إنت أو إنتي لقيتوا وزنكوا زاد أوي و طلعلكوا كرش خلي إن مشوار شرا الهدوم بيبقي عبارة عن عبء نفسي رهيب لإنك يا إما مش بتلاقي مقاس مناسب و الأكتر من كده إنك بتبص في المراية و تصعب عليك نفسك من اللي إنت عملته في جسمك .. في لحظة طيش بتقرر تعمل دايت و تنكد علي نفسك بهدف إنك تنزل الكرش اللي قارف عيشتك ده .. يا بتتابع مع دكتور أو بتدخل علي النت تعرف الناس بتخس إزاي فبتلاقي نظام دايت تمشي عليه .. فيه منكوا عنده إرادة إنه يروح الجيم مع الدايت أو ينزل يتمشي كل كام يوم عشان يسرع شوية من وقت نزول الكرش.
الوقت بيعدي و أول إسبوع بيخلص تروح تقيس وزنك تلاقي نفسك خاسس 5 كيلوجرام مرة واحدة بتبقي فرحان و مزقطط .. تروح البيت تقف قدام المراية تلاقي كرشك زي ما هو .. بيعدي شهر تلاقي نفسك نزلت فيه 7 كيلوجرام و بتبقي فرحان أوي بتروح البيت تشوف نفسك في المراية تلاقي كرشك بيبصلك و بيطلعلك لسانه .. هو ليه إنت وزنك عمال ينزل و كرشك لا؟ هو مش المفروض لما وزني يقل يبقي كمية الدهون اللي في جسمي كلها تقل معايا مع بعضها؟
الحقيقة هي الإجابة لا .. جسم الإنسان عامل زي دماغ الطفل الصغير عنيد و مبيحبش يتقاله يعمل إيه و ميعملش إيه و يخس فين و يطخن فين و عشان كده طبيعي جداً إن الناس الطخان لما يعملوا دايت يلاقوا حتت معينة في جسمهم إنكمشت و حتت تانية لا .. قدام شوية في المقالة حفهمك تعمل ايه عشان تنزل الكرش بس دلوقتي خليني أفهمك ليه كرشك ده دماغه ناشفة و عنيد و مبينزلش بالساهل؟
مهم تفهم إن مفيش إتنين زي بعض .. إنت ممكن عشان تشجع نفسك تقرر إنت و واحد صاحبك تعملوا دايت مع بعض تلاقيه هو بيخس أسرع و إنت كرشك نزل و هو كرشه لا .. بس فيه قواعد مشتركة بتمشي علي البشر كلهم خصوصاً 4 قواعد:
- القاعدة الأولي .. لو حضرتك بتعمل دايت و كرشك مبينزلش فده معناه حاجة من إتنين .. الإحتمال الأول يا إما حضرتك بتتعرض لضغط نفسي كبير سواء في شغلك أو حياتك الشخصية أو إن إنت بطبيعتك بني أدم عصبي لإن البني الأدم العصبي نسبة الكوليسترول في دمه بتنط جامد و لما ده بيحصل بتلاقي إن الدهون زي ما يكون عندها إجتماع في منطقة البطن و كلهم بيروحوا علي هناك .. الإحتمال الثاني إن جسمك عنده مقاومة لإفراز الإنسولين و دي خلقة ربنا و ممكن تتابع مع الدكتور بتاعك إنه يديلك أدوية تساعد جسمك في إنه يقبل الإنسولين بسهولة و ساعتها حتلاقي الدايت ماشي معاك زي السكينة في التورتة و كرشك بينزل و زي الفل.
- القاعدة الثانية إن الجينات بتلعب دور .. يعني لو إنت باباك أو مامتك عندهم كرش فإنت إحتمال كبير إنت كمان يبقي عندك كرش .. بس بلاش تخلي الجينات هي الشماعة اللي بتعلق عليها مشاكلك .. يعني بلاش دماغك تمشي بمبدأ نعمل إيه أدي الله و أدي حكمته.
- القاعدة الثالثة إن نظام الدايت اللي حضرتك ماشي عليه بيلعب دور مهم لإن أكتر نظامين دايت الناس كلها بتمشي عليهم يا إما حاجة بيسموها Low Carbohydrates Diet أو Low Fat Diet .. إنت ماشي علي دايت بتقلل فيه الكربوهيدرات يعني ممنوع عنك العيش و النشويات و البطاطس و الأرز فده معناه ان الدكتور التخسيس بتاعك إدالك Low Carbohydrates Diet و عشان كده فإنت بتلاقي نفسك بتخس بسرعة و كل شوية بتخش الحمام تعمل بيبي .. أهو كتر البيبي اللي إنت بتعمله ده هو السبب في إنك تخس لان دي المياه بتيجي من حاجة إسمها الجلايكوجين Glycogen و دي المادة اللي بتتكون منها العضلات مش الدهون .. عشان كده إنت بتلاقي نفسك بتخس بسرعة بس كرشك زي ما هو .. كمان الناس اللي عشان تخس تلاقيها عماله تتمرن كارديو في الجيم لما تتعمي .. الناس علي الميزان بتخس بسرعة بس ده برده مش معناه إن حضرتك كرشك بينزل أو كمية الدهون المتخزنة في جسمك بتقل.
- القاعدة الرابعة و الأهم .. لو خسيت بسرعة يبقي كرشك مش حينزل .. نقول كمان .. عشان تخس كلك علي بعضك مش حتة اه و حتة لا لازم في الإسبوع تخس ما بين 1-3% من إجمالي وزنك .. أكتر من كده إنت بتخاطر إن اللي يخس منك هو العضلات مش الدهون .. الصبر هو المفتاح إن كرشك ينزل .. لو إستعجلت و قلت أنا عايز نتايج بسرعة يبقي حتلاقي وزنك نزل بس كرشك بيطلعلك لسانه.
نيجي بقي للسؤال المهم: أنزل كرشي ده إزاي؟ .. فيه حاجتين لازم تعملهم صح مع بعض اللي هم إنك تاكل أكل بني ادمين و تروح الجيم تتمرن زي البني أدمين .. الإتنين لازم يتعملوا مع بعض.
يعني إيه أكل أكل بني أدمين؟
مبدأياً كده قبل كل وجبة غمض عنيك و تخيل طبق أحلامك يبقي عامل إزاي؟ يا تري حيبقي كبير ولا صغير ولا وسط؟ .. تخيلته؟ .. إقسمه نصين خد نص و إرمي الباقي .. دي الكمية اللي المفروض تاكلها .. يعني مش عايز تمشي علي دايت متمشيش بس لو إنت عايز تتغدي و مثلاً نفسك تروح تضربلك نص فرخة سوري بالرز و التومية و البطاطس المحمرة يبقي إنت لازم تاكل ربع فرخة بس و هكذا .. الطبق بتاعك حيتقسم كالأتي: نص الطبق حيبقي خضار و فاكهة .. ربع الطبق حيبقي بروتين خفيف .. ربع الطبق اللي فاضل حيبقي دهون صحية .. يعني نرجع للمثال بتاع النص فرخة السوري .. لو إنت بتعمل دايت فإنت بدل النص فرخة حتاكل ربع .. و بدل الأرز حتاكل خضار سوتيه أو خضار عادي يا سيدي .. و بدل البطاطس المحمرة كلها مهروسة.
لنفترض إنك عكيت في أكلة .. إتعزمت علي الغدا .. حد حلف عليك عشان تاكل حتة كيكة شيكولاتة مراته عاملاها .. مش مشكلة كلها و عك في أكله و إرجع أضبط من الوجبة اللي وراها .. اللي بيخسس هو إنك تثبت علي إرادتك و أكلك الصحي مش إنك عكيت في أكلة فتقول لنفسك ما هو كده كده اليوم باظ اخده فري كله و أبقي أبدأ دايت تاني من بكره .. الدنيا مش بتمشي كده .. أنا عارف إنه تشبيه غلط بس سامحني .. حاول تتخيل إن الدايت عامل زي الصلاة .. لسبب ما إنت فوت صلاة الظهر فهل معني كده إنك تقول لنفسك خلاص اليوم باظ مش حصلي العصر و المغرب و العشاء و بكره أبقي أحفاظ علي صلواتي كلها .. لا بتصلي عادي العصر و المغرب و العشا و بكره ممكن تعوض الظهر مرتين .. نفس الكلام في الدايت .. بوظت في وجبة مش مشكلة كمل يومك دايت عادي و ممكن تتمرن زيادة شوية يومها أو بكره .. و حط النقط اللي جايه دي حلقة في ودانك:
- لما تيجي تاكل أي وجبة متاكلش لحد ما تشبع .. كل لحد ما تشبع بنسبة 80% مثلاً .. إمشي بحديث النبي (عليه الصلاه و السلام) نحن قوم لا نأكل حتي نجوع و إذا أكلنا لا نشبع .. عارف ناس حتقولي يا عم ده حديث ضعيف بس حتي لو ضعيف بس هو حديث علمياً و منطقياً صح.
- لنفترض إن حضرتك طفس و جعت بين أي وجبتين .. متروحش تشتري حاجة حلوة .. كل خيار أو خس أو جرجير أو جزر .. أي خضار يعجبك أو أي فاكهة تعجبك و ياسلام لو تفاح عشان التفاح كله ألياف فتقدر تقول كده بيكتمك.
- متاكلش أي حاجة معلبة .. الأكل المعلب فيه سم قاتل .. لا بلوبيف ولا مربي ولا عسل إسود ولا اي أكل بيتحط في علبه جايلك من مصنع .. الأكل ده بيطخنك أو بيخلي جسمك ميستفيدش بالأكل الكويس اللي إنت بتاكله.
- لما تيجي تاكل حاول تزود نسبه الألياف في أكلك لإن الألياف بتملي بطنك بسعرات حرارية قليلة زي خضار السلطة اللي هو الخس و الخيار و الجزر و عندك الشوفان و السبانخ و التفاح.
- شرب مياه كتير و إياك تقرب من الحاجات الساقعة .. مشكلة الحاجات الساقعة إن كلها سكر بس جسمك مبيدخلهاش في حسبته .. جسمك بعيد عنك لما إنت بتشرب حاجة ساقعة بيستعبط و مبيسجلش كل السكر اللي في الكانزاية و بالتالي بعد ما بتشربها بتلاقي نفسك عايز حاجة حلوة عادي خالص مع إنك واخد كمية سكر قد اللي في كرتونة شيكولاتة جالاكسي فلوتس.
- متقربش من أي حاجة مقلية في الزيت .. لا بطاطس محمرة ولا فراخ بروستد.
- لو نفسك هفتك علي جبنة كلها مرة في اليوم .. هنا أنا بتكلم عن الجبنة المصنعة زي الجبنة البراميلي و الجبنة التركي (اللي هي الرومي) و الشيدر و كده.
طب كده أنا فهمت إزاي أكل زي البني أدمين .. أتمرن زي البني أدمين إزاي بقي؟
معلومة رقم واحد: أنا ممكن أقولك إعمل تمارين بطن من هنا لبكره و برده كرشك مينزلش .. معلومة رقم إتنين: فيه نوعين تمارين إنت حتحافظ عليهم اللي هم الكارديو HIIT Cardio و تمارين التحمل Strength Training و الإتنين حتتمرنهم سوا .. تمارين الكارديو هدفها إنك تحرق سعرات بس تمارين التحمل هدفها إنك تبني عضل .. لو حتتمرن 3 مرات في الإسبوع يبقي حتتمرن تمرينتين تحمل و تمرينة واحدة كارديو .. طب لنفترض إن حضرتك مسحول في الشغل و مش فاضي تروح الجيم .. فمعلش حستسمحك يعني تفضي نفسك في البيت 3 دقايق كل يوم تعمل 5 تمارين بحيث كل تمرين تعمله في دقيقة و نص يعني 90 ثانية.
التمرين الأول .. حتعمل حركة من 3 حركات دول بحيث لو النهاردة بدأت بواحدة يبقي بكره تعمل الثانية و بعده تعمل الثالثة و هكذا:
التمرين الثاني .. برده حتعمل حركة واحدة من الحركات الثلاثة اللي تحت بعض بحيث تبدل بينهم بين الأيام:
التمرين الثالث .. هي حركة واحدة إسمها لاتيرال هوبس Lateral Hops:
التمرين الرابع .. هي حركة واحدة برده إسمها جامبينج سكواتس Jumping Squats :
التمرين الخامس و الأخير إن حضرتك بتجيب كرسي حمام من القصيرين دول أو أي صندوق خشب و تعمل الBox Step.
المصدر:
مقالة بعنوان Why you’re losing weight but not belly fat- and what to do about it .. ليه إنت بتخس بس كرشك مبينزلش و تعمل إيه عشان تحل المشكلة دي .. نشرت علي موقع PopSugar.com وده لينك المقالة الأصلية:
https://www.popsugar.com/fitness/Why-Am-I-Losing-Weight-Belly-Fat-44838689
