فلاديمير بوتين .. أنا جامد أوي بس بخاف أنزل إنتخابات.

لينك التسجيل الصوتي للمقالة علي Sound Cloud:
https://soundcloud.com/user-112011687-312727988/m4a-6

موضوعنا اللي حنتكلم عنه النهاردة هو الرئيس الروسي (فلاديمير بوتين) .. سبب إننا حنتكلم عن الرجل ده هو إنك لو فتحت نشرة الأخبار سواء علي الجزيرة أو العربية أو حتي علي القناة الأولي حتلاقي إن اسم الرجل ده بيتقال أكتر من أي رئيس دولة تاني .. مشكلة (بوتين) إنك لو حتفتح الكلام عنه فإنت عندك حل من إتنين: يا إما تبقي سطحي و متحاولش تبقي عميق و علي قد ما تقدر تبقي تافه .. أو إنك تحاول تبقي عميق و تضرب غطس جوه فكر الرجل ده و الأهم إنك تبدأ تفكر في النتائج المترتبة عن أفعاله .. عشان أفهمك أنا قصدي إيه خليني أديلك مثال:

الناس اللي هارسه شوية السياسة الأميريكية عارفين إن فيه كلام كتير هناك علي إن المخابرات الروسية بشكل أو بأخر تلاعبت بنتيجة الإنتخابات الرئاسية الأميريكية اللي إتعملت في 2016 عشان يكسّبوا (دونالد ترامب) .. الرأي ده فيه ناس بتدافع عنه و فيه ناس مش مقتنعه به بس اللي مخلي كفه الناس اللي بتدافع عن الرأي ده بتميل هو إن (ترامب) مبيحاولش خالص إنه يقول أي كلمة وحشة عن (بوتين) و كأنه شايله خدمة إنه كسّبه الإنتخابات .. موقف (ترامب) من (بوتين) اللي هو أشبه ببنت بتكراش علي ولد معاها في الفصل خلي واحد زي (جيمس كلابر James Clapper) و ده كان ماسك منصب مدير المخابرات الوطنية اللي هو جهاز المخابرات اللي وظيفته إنه ينسق شغل أجهزة المخابرات الأميريكية كلها إنه يقول إن الروس بيتعاملوا مع (ترامب) ولا كأنه جاسوس هم زارعينه جوه أميركا .. و ده رأي ممكن يرعب أي حد بيقراه .. تخيل إن يطلع مدير المخابرات العامة في مصر يقول إنه زي ما يكون الموساد الإسرائيلي زارع الرئيس (عبدالفتاح السيسي) عشان يخرب البلد .. مجرد إن الكلام ده يطلع من بق مدير المخابرات العامة فده لوحده يخلينا يجيلنا إسهال.

و هي دي المشكلة .. علي السطح يبان إن كأن الروس بلاش نقول إنهم زارعين (ترامب) بس خلينا نقول إنهم ماسكين عليه زلة .. بس لو تعمقت شوية تلاقي نفسك قدام حاجة مختلفة خالص و هي إن زي ما يكون الأمريكان هم اللي زارعين (بوتين) عشان يخرب روسيا من جوه .. بداية من 2007 و الأخ (بوتين) نازل تخريب في بلده بشكل يخيلك تسأل نفسك هي روسيا حتفضل تستحمل لحد إمتي؟ .. روسيا بلد كبيرة مش صغيرة و فيها موارد كتير بس مشكلة الدول الكبيرة إنها زي الديناصورات حركتها بطيئة و بتكسر حوليها حاجات كتير .. كل ما الدولة كبرت كل ما النمو في إقتصادها بيبقي أبطأ .. كل ما الدولة كبرت فإقتصادها عشان يكبر بيدمر معاه البيئة زي ما حصل في الصين .. عشان كده الكتالوج اللي دولة زي سنغافورة مثلاً حتمشي عليه عشان تكبر يختلف كتير عن الكتالوج اللي دولة زي روسيا محتاجة تمشي عليه.

روسيا بلد عدد سكانها كبير فإنت محتاج عشان تنمي إقتصادها إنك تعلم و تثقف في ملايين الشباب اللي حيبقوا جزء من القوة العاملة .. عشان الشباب ده ياخد راحته فهو محتاج يحس إنه حر و إن رأيه بيتسمع و ده معناه إنك لازم تبني نظام سياسي ديموقراطي تعددي عشان في الأخر ده يترجم لإقتصاد قوي قايم علي الإبتكار .. مجهود و تعب و شغل كتير أوي الدول الصغيرة مش بتحتاجه عشان تقوم .. عشان دولة زي روسيا توصل للنطة الإقتصادية بتاعة تايوان أو كوريا الجنوبية أو سنغافورة فالموضوع مش سهل خالص.

اللي حصل إن (بوتين) قال لنفسه يا لهوي هو أنا لسه حعمل كل ده و حمشي الطريق الطويل ده لأخره؟ فإختار الطريق السهل .. هو لقي إن عنده حقول غاز طبيعي و نفط فبقي بيبيع الغاز و ياخد فلوسه يحطها في جيبه و مبيصرفهاش علي شعبه .. الجيش بقي بيبلع ميزانية البلد .. مؤسسة القضاء مبقاش يتصرف عليها و إستقلالها إتسرق منها .. حاوط نفسه برجال أعمال بايعين ضميرهم لدرجة إن بره بقي بيتقال عليهم أوليجارك Oligarchs و دي كلمة روسي بتتقال علي رجال الأعمال اللي معاهم فلوس جايبينها بالحرام و قريبين من السلطة فمحميين و ليهم ظهر .. قدام الشعب هو رافع شعار تحيا روسيا تلت مرات .. الإعلام راسم ل(بوتين) صورة إنه زعيم الأمة اللي بيحمي تراب روسيا و دينها الرسمي اللي هو المسيحية القائمة علي المذهب الأرثوذوكسي ضد أهل الشر من الكاثوليك و المسلمين و اليهود .. أنا عارف إن كل ده شبه حد نعرفه أوي بس ده يوريك ليه أنا بقول إن زي ما يكون الأمريكان هم اللي زارعين (بوتين) في روسيا لإن زي ما سياسات اللي بالي بالك مخليانا نقول إن زي ما يكون الموساد هو اللي زارعه فتحس إن هو و (بوتين) غاشين من بعض.

زي ما فيه مثل روسي بيقول إن الشيطان في التفاصيل فبرده شوية تفاصيل صغيرة توريك قد إيه روسيا عندها مشكلة كبيرة سببها الرجل ده:

• روسيا بلد كبيرة و كانت ولا تزال تعتبر دولة عظمي فلما تطلع جريدة زي Les Echos الفرنسية و دي من أهم الجرايد المهتمة بالBusiness في العالم تقول إن البحث العلمي في روسيا إنهار لدرجة إن شركة مايكروسوفت Microsoft الأميريكية لوحدها متسجل بإسمها براءات إختراع أكتر من إجمالي براءات الاختراع اللي بتتسجل لعلماء و باحثين روسيا كلهم فإنتي أكيد يا روسيا عندك مشكلة.
• المصيبة مش بس إن مجال البحث العلمي ضعيف .. اللي بيحصل إن لو أنا عملت شركة صغيرة في روسيا و الشركه دي نجحت و إشتغلت و جابت فلوس فممكن رجل أعمال مسنود يسرق شركتي و لو رفعت قضية عليه حلاقي إن الفساد جوه النظام القضائي بيخليني حتي مش عارف أخد حقي.
• ميغركش إن كل شوية (بوتين) يطلعلك في التليفيزيون مش لابس تي-شيرت و راكب حصان أو يطلعلك بيلعب جودو .. كل ده مجرد وهم .. الرجل ده كان مرعوب إن حد ينزل قدامه في الإنتخابات الرئاسية اللي حصلت في 2018 لدرجة إنه سجن أي حد سولت له نفسه إنه يرشح نفسه قدامه .. ده رجل في الحكم بقاله 20 سنة و لسه مرعوب إنه ينزل إنتخابات قدام حد.

بسبب النقطة الثالثة دي بالذات ف(بوتين) عشان تفهمه لازم تحط في إعتبارك إنك بتتعامل مع مدمن .. بس ده مش مدمن مخدرات قد ما هو مدمن شعبية .. الهروين أو الكيف بتاعه إن شعبيته تفضل تزيد و الناس تهتف بإسمه بإعتباره حامي حمي البلد بس زيه زي أي مدمن فهو مستعد يعمل و يبيع أي حاجه عشان يعمل دماغ .. عشان كلامي ميبقاش عام خليني أديلك شوية أمثلة تفهم بيهم كلامي:

سنة 2014 (بوتين) إستولي علي شبه جزيرة القرم أو Crimea و بتتنطق كرايميا اللي كانت أساساً تبع أوكرانيا .. مش كده و بس .. هو غزي شرق أوكرانيا بقوات روسية بس خلاهم يلبسوا زي مموه معلهوش علم روسيا .. ده عمل إيه؟ خلي شعبيته وسط القوميين و البسطاء في روسيا تنط للسماء .. كلهم بقوا بيقولوا يااااااه بقي عندنا رئيس حيرجعلنا هيبتنا و حيرجعنا تاني لأيام مجد الإتحاد السوفيتي .. بس في المقابل الغرب فرض علي روسيا عقوبات إقتصادية قاسية أوي كان من نتائجها مثلاً إن فرنسا كان حتبيع حاملتي طائرات الميسترال اللي إحنا أشتريناهم منها لروسيا بس لما الإتحاد الأوروبي فرض حظر بيع أسلحه لروسيا فحاملتي الطائرات راحوا علي روسيا بعد ما كانوا دفعوا جزء كبير من ثمنهم.

سنة 2015 متفهمش مين أقنع (بوتين) يبعت مقاتلات و مستشاريين عسكريين  وبطاريات صواريخ دفاع جوي لسوريا عشان ينقذ نظام الرئيس السوري (بشار الأسد) .. معاك إن دعم روسيا و إيران و حزب الله ل(الأسد) مخليينه يدوبك عارف يفضل في منصبه بس فكر فيها كده .. لو (الأسد) نظامه وقع أو لو روسيا حبت تطلع بره اللعبة فساعتها شكل (بوتين) قدام العالم حيبقي وحش .. الروس نفسهم عارفين إن الوضع زي الزفت و ده اللي قاله (فلاديمير فورلوف Valdimir Forlov) واحد من أكتر الناس اللي بتفهم في السياسة الخارجية الروسية و اللي عبر عن رأيه في مقالة نشرتها جريدة The Moscow Times يوم 5 مارس 2018 و قال فيها إن كل ما (بوتين) يطلع يقول روسيا إنتصرت أو يقول إنه ناوي يسحب شوية قوات روسية من سوريا متفهمش إيه اللي بيحصل بس الدنيا بتولع و جبهات قتال بتتفتح فجأة و تلاقي (بوتين) بقي مضطر مش يسحب قوات إنما لازم يبعت قوات إضافية .. روسيا بقت بتدفع فلوس و مش لاقيه مقابل و الروس حتي مش عارفين يطلعوا بره المصيبة اللي هم حطوا نفسهم فيها دي.

أخر حاجة حصلت في مسلسل المصايب مقابل الكيف هو متفهمش برده مين اللي وافق علي عملية إغتيال الجاسوس السوفيتي السابق (سيرجي سكريبال Sergei V. Skripal) هو و بنته (يوليا Yulia) جوه مطعم في مدينة سالزبري البريطانية عن طريق تسميمهم بغاز أعصاب مبيتصنعش في حتة غير روسيا .. يعني جاسوس روسي سابق خان بلده و راح طلب لجوء سياسي في بريطانيا يموت مسموم بغاز أعصاب محدش بيعرف يعمله غير الروس .. يعني التهمة لابساهم لابساهم .. طبعاً الإعلام الروسي طلع هلل و مجد في العملية بإعتبارها جزاء مستحق لخاين للأمة بس علي الناحية الثانية الغرب كله إتحد ضد روسيا و أكثر من 20 دولة أوروبية بالإضافة لأميركا طردت أكثر من 100 جاسوس روسي علي أراضيهم .. الإعلام الروسي خد عملية الإغتيال دي و رسموها علي إنها دليل علي إن مينفعش حد يحكم روسيا غير (بوتين) بس في المقابل اللي حيدفع ثمن كل ده هي المخابرات الروسية FSB اللي فجأة لقت أكثر من 100 جاسوس ليها جوه أوروبا و أميركا إتطردوا و مبقتش عارفه تعوضهم إزاي؟

سيبك من الضرر اللي وقع علي المخابرات الروسية .. أساساً كتير من رجال الأعمال الروس الفاسدين بيودوا فلوسهم بريطانيا تتغسل و تتحط جوه بنوكها و طبعاً بعد العملية دي السلطات البريطانية مبقتش حتسمح بده يحصل زي الأول .. يعني حتي عملية الإغتيال وقفت علي جيب (بوتين) بخسارة فده يوريك قد إيه إنت مش قدام بني أدم فاهم هو بيعمل إيه؟ .. أو بني أدم فاهم هو بيعمل إيه بس حاسب حسبته غلط و ده الرأي اللي أنا شخصياً مقتنع به و يمكن دليلي علي ده هو الغزو الروسي لأوكرانيا.

حط كل اللي أنا قلته ده جنب بعضه حتلاقي نفسك قدام رجل باني إستراتيجيته علي حسبة غلط و هي إنه مقتنع إنه يقدر سلط ملط كده يقف قدام أخطر 3 حاجات خلقهم ربنا: الطبيعة و البشر و التطور .. هو يا عيني مقتنع إن إقتصاد روسيا يقدر يفضل معتمد علي عائدات النفط و الغاز الطبيعي مع إنه شايف أوروبا و العالم كله بيتجه و ماشي في سكة الطاقة المتجددة أو Renewable Energy بس تقول إيه البعيد مبيفهمش .. هو يا عيني مقتنع إن مش حيجي اليوم اللي شباب روسيا يصرخ و يقول إيييييييه إنت فاكر نفسك إيه .. الأهم إنه متخيل إنه يقدر يقف في طريق التطور و اللي بيشرحه حاجة إسمها قانون مور Moore’s Law و القانون ده بيقول إن كل سنتين الComputing Power لProcessor بتاع الكومبيوتر بتاعك بتنط الضعف و سعره بيقل النص يعني القانون ده بيقول إن مع الوقت التكنولوجيا حتتطور أوي و سعرها حيفضل يقل لحد ما حتوصل لمرحلة إن التكنولوجيا إتعقدت لدرجة إنك حتي لو حبيت تصنع حاجة مش حتعرف و مش حيبقي قدامك بديل غير إنك تشتري من بره .. ده اللي وصله مجال صناعة العربيات دلوقتي اللي هو لو مصر بكره الصبح قررت ترجع مصنع النصر يشتغل تاني فحيكتشفوا إن سعر إستيراد العربية من بره حيبقي أرخص من سعر بيع العربية نصر لإن خلاص تكلفة التصنيع بقت عالية أوي و معقدة أوي.

روسيا ماشية في سكة اللي بيروح مبيرجعش و هي لابسه لابسه في الحيط و الأمل الوحيد ليها إن (بوتين) يعقل و يتك علي زرار الReset اللي بيرجع كل حاجة لطبيعتها بس ده مش حيحصل .. روسيا هي مراية لينا .. من غير إصلاح مفيش أي داعي للتفاؤل .. روسيا شبهنا في حاجات كتير يمكن أكثر مما نتخيل .. طبيعة سكانها مش موزونة و نسبة الشباب فيها أكبر بكتير من العواجيز .. مؤسساتها ضعيفة و كلهم معتمدين علي قوة المؤسسة العسكرية .. إقتصادها مش متنوع و قايم علي كام نشاط إقتصادي يتعدوا علي الصوابع .. رغم إن روسيا زيها زينا عندها شباب زي الورد يقدروا يقوموا البلد علي كتفهم بس في عصر الRenewable Green Energy اللي إحنا عايشين فيه و رايحينله فروسيا زيها زي مصر حتتحط في موقف إنها محتاجه تختار إما إنها تعمل إصلاحات سياسية و إجتماعية تؤهلها إنها تتعايش مع المستقبل أو إنها تعيش في عزلة بتزيد يوم عن يوم.

المصدر:

مقالة بعنوان Is Putin a C.I.A. agent? نشرت في جريدة The New York Times  الأميريكية وده لينك المقالة الأصلية:
https://www.nytimes.com/2018/04/03/opinion/putin-cia-weakening-russia.html