ناريندرا مودي .. العنصرية ضد المسلمين بالبرياني و الكاري.

لينك التسجيل الصوتي للمقالة علي ساوند كلاود:
https://soundcloud.com/user-112011687-312727988/gtxgbqyh9aai?si=49d69f0a20374f538b6cdd68c7cebf27&utm_source=clipboard&utm_medium=text&utm_campaign=social_sharing

مفيش شخصية سياسية عليها خناقة ما بين إنه أحسن إختراع في الحلويات بعد الإكلير بتاع سيدرا و بين إنه أسوأ إختراع بعد أي إكلير بيتباع عند أي حلواني تاني من (ناريندرا مودي Narendra Modi) .. في حالة إنك متعرفش مين ده ف(مودي) يبقي رئيس وزراء الهند و الرجل ده الناس مختلفة عليه لدرجة إنك لو مشيت في شوارع الهند يا حتلاقي ناس لابسه ماسكات عليها وشه يا حتلاقي مظاهرات شايله يفط بتسب و تلعن في سلسفين اللي جابوه .. هنا إنت محتاج تهدي شوية و تفهم اللي أنا بقوله .. أنا بتكلم عن إن أهل تاني أكتر بلد عايش فيها بني أدمين في العالم .. بتكلم عن بلد عايش فيها مليار و شوية بني أدم أهلها يا إما بيسبحوا بحمد الحاكم بتاعهم يا بيدعوا ربنا ياخده و يخلصهم منه .. هنا إنت محتاج فعلياً تسأل نفسك سؤالين .. ليه ده حصل؟ .. و الدنيا رايحة علي فين؟

خلينا نبدأ بالسؤال الأولاني .. إزاي الهنود وصلوا لمرحلة إنهم يتخانقوا علي (مودي) بالشكل ده؟

أهم حاجة إنت محتاج تفهمها عن (مودي) إنه بني أدم له كاريزما قوية جداً .. الرجل ده قصة حياته ملهمة لناس كتير في الهند .. ده رجل و هو صغير كان فقير فشخ .. و هو صغير كان بيبع شاي و قهوة علي رصيف محطات القطر و كبر لحد ما بقي حاكم ولاية جويجرات Gujarat و دلوقتي بقي رئيس الوزراء .. تاني حاجة إنت محتاج تفهمها عن (مودي) إن زيه زي أي حاكم له كاريزما فهو بالتبعية عاشق للهبد .. الرجل ده مبيعرفش يعيش من غير ما يهبد .. أحياناً هبده بيجيب نتيجة و بيبقي حظه حظ الرقاصة اللي بيجيلها فرحين في ليلة زي ما مثلاً في 2019 عرف يحط سياسة توصيل الغاز الطبيعي لأكثر من 72 مليون أسرة فقيرة في الهند و إنه برده قدر يوفي بواحد من وعوده الإنتخابية إنه يوفر 110 مليون حمام و في حالة إنك رحت الهند فإنت عارف إن الهنود الحمامات عندهم قليلة شوية .. أنا مش عايز أبان عنصري أو بتنمر علي خلق الله بس حكاية إن الهند مفيهاش حمامات كفاية بما يناسب عدد السكان واحدة من أسباب إن الهنود عموماً ريحتهم وحشة .. تاني أنا مش عايزك تعتبرني عنصري أنا بس حاول أرصلك شوية حقايق .. و في نفس الوقت أحياناً (مودي) بيهبد لدرجة إنه فعلياً و بدون أدني مبالغة كأنه بيفشخ الهنود في أفكارهم .. سنة 2016 هو بدأ حملة لمكافحة الفساد في البلد و واحد من أعمدة السياسة دي إنه يحاول يخلي الهنود يطلعوا فلوسهم اللي هم محوشينها تحت البلاطة و يودوها البنك عشان تدخل السوق تنشط الإقتصاد .. حلو أوي .. (مودي) قعد يفكر تعملها إزاي دي يا واد يا (مودي) لحد ما ربنا هداه إنه يقول للهنود إنه حيلغي فئات من العملة النقدية و إن لازم الهنود يروحوا البنوك يدوهم الورق النقدي القديم و يفكوه بورق من اللي لسه متداول .. تخيل كده إن الرئيس (عبدالفتاح السيسي) يطلع يقول إن عشان ننشط عجلة الإقتصاد حنلغي ورق البنكنوت فئات العشرين و الخمسين جنيه و إنك مثلاً لازم تروح أقرب فرع بنك مصر ليك تديله كل ورق العشرين جنيه اللي معاك و اللي لو مثلاً كانوا متين جنيه فالبنك حيديلك متين جنيه زيهم بس ورق عشرات و خمسات .. إيه علاقة ده بتنشيط الإقتصاد مش القضية دلوقتي .. القضية إن (مودي) بلغ شعبه بالقرار قبل تطبيقه بأربع ساعات بس .. طبعاً تخيل حجم الفوضي اللي قطاع البنوك الهندي لقي نفسه فيها.

سياسة (مودي) بتاعة العملة دي مثلاً معملتش أي حاجة من اللي هو قال عليها .. لا هي نشطت الإقتصاد ولا هي ساعدت في مكافحة الفساد .. كل اللي السياسة دي عملته إنها نكدت علي الهنود .. سياسة زي دي ممكن تجيب أجل أي رئيس في أي بلد ديموقراطية .. سيبك من عندنا أنا بتكلم عن أي بلد ديموقراطية لإن متنساش إن الهند هي أكبر بلد ديموقراطية في العالم بس ده محصلش مع (مودي) .. (مودي) جزء مهم من الكاريزما بتاعته إنه بيعرف ينسب لنفسه الفضل في أي نجاح و في نفس الوقت يلبس الفشل في أي حد غيره .. دي بالنسبة لأي واحد شغال في الكار بتاع السياسة تعتبر Super Power زي القدرة علي الطيران أو قراية أفكار الناس .. (مودي) فعلياً محصن ضد إن أي حد يقوله إنت بتعك أو إنت غلطان و السر في كده هو إنه ماسك علي الهنود ذلة و الذلة دي هي المسلمين و هنا الكلام حيخش في السكة اللي لما السياسة بتخشها بتقلب بوساخة .. الدين.

(مودي) هندوسي قومي .. يعني إيه البتاع ده .. كلمة (هندوسي قومي) دي معناها إنه مؤمن بفكرة إن الهند بلد هندوسية .. ديانتها الرسمية هي الهندوسية و لا صوت يعلوا فيها فوق صوت الهندوسية .. صحيح إن الهند عايش فيها تاني أكبر تكتل للمسلمين في العالم بس مش مشكلة .. زي ما في مصر إنت بتقول إن مصر بلد إسلامية بس فيه نقطة مهمة فشخ .. مصر غير الهند في حاجة .. الهند الحديثة إتأسست علي كتاف إتنين واحد إسمه (مهاتما غاندي) و الثاني إسمه (جواهر لال نهرو) .. واحد إنت عارفه عشان دايماً متصور عريان و الثاني إنت عارفه عشان فيه شارع في القاهرة متسمي علي إسمه في مصر الجديدة .. (غاندي) و (نهرو) لما قعدوا مع بعض يتفقوا هي الهند حتبقي بلد شكلها إيه بعد ما تستقل عن بريطانيا كان رأيهم إن الهند لازم تبقي بلد علمانية .. ده معناه إن بالضرورة الأساس اللي إتبنت عليه الهند عكس اللي (مودي) مؤمن بيه .. الأساس اللي إتبنت عليه الهند هي إنها بلد علمانية .. (مودي) بيقول إن الهند بلد هندوسية.

المشكلة الأكبر إن الخلاف بين فكرة الهندوسية القومية و بين فكرة علمانية الهند عامله زي إنك تطبخ أكلة هندي زي التندوري كده مينفعش تتاكل من غير شوية كاري و الكاري في السياسة هو العنصرية .. الحزب بتاع (مودي) إسمه حزب BJB أو بي جايه بي .. الحزب ده هو الدراع السياسي لحركة متطرفة إسمها RSS أو أر إس إس .. عارف إني رميت في وشك حروف إنجليزي كتير بس اللي إنت محتاج تعرفه عن RSS و بالتالي BJB إن دي حركة سياسية إتعملت سنة 1925 أسسها واحد إسمه (كاي بي هيد-جيوار K. B. Hedgewar)  و مش مهم تركز في إسمه .. المهم تعرف إنها إتبنت كحركة سياسية يتلم تحتها الهندوس .. بعد كده مسكها واحد إسمه (إم إس جول-واكار M.S. Golwalkar) بدأ يغير من أفكارها عشان تبقي شبه أفكار النازية .. الأخ (جول-واكار) كان معجب أوي بأفكار (أدولف هتلر) بتاعة نقاء الجنس الأري و بدأ يغير من أفكار الحركة عشان يبقي هدفها الأساسي إن الهند تبقي بلد الهندوس و إن أي أقلية أو عرقية أو ديانة تانية ملهاش أي وجود في الهند .. أظن إنت بتهرش في شعرك و بتسأل .. طب هو إيه علاقة (مودي) بكل الهري دي؟

سنة 2002 قامت أحداث طائفية في ولاية جوجرات اللي بفكرك إن في الوقت ده (مودي) كان الحاكم بتاعها .. الخناقة كانت بين الأغلبية الهندوسية و الأقلية المسلمة .. (مودي) زي ما حضرتك عارف هندوسي .. في الأحداث دي مات أكثر من 1000 مسلم و الأخ (مودي) عمل زي ما إنت تكون مزوغ من الشغل و تعمل موبايلك سايلانت أو تقفله خالص .. الأمريكان كانوا متغاظين منه لدرجة إن سنة 2005 وزارة الخارجية الأميريكية لغت الفيزا بتاعته لإنهم كانوا شايفينه مسئول مسئولية كاملة عن مذبحة ضد المسلمين اللي عايشين تحت حكمه و هو معملش حاجة .. و علي فكرة هو لحد دلوقتي مش في دماغه .. سنة 2007 جرنان The Telegraph البريطاني عمل معاه إنترفيو و لما سألوه عن مسئوليته عن اللي حصل في ولايته خد بعضه و مشي و ساب الإنترفيو .. (مودي) بيهد الأساسات اللي إتبنت عليها الهند طوبة طوبة .. (غاندي) و (نهرو) الإتنين كانوا هندوس بس (مودي) بدأ يمسح إسم (نهرو) من المناهج التعليمية الهندية و مش بس كده .. المناهج التعليمية الهندية زي ما تقول متاخدة Copy و Paste من الأفكار اللي كانت بتتزرع في دماغ الأطفال الألمان في الفترة النازية .. سنة 2014 في ولاية جويجرات اللي كان (مودي) الحاكم بتاعها قبل ما يبقي رئيس وزراء في منهج التاريخ بتاع سنة ثالثة إبتدائي بتتحكي قصة خلق الكون .. في الكتاب الهنود بيعلموا عيالهم إن ربنا كان بيحاول يخبز عيش .. في اليوم الأول هو دخل العيش الفرن بس طلعه بدري شوية قبل ما يستوي و عشان كده إتخلق الناس اللي بشرتهم بيضاء .. في اليوم الثاني ربنا ساب العيش في الفرن كتير شوية فإتحرق و عشان كده إتخلق الزنوج Negros و الكتاب بتاع تاريخ سنة تالتة إبتدائي في الهند بيسمي السمر زنوج بس ما علينا .. في اليوم الثالث ربنا حط العيش في الفرن الفترة المناسبة و من هنا الهنود إتخلقوا.

إذا كان (مودي) و هو لسه الحاكم بتاع ولاية جويجرات فإكتفي بإنه يسكت و ميتكلمش خالص عن العنف تجاه المسلمين فلما بقي رئيس وزراء بدأ بشكل منظم و خليني أستخدم المصطلحات النازية في وصف سياسته بإنه بدأ يشتغل علي إزاي ينقي الهند من المسلمين و ده عن طريق خطوتين حيتطبقوا مع بعض:

• الخطوة الأولي هي تطبيق قانون National Registry of Citizens أو NRC و ده قانون بيقول إن كل مواطن هندي مطالب إنه يوفر للسجل المدني بتاعه الورق اللي يثبت إنه مواطن هندي زي مثلاً شهادة الميلاد أو بطاقته أو باسبوره .. المشكلة إن كتير من الهنود يا مش متعلمين يا فقراء لدرجة إن معهمش فلوس مصاريف إنهم يروحوا السجل المدني يطلعوا الورق ده .. لحد دلوقتي الموضوع ملوش علاقة بالمسلمين زي ما إنت شايف  .. القانون ده بيتقال عليه في الإعلام إن والله من حق الدولة إنها يبقي عندها بيانات الناس اللي عايشين في البلد و هنا يجي دور الخطوة الثانية.
• الخطوة الثانية هي تطبيق قانون Citizenship Amendment Bill أو CAB و ده قانون تصحيح أوضاع المواطنين الهنود اللي معهمش ورق يثبت إنهم هنود بإسثتناء المسلمين .. لو أنا مواطن هندي هندوسي معييش ورق فالحكومة بتقولي بيس يا معلم متشيلش هم .. لو أنا مواطن مسلم معييش ورق فالحكومة بتقولي إمشي ياض من هنا شفلك بلد تاخدك إنت ملكش مكان هنا.

نقطة مهمة في شخصية (مودي) هي إنه شخصية هادية بشكل مستفز بس الهدوء اللي يعصب .. الهدوء اللي يخليك تقول إن وراه مصيبة .. و عشان يحافظ علي برستيجه قدام الناس فهو شخصياً مش بيفتح بقه كتير .. أغلب العنصرية اللي بتطلع من بق حكومته بتكون من الناس اللي حوليه مش منه هو شخصياً و هنا أحب أخص بالذكر إتنين بالذات من الناس اللي حولين (مودي) اللي كل ما يفتحوا بقهم في موضوع المسلمين بتحس إن فيه بكابورت مفتوح و طالع منه ريحة وحشة و صراصير .. واحد إسمه (يوجي أديتينات Yogi Adityanath) و الثاني إسمه (أميت شاه Amit Shag):

• (يوجي) ده يبقي المحافظ بتاع ولاية إسمها أوتار-براديش Utar Pradesh .. دي ولاية عايش فيها 200 مليون بني أدم .. ولاية واحدة عايش فيها ضعف عدد سكان مصر .. (يوجي) ده بيكره المسلمين لدرجة إن من أقواله المأثورة إن الهندوس و المسلمين ليهم ثقافات عكس بعض في كل حاجة و مينفعوش يعيشوا مع بعض في حتة واحدة .. و في واحدة من أقواله المأثورة الثانية برده إن لو هندوسي واحد إتقتل علي إيد مسلم فالهندوس لازم يقتلوا قصاده 100 مسلم.
• (أميت شاه) ده يبقي فعلياً الدراع اليمين بتاع (مودي) و اللي لما إتسأل هو إيه الهدف من تطبيق قانوني CAB و NRC فكان رده إن قانون CAB ده إتعمل عشان كل الهندوس و السيخ و البوذيين و المسيحيين اللي عايشين في الهند ياخدوا الجنسية الهندية بس المتسللين لا .. المتسللين اللي عايشين عندنا شبه الفطريات اللي بتمص دمنا .. طبعاً الكلام ليكي يا جاره .. متنساش إن (أميت شاه) زي ما قلتلك الدراع اليمين بتاع (مودي) و الكلام اللي بيطلع من بقه بالتبعية (مودي) موافق عليه.

أرجوك حاول تاخد الموضوع جد .. الحكومة الهندية حالياً شغاله في بناء سجون معمولة مخصوص للمسلمين اللي حيتحطوا فيها بعد تطبيق قوانين NRC و CAB .. فعلياً العلاقة بين كيس الشيتوس الحجم العائلي اللي بيحكم أميركا و بين (مودي) زي العلاقة بين الطحينة و العسل الأسود .. مصير مسلمي الإيجور في الصين حيبقي هو هو مصير كل المسلمين في الهند قريب .. إحنا محتاجين نفوق و نفهم إن اللي بتصدره لينا الأفلام الهندي ده كله وهم .. ده كذب .. إنت بيتضحك عليك و للأسف مفيش أي حد يبلغ صوت مسلمي الهند الحقيقي لحضرتك و إنت كل اللي تعرفه عن مسلمي الهند هو (شاه رو خان) و (عامر خان) .. عارف إن كتير منكوا مفيش في إيده حاجة يعملها بس علي الأقل أدعوا يمكن أبواب السما تبقي مفتوحة.

المصدر:
حلقة من برنامج Last week tonight with John Oliver بيتذاع علي قناة HBO و ده لينك الحلقة علي YouTube:
https://www.youtube.com/watch?v=qVIXUhZ2AWs