موضوعنا النهاردة اللي حنتكلم عنه هو السكر .. اللي لو إتحط في برطمان جنب الملح في المطبخ فإنت أكيد في يوم من الأيام غلطت و عملت كوباية شاي مملحة بس ما علينا أنا مش جاي أقلب عليك المواجع .. سبب إننا حنتكلم عن السكر هو إن جه الوقت إننا نحاول نحدد هل السكر بريء ولا هو مجرم؟ .. كتير من برامج التغذية سواء علي التليفيزيون أو علي علي Social Media بتحذر من السكر بإعتباره أخطر علي أجسامنا من الهروين .. حيطلعلك حد عامل فورمة حلوة أوي و مٌعتبر نفسه خبير تغذية يشاورلك بصباعه و يقولك و هو بيزعق أوعي تكتر من السكر .. السؤال دلوقتي هو الرجل ده بيقول كده ليه؟ .. هل السكر وحش فعلاً؟ .. هل لو إنت طخين و عايز تخس أو لو إنت عايز تحافظ علي وزنك هل لازم تبعد خالص عن السكر؟ ولا إحنا ظالمين السكر و حنخش النار كلنا؟
عشان نجاوب علي الأسئلة دي لازم نحكي قصة و صدقني هي قصة رغم إنها قصة بتدور حول دكاتره بس هي قصة ممتعة أوي .. سنة 2016 فيه فريق مشترك من الدكاتره شغالين في جامعتي كاليفورنيا و سان فرانسيسكو الأميريكية عملوا دراسة كبيرة أوي نشروها في مجلة علمية إسمها JAMA Internal Medicine و ده اللينك بتاعها لو حبيت تقرأها .. الدراسة دي حكت إن إزاي في الستينات فيه منظمة تجارية إسمها Sugar Research Foundation أو مؤسسة أبحاث السكر و إختصاراً بتتسمي SRF راحت لدكاتره في جامعة هارفارد الأميريكية اللي تعتبر من أعرق جامعات العالم و طلبوا من الدكاتره في كلية الطب إنهم يمسكوا كل الدراسات العلمية اللي إتعملت لحد الستينات و اللي بتناقش دور الدهون و السكريات في الإصابة بأمراض القلب و يكتبوا بحث يقولوا فيه الزتونة اللي هو الإجابة النهائية بتاعة هو مين اللي بيسبب أمراض القلب هل هو السكر ولا الدهون؟ .. سنة 1967 البحث إتنشر في مجلة علمية مرموقة إسمها New England Journal of Medicine و الحقيقة إن SRF دفعت فلوس حلوة أوي يعني الدكتور الواحد خد في جيبه 6500 دولار اللي هو لو حولتهم بفلوس دلوقتي حتلاقيهم حوالي 49,000 دولار .. و كانت النتيجة هي إن السكر برئ براءة الذئب من دم سيدنا (يوسف) عليه السلام و إن الدهون هي الشيطان الأكبر و هي السبب ورا كل المصايب اللي بتحصل في القلب .. طبعاً إنت بدأت تشك و الفار يلعب في عبك.
مش كده و بس .. الفريق المشترك بتاع جامعتي كاليفورنيا و سان فرانسيسكو ده السنة اللي فاتت كتبوا بحث تاني حكوا فيه إن إزاي نفس المنظمة اللي هي SRF دي في الستينات برده وقفت تمويل دراسة علمية كانت بتتعمل في جامعة هارفارد برده قام بيها شوية دكاتره مكانوش مقتنعين بنتيجة الدراسة اللي إتعملت قبل كده و الدراسة اللي كانوا بيعملوها كانت شغالة علي فئران تجارب لما إتحطت علي نظام غذائي غني بالسكر فأجسامهم بقي فيها نسبة عالية من حاجة إسمها ترايجلاسيرايدز Triglycerides و ده هرمون بيسبب إرتفاع كبير في فرصة الإصابة بأمراض القلب .. بإختصار شديد SRF كانت عايزه تقنع الرأي العام بإن السكر حلو و كلوا سكر براحتكوا و إن الدهون الوحشة هي السبب ورا أمراض القلب .. بفكرك بس إن الكلام ده في الستينات .. ده سبب إن من بعد كده إعلانات الزيوت و السمنة كانت كلها عن إزاي الزيت بتاعنا خالي من الكوليسترول و إن إزاي السمنة بتاعتنا زيها زي السمنة الفلاحي بس عمرك ما حتلاقي إعلان لكادبري ولا جالاكسي بيقولك الشيكولاتة بتاعتنا مفيهاش نسبة سكر كفيلة إنها تسدلك شرايينك .. اللي عملته SRF و غيرها هو إنها بشكل ما أقنعت العالم بإن كلو شيكولاتة و حاجات حلوة و أشربوا حاجة ساقعة زي ما أنتوا عايزين بس متاكلوش زيوت و سمنة عشان بتخن و خطر علي القلب.
مؤخراً الناس فاقت و الغيامة إتزاحت من علي عنيهم و بدأوا يقولوا للسكر إنت اللي قتلت بابايا .. عشان كده كل خبراء التغذية سواء الحقيقيين أو اللي بياكلوا علي قفانا عيش بيحذرونا من السكر و بقوا بيحطوه في نفس الكفة مع الدهون .. بس مش هي دي الصورة الكاملة .. القصة دي زيها زي أي قصة في الدنيا ليها وش تاني متناقض خالص مع الوش الأول.
شهر فبراير اللي فات فيه دراسة إتنشرت في مجلة Science العلمية قالت إن إحنا كلنا ظالمين SRF .. محدش قال إن مكنش ليهم نفوذ علي الأبحاث العلمية اللي بتتعمل في جامعة هارفارد بس ده مش معناه نهائي إنهم مسيطرين علي كل الأبحاث العلمية اللي بتطلع من باقي جامعات العالم .. إنك تتخيل إن SRF بقدرة قادر قدرت تقنع العالم بإن السكر حلو و الدهون وحشة كإنك بتقولي إن رئيس مجلس إدارة SRF هو البرفيسور (تشارلز إكزافيير Charles Xavier) بتاع سلسلة X-Men .. و ده لينك الدراسة دي لو حبيت تقرأها بنفسك .. سواء زمان أو دلوقتي كل من هب و دب يقدر يروح لأي جامعة في العالم يديها فلوس و يقولها عايز دراسة تقولي مثلاً إني لما أحط السفن أب علي البيبسي دي مفيدة للصحة بس لما أحط الإسبرايت علي البيبسي ممكن يجيبلي جلطة فإنك تيجي تقولي إن SRF أو غيرها هم السبب في إننا لسنين و سنين نتغاضي عن أضرار السكر فإحنا كده مش بس بنبالغ في قوة تأثير SRF إنما كمان بنخفف من حجم غباءنا و تخلفنا كبني أدمين.
دلوقتي إحنا عارفين إن البيبسي و غيرها من الحاجات الساقعة اللي محطوط فيها كميات سكر رهيبة خطر علي الصحة و بقينا عارفين إن الدهون المشبعة هي كمان خطر علي الصحة .. بس اللي إنت محتاج تفهمه إن بداية من بعد الحرب العالمية الثانية لما العالم بدأ يفوق من الحرب و رجع ياكل براحته مكنش وقتها العلاقة بين السكر و الدهون و بين الإصابة بأمراض القلب واضحة و صريحة زي دلوقتي .. في الستينات مثلاً العالم كان بيتعامل مع السكر و الدهون زي ما إحنا بنتعامل مع اللبان دلوقتي .. إسأل أي حد تعرفه كان عايش في الستينات و السبعينات و الثمانينات في مصر حيقولك قد إيه السمنة و السكر كانت مالية البيوت .. فكرة إن في شهر رمضان الإعلانات أغلبها إعلانات زيوت و سمنة و حاجة ساقعة ده مش صدفة .. لا ده نتاج سنين و سنين من العادات اللي أباءنا و أجدادنا إتربوا عليها و هي إن الأكل مينفعش يتعمل من غير سمنة و زيت بس متكتروش و إن اللمة في رمضان متحلاش إلا و إحنا شاريين كرتونة حاجة ساقعة بيبسي إتنين لتر.
اللي أنا عايز أوصله ليك إن جيلنا اللي هو جيل الثمانينات و التسعينات و حتي الألفينات أُرتكبت في حقه جريمة كبيرة أوي .. إحنا إتربينا علي إن البطاطس المحمرة كترها وحش .. إتربينا بلاش لما نعمل بيض مقلي نكتر من السمنة .. إتعلمنا بلاش نكتر من الزيت في الأكل .. بس محدش قالنا إن الشيكولاتة كترها مش حلو .. إنت لما بتروح تزور قرايبك اللي عندهم أطفال بتلاقي نفسك جايبلهم حاجات حلوة و شيكولاتات و عصاير و دي لوحدها جريمة .. إحنا بقينا نبص في Social Media علي صور التورتات و التشيز كيك و المولتين كيك و نريل و نقول نفسي في ده بس ده غلط .. لما نوصل لمرحلة إن أكثر من 30% من جيلنا عنده سِمنة يبقي إحنا إتربينا غلط و لو عرفت إن علاج السِمنة بس بيكلفنا سنوياً مليارات يبقي لازم تفهم إن إحنا أُرتكب في حقنا جريمة .. و في نفس الوقت مينفعش نحمل غيرنا المسئولية و خليني أديلك مثال .. إحنا عارفين إن الحاجة الساقعة كترها غلط لإن فيها كمية سكر مبالغ فيها بس حتي لما تطلع جريدة The New York Times الأميريكية سنة 2015 تقول إن شركة كوكاكولا دفعت فلوس لعلماء عشان يطلعولها دراسة علمية بتقول إن مفيش علاقة بين السِمنة و بين المشروبات الغازية فده مش معناه إن شركة كوكاكولا هي السبب في اللي إحنا فيه .. سوري في الكلمة إحنا اللي أغبياء.
المصدر:
مقاله بعنوان Inside the fight over the sugar conspiracy نشرت في Website اسمه TheVerge.com وده لينك المقاله الاصليه:
https://www.theverge.com/2018/2/23/17039780/sugar-industry-conspiracy-heart-disease-research-mark-hegsted-harvard
