موضوعنا اللي حنتكلم عنه النهاردة هو مالي .. مالي دي دولة أفريقية مبنسمعش عنها في مصر إلا إذا كان منتخبنا حيلاعبها في ماتش في تصفيات كأس عالم أو في بطولة الأمم الأفريقية .. غير كده إحنا منعرفش حاجة عن مالي ولا نعرف علمها ولا نعرف هي فين في أفريقيا أصلاً .. سبب إننا حنتكلم عن مالي هو إن في الوقت الحالي فيه حرب كبيرة بتدور في منطقة بتتسمي الساحل و المنطقة دي واسعة أوي بتمتد من حدود موريتانيا اللي هي دولة عربية بالمناسبة و بتقع علي المحيط الأطلنطي لحد دولة أريتريا و دي دولة بتقع علي البحر الأحمر يعني بتتكلم عن شريط واخد قارة أفريقيا كله بالعرض و مالي هي مركز الحرب اللي هناك دلوقتي.
زمان منطقة الساحل دي كان بيستخدمها التجار عشان ينقلوا بضاعة من كل شكل و لون .. ذهب و ملح و بهارات و حتي عبيد من جوه أفريقيا لدول شمال أفريقيا .. دلوقتي البضاعة اللي بيتم نقلها إختلفت شوية .. بعد ما كان بيتم الإتجار في الذهب و العطور و البهارات بقي الإتجار اليومين دول في المخدرات و السلاح بس فضل العبيد زي ما هم متغيروش .. يمكن الفرق إن دلوقتي العبيد بيبقوا في الغالب بنات بيتباعوا عشان يشتغلوا في الدعارة و إسمهم بقي مهاجرين غير شرعيين و دلوقتي تجار العبيد بقي إسمهم مهربين .. فيه Business بالمليارات لتهريب المخدرات اللي بتيجي من دول أميركا الجنوبية و بيعبروا بيها المحيط الأطلنطي لحد ما تنزل علي ساحل دولة إسمها غينيا بيساو و دي دولة الأمم المتحدة قالت صراحة كده إنها Narco-State يعني غينيا بيساو دي دولة إقتصادها قايم علي تهريب المخدرات .. دولة ماشية بفلوس حرام و المخدرات دي المهربين بينقلوها عن طريق مسارات هم عارفينها لحد ما توصل لدول شمال أفريقيا اللي من ضمنها مصر و بعد كده تتهرب لأوروبا.
فيه خريطة عندك و هي خريطة معقدة شوية بس توريك مهرجان التهريب للجميع اللي شغال في منطقة الساحل دي و لإنها خريطة معقدة شوية فخلينا مثلاً نتكلم علي مصر عشان بس نشوف سوا هو إحنا دورنا إيه في اللي بيحصل:
- عندك تهريب السلاح اللي هي الأسهم الحمرا .. إنت بيجيلك سلاح من اليمن يعدي البحر الأحمر يوصل لأرتيريا و بعد كده السودان و منها يتهرب جوه الصحراء الشرقية لحد ما يروح سيناء و طبعاً إنت محدش في الإعلام ولا في الحكومة بيتكلم عن السكة دي خالص .. أو إن السلاح يجي من اليمن يمشي جوه السعودية علي ساحل البحر الأحمر لحد ما يوصل سيناء برده .. خدت بالك إن مفيش سلاح بيجي من قطاع غزة زي ما بيتقالنا في الاعلام بتاعنا برده.
- تهريب البشر اللي هو الأسهم اللي لونها بني اللي واخد مصر ترانزيت و تقريباً هو واخد نفس المسارات بتاعة تهريب السلاح.
بس لو بصيت علي الخريطة حتلاقي فعلاً إن مركز عمليات التهريب دي كلها هو مالي و عشان تفهم قد إيه مالي عامله مشكلة خليني أقولك حادثتين حصلوا من فترة قريبة عشان تشوف بنفسك قد إيه الوضع هناك فعلاً زي الزفت:
- يوم 2 مارس 2018 حصلت شوية هجمات إرهابية متنسقة مع بعضها في أواجادوجو اللي هي تبقي عاصمة دولة بوركينا فاسو و دي دولة جارة لمالي .. الهجمات إستهدفت مقرات وزارة الدفاع و السفارة الفرنسية و مركز الثقافة الفرنسي و أدت لمقتل 28 بني أدم .. الجهة اللي أعلنت مسئوليتها عن الهجمات دي كانت منظمة تابعة لتنظيم القاعدة إسمها جماعة نصرة الإسلام و المسلمين.
- يوم 4 أكتوبر 2017 حصل كمين لمجموعة عسكرية مكونة من 40 جندي أميريكي و نيجيري جوه مالي علي يد مجموعة مسلحة من الإسلاميين و حصل إن فيه 4 من عناصر القوات الخاصة الأميريكية ماتوا في الهجوم ده و ده خلي ناس كتير جوه أميركا تسأل هو إحنا بنعمل إيه في مالي؟ و ليه كانت فيه قوات نيجيرية هي كمان جوه مالي؟ و هو إيه اللي بيحصل في مالي بالضبط؟
عشان كده إحنا حنحاول بسرعة أوي نفهمك هو مين بيحارب في مين في مالي؟ و ليه؟ .. الحرب في مالي دلوقتي متفرقش كتير عن الحرب في سوريا اللي هي حرب بين كذا طرف ولا واحد فيهم عارف يحسم الحرب لصالحه و فيه أطراف كتير أوي في اللعبة و محدش عارف الوضع حيخلص علي إيه:
الطوارق:
دي قبيلة عايشة في منطقة الساحل و متوزعين علي كذا بلد اللي هم زي الأكراد كده .. (معمر القذافي) الله يرحمه كان مجند 5000 مقاتل منهم جوه القوات المسلحة بتاعته بس لما نظامه إنهار سنة 2011 الناس دي رجعت مالي تاني بسلاحها و تدريبها اللي خدته .. بسبب تدريبهم و تسليحهم اللي خدوه من أيام ما كانوا في ليبيا فالطوارق قدروا إنهم يعملوا دولة ليهم اللي هي حاجة كده شبه وضع اليد علي الأرض و سموا الدولة دي أزواد و الكلام ده كان في 2012 بس الدولة دي محدش معترف بيها.
سنة 2015 إتوقعت معاهدة سلام بينهم و بين حكومة مالي .. الطوارق لإنهم مش حاجة واحدة فمسميين نفسهم دلوقتي تحالف التنسيق بين حركات أزواد أو CMA إختصاراً .. اللي يضحك إن معاهدة السلام اللي الإخوة في CMA مضوها مع مالي هم قانوناً ممضوهاش مع حكومة مالي لإنهم مضوها مع كيان إسمه تحالف الجماعات المسلحة اللي هم كل الجماعات المسلحة اللي بتحارب بالنيابة عن حكومة مالي .. يعني الناس دي واخدة فلوس من حكومة مالي عشان هم اللي يحاربوا الطوارق بالنيابة عن الجيش المالي .. بس الحقيقة الطرفين مش ملتزمين أوي بالمعاهدة دي لإن خلينا نبقي صرحاء مع بعض دي مش دول مضت إتفاقيات مع بعضها إنما شوية ناس معاهم سلاح قعدوا مع بعض و إتفقوا يبطلوا ضرب في بعض شوية .. سنة 2016 لوحدها الطرفين خرقوا الهدنة 174 مرة و في سنة 2017 حصلت خروقات للهدنة 72 مرة لحد ما ربنا كرمهم و في سبتمبر 2017 الطرفين وقعوا إتفاق وقف اطلاق نار.
التنظيمات الإسلامية:
و الحقيقة إن ده لوحده منتخب من الجماعات الإسلامية المسلحة اللي فيه منها بيتحسب علي تنظيم القاعدة و فيه منها بيتحسب علي داعش و فيه مجموعات تانية بتطلع فجأة زي شركات الStartup كده بتحب تعمل إسم لنفسها بس الثابت إن المجموعات المسلحة دي كلها بتكره بعضها و معندوهمش مشكلة يقتلوا في بعض رغم إن علي الورق كلهم بيتقال عليهم تنظيمات إسلامية ..عندك مثلاً من التنظيمات الإسلامية المسلحة اللي لا ليها علاقة بداعش ولا بالقاعدة تنظيم إسمه جماعة نصرة الإسلام و المسلمين اللي قلتلك إنه نفذ الهجوم بتاع 2 مارس 2018 اللي حصل في بوركينا فاسو و دول أساساً كانوا 3 جماعات مسلحة إشتركوا مع بعض اللي هم أنصار داين و جبهة تحرير ماكينا و المرابطون و الحقيقة إن إتحادهم خلاهم قوة محترمة جداً لدرجة إن تنظيم القاعدة في المغرب العربي أعلن انضمامه ليهم و هم خدوا الماركة أو البراند بتاعة تنظيم القاعدة و إعتبروا نفسهم فرع للتنظيم في مالي.
التحالفات بين الدول الأفريقية:
فيه تحالفين إتعملوا عشان يقدروا يواجههوا الطوارق و التنظيمات الإسلامية و التحالفين دول عاملين زي (تيمون) و (مومبا) اللي هم المفروض إنهم صحاب و المفروض إنهم متحالفين مع بعض بس مقضييينها غناء و رقص من غير ما يكون ليهم تأثير حقيقي علي الأرض .. التحالف الأول مكون من 5 دول اللي هم بوركينا فاسو و تشاد و مالي و موريتانيا و النيجر و مسميين نفسهم G5 و مع بعض مشكلين قوة مسلحة من 5000 مقاتل .. التحالف الثاني مكون من 5 دول برده اللي هم بينين و الكاميرون و تشاد و النيجر و نيجيريا و مسميين نفسهم Multinational Joint Task Force أو القوة الدولية المشتركة اللي هو تحس إنهم سارقين الإسم من حلقة من كارتون باور رينجرز بس التحالف ده معمول مخصوص عشان مواجهة تنظيم بوكوحرام و ده تنظيم إسلامي إرهابي نيجيري و عاملين مع بعض قوة مسلحة من 7500 مقاتل .. سبب إني شبهت التحالفات دي بإنها شبه (تيمون) و (مومبا) هو إن في يناير 2015 التحالف الثاني إتعرض لهجوم قوي أوي إستهدف مقره في مدينة باجا النيجيرية و مقاتلي بوكوحرام سيطروا علي المبني فعلاً و من ساعتها و مقر التحالف إتنقل من نيجيريا اللي هي المفروض البلد اللي قاعد فيها بوكوحرام و ودوه عاصمة تشاد اللي هي نجامينا عشان ميتضربش تاني.
التحالفات الدولية اللي المفروض إنها بتساعد التحالفين الموجودين بين دول أفريقيا:
ده بقي كوكتيل متفهمش هم شغالين مع بعض ولا عكس بعض .. الأمم المتحدة ليها قوة حفظ سلام إسمها مينوسما MINUSMA بس ملهاش أي لازمة و فالحين بس يموت منهم ناس كل كام يوم و أخر حادثة كانت في أول مارس 2018 لما 4 جنود من قوة حفظ السلام دي ماتوا في إنفجار عبوة ناسفة جنب عربيتهم في مالي .. الفرنسيين ليهم قوة عسكرية كبيرة ضمن عملية بيسموها عملية بارخان Operation Barkhane قوامها 3000 مقاتل و يمكن دول أكتر ناس فاهمين هم بيعملوا إيه في مالي .. الإتحاد الأوروبي بيحاول يعمل مقر تنسيق بين كل الجهات دي عشان محدش يعيد شغل حد بس كعادة الأوروبيين اليومين دول لا هم فاهمين بعض ولا إحنا فاهمينهم .. الأمريكان ليهم وجود ممثل في أفريكوم AFRICOM و دي تبقي قيادة القوات الأميريكية في أفريقيا و دول ليهم وجود كبير أوي في النيجر و شغالين علي تدريب القوات المسلحة للدول الأفريقية و الأمريكان حالياً شغالين علي بناء قاعدتين عسكريتين كبار أوي ليهم في النيجر منهم واحدة حتبقي قاعدة طيارات بدون طيار Drones بس تحس إن الأمريكان هناك ماشيين علي قشر بيض اللي هو ليهم قاعدة عسكرية بس مبيطلعوش منها إلا فيما ندر و لو طلعوا منها بيموت ليهم ناس زي اللي حصل في هجوم النيجر لما مات ليهم 4 عناصر من القوات الخاصة بتاعتهم.
الوضع في مالي و في منطقة الساحل كلها زي الزفت و حيفرقع في وش الكل قريب .. إحنا بس قلنا نوريك لمحة من اللي بيحصل هناك عشان لما تسمع في الأخبار إن الوضع طلع بره السيطرة تبقي فاهم هو مين بيعمل إيه هناك.
المصدر:
مقالة اسمها The unwinnable war in the Sahara that the west doesn’t want you to know about نشرت في جريدة The New Statesman و ده لينك المقالة الأصلية:
http:// https://www.newstatesman.com/world/africa/2018/03/unwinnable-war-sahara-drones-Africa-western-governments-don-t-want-you-know-about
