لينك التسجيل الصوتي للمقالة علي ساوند كلاود:
https://soundcloud.com/user-112011687-312727988/eojm2ey9fivh?si=84da18f9a02e4bddb8e68499f3474257&utm_source=clipboard&utm_medium=text&utm_campaign=social_sharing
لو إنت مهندس أو محاسب أو دكتور أو أيا كانت مهنتك الشريفة اللي بتأكلك عيش ففيه مشكلة إنت ممكن تشوفها هابلة ولا تستحق إنك تديها أي إهتمام و هي إن لحد السنة اللي فاتت البشر مكانوش متؤكدين بنسبة 100% هو إرتفاع قمة إيفيريست كام؟ .. طب إيه رأيك إننا كنا مش عارفين إذا كانت أصلاً قمة إيفيريست دي هي أطول نقطة فوق سطح الأرض أو لا؟ .. عشان بس الموضوع فيه هندسة و حساب مثلثات و جيولوجيا كتير فخليني أخدك من إيدك واحدة واحدة نرجعك تاني لأيام ثانوي عام أيام ما كان الطلبة بيتعلموا حاجة مفيدة.
خليني بس قبل ما أبدأ أقول هي تطلع إيه قمة إيفيريست دي؟ .. شوف يا ريس فيه سلسلة جبال في أسيا إسمها الهيمالايا بحيث قمة إيفيريست دي تبقي واحدة من وسط قمم الجبال بتاعة السلسلة .. الفكرة إن قمة إيفيريست دي تقدر تقول إنها علي الناصية بتاعة 3 شوارع .. ناصية بتطل علي الهند .. ناصية بتطل علي التيبيت اللي هي تبقي جزء من الصين .. ناصية بتطل علي دولة إسمها نيبال .. مش بس كده .. صحيح القمة دي معروفة بإسم إيفيريست و حنعرف ليه كمان شوية علي مستوي العالم إلا إن النيباليين بيسموها ساجارماث Sagarmath و أهل التيبيت بيسموها كومولانجما Qomlangma بس مش ده موضوعنا دلوقتي .. يلا بينا نبدأ نرصلك 10 حقايق ورا بعض و منهم حتقدر تفهم أكتر هي المشكلة كانت فين؟ و إتحلت إزاي؟
حقيقة رقم واحد .. ربنا مخلقش كوكب الأرض سطحه حاجة واحدة ده فيه جبال و أنهار و محيطات و كهوف كمان .. في سورة الغاشية ربنا بيقول “أفلا ينظرون إلي الإبل كيف خلقت .. و إلي السماء كيف رفعت .. و إلي الجبال كيف نصبت .. و إلي الأرض كيف سطحت” .. بس لو تخيلنا إننا عرفنا نصغر كوكب الأرض بحيث إنك تقدر تمسكه في إيدك فإنت حتلاقيه ناعم نفس نعومية كرة البلياردو مقارنة بكواكب تانية .. في نفس الوقت كوكب الأرض مش كرة كاملة الإستدارة إنما هو أقرب ما يكون لشكل البيضة بس لما تنيمها علي جنبها و ده اللي قاله ربنا في سورة النازعات “و الأرض بعد ذلك دحاها” .. الشكل الصح للكرة الأرضية هو إن ليها شكل بيضاوي بيوسع شوية من عند خط الإستواء.
حقيقة رقم إتنين .. القشرة الأرضية أو الطبقة الخارجية لكوكب الأرض مش حاجة واحدة إنما حتت أو شرايح بتتسمي الصفائح التكتونية مترصصة جنب بعض .. عشان تفهمها تخيل إن بدل ما إنت فارش سجادة في صالة بيتكوا فإحنا جبنا كل المراتب اللي في البيت رصيناها جنب بعض مكان السجادة .. المشكلة كلها في الوصلات بين المراتب لإن لما حضرتك بتدوس علي مرتبة زي ما تقول كده بسبب الدوسة دي و بسبب إن المراتب مش متخيطة في بعض فبتلاقي الرصة باظت .. شبه الجزيرة الهندية ربنا خلقها فوق صفيحة بتتسمي الصفيحة الهندية وجنبها علي طول فيه الصفيحة اللي شايله فوقيها قارتي أسيا و أوروبا .. بسبب الإحتكاك المستمر بين الصفيحتين دول خلال 40-50 مليون سنة اللي فاتوا فقمة جيل إيفيرست كل سنة إرتفاعها بيزيد بمقدار نصف سنتيمتر .. نص سنتيمتر في السنة مش حاجة تستحق إننا نقول وااااو يعني بس خليك معايا.
حقيقة رقم ثلاثة .. سنة 1934 دولة نيبال و دي من الدول اللي قمة إيفيريست واخدة حتة منها إتعرضت لزلزال جبار خلي علماء الجيولوجيا يقولوا إن الزلزال ده لوحده خلي قمة إيفيريست تقصر حوالي 0.6 متر .. سنة 2015 زلزال تاني ضرب نيبال و ده خلي الناس تسأل هي الزلازل دي تأثيرها إيه معلش علي إرتفاع قمة إيفيريست؟
حقيقة رقم أربعة .. لو دخلت علي Google بصيت علي صور قمة إيفيريست حتلاقيها في كل الصور مكسية بالثلج .. جميل .. هل بقي ناخد الثلج ده في إعتبارنا و إحنا بنقيس إرتفاع الجبل؟ .. خلي بالك إن لما موسم الشتاء يجي شادد حيله طبقة الثلج اللي بتغطي قمة الجبل لوحدها سمكها ممكن يوصل 3 متر .
حقيقة رقم خمسة ..عشان تقيس أرتفاع أي حاجة في الدنيا إنت محتاج Datum أو أساس تقيس منه .. فيه ناس بتقول إن عشان تقيس إرتفاع الجبال لازم النقطة اللي تقيس منها هي مركز الأرض و لو سمعنا كلام الناس دي ففعلياً أعلي قمة جبلية علي كوكب الأرض هي قمة جبل تشيمبورازو في الإكوادور .. القمة دي لو قست إرتفاعها من سطح البحر فإنت حتلاقي طولها 6210.6 متر .. لو قست طولها من مركز الأرض حتلاقيه 614,888,6.4 متر .. إنت متخيل الرقم؟ .. بالحسبة بتاعة القياس من مركز الأرض دي فقمة جبل تشيمبورازو أعلي من قمة جبل إيفيريست ب2060 متر ولا تخرج قبل أن تقول سبحان الله.
حقيقة رقم ستة .. فيه ناس قالت و منهم الإنجليز قالوا لا معلش إركنوا علي جنب بقي شوية بلا قيس من مركز أرض بلا بتاع .. ماله حساب المثلثات ما هو لطيف أهو .. سنة 1856 رئيس إدارة المساحة في الهند اللي كان السير (جورج إيفيريست George Everest) كلف فريق من بتوع الخرايط الإنجليز إنهم يقيسوا قمة الجبل اللي كان وقتها الإنجليز بيسموه القمة 15 أو Peak XV .. الفريق ده بدأ من عندك خليج البنغال اللي هو أقرب مسطح مائي للجبل و بدأ بحساب المثلثات يقيسوا إرتفاع الجبل و بطرق بدائية شوية قالوا إن إرتفاع قمة أيفيريست 8840 متر .. سنة 1954 يعني تقريباً بعد 100 سنة فريق هندي قاس برده إرتفاع قمة الجبل بطرق أحدث شوية لقوها 8,848 متر.
حقيقة رقم سبعة .. جت ناس قالت مركز أرض إيه بس يا جدعان اللي نقيس منه إحنا عايزين نستخدم Reference يكون له علاقة بسطح البحر Sea Level .. قلنا و ماله حلو سطح البحر بس هي المشكلة إن مفيش مستوي سطح بحر ثابت .. حضرتك ناسي إن فيه ظاهرة إنت درستها في ثانوي عام إسمها المد و الجزر؟ .. الجاذبية المشتركة بين الأرض و القمر بتخلي إن حتي سطح البحر مش مستوي ثابت تقيس منه .. حنحلها إزاي دي؟ .. جم الناس بتوع المساحة قالوا إحنا عندنا مش حل واحد إنما حلين .. حل إسمه Ellipsoids و حل إسمه Geoids .. طبعاً إنت مبلم مش فاهم حاجة.
يعني إيه Ellipsoids دي؟
عارف الأية الكريمة بتاعة “والأرض بعد ذلك دحاها”؟ يعني ربنا خلق الأرض علي شكل شبه بيضاوي بحيث شبه البيض اللي نايمة علي جنبها اللي عندها كرش خفيف من عند خط الإستواء؟ .. أهو الناس بتوع المساحة عملوا نموذج رياضي لشكل الأرض له إسم مشهور جداً WGS84 و اللي الناس بتوع Google خدوه زي ما هو كده عشان يعملولك الإختراع اللي إنت متقدرش تعيش من غيره اللي هو Google Maps .
يعني إيه Geoids دي؟
عارف فيضان سيدنا (نوح) عليه السلام؟ .. أهو تخيل بقي إن كوكب الأرض كله غطته مياه البحار و المحيطات و تخيل كمان إننا جبنا برنامج كومبيوتر يحسبلنا تأثير قوي الجاذبية بين الأرض و القمر علي سطح البحر و خلي البرنامج ده يرسم شكل سطح كوكب الأرض حيبقي عامل إزاي .. إذا كانت طريقة Ellipsoids رسمت شكل بيضاوي Smooth لكوكب الأرض إستخدمناه بعد كده عشان نعمل Google Maps فطريقة Geoids رسمت شكل كوكب الأرض زي ما يكون بطاطاساية عند الخضري.
حقيقة رقم ثمانية .. سنة 1999 إتشكل فريق بقيادة واحد إسمه (برادفورد واشبرن Bradford Washburn) و بتمويل من National Geographic عشان يستخدم تكنولوجيا GPS يعني هو إستخدم الموديل بتاع Ellipsoid عشان يقيس إرتفاع قمة إيفيريست .. إذا كانت البعثة بتاعة سنة 1954 قالت إن إرتفاع قمة إيفيريست 8,848 متر فالبعثة الجديدة بتاعة سنة 1999 إكتشفت إن قياساتهم بتقول إنهم أعلي ب1.8 متر بس عن القراية القديمة اللي هو إنت عايز تقولهم طب كلفتوا نفسكوا و رحتوا تقيسوا قمة الجبل تاني ليه .. سنة 2005 بعثة صينية عملت نفس الحركة و طلعت قراية جديدة بإن إرتفاع قمة إيفيريست 8705.1 متر .. لحد دلوقتي إنت عندك 3 قرايات مختلفة لإرتفاع قمة إيفيريست في 3 سنين مختلفة عملتها 3 بعثات مختلفة و ال3 قرايات معترف بيهم علي مستوي العالم .. تفتكر الحكاية كده خلصت؟ تبقي غلطان.
حقيقة رقم تسعة .. عشان الرقم اللي جابته البعثة الصينية بتاعة سنة 2005 مكنش بموافقة ولا بمشاركة حكومة نيبال فالأخوة النيباليين قالوا إحنا مش معترفين بالقراية دي و حنفضل ماشيين بالقراية اللي عملتها الهند سنة 1954 .. جميل .. هوبا في 2015 نيبال إتضربت بالزلزال الفشيخ اللي إتكلمنا عنه في الحقيقة رقم 3 و اللي بسببه ناس كتير قالت إن كده ممكن القرايات الثلاثة اللي إتاخدت لقمة إيفيريست تكون كلها أصلاً بقت غلط .. سنة 2017 نيبال بدأت تشتغل علي قياس جديد لقمة إيفيريست.
حقيقة رقم عشرة .. سنة 2018 الرئيس الصيني (جي جينبينج Xi Jinping) زار نيبال و صالحها و إتفقوا سوا علي إنهم حيشتغلوا مع بعض في عملية القياس الجديدة لإرتفاع قمة إيفيريست بحيث إن القياس الجديد حيمشي في 3 إتجاهات مع بعض اللي هم حساب المثلثات و GPS و الموديل بتاع Geoids اللي هو بتاع الجاذبية الأرضية و الحمد لله يوم 8 ديسمبر 2020 الفريق النيبالي الصيني المشترك طلع قال يا جدعان مبروك إحنا عرفنا إرتفاع قمة إيفيريست اللي هو 8848.86 اللي هو فعلياً يعني يدوبك 0.86 متر زيادة عن الرقم اللي حسبته البعثة الهندية بتاعة سنة 1954 و اللي برده بيخليني أسأل و كان علينا بإيه كل الهم ده كله ما إحنا كنا راضيين بالشغل بتاع الهنود و راضيين.
كده الحكاية خلصت بعد علي الأقل عشر سنين من الخناق علي حاجة إنت ممكن تشوفها تافهة أو تقول عليها إن فيه مشاكل تانية في الكون أكبر من إننا نعرف بالضبط إرتفاع قمة إيفيريست كام .. بس في نفس الوقت ده يوريك إن اللي إنت شايفه تافه فيه ناس تانية شايفاه قضية وطن .. نيبال بلد كل اللي فكرت فيه إن مش الصين هي اللي تقول إرتفاع الجبل كام و الموضوع ده كان حازز في نفسيتهم أوي .. الصين كمان تعاملت مع الموضوع بحكمة الحقيقة لإنهم تعاملوا مع مشاعر نيبال بمبدأ كله بالحنية بيفك و مش لازم يعني الصين تاخد هي اللقطة يمكن عشان الصينيين من جواهم كانوا عارفين إنت بتفكر إزاي .. هم عارفين إنك مش مهتم عشان كده هم منشفوش دماغهم زي النيباليين و قضوها عند .. بغض النظر عن الأفكار العلمية و الهندسية في الموضوع بس الحكمة السياسية كمان تستحق إننا نقف عندها و نتعلم منها.
المصادر:
- مقالة بعنوان How Do You Measure Everest? It’s Complicated by Frostbite-and Politics نشرت في مجلة National Geographic و ده لينك المقالة الأصلية:
https://www.nationalgeographic.com/science/article/remeasuring-mount-everest-the-worlds-tallest-mountain - مقالة بعنوان China and Nepal Finally Agree on Mount Everest’s Height After Years of Dispute نشرت علي موقع وكالة أنباء CNN و ده لينك المقالة الأصلية:
https://edition.cnn.com/travel/article/mount-everest-height-intl-hnk-scli/index.html - مقالة بعنوان How to Measure a Mountain: Everest Height Called Into Question نشرت علي موقع وكالة أنباء CNN و ده لينك المقالة الأصلية:
https://edition.cnn.com/2017/06/21/asia/everest-height-dispute/index.html
