصي بتاعه (رودولف جولياني Rudolph Giuliani) أوكرانيا عشان ياخد بنفسه الملفات والمعلومات اللي ممكن تدين (هانتر بايدن) وأبوه.
تقريباً إنت بتهرش في شعرك طب إزاي مكالمة تليفون بين إتنين رؤساء دول المفروض يعني إنها سرية تعمل المشكلة دي كلها؟ .. الفكرة إن مكالمات التليفون دي مبتقاش سرية ومبتقاش بين الإتنين رؤساء بس .. الإتنين بيبقوا فاتحين السبيكر وفيه طاقم كبير من المساعدين بيبقي حاضر مع كل رئيس والأهم من كل ده إن نص المكالمة نفسه بيتكتب وبيتحفظ في الأرشيف للإطلاع بعد كده .. اللي حصل إن كان فيه ضابط مخابرات شغال في وكالة المخابرات المركزية الأميريكية CIA ووقتها كان ملحق لمجلس الأمن القومي إتكلم مع كذا حد من الطاقم الرئاسي الأميريكي اللي كانوا حاضرين وسامعين المكالمة بين (ترامب) وبين (زيلينسكي) واللي مش بس قالوله إن اللي حصل ده غلط دول كمان قالوله إن ناس من المساعدين بتوع (ترامب) أمروا بحجب النص بتاع المكالمة بين الإتنين لإنهم كانوا عارفين إن لو حد شم خبر باللي حصل حتبقي مصيبة سودا.
ضابط المخابرات ده قرر إنه يعمل حاجة لإنه شاف إن اللي بيحصل ده غلط وبناء علي لوايح أجهزة المخابرات الأميريكية في الحتة دي بالذات اللي إسمها Intelligence Community Whistleblower Protection Act فهو مينفعش يسرب المعلومات دي للإعلام لإنه ساعتها ممكن يتحاكم بتهمة الخيانة العظمي وده اللي حصل مع (إيدوارد سنودين Edward Snowden) واللي برده جبنا سيرته في مقالة قديمة .. اللوايح بتقول إنه لازم يكتب شكوي رسمية ويقدمها للمفتش العام علي أجهزة المخابرات الأميريكية .. بعد كده اللوايح بتقول إن لو المفتش العام شاف إن الشكوي دي تستدعي إنها تتصعد فهو بيرفعها لمدير المخابرات الوطنية وده الرجل اللي دوره إنه يشرف علي شغل كل أجهزة المخابرات الأميريكية .. لما الشكوي توصل لمكتب الرجل ده فهو قدامه 7 أيام عشان يقرر هل يصعد الشكوي دي للبرلمان ولا يحطها في الدرج .. مدير المخابرات الوطنية وقتها كان إسمه (جوزيف ماجواير Joseph Maguire) اللي لما شاف الشكوي حس إن وراها مصيبة وفعلياً هو مكنش عارف يعمل إيه فبدل ما يرفعها للبرلمان هو كلم المستشار القانوني لوزارة العدل يسأله يعمل إيه .. المستشار القانوني بتاع وزارة العدل نصحه إنه يحط الشكوي في الدرج يمكن عشان هو شاف إن الشكوي دي مورهاش فايدة أو إنه شاف إن مش حيجي من وراها إلا وجع القلب.
الحكاية دي خدت من يوليو لحد سبتمبر 2019 ورغم إن فعلياً (جوزيف ماجواير) حط الشكوي في الدرج إلا إن ناس كتير كانوا قروها وبدأت الإشاعات تنتشر عن الشكوي دي واللي فيها .. هوبا الكلام وصل للإعلام يوم 19 سبتمبر وفجأة وبدون أي مقدمات مؤسسة الرئاسة قررت إنها تنشر نص الشكوي الرسمية بتاعة ضابط المخابرات يوم 25 سبتمبر ووراها علي طول يوم 26 سبتمبر نشروا النص بتاع المكالمة بين (ترامب) و(زيلينسكي) عشان تبدأ أكبر خناقة من أول ما كيس الشيتوس بقي رئيس .. ليه مؤسسة الرئاسة عملت كده؟ .. ده واحد من الألغاز اللي محدش عارف يحلها بس يمكن عشان لما ربنا بيريد يفضح حد فمفيش حد بيستره.
هنا يجي دور السؤال التاني .. إشمعني الغلطة دي بالذات؟
هنا أنا محتاج أشرحلك وجهتين النظر في الموضوع .. الجمهوريين اللي واقفين ورا (ترامب) والديموقراطيين اللي عايزين (ترامب) يغور في ستين داهية وخليني أبدأ بإني أوريك وجهة نظر الديموقراطيين .. ليه (ترامب) شخصية بنت وس&^ مينفعش تكمل في منصب الرئيس؟ .. الحقيقة إن فيه كذا نقطة:
- فلوس السلاح اللي كانت أوكرانيا حتاخده دي مش فلوس أمك يا (ترامب) .. دي فلوس جاية من جيب المواطن الأميريكي فلما حضرتك تمنع الأوكرانيين إنهم ياخدوا السلاح ده فإنت بتاخد من المواطن الأميريكي حقه إن فلوسه تروح لمن يستحق لا وكمان إنت عايز الأوكرانيين يساعدوك في الإنتخابات عشان تكسبها علي قفا المواطن الغلبان .. متنسوش كمان إن أوكرانيا في حالة حرب مع روسيا اللي هي العدو الأول لأميركا دلوقتي و(ترامب) مكنش عنده أي مشكلة إنه يمنع مساعدات عسكرية عن أوكرانيا اللي المفروض يعني إنها حليفة أميركا عشان مصلحته هو الشخصية إنه يكسب الإنتخابات ودي كانت النقطة الأولي في النقطتين اللي قضية عزل (ترامب) إتبنت عليهم.
- النقطة الثانية إن لما مجلس النواب وده اللي حنعرفه كمان شوية بدأ يفتح تحقيق في الموضوع فمؤسسة الرئاسة رفضت تدي للجنة الدفاع والأمن القومي في مجلس النواب أي معلومات أو أدلة أو شهود ورفضت التعاون أصلاً في التحقيق .. يا رجل ده (ترامب) طلع علي تويتر عشان يتهم (أدام شيف Adam Schiff) رئيس لجنة الدفاع والأمن القومي في مجلس النواب بإنه خاين وعميل.
وبعد ما فهمت ليه الديموقراطيين بيشدوا في شعرهم خليني أعيش دور محامي الشيطان وأقولك الجمهوريين بانيين دفاعهم عن (ترامب) علي أي أساس .. الناس دي بتقول كذا حاجة:
- في البلاد الديموقراطية الرئيس بيجي بالصندوق وبيمشي بالصندوق فلما تيجي المعارضة تقول إن الرئيس خرب البلد ولازم يمشي فأنتوا كده بتحرموا المواطن من حقه إنه يمشي أو يخلي رئيسه.
- بعدين تعالوا هنا .. هو ضابط المخابرات اللي كتب الشكوي ده كان حاضر وقت المكالمة؟ .. لا .. يبقي خلاص محتوي الشكوي بتاعته ده تبلوه وتشربوا ميته وبعدين إحنا لحد دلوقتي بسبب لايحة Intelligence Community Whistleblower Protection Act مش عارفين هو مين ضابط المخابرات ده وبعدين إفرض إنه كان لسه ضابط صغير .. معقول حتشيلوا رئيس الجمهورية عشان حتة ضابط صغير ضميره ناقح عليه؟ .. وبعدين لما الفضيحة إتعرفت و(ترامب) قابل (زيلينسكي) وعملوا مؤتمر صحفي وإتسأل الرئيس الأوكراني عن هل حد ضغط عليك تحقق في إحتمالية فساد (هانتر بايدن) كان رده إن لا محصلش .. ومحدش يقولي ما هو طبيعي يقول كده وهو قاعد جنب (ترامب).
- ثم إن إيه يعني الرئيس يقول لرئيس دولة أجنبية حقق في إحتمالية فساد واحد مرشح نفسه للرئاسة؟ هو ده مش حاجة صح والمفروض إننا نحييه عليها؟ .. مش محاربة فساد دي يا متعلمين يا بتوع المدارس؟
أخيراً يجي دور السؤال الثالث والأخير .. الدنيا حتمشي إزاي بعد كده؟
زي ما إحنا عندنا في مصر فيه حاجة إسمها مجلس الشعب وحاجة إسمها مجلس الشوري بحيث إن الصلاحيات كلها في إيد مجلس الشعب ومجلس الشوري ده ولا له أي ستين لازمة فأميركا برده فيها حاجة إسمها House of Representatives يعني مجلس النواب وإختصاراً بيسموه House وده يبقي مجلس الشوري بتاعهم اللي ملوش لازمة وعندهم برده حاجة إسمها Senate أو مجلس الشيوخ وده هو مجلس الشعب اللي في إيده الصلاحيات كلها .. الفكرة إن الديموقراطيين (اللي إنت تقدر تسميهم المعارضة) مسيطرين علي مجلس النواب وكبيرتهم إسمها (نانسي بيلوسي Nancy Pelusi) ودي رئيسة مجلس النواب .. يوم 18 ديسمبر 2019 إتعمل تصويت علي عزل كيس الشيتوس ووافق عليه كل الأعضاء الديموقراطيين ومعاهم عضو مستقل وبكده فمجلس النواب أقر إن (ترامب) لازم يتعزل .. علي فكرة التصويت ده إتعمل بعد أسابيع من جلسات الإستماع وعرض الأدلة اللي كان موقف مؤسسة الرئاسة منها إن عليا الطلاق ما أنا متعاونة معاكوا ولا مدياكوا أي معلومة ولا حجاوب علي أي سؤال .. مش كده وبس .. من ضمن التحقيق اللي إتعمل في مجلس النواب إن لجنة الدفاع والأمن القومي كان المفروض تعمل جلسة إستماع لواحد إسمه (جوردون ساندلاند Gordon Sondland) وده يبقي سفير أميركا للإتحاد الأوروبي وفي أخر لحظة وقبل ما يخش قاعة البرلمان اللي حتتعمل فيها جلسة الإستماع جاله تليفون من الرئاسة قاله إن الرئيس بيمنعه من إنه يشهد قدام اللجنة .. إشمعني الرجل ده بالذات؟ .. لإنه كان هو الوصلة بين الحكومة الأوكرانية وبين محامي (ترامب) اللي هو (رودولف جولياني) بعد ما السفير الأميريكي في أوكرانيا (وليام تايلور William Taylor) معجبوش فكرة إن محامي الرئيس الشخصي هو اللي يجي أوكرانيا يستلم نتايج التحقيق اللي النائب العام الأوكراني شغال فيه.
علي فكرة .. رسايل الموبايل بين (جوردون ساندلاند) و(وليام تايلور)كانت من ضمن الأدلة اللي إتعرضت في التحقيق بتاع مجلس النواب واللي فيها (وليام تايلور) بيسأل (جوردون ساندلاند) هو إنت عايز تقولي إن المساعدات العسكرية بتاعتنا لأوكرانيا بقت مربوطة بهل الأوكرانيين حيحققوا في قضية (هانتر بايدن)؟ فرد عليه (جوردون ساندلاند) في رسالة قاله كلمني وأنا حفهمك .. في شهادة (وليام تايلور) قدام لجنة الدفاع والأمن القومي هو حكي إنه لما كلم (جوردون ساندلاند) في التليفون قاله إن (ترامب) زي أي بيزنس مان قبل ما يسلف حد فلوس بيطلب منه حاجة في المقابل فالصواريخ اللي حتروح لأوكرانيا لازم الأوكرانيين يدونا حاجة قصادها.
الخطوة اللي بعد كده المفروض إن الست (نانسي بيلوسي) اللي هي الكبيرة بتاعة الديموقراطيين حتبعت جواب رسمي لمجلس الشيوخ عشان تبدأ محاكمة (ترامب) في المجلس .. المشكلة إن الجمهوريين هم اللي مسيطرين علي مجلس الشيوخ وكبيرهم اللي هو (ميتش ماكونيل Mitch McConnell) طلع قال إن مش حيبقي فيه لا محاكمة ولا إستماع لشهود ولا عرض أدلة .. الموضوع حيبقي شبه الإنترفيو بتاع (مرجان أحمد مرجان) كده .. يتسأل What’s Your Name? وهو يرد Maybe Yes, Maybe No .. عشان كده (نانسي بيلوسي) لحد دلوقتي مش عايزة تبعت الجواب ده.
الخناقة اللي في أميركا دلوقتي إنت محتاج تفهمها كويس لإنها حتشكل مفهومنا كلنا عن يعني إيه ديموقراطية ويعني إيه محاسبة مسئولين؟ .. الخناقة دي حول هل من حق الرئيس إنه يعمل اللي علي مزاجه؟ .. هل من حقه إنه يعمل أي حاجة عشان مصلحته الشخصية وتولع مصلحة البلد؟ .. لو إتكلمت مع الديموقراطيين حتلاقيهم يقولولك إن الأباء المؤسسين لأميركا وهم بيكتبوا الدستور كانوا عاملين حسابهم إن حيجي اليوم ده علي البلد .. حيجي اليوم اللي يمسك الحكم بني أدم معندوش في الفساد ياما إرحميني .. حيجي اليوم اللي يمسك البلد حد معندوش مشكلة إنه يخلي بلد أجنبية تتدخل في الشئون الداخلية لأميركا .. وحيجي اليوم اللي يمسك البلد حد مستعد مش بس يبقي فاسد ومش بس إنه يبيع البلد لجهة أجنبية إنما كمان يعمل ده في وقت إنتخابات عشان يكسبها .. علي الناحية الثانية أنا شخصياً بسأل طب إفرض (نانسي بيلوسي) بعتت الجواب لمجلس الشيوخ و(ميتش ماكونيل) عمل اللي في دماغه ومحاكمة (ترامب) كانت مجرد شو و خلصت علي فشوش .. مش ساعتها هو فعلياً حيتوحش؟ .. مش ساعتها هو حيقول لنفسه أنا ربكم الأعلي؟
الديموقراطيين من ناحيتهم بيقولوا إن لما (ترامب) أيام ما كان مرشح نفسه للإنتخابات قصاد (هيلاري كلينتون Hilary Clinton) وطلع قال للروس يا روس لو سامعيني أنا بقولكوا خلوا Hackers بتوعكوا يخترقوا إيميلاتها ولو لقيتوا حاجة إبقوا قولولي ده حمادة وإنه يبقي رئيس ويضغط علي حكومة بلد أجنبية عشان تساعده يكسب الإنتخابات الجاية ده حمادة تاني خالص .. حاجة كمان وهي إنك لو أخدت بالك من تاريخ المكالمة بينه وبين (زيلينسكي) حتكتشف إنه تاني يوم علي طول من بعد شهادة (روبيرت مولر Robert Meuller) قدام الكونجرس بخصوص التقرير اللي هو كتبه وأنا إتكلمت عنه في مقالة قديمة وكان الديموقراطيين حاطين أمل علي إن الشهادة دي تودي (ترامب) في ستين داهية بس طلع منها زي الشعرة من العجين .. يعني دلوقتي ربنا سترها عليك ونجاك تقوم تاني يوم عامل مصيبة تانية؟ .. طب وأخرتها معاك؟ .. حنسيبك كده؟ .. يعني إنت ربنا نجاك من فضيحة إن الروس ساعدوك تكسب الإنتخابات اللي فاتت تقوم مستغل صلاحياتك عشان تبتز دولة تانية عشان تساعدك تكسب الإنتخابات الجاية؟ .. التهم اللي متوجهه ل(ترامب) عبارة عن حاجتين: سوء إستغلال صلاحياته وعرقلة التحقيق بتاع البرلمان .. الخناقة بعد كده حتبقي عن إيه اللي حيحصل في مجلس الشيوخ ومحدش يسألني هو إيه اللي حيحصل لإن أنا شخصياً معرفش.
المصادر:
- مقالة بعنوان Impeach Trump. Save America. نشرت في جريدة The New York Times وده لينك المقالة الاصلية:
https://www.nytimes.com/2019/12/10/opinion/trump-impeachment.html - مقالة بعنوان The ultimate guide to the Donald Trump impeachment saga نشرت في موقع Vox وده لينك المقالة الاصلية:
https://www.vox.com/2019/11/5/20914280/impeachment-trump-explained - أنترفيو عمله (ادام شيف Adam Schiff) في برنامج The Late Show with Stephen Colbert وده لينك الانترفيو علي YouTube:
https://www.youtube.com/watch?v=ytB9qhfZ_oE - حلقة من برنامج The Daily Show with Trevor Noah وده لينك الحلقة علي YouTube:
https://www.youtube.com/watch?v=L4Zau-K1168&t=320s
