اللي ححكيه النهارده و أنا بقول من الأول أهو حصل بحق و حقيقي .. دي مش فكرة سيناريو فيلم .. دي مش أحداث رواية .. اللي ححكيه النهارده حيخليك تصدق فعلاً مقولة إن أحيانا الواقع بيكون أغرب من الخيال .. زي ما أي قصة في الدنيا ليها البطل بتاعها فقصة النهارده بطلها هو الخوف .. انا شخصياً شايف إن الخوف هو السبب ورا كتير من الحاجات اللي بنعملها في حياتنا .. حضرتك بتقرر تصلي الخمس فروض في معادهم و جماعة في المسجد مش عشان حضرتك عايز الناس تقول الواد المؤمن راح الواد الشيخ جه قد ما انت بتعمل كده عشان خايف من ربنا .. انت بتبر بأبوك و أمك مش عشان الناس علي السوشيال ميديا تقول الواد البار بأبوه و أمه أهو أهو إنما عشان انت خايف من حقيقة إن كما تدين تدان وزي ما انت بتعامل باباك و مامتك وحش عيالك كمان حيعاملوك وحش .. انت بتسهر في شغلك ومش بتروح عشان خايف علي أكل عيشك مش عشان حضرتك بتحب شغلك و عايز تحقق ذاتك عملاً بالمقولة الصادقة اللي بتقول انت عبد مش صاحب مكان .. ده لو انت بتتكلم عني و عنك وعن الناس اللي حولينا .. لما بتيجي تتكلم عن دول بقي فالخوف بيلعب دور رهيب في إنه يعكنن علي الشعوب عيشتهم.
عشان تفهم إزاي الخوف سلاح جامد زحليقة في إيد أي سياسي في الدنيا بص علي بني أدم إسمه (رونالد ريجان Ronald Reagan) .. (ريجان) كان ممثل .. مش قصدي إنه كان بيخليك تصدق كلامه مع إنه كذاب .. هو كان فعلاً ممثل سينما .. كونه ممثل فده معناه إنه لو معاه سيناريو مكتوب حلو و كاميرا فهو يقدر يقنعك بأي حاجة مكتوبة في السيناريو زيه زي أي ممثل شاطر .. و (ريجان) كان ممثل شاطر .. شاطر أوي .. و السيناريو اللي معاه كان مرعب.
سنة 1980 (ريجان) دخل الإنتخابات الرئاسية الأميريكية ضد الرئيس وقتها (جيمي كارتر Jimmy Carter) .. ولإن الثمانينات بالنسبة لشباب الجيل بتاع دلوقتي بعيدة عن إستيعابهم لإنها بتتحط في نفس الخانة مع (أم كلثوم) الله يرحمها فخليني أفكرك إن (كارتر) كان هو رئيس أميركا وقت توقيع إتفاقية السلام بين مصر و إسرائيل .. (كارتر) كان رجل طيب .. ده حقيقي علي فكرة .. أي حد قاري شوية في السياسة الأميريكية عارف إزاي الرجل ده جمعيته الخيرية اللي عملها بعد ما طلع من الرئاسة أنقذت حياة الالاف من البني أدمين في أفريقيا ويمكن هي دي كانت مشكلته .. طيبة (كارتر) مكنتش تقدر تقف قدام الكاريزما بتاعة (ريجان) .. (ريجان) بص للأمريكان وقالهم عارفين مين السبب ورا كل مشاكلكوا؟ .. مين السبب ورا إنكوا مش لاقيين شغل؟ .. مين السبب ورا الفقر و الجوع و المرض؟ .. السوفييت .. و انا اللي حخلص علي السوفييت .. و المصيبة إن الأمريكان صدقوه.
(ريجان) كان متخصص في إنه يقف قدام الكاميرا و يمسك ورقة و الكلام اللي يطلع من بقه يحسسك إن الروس دول هم يأجوج و مأجوج .. كان له قدرة غريبة علي إقناع الأمريكان إن الروس هم شياطين الإنس .. سنة 1982 بعد سنتين من رئاسته راح قال خطاب قدام البرلمان البريطاني قال فيه نصأ إن مصير روسيا هو محرقة التاريخ .. يوم 8 مارس 1983 قال خطاب مشهور أوي وصف بيه الإتحاد السوفيتي بإنه مصدر كل الشر في العالم و إن روسيا هي إمبراطورية الشر علي الأرض .. علي رأي (محمد سعد) في فيلم اللمبي .. هار أسود علي الكلام.
ومش بس الكلام .. كتير من الأسلحة اللي أميركا بتبيعها دلوقتي و قواتها معتمده عليها إتصممت و إتعملت أيام (ريجان) عشان الهسهس اللي كان مسيطر علي وزارة الدفاع الأميريكية هو الخوف من روسيا .. علي إيد وزير دفاعه (كاسبر واين-بيرجر Casper Weinberger) أميركا صنعت الأسلحة الجاية دي .. جاهز؟ .. الدبابة M1 Abrams اللي بعد كده بقت سلسلة طويلة أخرها M1A2C Abrams .. الغواصات النووية طراز ترايدينت Trident .. الطيارة الشبح B-2 و القاذفة B-1 Lancer اللي كانوا أساسا مشاريع إتلغت في عهد (كارتر) و (ريجان) رجعهم تاني للحياة و فضل وراهم لحد ما إتعملوا .. من أول ما (ريجان) مسك الحكم وهو مش بقه غير لبانة إنه عايز يخلي القوات البحرية الأميريكية فيها 600 قطعة بحرية و ده أساسا هدف خزعبلي و عشان يحققه رجع للخدمة4 بارجات من اللي شاركوا في الحرب العالمية الثانية كانوا خلاص طلعوا معاش .. كل ده كوم و اللي حصل يوم 23 مارس 1983 كوم ثاني .. في اليوم ده هو طلع أعلن عن مشروع SDI و دي إختصار Strategic Defense Initiative أو مبادرة الدفاع الإستراتيجي وعشان إسمها مش حلو فهو قال علي البرنامج ده إسم دلع سيكسي أوي اللي هو مشروع Star Wars .. الفكرة إن ليه لا نرص شوية أقمار صناعية في الفضاء عشان تصطاد الصواريخ الباليستية اللي روسيا حتضربها علينا .. بص هي فكرة هابلة وممكن نبقي نتخانق انا و انت عليها بعدين بس ده مش موضوعنا دلوقتي بس انت مستوعب قد إيه الرجل ده كان مخوف الأمريكان من السوفييت؟
كل ده ليه؟ .. كل الصرف ده إيه سببه؟ .. الخوف .. الخوف من إن في أي لحظة الروس حيضربونا بالنووي .. الخوف اللي (ريجان) بني عليه حملته الإنتخابية و بني عليه الكاريزما بتاعته .. من غيري انتوا ملكوش فرصة إنكوا تقفوا قدام السوفييت .. انا حامي حمي الرأسمالية و الديموقراطية و الحرية الغربية .. انت فعلياً مش متخيل إزاي هو إستغل الإعلام بطريقة فعالة جداً إنه يوصل للأمريكان الإحساس ده .. هو كان مجرد تمثيل .. (ريجان) طول ما هو واقف قدام كاميرا هو كأنه ممثل بيجسد شخصية .. اللي هو حاجة كده زي الفرق بين الممثل (أحمد زاهر) و شخصية (فتحي) اللي جسدها في مسلسل البرنس بتاع (محمد رمضان) .. مجرد أداة في إيده عشان يفضل في السلطة و يكسب الإنتخابات بس وقتها محدش كان شايف كده .. وقتها كان كتير من الأمريكان شايفين إن فعلاً (ريجان) عايش في هسهس إن الروس حيضربونا بالنووي .. الأهم إن الروس نفسهم بقوا مقتنعين بكده برده .. عشان كده انا عايز أكلمك شوية علي الناحية الثانية بقي .. الخوف اللي عند الروس .. الخوف اللي ملي قلب و عقل (يوري أندروبوف Yuri Andropov) سكرتير عام الحزب الشيوعي السوفيتي.
(أندروبوف) كان رجل وطني بكل ما تحمله الكلمة من معني .. رجل فعلاً خايف علي بلده .. ده رجل حارب في الحرب العالمية الثانية .. بعد الحرب إشتغل في المخابرات العامة السوفيتية لحد ما مسك منصب مدير عام KGB .. في نوفمبر 1982 بعد وفاة (ليونيد بريجينيف Leonid Brezhnev) سكرتير عام الحزب الشيوعي وقتها فرجالة الحزب هم اللي إختاروا (أندروبوف) عشان يمسك البلد .. (أندروبوف) يمكن عشان هو رجل مخابرات .. يمكن عشان هو مجربش يعني إيه إنتخابات و يعني إيه ديموقراطية .. يمكن عشان هو مش متخيل إن إزاي عشان أمسك سلطة فانا طول ما انا وقف قدام الناس كأني بمثل شخصية فهو كان شايف إن فعلاً حقاً و صدقاً يعني (ريجان) عايز يخربها و يقعد علي تلها .. الإحساس أو خليني أقول اليقين اللي بقي عند (أندروبوف) إن (ريجان) مش حيرتاح إلا لما يشوف روسيا مولعة ودي الحاجة اللي هو عمره ما حيسمح بيها .. أصل أنا محاربتش النازيين و هزمت (أدولف هتلر) عشان أشوف المشخصاتي ده بيهزم بلدي.
بعد ما الحمد لله إتحطيت في الصورة جه الوقت إني كلمك عن سنة 1983 .. دي السنة اللي صينية الخوف طلعت من الفرن .. بعد 3 سنين من الكلام جه وقت الفعل .. بعد 3 سنين من تلقيح الكلام جه وقت إن الأعصاب تفلت .. حتي لما الأعصاب فلتت ده محصلش من يوم وليلة .. اللي ححكيه دلوقتي هو تسلسل الأحداث اللي في الأخر كانت حتكون السبب ورا إن العالم يقول القاضية ممكن القاضية ممكن.
إبريل و مايو 1983 .. مناورة FLEETEX83 المستفزة:
تخيل إنك تبقي متخانق مع جارك و تقوم مقرر عشان تعكنن عليه عيشته تعمل حفلة عيد ميلاد و تجيب DJ و الحفلة تفضل مكملة طول الليل لحد تاني يوم .. اللي هو صباح الإستفزاز يعني .. وسط كل الكلام علي إن روسيا هي إمبراطورية الشر في العالم و إن العالم مش حينفع يساع إن أميركا و روسيا يفضلوا عايشين مع بعض في نفس الكوكب تيجي القوات البحرية الأميريكية تعمل أكبر مناورة بحرية ليها من وقت الحرب العالمية الثانية في المحيط الهاديء قصاد سواحل روسيا يبقي ده ملوش إلا إسم واحد .. جر شكل.
تخيل حضرتك قاعد مكان الروس .. انت شايف مناورة بحرية بتقوم بيها أميركا بتشارك فيها 40 قطعة بحرية .. كتير انا عارف .. زود علي كده إنهم كانوا 3 حاملات طائرات اللي هم إنتربرايز Enterprise و بحر كورال Coral Sea و ميدواي Midway بسلاطاتهم و بابا غنوجهم .. في حالة إنك مش فاهم يعني إيه حاملة طائرات بسلاطاتها و بابا غنوجها فحاملة الطائرات سيدي القاريء مش بتمشي لوحدها .. هي بتمشي معاها عزوتها من مدمرات و فرقاطات و سفن إمدادات و غواصات .. 40 قطعة بحرية إنت شايفهم بعنيك بيلعبوا إستغماية مع بعض قصادك .. في مرحلة من مراحل المناورة سرب من 6 طيارات F-14 Tomcat فعلياً إخترقوا المجال الجوي السوفيتي لما طاروا فوق جزر كوريل ودي مجموعة جزر عليها خناقة بين الإتحاد السوفيتي و اليابان .. طبعاً الأمريكان قالوا إن دي غلطة مش مقصودة بس انت بس عايزك تتخيل إزاي الروس كانوا شايطين.
سبتمبر 1983 .. إسقاط الطيارة الكورية الجنوبية 007:
من بعد مناورة FLEETEX83 و الأمريكان بقوا بيعملوا حاجة تعصب الحقيقة .. كل شوية يبعتوا طيارة إستطلاع تطير فوق المجال الجوي السوفيتي .. عشان السوفييت بيخافوا يضربوا الطيارة بصاروخ أرض- جو من منظومة الدفاع الجوي بتاعتهم علي أساس إنها لو طيارة مدنية و تاهت و دخلت المجال الجوي السوفيتي بالغلط حتبقي مصيبة لو الروس وقعوها و في نفس الوقت لو وقعوا طيارة أمريكاني حتبقي مصيبة أكبر فالحل كان إن دايما بمجرد ما الرادارات الروسية تلقط طيارة مشتبه إنها طيارة إستطلاع أميريكية دخلت المجال الجوي بتاعهم بتطلع طيارات مقاتلة سوفيتية عشان تعترضها .. المشكلة إن الأمريكان مش عبط وبقوا بيحسبوا هم الطيارين الروس محتاجين وقت قد إيه عشان يعترضوا الطيارة فاللي بيحصل إن لما الطيار الروسي يوصل فعلاً للمكان اللي إتلقطت فيه الطيارة الأمريكاني بتكون هربت و رجعت تاني بلدها.
مرة في مرة في مرة و الروس بقوا فعلاً علي أعصابهم .. ولإن اللي ميقدرش علي الحمار بيتشطر علي البردعة فاللي كان بيشيل الطين هم الطيارين الروس .. القيادة السياسية مش عارفه تاخد لا حق ولا باطل من أميركا فتلاقي كل شوية جزاءات نازلة ترف فوق دماغ الطيارين الروس علي أساس إنهم مطلعوش بطياراتهم بالسرعة الكافية اللي تخليهم يعترضوا الطيارات الأمريكاني .. لحد ما جه يوم 1 سبتمبر 1983.
ليلة 1 سبتمبر 1983 بطارية رادار سوفيتية لقطت طيارة إتقال لحظتها إنها طيارة إستطلاع أميريكية طراز RC-135 اخترقت المجال الجوي السوفيتي فوق مجموعة جزر ساخالين Sakhalin Islands .. عشان تبقي برده معايا في الصورة و فاهم الدنيا .. فيه حتة في روسيا إسمها شبه جزيرة كاماتشاتكا Kamchatka Peninsula قريبة جدا من اليابان .. المهم إن كتير من تجارب إطلاق الصواريخ العابرة للقارات اللي بتعملها روسيا بتطلع من شبه الجزيرة دي .. حلو .. عشان كده الأمريكان حاطين سرب طيارات إستطلاع طراز RC-135 في حتة إسمها جزر أليوشينAleutian Islands يدوبك فرده كعب من شبه جزيرة كاماتشاتكا .. ليه؟ .. عشان يفضلوا مراقبين تجارب إطلاق الصواريخ اللي بيعملها الروس و يشوفوا الصاروخ وهو بيطلع و يصوروه و يدرسوه و يشوفوا مداه .. إذن طبيعي و منطقي إن بمجرد ما ضابط الرادار في الليلة السودا دي لقت طيارة إخترقت المجال الجوي في الحتة دي إنها غالباً بنسبة كبيرة طيارة إستطلاع أميريكية .. و زي ما حكيتلك من شوية إن في موقف زي ده الStandard إن بتطلع طيارات سوفيتية لإعتراض الطيارة الأمريكاني .. وزي ما قلتلك برده من شوية إن القيادة الروسية كانت متضايقة إن الطيارين الروس مش بيلحقوا يمسكوا الطيارات الأمريكاني .. كل ده خليه في دماغك كويس أوي وانت معايا في بقية القصة.
صدر قرار بإن تطلع طيارتين سوخوي-15 بسرعة عشان يعترضوا الطيارة الأمريكاني .. أي سرب من طيارتين بالشكل ده بيبقي فيه طيارة فيهم أو طيار فيهم بيتقال عليه Lead Pilot وده اللي بيدي القرار .. في الليلة اللي زي الطين دي الLead Pilot من ضمن الطيارتين سوخوي-15 كان ملازم أول طيار (جينادي أوزيبوفيتش Gennady Osipovich) و اللي قرب بما يكفي عشان يشوف بعنيه الطيارة الأمريكاني .. هو شاف طيارة كبيرة حبتين بأربع محركات .. أول ما شافها قال بااااااس دي طيارة RC-135 فعلاً زي ما ضابط الرادار قال ..(أوزيبوفيتش) حاول يبعت إشارات لاسلكية للطيار بتاع الطيارة الأمريكاني بس محدش رد عليه .. بعدها جاله أمر بالراديو من قيادة سلاح الجو السوفيتي بإنه يوقع الطيارة الأمريكاني .. (أوزيبوفيتش) في الأول ضرب طلقات تحذيرية من المدفع الرشاش بتاعه علي أساس إن الطيار الأمريكاني يحس علي دمه بس تقول إيه البعيد جبلة .. ده مخلاِش قدام (أوزيبوفيتش) غير إنه يضرب صاروخين R98 جو-جو علي الطيارة و شافها بعنيه وهي بتقع .. بمجرد ما وقعت بلغ في الراديو .. الهدف تم تدميره.
وسط جو الفرحة و تحيا روسيا 3 مرات اللي بقي منتشر بين الروس في الليلة دي محدش خد باله من إن شكل طيارة الإستطلاع RD-135 هو هو شكل الطيارة بوينج 747 .. السبب في كده هو إن الطيارة RD-135 ما هي إلا طيارة مدنية طراز Boeing 707 اللي تبقي بنت عم Boeing 747 بس إتشال منها كراسي الركاب و إتحط مكانها معدات إتصالات .. محدش خد باله إن الطيارة اللي (أوزيبوفيتش) وقعها مكنتش طيارة إستطلاع أمريكاني ولا نيلة .. دي كانت طيارة مدنية طراز Boeing 747 Jumbo Jet تابعة للخطوط الجوية الكورية الجنوبية رحلة رقم 007 بس الطيار بتاعها خرج بره المسار بتاعه بسبب عطل في أنظمة الملاحة و الإتصالات بتاعته .. محدش خد باله لحظتها إن اللي مات في سقوط الطيارة مش طيارين أمريكان إنما 267 بني أدم ملهمش ذنب ومن ضمنهم عشان ميكس النكد يكمل عضو في الكونجرس الأميريكي عن الحزب الجمهوري بتاع (ريجان) إسمه (لورينس ماكدونالد Lawrence McDonald).
يوميها العالم كله كان عرف بالكارثة اللي حصلت .. (ريجان) لإنه زيه زي أي ممثل بيبقي نفسه في مشهد درامي عشان يورينا قد إيه هو غول تمثيل ما صدق إن ده حصل و طلع في خطاب تليفيزيوني عاجل إتذاع في نفس الليلة قال فيه نصاً .. ” اللي حصل ده ميعملوش غير ناس مجرمين ناس طالعة من مجتمع مش بيعترف بحقوق البني أدمين و ناس دايماً بيحاولوا يفرضوا سيطرتهم و إرادتهم علي اللي جيرانهم” .. اللي محدش كان عامل حسابه عليه إن اليابانيين لقطوا الرسايل اللاسلكية اللي كانت بين قيادة سلاح الجو و بين (أوزيبوفيتش) .. اليابانيين خدوا نص الرسايل دي زي ما هو كده و بعتوه للأمريكان .. الأمريكان قصقصوه و شالوا منه حاجات كتير بحيث اللي إتنشر في الجرايد العالمية كان يدوبك هو الأمر بضرب النار و كلمة (أوزيبوفيتش) اللي كانت لوحدها دليل إدانة .. الهدف تم تدميره.
رد فعل السوفييت علي الكارثة كمان الصراحة كان غريب يعني .. في الأول قالوا إن مفيش طيارة وقعت ولا حاجة .. شوية وقالوا معلش أصل فيه غلطة حصلت .. شوية و قالوا إن الطيارة اللي وقعت كانت طيارة إستطلاع أميريكية أخترقت المجال الجوي الروسي و بناء عليه هم كان عندهم حق إنهم يوقعوها .. مش كده وبس .. دول صرفوا مكافاءة 200 روبل ل(أوزيبوفيتش).
29 سبتمبر 1983 .. (أندروبوف) بيقول لا تراجع ولا إستسلام القبضة الدامية:
بعد أقل من شهر من كارثة إسقاط الطيارة الكورية الجنوبية بيطلع (أندروبوف) يقول كلام غريب جداً في بيان رسمي موجه للشعب السوفيتي إن طالما البني أدم السقيل اللي إسمه (رونالد ريجان) ده قاعد علي الكرسي هناك في بلاد الهيبيز و الماكدونالدز فلن يكون هناك سلام بين الدب الروسي و العم سام .. شوف يا إبني .. إن يطلع رئيس دولة يلقح بكلام علي دولة تانية ده حماده وإن يطلع رئيس دولة يقول إنه مش حيتفاوض ومش حيقعد علي طرابيزة واحدة مع رئيس دولة تانية ده حماده تاني خالص خصوصا لو بتتكلم عن القوتين العظمتين في العالم .. ناس كتير خدت الكلام ده و حاولت تقول ل(أندروبوف) إستهدي بالله بس لكن اللي حصل بعد كده حط الحقيقة المرة قدام العالم .. أميركا و روسيا إتحطوا علي قضيب قطر الحرب.
25 أكتوبر 1983 .. غزو الأمريكان لجرينادا:
غالبا انت متعرفش تطلع إيه جرينادا دي .. فيه منكوا أصلا حيتخيل إني بتكلم عن مدينة جرانادا اللي هي غرناطة في إسبانيا .. الحقيقة انا بتكلم عن جزيرة صغيرة في البحر الكاريبي إسمها جرينادا ومن غير ما نخش في تفاصيل ممكن ميبقاش دلوقتي مكانها ولا وقتها فخلينا نختصر الدنيا بإن الجزيرة دي وقتها كانت فيها خناقة بين طرفين المفروض إنهم حاجة واحدة .. الطرف الأولاني هو جيش الثورة الشعبي ودول كانوا حوالي 1,200 مقاتل و الطرف الثاني هم مليشيات كوبية عددهم كان بيتقدر بحوالي 780 مقاتل .. في حالة إنك لسه مش لاقط الفكرة فالطرفين دول المفروض إنهم شيوعيين و المفروض إن ولاءهم لروسيا بس الإتنين إتخانقوا علي مين فيهم يحكم الجزيرة .. عادي بتحصل كتير .. المشكلة إن في وسط الخناقة دي كان فيه 250 طالب أمريكاني في كلية طب جامعة القديس جورج في الجزيرة إتاخدوا رهاين .. هوبا (ريجان) إعتبر ده مبرر كافي إن القوات المسلحة الأميريكية تغزو الجزيرة .. خلال 48 ساعة كانت القوات الأميريكية سيطرت علي الجزيرة بعد ما إتقتل ليهم 134 عسكري قصاد 500 قتيل من الطرفين اللي زي ما قلتلك هم الإثنين بينتموا لحاجة واحدة.
(أندروبوف) و الروس كلهم الحقيقة بصوا للي حصل في جرينادا و الخوف ملي قلبهم .. لا خوف إيه ده رعب .. هم شافوا بعنيهم الأمريكان وهم متعلموش من درس كوريا الشمالية و من درس فيتنام .. الأمريكان ملاهم العند و عمي قلوبهم الخوف من الروس لدرجة إنهم عشان قال إيه يحلوا أزمة رهاين بعتوا قوات تحتل بلد تانية .. (أندروبوف) بعد اللي حصل في جرينادا وهو إتاكد جواه إحساس إن (ريجان) حيخربها و يعد علي تلها .. (ريجان) مش حيرتاح إلا لما يشوف موسكو بتولع.
نوفمبر 1983 .. مناورة Able Archer .. حنموت كلنا:
لو انت كبني أدم معندكش القدرة إنك تحط نفسك مكان اللي قدامك عشان تفهم هو ممكن يكون بيفكر و بيحس بإيه فصدقني انت ممكن تعمل مصايب وانت مش داري .. محدش من الأمريكان وهو بيشرب سيجارة في البلكونة كده سأل نفسه هو يا تري بعد غزو جرينادا الروس شايفينا إزاي؟ .. سبب إني قلت كده هو إن بعد إسبوع واحد بس من اللي حصل حلف شمال الأطلسي و بسرية مطلقة بدأ يستعد لأكبر مناورة عسكرية يعملها في تاريخه من بعد الحرب العالمية الثانية .. مناورة الرامي الماهر Able Archer 83 .. هنا عشان خاطري حاول تستهدي بالله و تخيل نفسك مكان (أندروبوف) وانت بتشوف بعنيك اللي انا حقوله دلوقتي.
- حقيقة رقم واحد .. مناورة Able Archer 83 حتشارك فيها كل دول أوروبا الغربية المشاركة في حلف شمال الأطلنطي يعني بتتكلم عن تركيا و ألمانيا الغربية و فرنسا و بريطانيا و إيطاليا و طبعاً أميركا علي مدي 10 أيام بحيث إن فكرة المناورة كلها إن الدول دي حتتخيل إن روسيا بدأت غزو بري كاسح لألمانيا الغربية .. ليه ده حيحصل بناء علي منطق الخيال بتاع المناورة؟ .. قالك إن حتحصل حرب شبه حرب أكتوبر تاني و الخليج مش حيعرف يبعت بترول لروسيا .. زود علي كده إن يوغوسلافيا اللي وقتها كانت ضمن دول عدم الإنحياز قررت تنضم لNATO فالروس خافوا إن ده يكون بداية ثورة علي نفوذهم في أوروبا ..المناورة اخرها هو إيه اللي حيحصل لو الروس ضربوا أوروبا و أميركا بالصواريخ النووية؟
- حقيقة رقم إثنين .. اللي حيشرف علي المناورة دي هو مركز قيادة حلف شمال الأطلنطي في أوروبا و اللي إختصارا بيتسمي SHAPE ودي إختصار Supreme Headquarters Allied Powers Europe واللي مقره في مدينة كاستاو البلجيكية.
- حقيقة رقم ثلاثة .. المناورة حتبدأ بإن محطات المراقبة و بطاريات الرادارات اللي علي طول الحدود بين ألمانيا الغربية و الشرقية حتبدأ تبعت رسايل بإن القوات البرية الروسية بدأت فعلاً هجوم كاسح ضد يوغوسلافيا و الدول الإسكندنافية اللي هي فنلندا و النرويج و الدانمرك و السويد و كمان ألمانيا الغربية .. بفكرك إن الروس مكانوش عارفين إن فيه مناورة حتحصل .. المخابرات الروسية بدأت تلقط رسايل لاسلكية بتتبعت من علي الحدود بإن الروس بدأوا غزو بري .. طبعا الروس لا كانوا بيغزوا بري ولا نيلة فلك أن تتخيل إن الروس كانوا بيفكروا في إيه وهم بيقروا التقارير دي.
- حقيقة رقم أربعة .. المناورة إفترضت إن الغزو البري حيحتاج ما بين 7 ل10 أيام عشان روسيا تحتل ألمانيا الغربية كلها .. ده نفس التوقيت اللي حتحاجه القوات المسلحة الأميريكية لتوجيه ضربة نووية لروسيا وبناء عليه القوات المسلحة الأميريكية رفعت حالة التأهب القصوي كجزء من المناورة بحيث إن أول هدف حتضربه الصواريخ النووية الأميريكية هي العاصمة الأوكرانية كييف.. حلو .. اللي مش حلو إن مع اليوم الخامس للمناورة الروس شافوا الأمريكان بيرفعوا حالة التأهب فتخيلوا إن الأمريكان حيضربوهم بالنووي فعلاً.
ده السبب إن يوم 9 نوفمبر 1983 وده يبقي اليوم السابع للمناورة المخابرات البريطانية بدأت تكتب تقارير إن الروس عملوا حاجة غريبة جداً .. السرب الرابع المتوزع في ألمانيا الشرقية و في بولندا و اللي تحت إيده طيارات سوخوي-24 إتركبلها قنابل نووية إستراتيجية و بقت جاهزة للإقلاع في أي وقت .. مش بس كده .. تقارير المخابرات البريطانية قالت إن الطيارين الروس بقوا قاعدين جوه كباين القيادة بتاعة الطيارات علي مدرج الإقلاع زي ما يكونوا مستنيين الأمر في أي لحظة لضرب أهداف جوه أوروبا .. مش بس كده .. مخابرات حلف شمال الأطلنطي قالت إنهم لقطوا أكبر تحرك للأسطول الروسي في تاريخه .. علي فكرة انا لسه مخصلتش .. تقارير تانية قالت إن الروس جهزوا 300 صاروخ عابر للقارات واللي بيتسموا ICBM ودي إختصار Intercontinental Ballistic Missiles وبمجرد ما (أندروبوف) يدي الأمر الصواريخ دي كلها حتضرب .. هل تفتكر إن كده خلاص؟ .. لا لسه .. صدر أمر لكل الغواصات النووية السوفيتية إنها تجري لأقرب نقطة إطلاق تخلي صواريخهم توصل لأميركا.
كل التقارير دي وصلت لقيادة القوات المسلحة الأميريكية و ولا واحد فيهم إتهزله شعرة .. إيه يعني الروس يعملوا كل ده .. خليهم يقلقوا شوية .. هم أكيد عارفين إننا عمرنا ما حنضربهم .. شفت انا قلت إيه .. هم أكيد عارفين .. جابوا منين الثقة دي؟ انا معرفش .. الدنيا حتخرب ومحدش حاسس بحاجة لحد ما جه البني أدم اللي أنقذنا كلنا .. (أوليج جوردفسكي Oleg Gordievsky).
(أوليج) أتولد في عيلة كلها ضباط مخابرات .. عادي بتحصل .. فيه ناس بتتولد لعيلة كلها دكاترة وفيه ناس بتتولد في عيلة كلها مهندسين .. أبوه كان ضابط مخابرات .. أخوه إنضم للمخابرات العامة السوفيتية KGB سنة 1957 وهو شخصياً إنضم للجهاز سنة 1962 .. سنة 1983 إترقي لرتبة عقيد و إتعين مدير مكتب KGB في العاصمة البريطانية لندن .. بس اللي انت محتاج تفهمه إنه من سنة 1974 وهو شغال عميل مزدوج لصالح المخابرات البريطانية للنشاط الخارجي اللي انت إحتمال تكون عارفها باسم MI6 .. (أوليج) كان التجسيد لمقولة أليس فيهم رجل رشيد .. هو كان عارف إن Able Archer 83 مجرد مناورة وفي نفس الوقت هو كان شايف مدي الخوف و الرعب اللي سيطر علي القيادة السياسية السوفيتية لدرجة إنهم بقوا مقتنعين بإن الأمريكان حيضربوهم فعلاً بالنووي.
(أوليج) برده عشان قديم في الشغلانة فهو كان عارف إن الأمريكان مش حيصدقوا بسهولة إن فعلاً الروس مرعوبين وعشان كده هو صور الأوامر اللي طالعة بخط إيد (أندروبوف) بإنه يرفع حالة التأهب القصوي للقوات المسلحة السوفيتية و إنهم يستنوا أمر مباشر منه في أي لحظة لتوجية ضربة نووية لأميركا و بعت الأوامر دي كلها لضابط الحالة بتاعه في المخابرات البريطانية .. الورق ده كله وصل لمكتب رئيسة وزراء بريطانيا وقتها (مارجريث ثاتشر Margret Thatcher) اللي تقدر تقول إنهم عملت Forward للإيميل ده و كتبت عليه Urgently FYA لمكتب مدير وكالة المخابرات المركزية الأميريكية CIA وقتها (وليام كايسي William Casey) واللي بنفسه وداها ل(ريجان) في مكتبه في البيت الأبيض.
(ريجان) بعت بنفسه جواب ل(أندروبوف) حلفله فيه علي الإنجيل إنه مش حيضرب و برده (أندروبوف) مصدقوش .. (ريجان) بعت مستشاره الخاص (برينت سكوكروفت Brent Scowcroft) لموسكو عشان يتكلم مع (أندروبوف) شخصياً و يقنعه إن Able Archer مجرد مناورة و برده محدش صدقه .. لحد يوم 11 نوفمبر اللي هو أخر يوم في المناورة و القوات المسلحة السوفيتية فضلت علي أقصي درجات التأهب مستنيين أمر (أندروبوف) لتوجيه ضربة نووية لأميركا و ربنا سترها معانا .. الخوف هو أكتر حاجة بتحرك البني أدمين .. أوعي تنسي الحقيقة دي .. أوعي.
المصادر:
مقالة بعنوان In 1983, a NATO Military Exercise Almost Destroyed the World نشرت في مجلة The National Interest وده لينك المقالة الأصلية:
https://nationalinterest.org/blog/reboot/1983-nato-military-exercise-almost-destroyed-world-180529
مقالة بعنوان The War Game that Could Have Ended the World نشرت في موقع هيئة الإذاعة البريطانية BBC وده لينك المقالة الأصلية:
https://www.bbc.com/future/article/20181108-the-wargame-that-could-have-ended-the-world
