سبب إننا حنجيب سيرة الموضوع ده اللي هو أصلاً يعني محدش بيفتحه في مصر كان الكلام اللي زي السم اللي طلع من بق كيس الشيتوس الحجم العائلي اللي بيحكم أميركا (دونالد بيه ترامب باشا) لإن خلينا نكون صرحاء مع بعض إن بسبب المصايب اللي عماله ترف علي المنطقة عندنا محدش عنده وقت ولا دماغ يتكلم عن باناما اللي لو نزلت الشارع في مصر قلت لحد يشاورلي علي مكانها علي الخريطة محدش حيعرف .. لما (ترامب) دخل الإنتخابات قصاد (كامالا هاريس) اللي كانت مرشحة الديموقراطيين قدامه مكنش ضمن أجندة حملته الإنتخابية أي كلام عن باناما .. محدش جاب سيرتها لا بالحلو ولا بالوحش .. هوبا (ترامب) يكسب الإنتخابات ويقوم يخترعلك خناقة مش بس مع باناما إنما مع كندا ومع الدانمرك بسبب جزيرة جرينلاند .. الدانمرك يا مؤمن .. اللي حصل إن (ترامب) في تصريحات ملهاش معني قال إن مش عاجبه إن قال إيه أمريكا بجلالة قدرها بتدفع فلوس زيها زي أي بلد تانية عشان السفن بتاعتها تعدي القناة .. شوف يا أخي عايز كل حاجة ببلاش وإن لو ده محصلش مش بعيد اميركا تتدخل عسكرياً وتحتل القناة وتاخدها وضع يد من باناما.
اللي حنحاول نشرحه النهاردة هو بهدوء كده نجاوب علي سؤالين:
- هو بالصلاة علي النبي إيه هي قناة باناما؟ .. بمعني أخر .. إيه الفرق بينها وبين قناة السويس؟
- ليه (ترامب) عايز يرجع القناة تاني تحت سيطرة أمريكا؟
قناة باناما .. أذكر ما تعرفه عنها:
زي ما بنقول دايماً الحاجة أم الإختراع .. أمريكا بدأت تحس إنها بلد كبيرة بداية من سنة 1900 مع فكرة إن بقي عندها أسطول محترم وبقي عندها شركات معتمدة علي النقل البحري عشان تجيب فلوس .. كان زمان عشان سفينة تطلع من ميناء نيويورك أو ميناء نيوجيرسي في شرق البلد عشان توصل لميناء لوس أنجيلوس في غرب البلد فالسفينة دي كانت بتنزل لتحت في المحيط الأطلنطي تعدي جنب ساحل أميركا الشمالية كله .. تكمل سكتها قصاد ساحل أميركا اللاتينية كله .. تسحب كمان لتحت قصاد ساحل قارة أميركا الجنوبية كله عشان تلف من تحت خالص قصاد ساحل الأرجنتين من عندك كيب هورن Cape Horne اللي هو رأس الرجاء الصالح بس بتاع أميركا الجنوبية وتلف تاني في المحيط الهاديء وترجع تمسك الساحل الغربي لأميركا الجنوبية وتطلع فوق لحد لوس أنجيلوس .. رحلة اطول من الليلة السودا لمسافة 20,900 كيلومتر .. كان لازم حل وبسرعة وإلا كده مش حنخلص .. عشان بس تبقي مستوعب الرحلة .. السفن التجارية الحديثة عشان تروح من نيويورك لحد لوس أنجيلوس بأنها تلف من كيب هورن بتحتاج اسبوعين .. في حين إن عبور قناة باناما بيحتاج من 8 -10 ساعات .. إنت متخيل فرق الوقت واللي بيسمع في الفلوس.
أي حد مسك خريطة الأمريكتين كان عارف إن أقصر حتة ينفع تحفرها عشان توصل بين المحيطين الأطلنطي والهادي هي في باناما .. المشكلة في حاجتين:
- أول حاجة إن باناما هي منطقة غابات اسوائية .. عايزك تعرف إن سنة 1880 حصلت أول محاولة لحفر قناة هناك وحزر فزر مين اللي كان ماسك المشروع .. (فرانسوا ديليسبس) اللي كان ماسك حفر قناة السويس .. سواء قناة السويس أو قناة باناما الاتنين كانوا مشاريع محتاجين فلوس وعمال والأهم إرادة سياسية عشان تتغلب علي الصعوبات الجعرافية سواء كنت بتتكلم عن حفر في صحراء أو حفر في غابة .. بس يمكن عشان باناما مكنش فيها الخديوي (إسماعيل) الله يرحمه ويسامحه وده موضوع محتاج وقت عشان نتكلم فيه فمشروع حفر قناة باناما انتهي بكارثة صحية ومالية .. الاف العمال بيتقدروا بانهم علي الأقل خالص فوق 20,000 اللي اشتغلوا في الحفر ماتوا بالحمي الصفراء والملاريا والمشروع مالياً كان خازوق لدرجة إنه تسبب في افلاس الحكومة الفرنسية.
- ثاني حاجة إن لحد سنة 1903 باناما مكنتش بلد مستقلة ودي معلومة مش عند ناس كتير .. لحد السنة دي هي كانت جزء من الأراضي الكولومبية ولإن باناما كانت منطقة غابات استوائية فتقدر تقول إن كولومبيا كانت منفضة ليها ولا حد مهتم يستثمر ولا يطور ولا يصرف مليم فيها .. في نفس الوقت كولومبيا كانت قافله الباب علي أميركا إنها تيجي تحفر هي القناة لإن الأمريكان عايزين يبقي ليهم حق السيطرة الكاملة عليها والكولومبيين الكلام ده مش جاي معاهم سكة .. من زهقه فالرئيس الأميريكي وقتها (ثيودور روزفلت) بعت الأسطول الأميريكي لباناما قال إيه عشان يساعد الشعب البانامي يحقق استقلاله من كولومبيا .. لسه الشعب البانامي بيقول هيييييه الناس صحيت علي كابوس إن الإتفاق اللي عمله الأمريكان مع الحكومة البانامية الجديدة بعد الاستقلال إن في مقابل إننا ساعدناكوا تستقلوا من كولومبيا فانتوا حتدونا الحق في السيطرة علي القناة اللي احنا إن شاء الله حنحفرها علي أرضكوا.
سنة 1904 أميركا بتفق مع باناما إنها حتاخد الأرض اللي حتتعمل عليها القناة بحق إنتفاع بحيث باناما ملهاش علاقة بالأرض دي .. الأرض دي جزء من التراب الأميريكي وأيا كان الفلوس اللي بتيجي منها فباناما ملهاش حق تاخد مليم .. سنة 1913 بيتم افتتاح القناة في فترة رئاسة (وودرو ويلسون) .. يمكن أكتر حاجة بتعبر عن أكبر سرقة في تاريخ البني أدمين دي هي الأية 20 من سورة سيدنا يوسف اللي بتحكي عن الرحالة اللي لقوا سيدنا (يوسف) في البير .. وشروه بثمن بخس دراهم معدودة وكانوا فيه من الزاهدين ..اللي هو شوف نبي من أنبياء الله عليهم السلام بيتعمل فيه ايه .. نفس الفكرة هنا .. القناة اللي جابت للأمريكان مليارات كلفتهم 10 مليون دولار دفعة مقدمة راحت لباناما مقابل شراء الأرض اللي القناة حتتحفر عليها وفوقهم 250 الف دولار كل سنة .. إنت متخيل الرقم .. لو ده مش استعمار وسرقة موارد عيني عينك حتسميها ايه .. طبيعي إن سرقة زي دي تخلي دم الباناميين بيغلي .. مستقبل عيالنا راح وعشان خاطر ايه .. نستقل عن كولومبيا؟ .. ياخي عننا ما استقلينا.
عايزك تبقي فاهم إن قناة باناما كان وصل بيها الحل إنها بقت شبه إنك جيت في قلب منطقة عشوائية عملت كومباوند لرجال الاعمال وحاوطته بسور عالي .. جوه الكومباوند ده كل ما لذ وطاب من رغد العيش .. ملاعب جولف .. حمامات سباحة .. تطلع بره الكومباوند تلاقي صورة حية للفقر والجوع والمرض .. سنين من الحقد والكراهية والغضب عمالين يتشحنوا في قلوب الباناميين .. من 1913 والأمريكان مفخدين هناك وحاسين إن مفيش حاجة ممكن تنكد عليهم لحد ما جه يناير 1964 .. بعد 51 سنة من الاستعمار الأمريكاني لباناما الدنيا بتولع وبتقوم انتفاضة شعبية والباناميين بيقتحموا منطقة القناة ووسط الضرب بيموت 22 بانامي و 4 عساكر مارينز أمريكان .. من بعد اللي حصل ده وبقي واضح للكل إن الوضع ده مينفعش يكمل علي كده.
فضلت قضية قناة باناما دي صداع في العلاقة بين البلدين .. الباناميين شايفين إنه اتضحك عليهم .. الأمريكان شايفين إن القانون لا يحمي المغفلين .. من بعد انتفاضة 1964 ولمدة 13 سنة والمفاوضات تروح وتيجي .. سنة 1977 كان بيحكم أمريكا وقتها يمكن أطيب رئيس جه في تاريخها اللي هو (جيمي كارتر) اللي مضي اتفاقية مع حكومة باناما وقتها (عمر توريخوس) اتسمت اتفاقية كارتر توريخوس Carter-Torrijos Agreement بإن القناة حتعيش فترة تحت قيادة مشتركة بين الأمريكان والباناميين بحيث ترجع بشكل كامل لباناما يوم 13 ديسمبر 1999 وعلي فكرة الاتفاقية دي عشان تتمضي كانت خناقة لرب السما جوا أميركا لإنها احتاجت إن تلتين أعضاء الكونجرس يوافقوا وكتير كانوا رافضين فكرة إن أميركا ترجع القناة لأهلها .. بس فيه نقطة .. اتفاقية كارتر توريخوس فيها فقرة زي الخازوق كده هي اللي كيس الشيتوس الحجم العائلي ماسك فيها وبتقول إن من حق أميركا استخدام القوة العسكرية لضمان استمرار الملاحة في القناة وحنيجي للموضوع ده كمان شوية.
جدير بالذكر إن باناما دفعت من جيبها فوق 6 مليار دولار في استثمارات مباشرة في القناة لتوسيعها وصيانتها .. بداية من 2007 الباناميين هم عملوا 3 استثمارات يستحقوا إننا نجيب سيرتهم بسرعة:
- أول حاجة أنهم عملوا مناطق خاصة علي امتداد القناة يعني منهم واحدة مثلاً اسمها باناما باسيفيكو Panama Pacifico ودي منطقة صناعية .. فيه منطقة تانية سموها مدينة المعرفة City of Knowledge عشان تبقي معهد بحث وتطوير لإزاي ينموا موارد القناة.
- ثاني حاجة انهم عملوا خمس موانيء خدمية بس يمكن أهم حاجة إنهم بدأوا مشروع لتوسعة المجري المائي 3 أضعاف بحيث يقدر يعدي فيه سفن أكبر 3 أضعاف الحجم المتاح اللي هم استلموا بيه القناة من أميركا وده المشروع اللي بلع فوق 6 مليار دولار استلفتهم باناما وبتسدد فلوسهم حالياً.
- بسبب إن القناة منسوبها فوق سطح البحر فإنت عشان تخلي فيها مياه بتعتمد بنسبة كبيرة علي الأمطار الموسمية اللي بتنزل علي الغابات اللي في المنطقة .. لكن عشان الاحتباس الحراري ونقص معدلات سقوط المطر فباناما استثمرت 1.5 مليار دولار في محطة رفع بمضخات عشان تسحب مياه من الأنهار اللي حولين القناة وتضخها فيها.
منطق (ترامب) .. أبوبلاش كتر منه:
بداية إن يتجاب سيرة قناة باناما علي لسان كيس الشيتوس كانت في خطاب توليه الرئاسة يوم 21 يناير 2025 وعشان (ترامب) ده سرسجي أصلاً فخليني اترجملك كلامه كما لو كان هو بلطجي في حارة .. “باشا احنا بيتضحك علينا عشان ميصحش إن السفن الحربية بتاعتنا تدفع مليم وهي بتعدي في القناة اللي احنا حافرينها بنفسنا وبالصلاة علي النبي احنا أصلاً مكنش صح من الأول نرجع القناة لباناما .. لا وكمان الصين جايه تحط ايدها هناك .. لا يا باشا احنا ناخد القناة تاني” .. زي ما انت شايف هو سرسجي فعلاً بس ورا الكلام المرسل اللي مش مبني علي معلومة واحدة توحد ربنا ده فيه كام حاجة لازم تبقي إنت عارفها كويس .. زي ما الإقتصاد المصري بيعتمد علي الفلوس اللي بتدخلها قناة السويس فبرده باناما نفس الوضع .. سنة 2024 بس أرباح القناة وصلت 5 مليار دولار وده بيمثل تقريباً 23.6% من الفلوس اللي بتخش البلد .. هو 5 مليار دولار ده يبان رقم قليل بس خلي بالك إن باناما تعداد سكانها 4.5 مليون بني أدم فالفلوس بالنسبة للباناميين معيشاهم في نعمة الحمد لله.
من ضمن الأساسات اللي اتبنت عليها اتفاقية كارتر توريخوس هي إن قناة باناما كيان محايد .. بمعني .. طالما حتدفع يبقي تعدي أيا كان إنت مين وعشان كده أمريكا رغم إنها هي اللي بنت القناة إلا إنها بتدفع فلوس زيها زي أي بلد تانية .. طبيعي إن السؤال اللي بيدور في دماغك دلوقتي يكون طب هو سعر التذكرة بيتحدد علي أي أساس؟ .. هو بيتحدد علي أساس فكرة العرض والطلب وعلي حاجات من ضمنها إنت بتتكلم عن سفينة حجمها إيه وهل هو موسم جفاف ولا موسم أمطار موسمية لإن لو موسم جفاف فلازم محطة رفع المياة اللي بتملي القناة تشتغل وده بيحرق كهرباء فبيسمع في تكلفة العبور .. بمعني أخر .. الباناميين مش بيصحوا الصبح يقرروا يا تري التذكرة بكام .. فيه عوامل كتير بتخش مع بعضها في معادلة في الأخر بتديلك المبلغ اللي بيتدفع لكل سفينة.
تاني .. مشكلة (ترامب) الأساسية هي إنه عايز ميدفعش فلوس خالص عشان يعدي من القناة بس هو مينفعش يقول كده قدام الناس لإن ده حيخلي منظر أميركا قدام العالم إنها بلطجي بياكل حق الناس الغلابة .. طب والحل؟ .. لازم يلاقي فنكوش يشاور عليه ويقول بصوا بصوا عشان تعرفوا إني خايف علي مصالح أميركا .. والفنكوش ده هو إن الصين ليها وجود في باناما وده اللي محتاج يتشرحلك براحه .. دلوقتي قناة باناما دي بيخدمها زي ما قلتلك من شوية 5 موانيء هي اللي بتتحكم في حركة الملاحة في القناة .. فيه اتنين من الخمس موانيء دول تحت سيطرة شركة اسمها شركة موانيء باناما Panama Ports Company .. الشركة دي مملوكة لشركة اسمها شركة ميناء هاتيشسون القابضة Hutchison Port Holding والشركة دي مقرها في هونج كونج .. شركة صيني يعني .. حلو .. بعد ما (ترامب) في كلامة قال إن الصين حاطه رجلها في باناما ودي حاجة مش حلوة فهيئة قناة باناما اللي هي الجهة اللي بتتحكم في القناة ودي النسخة بتاعتهم من هيئة قناة السويس فتحت تحقيق في يناير 2025 في شغل شركة موانيء باناما .. حلو خالص .. في فبراير 2025 كانت فيه زيارة قام بيها وزير الخارجية الأميريكي (ماركو روبيو) لباناما وهو هناك قابل الرئيس البانامي (جوزيه راؤول مولينو) اللي قاله إن بلده قررت إنها تنسحب من مبادرة حزام وطريق Belt and Road Initiative أو BRI اللي عاملاها الصين .. حلو أوي .. لحد هنا باناما عملت كل حاجة تقدر تعملها عشان ترضي (ترامب) .. أو ده اللي هم متخيلينه.
يا جدعان مشكلة (ترامب) مش الصين .. مشكلة (ترامب) إنه مش عايز يدفع .. عشان كده يوم 5 فبراير ومن غير لا احم ولا دستور موقع وزارة الخارجية الأميريكية طلع من نفسه قال إن من هنا ورايح أميركا مش حتدفع فلوس علي حركة الأسطول الأميريكي في القناة اللي هم أًصلاً ملاليم يعني .. بناء علي كلام هيئة قناة باناما فانت بتتكلم عن 25.4 مليون دولار خلال 26 سنة يعني أقل من مليون في السنة .. منطق (ترامب) إن منين إنت بتقولي إن اتفاقية كارتر توريخوس بتدي أمريكا حق التدخل العسكري لضمان استمرار الملاحة وفي نفس الوقت بتدفعني فلوس علي حركة أسطولي في القناة .. علي الناحية الثانية اللي (ترامب) مش فاهمه إن الدستور البانامي بيقول إن هيئة قناة باناما رغم إنها مؤسسة حكومية بس لا تخضع لسيطرة الرئيس .. يعني مش عشان الرئيس البانامي (مولينو) يرضي (ترامب) يقوم مميل علي سيادة اللواء رئيس الهيئة يقوله خلي السفن العسكرية الأمريكية تعدي ببلاش .. (ترامب) يا جدعان تاجر في سوق البلح هو مش متخيل ومش قادر يستوعب ومش عاجبه إن فيه حاجة اسمها دولة مؤسسات .. هو شخصياً في أمريكا ماسك أجنة وشاكوش وعمال يكسر في مؤسسات البلد اللي بتقف قدامه وبتقوله إيه عم اللي انت بتعمله ده.
خليني أختم معاك إن مشكلة طريقة (ترامب) إنه يا عيني بيكون مركز فشخ علي التارجيت بتاعه اللي هو عايزه عشان يبان قدام الناس إنه أبوالعريف اللي رجع حق أميركا فبيبقي مش قادر يشوف الصورة الكبيرة وهي إن عادي تخسر فلوس دلوقتي عشان تكسب بعدين .. بمعني .. باناما جغرافياً في حتة اسمها أميركا الوسطي وهم الحقيقة 6 دول اللي هم باناما وكوستاريكا وجواتيمالا والسلفادور وهوندوراس ونيكاراجوا .. إنت فيه عندك اربعة من الستة في حضن الصين أصلاً .. أولهم كانت كوستاريكا من 2007 .. جواتيمالا أصلاً جزء من مبادرة BRI وهي من الدول اللي معترفة إن تايوان جزء من التراب الصيني .. فإنت مبدأياً كده عشان خاطر أقل من مليون دولار في السنة خسرت 6 دول .. لو عملت Zoom Out سيكا حتلاقي إن أكتر الدول المستفيدة من القناة هي دول أميركا الجنوبية التقيلة زي تشيلي وكولومبيا وبيرو .. عارفها انت الدول اللي بنتفرج عليها في كوبا أميركا دي .. الناس دي مش عاجبها اللي بيحصل وواقفة في صف باناما علي أساس اشمعني يعني أميركا متدفعش .. بوليفيا هي كمان مش عاجبها اللي بيحصل لإنها هي كمان من الدول اللي مرمية في حضن الصين .. الوحيد اللي يمكن واقف في صف أميركا في الخناقة دي هو الرئيس الأرجنتيني (خافيير ميلي) بس ده رجل لاسع فكك منه.
في نفس الوقت طريقة (ترامب) إنه يحمل الناس جمايل بتخلي منظره هو وحش قدامهم .. يعني مثلاً هو عشان قال يعني يبرر بلطجته علي باناما بإنه يفكر الناس بحجم التضحيات اللي قدمتها أميركا عشان القناة تتحفر فهو قال إن أميركا قدمت 3,500 قتيل ماتوا في الحفر .. هو أولاً الرقم غلط لإن اللي ماتوا في الحفر كانوا 5,600 بني أدم .. بس الأهم إنهم مكانوش أميركان .. هم كانوا عمال باناميين ومن دول أميركا الوسطي اللي حولين باناما .. لو عايز تعرف أميركا قدمت إيه فهي قدمت 300 واحد ماتوا بس في الحفر.
المصادر:
- مقالة بعنوان Why the Panama Canal is on President Trump’s agenda يعني ليه قناة بانما علي أجندة الرئيس (ترامب) نشرت في موقع معهد هارفارد كينيدي للدراسات Harvard Kennedy School وده لينك المقالة الأصلية:
Why the Panama Canal is on President Trump’s agenda | Harvard Kennedy School - مقالة بعنوان Panama turned its canal into a money maker. History shows why Trump’s threats are sounding the alarm bells يعني باناما حولت القناة بتاعتها لمكنة فلوس والتاريخ بيورينا ليه تصريحات (ترامب) بتخلينا نقلق نشرت علي موقع وكالة أخبار CNN وده لينك المقالة الأصلية:
Panama Canal: History shows why Trump’s threats are sounding the alarm bells | CNN - مقالة بعنوان The Crisis Trump is Causing in Panama Will Reach Far Into Latin America يعني الأزمة اللي عاملها (ترامب) في باناما حتسمع في أميركا اللاتينية نشرت في موقع معهد كارنيجي وده لينك المقالة الأصلية:
The Crisis Trump Is Causing in Panama Will Reach Far Into Latin America | Carnegie Endowment for International Peace - مقالة بعنوان Panama Canal: What you need to know now يعني قناة باناما: إيه اللي انت محتاج تعرفه نشرت علي موقع وكالة أنباء DW الألمانية وده لينك المقالة الأصلية:
Panama Canal: What you need to know now – DW – 01/08/2025
