الرجل اللي قدامك ده واللي شبه الفنان (محمد صبحي) في دور (ونيس) إسمه (ميل جرييفز Mel Greaves) و الرجل ده عايز يعمل حاجة واحدة بس في حياته .. إنه يخلي الأطفال يشربوا زبادي خلاط عشان يحميهم من الإصابة بسرطان الدم أو اللوكيميا Leukaemia .. أنا مبهزرش علي فكرة .. أكتر من 30 سنة أبحاث و تعب و دراسة في اللوكيميا كباحث في معهد أبحاث السرطان في العاصمة البريطانية لندن عشان في الأخر يطلع يقولنا إن الحل لحماية الأطفال منه إنهم يشربوا زبادي خلاط .. لو إنت فاكر اني بضيع وقتك في المقالة دي فالرجل في ديسمبر 2018 إستلم لقب فارس المملكة البريطانية تقديراً لجهوده إنه يعمل زبادي الخلاط .. واضح كده إن الموضوع محتاج يتشرح لإن أكيد هزيمة اللوكيميا مش بالبساطة دي فخليك معايا بقي.
في الخمسينات يعني ما وقت ما (جمال عبدالناصر) الله يرحمه غفلنا كلنا و بقي رئيس كان اللوكيميا بيجي لطفل من كل 2000 طفل في بريطانيا وكان وقتها مرض قاتل مفيش طفل بيقدر يهزمه .. في الوقت ده الرأي العام وسط الدكاتره و الباحثين إن والله السبب الأساسي للإصابة باللوكيميا هي الأشعة النووية لإن وقتها أي حاجة الناس مش فاهمه هي جت ليه أو بتحصل إزاي يقوم يقولك أصله نووي .. دلوقتي أكتر من 90% من حالات الإصابة باللوكيميا بقينا بنعرف نشفيها بس إنت عندك مشكلة .. العلاج المتوفر حالياً للوكيميا سام و له أعراض جانبية كتير و تجربة ما يعلم بيها إلا ربنا من قسوتها لأي طفل .. زود علي كده إن العلماء بره ملاحظين حاجه غريبة أوي .. نسبة الإصابة باللوكيميا في بريطانيا و أوروبا عموما بتزيد بمعدل شبه ثابت وهو 1% سنويا .. هم خدوا بالهم إن اللوكيميا بيجي للأطفال في الدول المتقدمة أكتر بكتير من الدول النامية .. اللي هو يخليك تسأل هو اللوكيميا ده إشتراكي يعني ولا إيه .. هو الحقيقة مش إشتراكي ولا عنده مشكلة مع الرأسمالية .. عشان تفهم ليه طفل ممكن يصاب باللوكيميا فإنت لازم تفهم إن فيه حاجتين لازم يحصلوا ورا بعض عشان طفل يصاب بالمرض .. حاجة منهم رباني و حاجة منهم بصنع البشر.
الحاجة الأولانية اللي لازم تحصل عشان طفل يصاب باللوكيميا هي طفرة جينية بتحصل لطفل من كل 20 طفل حول العالم:
فيه حاجة غلط بتحصل للطفل ده وهو لسه في رحم أمه .. اللوكيميا مش مرض وراثي .. تاني هو مش وراثي .. بس الحاجة الغلط دي هي بتبقي الشرارة اللي بسببها ممكن الطفل يجيله لوكيميا لما يكبر ودي زي ما قلت عبارة عن طفرة جينية زي بتاعة سلسلة أفلام X-Men كده بس بتحصل و لسه الطفل في رحم أمه.
الحاجه الثانية اللي لازم تحصل إن يحصل خلل في الجهاز المناعي للطفل:
عشان حضرتك جهازك المناعي يشتغل صح و إنت كبير فلازم و إنت لسه في أول سنة ليك من عمرك يجيلك دور برد جامد شوية أو يحصلك أي عدوي من أي نوع .. المهم إن جسمك يحصله الصدمة الأولانية زي صدمة لما ترمي البصل في السمنة عشان يتحمر .. من غير الطشة دي الخضار مش حيتسبك .. ومن غير دور البرد ده جهازك المناعي مش حيشتغل وهنا بيجي دور ليه اللوكيميا بيجي للأطفال في المجتمعات الغنية .. روح لأي حد من أهلك ربنا رزقه بطفل جديد في زيارة بس يكون الطفل شد حيله كده بقي عنده 6 شهور مثلاً و إتفرج علي الأم معيشة طفلها في جو عامل إزاي .. حتلاقي نفسك كأنك في أوضة عناية مركزة .. الأرض كلها متنظفة علي سنجة عشرة .. مفيش ترابة علي الحيطة .. الشبابيك مش بتتفح .. لو عندهم تكييف حتلاقيها مشغلة فلتر عشان ينقي الهواء .. الطفل بيشرب مياه معدنية و بياكل أكل مُعلب .. لو الأم شافت نملة في الشقة بيبقي يوم أسود .. البيت كله مُعرض إنه يتنفض من أول و جديد عشان المحروس النملة متعضوش .. مش كده وبس .. عدد الأمهات اللي بترضع طبيعي بيقل كل ما غني المجتمع بيزيد .. الطفل مبينزلش الشارع .. مبيلعبش مع أطفال تانية .. بإختصار إنت بتعيش الطفل في أوضة عناية مركزة .. كل ده معناه إن الطفل بيتعزل عن أي فرصة إنه يتعرض للجراثيم و الميكروبات .. هي دي حاجة كويسة إنه مش حيعيي و مش حيجيله برد .. بس في نفس الوقت إنت بتخاطر إن جهازه المناعي لما يكبر ميشتغلش صح.
دلوقتي الطفل الحمد لله كبر و راح المدرسة و طبعاً المدرسة مش نظيفة زي البيت اللي هو إتربي فيه .. هوبا الطفل جاله دور برد يعتبر أول دور برد قوي يجيله من ساعة ما إتولد .. أو إنه إتعور مثلاً أو حتي حشرة عدت علي التعويرة عملتله إلتهاب .. فجأة جهازه المناعي لإنه حساس مش متعود علي الكلام ده بيبالغ جداً في رد فعله .. ساعتها الجهاز المناعي بيتعامل مع دور برد عادي علي إنه إلتهاب مزمن Chronic Inflammation .. أكنك بالضبط بتتعامل مع خطيبتك و تكون حساسة شوية بتسألك الفستان ده حلو عليا فبتقولها بس يا ريت لو مقاس اكبر تقوم مزعقة في وشك هو يعني انا طخينة و تاخد بعضها و تمشي و ترميلك الدبلة في وشك .. بيبقي كل اللي إنت بتفكر فيه إن محدش يشوف تفاصيل جسمها بس هي لإنها حساسة بتروح في حتة تانية خالص .. لما ده بيحصل الجهاز المناعي بيتعامل زي ما أميركا تتضرب بالنووي كده فتقوم مطلعة صواريخها العابرة للقارات عشان تنسف العالم كله .. الصواريخ العابرة للقارات بتاعة الجهاز المناعي هي مادة كيميائية إسمها سايتوكاينز Cytokines بتبدأ تمشي في مجري الدم .. ولإن الجسم فعلياً مش محتاج المادة دي اللي المفروض إنها بتطلع في حالات الطواريء القصوي يعني فوجودها في الدم في وقت الجسم مش محتاجه بيخلق الطفرة الجينية التانية اللي لو هي و الطفرة الجينية الأولانية خالص اللي حصلت و الطفل لسه في رحم أمه حصلوا مع بعض فالطفل ساعتها بقي معرض أوي إنه يصاب باللوكيميا.
الدم بيتكون من 3 حاجات و المصنع اللي بينتج الدم هو النخاع اللي في العظم عشان بعد كده لما نقولكوا كلوا النخاع اللي في الكوارع محدش يتريق .. المهم .. فيها حاجة إسمها كرات الدم الحمراء ودي دورها إنها أوبر Uber بتاع الأكسجين لخلايا جسمك .. كرات الدم البيضا ودي تبقي الAnti-Virus بتاع الكومبيوتر بتاعك لإن دورها هي محاربة الإلتهابات و البكتريا .. البلازما ودي دورها إنها توقف النزيف .. المشكلة إن لما الطفرتين الجينيتين دول يحصلوا و يبدأ جسمك يٌصاب باللوكيميا فالنخاع بيبدأ ينتج كمية كرات دم بيضا زيادة عن اللزوم .. ده بيخلي إن خلايا النخاع أساساً تبدأ متنموش بالشكل المطلوب .. حاول تتخيل إن النخاع ده عبارة عن مصنع فيه 3 خطوط إنتاج و بسبب غلطة فإنت بدل ما تنتج 3 حاجات قد بعض في الكمية إنت خليت خط إنتاج منهم ينتج ضعفين الكمية بتاعة الخطين التانيين لدرجة إن المواتير و المكن سخنت و إتحرقت و المصنع كله وقف .. لما المصنع كله بيقف فإنتاجه هو كمان بيقف .. بيبدأ النخاع مينتجش لا كرات دم حمرا ولا بيضا ولا بلازما.
هنا بيجي دور الزبادي خلاط .. إحنا مش حنعرف نحمي الطفل من الطفرة الجينية اللي بتحصله وهو لسه في بطن أمه بس نقدر نحميه من الإلتهاب اللي بيجيله لما يكبر خصوصاً لو كان جهازه المناعي مش مستعد .. (ميل جرييفز) و الفريق بتاعه بدأوا يدرسوا البكتريا اللي جوه معدة سعادتك لإن البكتريا دي جزء من شغلها إنها تهضم الأكل اللي إنت بتطفحه و في نفس الوقت بتقدر تفهم منها هي إيه بالضبط الحشرات اللي إنت إتعرضتلها من ساعة ما إتولدت .. بمعني .. لو إنت طفل إتولدت في البيوت النظيفة اللي أنا شبهتها بإنها شبه أوض العناية المركزة فده معناه إن معدة سعادتك غالباً مفيهاش بكتريا كتير فإنت زي ما إحنا بنقول كده إنت فايتك كتير لإن فيه بكتريا كتير مفيدة لجهازك المناعي مش موجوده في معدتك .. حالياً (ميل جرييفز) شغال علي إختبارات علي الفيران عشان يعرف إيه هي الحشرات اللي لو الفيران كلتها بتحفز من جهازها المناعي بحيث إن شاء الله خلال سنتين أو 3 سنين حيبدأ شغل في التجارب علي البشر .. كل اللي هو محتاجه هو خلطة من 6 ل10 ميكروبات يكون الجهاز المناعي للطفل محتاجهم يضربهم في الخلاط زي أي سموثي أو زبادي الخلاط بتعمله في البيت و يدهولك تشربه .. الكوكتيل ده مش بس حيحميك من اللوكيميا .. السكر و الحساسية برده مرتبطة بضعف الجهاز المناعي وممكن يبقي الكوباية ديه هي اللي تحميك من الإصابة بيهم.
المصدر:
مقالة بعنوان ‘For 30 years I’ve been obsessed by why children got Leukaemia. Now we have an answer’ .. نشرت في جريدة The Guardian البريطانية وده لينك المقالة الأصلية:
https://www.theguardian.com/science/2018/dec/30/children-leukaemia-mel-greaves-microbes-protection-against-disease
