لينك التسجيل الصوتي للمقالة علي Sound Cloud:
https://soundcloud.com/user-112011687-312727988/holland-m4a
قبل ما أقولك إحنا حنتكلم عن إيه و أشرحلك الموضوع عايزك تتخيل معايا السيناريو ده .. تخيل معايا إنك ماشي في أي ميدان من ميادين القاهرة يوم الجمعة مثلاً الساعة 8 الصبح و بتكلم عن الميادين اللي فيها جنينة في الصينية اللي في نص الميدان و أنا عارف إنهم شبه إنقرضوا بسبب موسم الكباري اللي بتتعمل لسبب و من غير سبب و تخيل معايا إن الحي حاطط زحليقة و مرجيحة في الجنينة دي و إنت ماشي في الشارع بصيت علي الجنينة دي لقيت شوية أطفال بيلعبوا علي الزحليقة و أمهات الأطفال قاعدين يتكلموا مع بعض بعيد علي بينش خشب في طرف الجنينة .. مشيت شوية قدام لقيت علي الرصيف طفل صغير راكب عجلة لوحده محدش معاه .. قدامه فيه شوية أطفال بس أكبر منه في السن بيجروا مع بعض .. و إنت عمال تستغرب و مش فاهم فيه إيه بصيت علي شوية بنات صغيرين بيلعبوا أستغماية لوحدهم برده من غير ما يكون معاهم حد كبير .. إنت بالنسبة لك ده سيناريو فانتازيا مناسب أكثر لفيلم خيال علمي مستحيل يتحقق في مصر اللي كل يوم تسمع فيها عن حادثة إختطاف طفل أو حادثة إغتصاب لطفلة صغيرة كانت بتلعب في الشارع .. بس في دولة زي هولندا ده الوضع الطبيعي .. الطبيعي إنك تمشي في شوارع هولندا تلاقي الأطفال بتلعب في الشارع من غير ما حد يفضل مراقبهم و حاطط عينه عليهم.
محدش في العالم إهتم لما سنة 2013 منظمة اليونيسيف Unicef التابعة للأمم المتحدة طلعت تقرير قالت فيه إن الأطفال الهولنديين هم أسعد أطفال في العالم .. إنك تجيب أكثر من 29 دولة متقدمة علي مستوي العالم و تفضل تقيس مين فيهم أكتر الدول اللي بتوفر مناخ مناسب لتربية طفل سعيد و تطلع هولندا هي متصدرة التصنيف ده فالعالم كله كان لازم يقف ويسأل نفسه هو الهولنديين بيعملوا إيه في عيالهم؟ .. دول زي بريطانيا اللي جت في المركز ال16 أو أميركا اللي جت في المركز ال26 يعني في المركز الرابع قبل الأخير يدوبك قبل ليتوانيا و لاتفيا و رومانيا كانت لازم تقف و تسأل هو فيه إيه؟ بس ده محصلش .. التقرير و هو بيتعمل عطي فرصة لأطفال ال29 دولة إنهم يقيموا نفسهم هل هم سعداء ولا لا و كانت النتيجة إن 95% من الأطفال الهولنديين صنفوا نفسهم علي إنهم سعداء .. مش تقرير الUnicef ده بس اللي قال كده لإن فيه تقارير تانية طلعت من منظمة الصحة العالمية WHO و مجموعة مكافحة فقر الأطفال في بريطانيا قالت برده إن الطفل اللي بيتربي في هولندا بيطلع سعيد سعادة الفيل اللي قاعد يبلبط في الطينة.
أظن هنا إحنا محتاجين نسأل نفسنا كذا سؤال:
- هو إنت إزاي تحدد إذا كان الطفل سعيد ولا لا؟ .. لإنك بتتكلم عن طفل من مرحلة إنه لسه مولود لحد مثلاً لما يبقي عنده 10 سنين فده معناه إن منهم سنين الطفل مبيكونش إتعلم الكلام و مبيعملش حاجة في حياته غير إنه ياكل و يعيط و يعمل بيبي.
- طب هم الهولنديين بيعملوا إيه في عيالهم عشان يخلوهم سعداء؟ بيأكلوهم كيكة الحشيش مثلاً؟
- و هل ده معتمد علي إن المجتمع علي بعضه يبقي كده ولا ممكن الأفراد بس في مجتمع زي بتاعنا يقرروا يقلدوا النموذج الهولندي؟
- نقطة أخيرة و هي إزاي الهولنديين بيعلموا أطفالهم مفهوم الحرية؟
خلينا نبدأ بالسؤال السهل اللي هو إزاي تحدد إذا كان الطفل سعيد أو لا؟
دي إنت بتحددها إنك بتقيس قد إيه الطفل مش كل شوية يعيط و قد إيه بيضحك و يبتسم و مش بيخاف من أي حد غريب يشيله .. و إنك بتقيس قد إيه الطفل بيبقي سهل عليك إنك تخليه يبطل عياط و كل دي عوامل نفسية و إجتماعية بتعتمد أساساً علي المجتمع اللي الطفل بيتربي فيه .. أما السؤال الصعب بقي .. هم الهولنديين بيعملوا إيه في عيالهم؟ .. خليني الأول أصدمك و أحطلك كذا نقطة عشان تشوف الهولنديين بيربوا عيالهم إزاي:
- أكثر طفل بياخد ساعات نوم في العالم هو الطفل الهولندي.
- في المرحلة الإبتدائية الطفل الهولندي مبياخدش واجب Homework يعمله في البيت خالص.
- الطفل الهولندي بيتعود من و هو صغير إن كلامه بيتسمع و الناس اللي حوله بتهتم بالكلام اللي هو بيقوله فبيتعلم إنه مش بيحتاج يعيط عشان يلفت انتباه أبوه و أمه.
- الطفل الهولندي أبوه و أمه بيعلموه إنهم واثقين فيه بما يكفي إنه يروح مدرسته لوحده و هو راكب العجلة بتاعته .. مفيش حاجة هناك إسمها باص مدرسة .. مفيش حاجة إسمها إنك تودي عيالك المدرسة بعربيتك قبل ما تروح الشغل .. الطفل عنده عجلته و بيروح مدرسته لوحده شايل شنطته علي كتفه من غير مساعدة من حد.
- الطفل الهولندي أبوه و أمه بيسيبوه يلعب في الشارع مع صحابه لوحده.
- مفيش حاجة إسمها إن كل فرد من أفراد العيلة ياكل لوحده .. العيلة كلها بتتجمع وقت الغدا أو العشا ياكلوا مع بعض و أهم وجبة العيلة بتتجمع فيها هي الفطار .. مفيش حاجة إسمها أصلي حفطر في الشغل أو إني صحيت متأخر .. العيلة كلها بتصحي بدري و بتفطر سوا قبل ما كل واحد فيهم ينزل من البيت.
- مفيش حاجة إسمها إن الأب جاي من شغله تعبان و عايز ينام لإن الطفل الهولندي أكثر طفل في العالم بيقضي وقت مع أبوه و أمه.
- الطفل الهولندي بيتعلم يتبسط من أقل حاجة .. مفيش حاجة إسمها نجيبله لعب غالية عشان يتبسط و بيفرح أوي لو حد جابله لعبة مستعملة حتي.
- مفيش حاجة إسمها إحنا بنأكل إبننا اكل صحي .. لو ـمه عايزة تأكله شيكولاتة سنيكرز علي الفطار و ماله بس هي مرة في اليوم.
فكر فيها كده .. إنت إيه معلوماتك عن المجتمع الهولندي؟ .. إنت اللي تعرفه عن هولندا عرفته من فيلم همام في أمستردام بتاع (محمد هنيدي) و هو مجتمع بسيب البنت تعمل اللي هي عايزاه من سن 18 سنة .. تعرف عن هولندا إن بنات الليل في شوارع العاصمة أمستردام بيتعرضوا في الفاترينات زي الهدوم .. تعرف عن هولندا إنك تقدر تشرب خمرة و حشيش براحتك .. ده اللي إنت تعرفه عن هولندا .. بس تحت كل ده فيه حاجة إحنا منعرفهاش و هي إن المجتمع الهولندي مجتمع محافظ جداً بيعتبر إن الطفل هو أهم حاجة في العيلة .. الأب و الأم بيتعاملوا مع الطفل إنه بني أدم مش إنه إمتداد ليهم يعني هم عايزين إبنهم أو بنتهم يبقوا سعداء و مفيش حاجة إسمها إن الأب دكتور كبير فلازم إبنه هو كمان يطلع دكتور .. هناك الطفل بيتعلم إنه عشان يبقي سعيد مش لازم يحقق حاجات كتير في حياته إنما لما يبقي هو سعيد فحيحقق حاجات كتير بس لو عايز تضرب كف علي كف فعلاً إتفرج علي نظام التعليم الإبتدائي في هولندا.
في الوقت اللي إحنا في مصر بنجري عشان ندخل عيالنا مدارس تجريبي و لغات و فيه حضانات قبل المدارس و الحضانة بتدفعلها مصاريف بتمص من دمك و قال إيه حتي الحضانات بتعمل Interviews للأب و الأم قال يعني إنت لما تدخل إبنك الحضانة دي فحيطلع منها خبير في NASA .. في هولندا مفيش الكلام ده .. الطفل في المرحلة الإبتدائية هناك مبيعملش واجب و مفيش حاجة إسمها قلق و مذاكرة ليلة الإمتحانات .. إنت بتودي طفلك المدرسة الإبتدائي و هو عنده 4 سنين بس مبيبدأش يتعلم حاجة زي القراءة و الكتابة و الحساب و يبقي له منهج دراسي إلا لما يبقي عنده 6 سنين يعني في سنة تالتة إبتدائي .. لو الطفل بان عليه في أول سنتين إنه عايز يتعلم و مهتم إنه يعرف فالمدرسين بيساعدوه بكتب و حاجات تساعد الطفل إنه يتعلم القراءة و الكتابة بنفسه .. عايزك تتخيل ده كويس أوي .. إنت بتودي إبنك و هو عنده 4 سنين و لو لقي نفسه عايز يتعلم القراءة و الكتابة بدري فهو بيتعلم من نفسه و من غير ما حد يضغط عليه لإن فعلياً مش حتفرق كتير لإن زمايله اللي إتعلموا القراءة و الكتابة و هم عندهم 6 أو 7 سنين إتعلموا بسرعة و حصلوا الطفل اللي إتعلم القراءة و الكتابة و هو عنده 4 سنين.
الأطفال الهولنديين بيحبوا يروحوا المدرسة .. الأهالي هناك مش فارق معاهم خالص طفلهم يتعلم العزف علي البيانو أو الكمان و هو صغير أو إن إبنهم ييتعلم رياضة أو يتعلم الرسم .. لو هو حابب أهلاً و سهلاً و لو مش حابب عادي .. مفيش حاجة إسمها إني أودي إبني جيم للأطفال أو إني أخش علي YouTube عشان أعرف إزاي أقوي ذكاء إبني أو بنتي .. اللي الهولنديين عايزينه مش إن عيالهم يطلعوا أذكي أطفال العالم هم بس عايزينهم يطلعوا كويسين و أسوياء نفسياً .. الأباء و الأمهات في هولندا وصلوا لمرحلة أنا بسميها المرحلة البرنسية إن كل واحد فيهم وصل لمرحلة إنه برنس في نفسه و عايزين عيالهم كمان يبقوا كده .. كل أب و أم عارفين كويس إن إبنهم فيه عيوب كتير و إنه مش بني أدم Perfect فهم مش عايزين يضغطوا علي طفلهم عشان يبقي حاجة مستحيلة .. أهم حاجة إن لما الطفل يبص لنفسه في المراية يحس إنه راضي عن نفسه.
السؤال اللي بعد كده هو هل عشان توصل للمرحلة البرنسية زي الهولنديين فهل إنت محتاج المجتمع كله يبقي برنس في نفسه؟
الحقيقة المرة هي اه .. المجتمع الهولندي حارب كتير أوي عشان يوصل لظروف شغل أدمية للمواطنين .. المواطن الهولندي بيشتغل 5 أيام في الأسبوع كل يوم 6 ساعات بس .. و فيه يوم كامل في الأسبوع مخصص لوحده للأطفال و فيه وقت كل أب و أم بيقضوه لحياتهم الشخصية .. الأم الهولندية بتعرف تلاقي وقت في يومها عشان تشتغل و تربي عيالها و ترفه عن نفسها .. الأم الهولندية لعبتها صح .. لما بتولد أخر حاجة بتفكر فيها هي إنها تروح الجيم و تعمل دايت عشان ترجع وزنها و شكل جسمها لمرحلة ما قبل الحمل .. و في نفس الوقت مش حتلاقي أم هولندية بتعمل كل حاجة لإبنها أو بنتها .. لو الطفل يقدر يعمل حاجة لوحده حيعملها لوحده حتي لو هو لسه صغير .. الطفل الهولندي بيتعود من و هو صغير إعمل الحاجة بنفسك عشان محدش حيساعدك .. الأم الهولندية بتربي طفل واثق في نفسه و هادي أوي و الأهم إنه مبيعيطش كتير .. علي الناحية التانية تلاقي إن الأب الهولندي مش ماشي بمبدأ أنا سي السيد في البيت .. مفيش حاجة إسمها أصلي جاي تعبان في الشغل و عايز لما أروح ألاقي الأكل جاهز و بعد ما أكل الزوجة تشيل الأكل و تغسل المواعين و كمان تعمله كوباية الشاي لحد عنده .. الأب الهولندي بينظف البيت و بيغسل المواعين و بيقعد بالعيال و بينيمهم في سرايرهم و ممكن و إنت ماشي في الشارع هناك طبيعي جداً تلاقي الأب هو اللي بيجر عربية الأطفال عشان رايح يشتري حاجات من السوبر ماركت عشان الأم في الجيم.
جري العرف و الإعتقاد السائد مش بس في مجتمعنا إنما في العالم كله إن فيه نوعين من التربية .. النوع الأول هو التربية الناشفة إن الأب و الأم بيحطوا قيود و قواعد واضحة و صارمة للطفل عشان يمشي عليها و لو ممشاش عليها فخرطوم الحمام أو العصاية أو الشبشب أو حتي كف إيد الأب موجود و سداد .. النوع الثاني هو إن الأب و الأم سايبين الحبل علي الغارب للطفل يعمل اللي هو عايزه .. الهولنديين إخترعوا نوع تالت من التربية و هو نوع رمادي شوية متعرفش تعرفه ولا تصنفه بس أقدر أقولك هم بيعملوا إيه:
- الأب و الأم بيشجعوا الطفل إنه يتصرف علي طبيعته .. إن الطفل يلعب دي أهم عندهم من إن الطفل يسمع الكلام .. بالنسبة ليهم مهم أوي إن الطفل يكتشف العالم اللي حوله .. مش مشكلة يقع و يكسر و يلغوص الدنيا .. في الوقت اللي إحنا في مصر لو شفنا الطفل دخل المطبخ طلع كل الحلل اللي فيه و مسك الكبشة و قعد يطبل و يعمل دوشا فحنشخط فيه و نقوله كخ يا ولد كده .. تلاقي إن الهولنديين بيسيبوا الأطفال يعملوا اللي هم عايزينه.
- عندهم الإلتزام مش مربوط بالعقاب قد ما هو مربوط إنهم يعلموا الطفل إيه هي التصرفات اللي المجتمع بيقبلها .. المجتمع المصري مجتمع فيه الجد أو الجدة هم كبار العيلة و وراهم الأب و الأم و مهم تسمع كلامهم و مينفعش تعصي أوامرهم و بالتالي إنت بتكبر علي نفس المعتقدات و التقاليد و الأفكار بتاعتهم و ده السبب إن كتير من عاداتنا و تقاليدنا اللي إحنا شايفينها غلط مكملة طول السنين اللي فاتت .. هولندا مجتمع مفيهوش الكلام ده .. الطفل بيتعلم إحترم الكبير بس إختلف معاه في الرأي براحتك .. هناك الكل بيتعلم إنهم متساويين في الحقوق و الواجبات .. مش حتلاقي هناك الطفل من صغره عندي أو بيشبط في حاجة أو عنده ميول عدوانية خالص بس بيعرف يدافع عن رأيه و معتقداته كويس .. الطفل بيتعلم من و هو صغير لو أنا كأب أو كأم قلتله يعمل حاجة هو مش مقتنع بيها فهو بيتعلم يرد عليا و يقولي هو شايف إيه و يتناقش معايا يمكن هو شايف حاجة أنا مش شايفاها.
- في هولندا الأب و الأم هم مثال يحتذي به في البيت .. الأب مبيدخنش سجاير قدام أطفاله .. الأم و الأب مبيتخانقوش مع بعض قدام الأطفال .. مفيش حاجة إسمها نشتم أو نزعق في وجود الأطفال .. الهولنديين إخترعوا قاعدتين للتربية و القاعدتين دول أهم من بعض .. القاعدة الأولي بتقول إن التربية إنك تمشي بنفس القواعد اللي إنت بتعلمها لعيالك .. القاعدة الثانية بتقول اللي الأب و الأم بيعملوه فالأطفال بيلقطوه و يتعلموه .. الأباء و الأمهات بيتعلموا من أول ما الطفل بيتولد إزاي يربوا أطفالهم إنك متقولش لطفلك إعمل و متعملش إنما إنت شخصياً تعمل الحاجات اللي بتقول لإبنك يعملها و متعملش الحاجات اللي إنت برده بتقولها ميعملهاش .. قوله أنا عايزك تعمل كذا زي ما أنا بعمل .. الفكرة إنك متديش لطفلك خيار إما إنه ينفذ الأمر أو مينفذوش لإنك بتربي طفل مش عسكري في جيش إنما إنك كإنك بتدي لطفلك توجيهات إزاي يعمل الحاجة اللي إنت عايزه يعملها.
- مبدأ الهولنديين في التربية هو إن التربية مش معناها إن أخلي طفلي يمشي زي الكاتالوج أو إني أفرض سيطرتي عليه و إني دايماً أحسسه إني مش بثق فيه أو فيها و دايماً بتجسس عليه عشان أعرف هو بيعمل إيه من ورا ظهري و كل كلامي معاه بشخيط و زعيق .. التربية معناها إني أعلمه التصرفات الصح و لو عمل حاجة صح أكافئه و أقوله برافو و لو عمل حاجة غلط في لحظتها بنقف و نعلمه إيه اللي هو عمله غلط عشان ميتعملش تاني.
أخر نقطة عايزين نتكلم عنها هو إن إزاي الهولنديين بيعلموا أطفالهم مفهوم الحرية؟
الأطفال الهولنديين بيتمتعوا بأكثر نسبة حرية ممكن تشوفها في العالم .. الطفل الهولندي له الحرية إنه يروح مدرسته لوحده راكب عجلته .. له الحرية إنه يلعب بعد المدرسة و إنه يزور صحابه براحته من غير ما حد من أبوه و أمه يروحوا معاه .. مفيش حاجة إسمها الدنيا بتشتي و مش خارج و خلينا نقعد في البيت .. مفيش ماتش أو حدث رياضي بيتلغي بسبب سوء الأحوال الجوية .. لو الدنيا بتمطر جامد الطفل بيروح مدرسته لابس كُزلك زي بتوع البنايين .. لو إنت لابس شيك بتتعلم إزاي تروح مدرستك و إنت راكب العجلة ماسك البدال بإيد و ماسك الشمسية بالإيد التانية .. الأباء و الأمهات بيعلموا عيالهم إن مفيش حاجة إسمها الجو وحش إنما فيه حاجة إسمها إنت مش لابس كويس .. مفيش حاجة إسمها أنا الأخ الكبير أو إني أخوكي و إنتي أختي فتعملي اللي أنا بقولك عليه .. الطفل من و هو صغير بيتعلم يعتمد علي نفسه في كل حاجة .. مفيش حاجة إسمها تخلي أختك تعملك الأكل .. الطفل من و هو صغير بيتعلم إيه هي حدوده و إيه هي مسئولياته و إزاي يدافع عن حقوقه.
الطفل الهولندي من و هو صغير أبوه و أمه بيشيلوا منه خصلة الغرور و بيحطوا بدالها الثقة بالنفس .. و دي حاجة مهم أوي إنك تقف قدامها و تفهمها كويس .. أكيد إنت شفت في فيلم همام في أمستردام إن إزاي عم (همام) كان بيسيب بنته تبات عند بيت صاحبها و أكيد إنت إستغربت و قلت عليه رجل إريال .. بس المشكلة إن الفيلم مشرحش الموضوع من وجهة النظر التانية اللي إنت محتاج تكون فاهمها حتي لو مش مقتنع بيها .. صحيح هولندا الدعارة فيها مرخصة و صحيح إن من حق البنت إنها تمارس الجنس من بعد سن 18 سنة بس رغم ده فهولندا هي أقل دول العالم في معدلات حمل المراهقات .. دي ملهاش إلا تفسير واحد و هو إن البنت الهولندية بتتربي كويس علي إزاي تتعامل في سن المراهقة و إزاي تكبر من بنت لإمرأة .. صحيح إن هولندا الخمور فيها مرخصة و مفيهاش قيود جامدة أوي علي سن السكر بس تلاقي إن هولندا هي أقل دولة في أوروبا في معدلات تناول الكحوليات و الخمور .. اللي يجيبلك صدمة فعلاً هو المخدرات .. اه القانون الهولندي بيسمح للقهاوي و الكافيهات إنها تبيع ماريجوانا و حشيش بس ممنوع إنها تتباع لأي حد تحت سن 18 سنة و ممنوع إن قهوة أو كافية يفتح ضمن دايرة قطرها 250 متر من أي مدرسة .. سنة 2011 إتعملت دراسة رسمية قالت إن حوالي 19% بس من الولاد و 14% بس من البنات في هولندا في المرحلة الثانوية هم اللي جربوا يشربوا حشيش و دي أرقام مذهلة لدولة مسموح فيها بيع الحشيش في الشارع .. الهولنديين جابوا مبدأ الممنوع مرغوب و طبقوه زي ما هو كده .. لما رخصوا بيع الحشيش الشباب قال لنفسه و أنا إيه اللي يخليني أجربه؟
المصدر:
مقالة بعنوان They raise the world’s happiest children- so is it time you went Dutch? نشرت في جريدة The Telegraph البريطانية و ده لينك المقالة الأصلية:
http://www.telegraph.co.uk/women/family/raise-worlds-happiest-children-time-went-dutch/
