موضوعنا النهاردة اللي حنتكلم عنه هو البني أدم اللي قدامك في الصورة ده .. في حالة إنك متعرفش ده مين فده إسمه (إيلون ماسك Elon Musk) و ده رجل معاه فلوس بس مش دي القضية لإن ناس كتير معاها فلوس .. (نجيب ساويرس) معاه فلوس .. (فيفي عبده) معاها فلوس .. المميز في (ماسك) إنك لما تمسك الCV بتاعه حتلاقي نفسك مش مصدق إن فيه بني أدم طبيعي بيعمل اللي هو عمله .. ده رجل عنده شركة بتصنع صواريخ فضاء و عنده شركة بتصنع عربيات بالكهرباء قام حاطط عربيته الشخصية اللي بتنتجها شركته علي صاروخ من اللي بتعملها شركته برده و طلعه الفضاء عشان يروحوا المريخ و هم في الجو الكبسولة اللي شايله العربية تفتح تقوم مطلعه العربية تطير في الفضاء وهي مربوطة بحبل بالصاروخ ويفضلوا طايرين كده في الفضاء لحد ما يوصلوا المريخ ياخدولهم لفتين حوليه .. بلاش دي .. إنت تعرف إن (ماسك) ده كان ماشي مع (كاميرون دياز Cameron Diaz) و ممثلة تانية إسمها (أمبر هيرد Amber Heard) عايزك بس تخش تعمل Search عليها و إتفرج علي شكلها .. طب بلاش دي .. لما جه الممثل (روبيرت داوني جونيور Robert Downey Jr.) يقدم شخصية (توني ستارك Tony Stark) في فيلم Iron Man يٌقال إنه بني حاجات كتير في طريقة تجسيده للشخصية علي (ماسك) لإنهم يعرفوا بعض كويس.
بس اللي حنتكلم عنه النهاردة هو إزاي (ماسك) ده بني أدم طبيعي خالص زيه زيك .. ده حقيقي .. ده رجل حياته الشخصية عبارة عن منطقة كوارث .. شركاته بتخسر كتير زيها زي أي شركات شغالة في مجال الهندسة بيبقي مطلوب منها تخلص تسليمات قبل Deadline معين و مبتلحقش تسلم .. بإختصار إحنا هنا جايين نثبتلك إن (ماسك) ده بني أدم طبيعي خالص مفيهوش حاجة مختلفة .. مراتاته شايفينه رجل مينفعش يبقي زوج و مشاكله في الشغل مبتخلصش اللي هو فعلياً (ماسك) ميفرقش كتير عن أي رجل في الدنيا.
هو من مواليد مدينة بريتوريا في جنوب أفريقيا لأم إسمها (ماي Maye) كانت شغاله عارضة أزياء و أب إسمه (إيرول Errol) شغال مهندس .. (ماسك) من وهو صغير و هو مهووس بحاجتين: روايات الخيال العلمي و أي سلك بيمشي فيه كهرباء .. لما بقي عنده 8 سنين أبوه و أمه إتطلقوا .. أخته و أخوه شبطوا يقعدوا مع مامته فهو بكل جنتلة تطوع إنه يروح يقعد مع أبوه و كان ده واحد من أسوأ الحاجات اللي هو عملها في حياته .. لما بقي عنده 17 سنة سافر كندا عشان يدرس فيزياء و إقتصاد في جامعة الملكة Queen’s University في ولاية أونتاريو و سنة 1992 هاجر لأميركا عشان يدرس في جامعة بنسلفانيا و بعدها قدم عشان ياخد الدكتوراه من جامعة ستانفورد في فيزياء الطاقة .. بعد يومين من بداية الدراسة في الدكتوراه سحب ورقه من الجامعة.
اللي عمله (ماسك) إنه راح عمل جرنان علي النت سماه Zip2 بالتعاون مع أخوه (كيمبال Kimbal) .. يُقال لما (ماسك) أسس Zip2 كان تقريباً بيشتغل طول اليوم و بينام في مكتبه بمعدل شغل ما بين 80 ل100 ساعة في الأسبوع .. أحب بس أقولك إن الإسبوع علي بعضه فيه 169 ساعة .. سنة 1999 الإتنين باعوا الجرنان بتاعهم لشركة إسمها Compaq مقابل 300 مليون دولار .. (ماسك) خد نصيبه من الفلوس و أسس به بنك علي النت إسمه X.com و بعد كده X.com بقي Paypal و دي شركة زي OLX كده اللي هو بتشتري حاجات Online من عليها بس هو كان من أوائل الناس اللي إشتغلت في ال Business ده .. المهم إن سنة 2002 (ماسك) باع Paypal لشركة eBay مقابل 1.5 مليار دولار .. هنا (ماسك) بقي عنده 31 سنة و تحت إيده في البنك 165 مليون دولار محتاج يحطهم في مشروع .. أقف بقي هنا شوية عشان حنتكلم عن الحياة الشخصية بتاعة (ماسك) لحد ما وصل للمرحلة دي.
وهو بيدرس في كندا إتعرف علي واحدة إسمها (جاستين ويلسون Justine Wilson) كانت عايزه تبقي كاتبة روايات .. وهم في الجامعة (ماسك) أعجب بيها وعزمها علي خروجة أيس كريم بس هي مجاتش .. تاني يوم هو راحلها السكشن بتاعها وفي إيده علبتين أيس كريم .. رأي (جاستين ويلسون) في (ماسك) إنه بني أدم مبيحبش يتقاله لا .. الإتنين إتجوزوا و هم بيرقصوا مع بعض في الفرح (ماسك) و سط جو الرومانسية اللي محصلش اللي كل بنت في الدنيا بتحلم به و هي بترقص سلو مع جوزها إذا ب(ماسك) بيميل علي ودنها و بيقولها إنه هو زي ما بنقول كده سي السيد في الجوازة دي .. كلمته هي اللي تمشي و مينفعش تقوله لا ولا تناقشه في قراراته .. هو كان متحكم في كل حاجة في الجوازة .. هو اللي كان بيقولها مثلاً تصبغ شعرها إمتي و لون إيه (هو كان مجنون باللون الأصفر فكان عايزها تبان دايماً شقرا).
من أكتر الحاجات اللي كانت بتتقال لما بيتخانقوا إنها كانت بتقوله انا مراتك مش موظفة عندك فهو يرد عليها لو إنتي كنتي موظفة عندي كنت طردتك من الشغل .. أول طفل ليهم (نيفادا Nevada) مات بعد ولادته ب10 أسابيع بسبب مرض نادر إسمه متلازمة وفاة الأطفال الرضع السودانية Sudan Infant Death Syndrome و دي مأساة لا هو ولا هي بيحبوا يتكلموا عنها بس هي عانت كتير من الإكتئاب بعد وفاة إبنها .. بعد كده خلفوا 5 أطفال بالحقن المجهري إتنين توأم و ثلاث توائم بس .. بعد 8 سنين جواز إتطلقوا بخناقة كبيرة كلفت (ماسك) ملايين الدولارات راحت في النفقة اللي هي الخناقات المعتادة في الجواز عندنا في مصر .. بعد شهر ونص من طلاقه بعتلها رسالة علي الموبايل إنه خطب الممثلة البريطانية (تالولاه رايلي Talulah Riley) اللي هي أساساً أصغر منه ب14 سنة .. و دي تاني حاجة عايزك تعرفها عن (ماسك) الرجل و هي إنه مبيحبش يبقي من غير ست في حياته .. سنة 2010 الإتنين إتجوزا و إتطلقوا سنة 2012 و إتجوزا تاني سنة 2013 .. سنة 2014 هو قدم علي إجراءات الطلاق بس رجع في كلامه و سنة 2016 هي اللي قدمت علي إجراءات الطلاق و أخيراً إتطلقوا .. مش بقولك حياته الشخصية عبارة عن منطقة كوارث.
نرجع تاني بقي للكلام عن شغل (ماسك) وكنا وقفنا إنه باع Paypal لeBay مقابل 1.5 مليار دولار سنة 2002 وكان نصيبه لحد كده 165 مليون دولار كان محتاج يحطهم في مشروع بس هو الحقيقة أسس بيهم 3 شركات هم تيسلا Tesla و SpaceX و Solar City .. في رأيي إن إستثمار (ماسك) فلوس في شركة تيسلا Tesla كان أخطر مغامرة هو عملها لإن هو بدأ الشركة دي سنة 2002 في الوقت اللي مش بس أميركا إنما العالم كله كان مدمن بنزين و جه هو قالهم أنا حعمل عربية سريعة بنفس إمكانيات الفيراري و اللامبورجيني بس بتمشي بالكهرباء و ده في حد ذاته في الوقت اللي (ماسك) قال فيه فكرته كان زلزال هز عالم العربيات اللي بالكهرباء بس في نفس الوقت الناس بدأت تضحك عليه و تعتبره بني أدم مغفل .. بفكرك بس إن وقتها كانت الفكرة اللي متاخده عن عربيات الكهرباء إنها عربيات صغيرة محندقة أخرها تمشي علي 60 كيلومتر في الساعة .. مش كده وبس .. طموح (ماسك) إن شركة Tesla بعد ما تعمل عربيتها السريعة الأولانية تبدأ تخش في مجال العربيات الSedan أو الصالون بحيث برده حيعمل عربيات كهرباء بنفس إمكانيات العربيات الBMW و الMercedes.
(ماسك) بيحب يدير شغله زي ما بيحب يدير علاقاته العاطفية .. بيبقي هو الكل في الكل اللي كلمته تمشي علي أطخن طخين و ده يفسرلك ليه هو معين نفسه الCEO بتاع شركاته الثلاثة .. تحت إدارته شركة Tesla فضلت تمشي علي سطر و تسيب سطر لحد ما في سنة 2008 قدر ياخد قرض من الحكومة الأميريكية بقيمة 456 مليون دولار أنقذ الشركة من الإفلاس و في 2010 طرح أسهم الشركة للبيع في البورصة و بقت شركة Tesla هي شركة السيارات الأميريكية الوحيدة اللي ليها أسهم في البورصة مع شركة Ford واللي سبقتها للخطوة دي من سنة 1956 .. مهم تكون فاهم إن فكرة المشي علي سطر و نسيب سطر ده بقي أسلوب حياة في شركة Tesla .. اه والله زي ما بقولك كده .. سنة 2017 تفوقت علي شركتي Ford و General Motors عشان تبقي أغني شركة سيارات أميريكية و بعدها بسنة و بسبب التأخيرات المستمرة في معاد تسليم أحدث موديلات الشركة اللي سموها Tesla Model 3 فالأرقام بتاعة حسابات الشركة في الربع الأخير من سنة 2017 قالت إن الشركه خسرت 675.5 مليون دولار و ده في حد ذاته خمس أضعاف الخساير بتاعتهم في سنة 2016 .. وفي نفس السنة برده الأرقام بتاعة الحسابات بتاعتهم قالت إن أرباح الشركة نطت 44% عشان تبقي 3.3 مليار دولار.
خليني أحاول أبسطلك الدنيا و أقولك خلاصة تجربة Tesla دي بإني أنقلك كلام (ماسك) اللي قاله في إجتماع مع المستثمرين اللي حاطين فلوسهم في الشركة لما قالهم (وسوري يعني علي سوء التشبيه بتاعه) .. إحنا كنا في وضع زي الخره يمكن أكتر مما كنا متوقعين و كنا في وضع زي الخره أكتر ما إحنا كنا عايزين نبقي.
الاستثمار التاني اللي (ماسك Musk) بدأه من سنه 2002 هي SpaceX و دي شركة بتصنع صواريخ فضاء و تقدر تقول إن دي الشركة اللي بتجيب فلوس مخليه (ماسك) يقدر يصرف علي Tesla .. شركة SpaceX دي بتعمل حاجات كتير زي مثلاً إنها شغالة زي ما تقول كده Uber بتاع NASA إن كل ما NASA تحب تبعت رواد فضاء أو معدات أو أجهزة لمحطة الفضاء الدولية تقوم رايحه لSpaceX تقولهم إنقلولي الحاجات دي بصواريخ Falcon9 بتاعتكوا .. لو انت عملت أو إشتريت قمر صناعي و عايز تنقله الفضاء الخارجي ممكن SpaceX تنقلهولك .. شغل SpaceX خلاها بلا منازع أغلي شركة قطاع خاص في العالم و قيمتها في السوق دلوقتي تتعدي 21.2 مليار دولار.
الدرة علي تاج SpaceX هي تكنولوجيا بيسموها Reusable Rocket Technology و هي إن زمان كنت تسمع مثلاً عن إن مصر طلعت القمر الصناعي بتاعها Nilesat علي متن صاروخ أريان الفرنسي .. اللي كان بيحصل إن الصاروخ يطير لحد أخر الغلاف الجوي للأرض وزي ما بنقول كده يتف الصاروخ و ينزل تاني يقع للأرض مفكوك و يكونوا حاسبين إن الصاروخ أو اللي فاضل من الصاروخ حيقع فين في المحيط سواء الهاديء أو الأطلنطي عشان ياخدوه يركبوه تاني في بعضه عشان يستخدم في إطلاق حاجة تانية بعدها بكام شهر .. اللي عملته SpaceX إنها عملت صواريخ فضاء بتطلع للغلاف الجوي للأرض و تنزل تاني تهبط زيها زي الطيارات الهليكوبتر بحيث إن تكلفة الرحلة نفسها بتقل جامد .. الطموح الجامد فشخ بتاع (ماسك) إنه عايز SpaceX عن طريق أقوي صواريخها Falcon Heavey تقدر تبعت مهمة إرسال معدات للمريخ علي سنة 2022 بحيث إن بعدها بسنتين يكون البشر باعتين أول بعثة بشرية للمريخ و ده في حد ذاته هري و هبد من وجهة نظر NASA اللي شايفه إن المنطق و العقل بيقولوا إن أول رحلة للبشر للمريخ مش حتبقي قبل 2035.
في النهاية انت إيه رأيك في شخصية (ماسك)؟ هل انت شايفه رجل مجنون ولا شايفه عبقري ولا شايفه رجل دماغه ناشفة؟ فيه ناس لسه مش قادرة تقرر فخليني أحاول أساعدك بإني أحكيلك علي موقف حصل شهر أكتوبر 2018 .. فيه شركة (ماسك) أسسها إسمها Boring Company أو الشركة المملة و الشركة دي خدت موافقة من الحكومة الأميريكية إنها تجرب تحفر نفق علي عمق 15 كيلومتر في ولاية ميريلاند عشان يجربوا فكرة إسمها الهايبرلووب Hyperloop و الفكرة دي بمنتهي البساطة إنه عايز يعمل مترو أنفاق تحت الأرض بحيث إن العربيات بتاعته ماشية بالطاقة الكهرومغناطيسية وتقدر تمشي بسرعة تعدي ال1223 كيلومتر في الساعة .. عشان نقيس ده علي واقعنا .. الرجل ده ناوي يعمل خط مترو أنفاق لو انت جيت ربطت بيه الإسكندرية و أسوان فانت بدل ما بتاخدها بالقطر العادي في 12 ساعة فهو حيخليك تاخدها في ساعة إلا ربع.
فيه ناس شافت الكلام ده علي إنه هبد يستحق يخش أوليمبياد الهبد و فيه ناس شايفه إن كل العباقرة في زمنهم مكنش حد شايف إنهم عباقرة .. علي الناحية التانية ناس رأيها فيه إنه من نوعية الرجاله اللي ماشية بمبدأ صورني و انا ومش واخد بالي و دليلها علي ده فكرة الغواصة الصغيرة اللي كان عايز يعملها لإنقاذ الأطفال بتوع الكهف في تايلاند و ناس كتير إتهمته إنه كان عايز يسحب البساط من تحت إيد الغطاسين عشان يبان هو أبوالعريف اللي أنقذ الأطفال و في الأخر برده إختراع الغواصة بتاعه مطبقش .. أيا كان .. حسيبك تقرر انت رأيك النهائي في البني أدم بس يمكن الدرس اللي إحنا ممكن نتعلمه إن البني أدمين أعقد من إننا بكل بساطة نختذلهم في إننا نوصفهم هو ده بني أدم كويس ولا وحش.
المصدر:
مقالة بعنوان: (إيلون ماسك) الرجل اللي بعت عربيته السريعة للفضاء Elon Musk: The man who sent his sports car into space نشرت علي Website بتاع هيئة الإذاعة البريطانية BBC وده لينك المقالة الأصلية:
https://www.bbc.com/news/science-environment-42992143
