بوينج .. احنا بنعمل طيارات توديك الشلاحات.

هندسة الطيران واحدة من أكتر مجالات الهندسة اللي الناس بتحب تتكلم فيها وبتحب تتفرج علي فيديوهات علي YouTube عنها بس صعب تلاقي حد ناوي يضحي بنفسه عشان يدرسها ولو مش مصدقني إسأل أي حد تعرفه غلط غلطة عمره ودخل قسم هندسة الطيران جامعة القاهرة .. ده قسم زيه زي قسم الهندسة النووية في جامعة إسكندرية كده تبقي فرحان إنه موجود بس متهوبش ناحيته .. أنا شخصياً كنت بستني محاضرة Aerodynamics في قسم ميكانيكا بتاعة دكتور (إيهاب أدم) الله يديله الصحة وطولة العمر عشان بس أفهم هو يعني إيه جناح طيارة وإزاي بيشتغل وتطلع إيه الDrage Force دي .. عشان إحنا مهندسين وهندسة الطيران زي ما قلتلك كانت لاحسه مخنا فإحنا كنا بنتمظر علي الناس بإننا عارفين أسامي الشركات الكبيرة في المجال .. زي ما إنت كده تبقي بتحب العربيات وتبقي ماشي مع صحابك وتعدي جنبك عربية ألفا روميو Alfa Romeo وتبقي إنت الوحيد اللي عارف اسمها عشان دحيحة العربيات بس اللي عارفين الشركة الطلياني دي وكلنا عارفين إن في مجال هندسة الطيران مفيش اسمين أكبر من بوينج Boeing الأميريكية وأيرياص Airbus الأوروبية وده اللي عايزين نتكلم عنه النهاردة وهي حكاية إزاي بوينج تحولت من شركة بتعمل طيارات عيل صغير يبقي مطتمن وهو طاير بيها لشركة بتعمل طيارات متصممة عشان توديك الشلاحات.

مهم تفهم قبل ما نبدأ نتكلم هي إيه مشكلة بوينج إنك تبقي عارف هي بوينج بتمثل إيه للأمريكان .. دي واحدة من الشركات التوب فايف مش بس في أميركا إنما في العالم .. شركة إتأسست سنة 1916 علي إيد (وليام بوينج William Boeing) .. شركة خلال الخمس سنين بتوع الحرب العالمية الثانية صنعت 98,965 طيارة للحلفاء .. شركة هي اللي عملت المرحلة الأولي من صاروخ الفضاء زحل خمسة Saturn V اللي الأمريكان طلعوا بيه للقمر .. دي الشركة اللي صنعت الطيارة Air Force One اللي هي الطيارة الرئاسية الأميريكية .. زي ما إنت شايف دي شركة متعلق في رقبتها روح الرئيس الأميريكي فدي شركة عرفت تبني اسمها خلال سنين من التعب والشغل علي إنها بتعرف تدمج كويس بين حاجتين: الأمان والأرباح وده تجسد في التحفة الهندسية Boeing 737 اللي خرجت للعالم سنة 1967 عشان تبقي الطيارة الانجح في تاريخ هندسة الطيران المدني بأكثر من 10,000 نسخة إتصنعت لحد دلوقتي .. تاني .. فكرة إن شركة تعرف تدمج كويس بين هدفين عكس بعض والمفروض إنهم بيتعارضوا مع بعض اللي هم الأمان والأرباح خلت سمعة بوينج بين الطيارين المدنيين زي الألماظ .. زي ما إنت كده عارف إن السمعة المتاخدة عن العربية الفولفو السويدي إنها العربية الأكثر أمان علي مستوي العالم فالطيارين المدنيين برده إتزرع جواهم نفس الرأي بإن مفيش طيارة أمنة زي بوينج.

السمعة دي إتزرعت بإن الفلسفة بتاعة بوينج واللي حطها مؤسس الشركة (وليام بوينج) إن إحنا أولاً وأخيراً مهندسين والمهندسين مش بيخبوا معلومة عن بعض والأهم إن إحنا مش بنكره في حياتنا قد الشغل المعكوك .. حصلت ياما إن (وليام بوينج) ممكن يهزق مهندس في المصنع بتاعه عشان عمل حاجة مش صح وكان دايماً يقول أنا أهون لي أقفل المصنع وأقعد في البيت ولا إني أعمل شغلانة غلط وأنزل طيارة فيها عيب .. بس ده كان زمان .. دلوقتي وضع بوينج لا يسر عدو ولا حبيب .. بداية إن الكلام يكتر عن بوينج كانت في يناير 2024 لما يوم 7 كانت فيه رحلة 1282 طراز Boeing 373-9 Max التابعة لشركة طيران ألاسكا ودي شركة طيران أميريكية .. اللي حصل إن بعد ما الطيارة طلعت بدقايق ركاب الطيارة لقوا باب من أبواب الطيارة بيتخلع من مكانه زي ما يكون ميكروباص الباب بتاعه فك .. الفكرة إن صحيح الطيارة رجعت تاني المطار بالسلامة بس ربنا ستر لإن الباب اتخلع بعد دقايق من إقلاع الطيارة ولو كان الباب إتخلع في نص الرحلة وكان أي حد من الركاب فاكك حزام الأمان عشان يقوم يخش الحمام فكان حيتشفط من الطيارة عشان يعمل بيبي علي نفسه وهو طاير في الجو.

هو صحيح ربنا ستر بس لما الخبر إتذاع فيه ناس كتير بدأت تهرش في شعرها لإن الطيارة دي Boeing 373-9 Max مش طيارة قديمة من الثمانينات .. دي طيارة لسه طالعه من المصنع وبقالها أقل من شهرين شغالة .. ده زي ما إنت لسه تكون جايب عربية زيرو ولسه بتطلع بيها من أجانص العربيات اللي اشتريتها منه تلاقي الموتور وقع من العربية .. هو اه بيحصل إن الموتور يقع من عربيات بس مش العربيات اللي لسه طالعه من الأجانص .. اللي حصل ده كان فضيحة استدعت إن يتعمل مؤتمر صحفي للمدير التنفيذي لشركة بوينج (دايف كالهون Dave Calhoun) عشان يطلع يعتذر للناس ويقولها إحنا بنتحمل المسئولية كاملة وقال إن السبب ورا الحادثة دي هي مشكلة كواليتي Quality ممكن تحصل في أي شركة إن فيه منتج الشركة بتعمله متراجعش عليه كويس .. أقف بقي هنا .. المبرر ده بتاع إن باب طيارة طار من مكانه دي مشكلة QC اللي هي إختصار Quality Control أنا ممكن أقبلها لو إنت بتتكلم عن علبة لبن المراعي اشتريتها وطلعت بايظة قبل ما فترة إنتهاء الصلاحية تخلص ومش ممكن أقبلها علي صناعة الخطأ فيها معناه إن فيه ناس بتموت زي صناعة الطيران أو حتي صناعة العربيات .. عشان الكلام اللي طلع من (دايف كالهون) مكنش ينفع يطلع من بق بني أدم فاهم هو بيقول إيه فالمبرر بتاعه فرقع في وش الشركة بشكل غريب:

• شركة طيران ألاسكا اللي الطيارة بتاعتها بابها طار عملت تحقيق داخلي والمهندسين بتوع الشركة لقوا إن السبب ورا اللي حصل إن فيه 4 مسامير كان المفروض يربطوا الباب في شاسيه الطيارة مكانوش موجودين .. لما ده حصل فالشركة قررت تعمل فحص شامل لكل طيارات Boeing 373-9 Max اللي هي شارياها ولقوا فيها إن كتير من المسامير اللي بتربط الأبواب مش موجوده برده.
• يوم 7 يناير 2024 اللي هو نفس اليوم اللي الباب طار من الطيارة بتاعة شركة طيران ألاسكا حصلت حادثة تانية إن طيارة من تصنيع شركة بوينج برده بس المرة دي Boeing 787 Dreamliner ولعت في مطار لوجان الدولي اللي موجود في مدينة بوسطن الأميريكية.
• لما شركة طيران ألاسكا أعلنت تقريرها طلع قرار من هيئة الطيران المدني الأميريكية FAA ودي تعادل وزارة الطيران عندهم يوم 9 يناير 2024  بحظر طيران أي موديل من طيارات Boeing 373-9 Max.

السؤال اللي عايزين نجاوب عليه سوا هو إزاي ده حصل؟

أغلب الناس اللي دورت في الموضوع لقت نفسها قدام نقطة تحول في تاريخ الشركة هي اللي تقدر تفهمك إزاي بوينج تحولت من بيت خبرة هندسي لورشة لحام في السبتية؟ .. يوم 15 ديسمبر 1996 حصل دمج بين شركة بوينج وشركة تانية اسمها ماكدونيل دوجلاس McDonnell Douglas  وفي حالة إنك بتسأل نفسك هي مين شركة مكدونالدز دي فعايزك تعرف إن McDonnell Douglas كانت واحدة من أهم شركات تصنيع الطيارات المقاتلة في العالم .. أيوه .. ده معناه إن أحسن شركة بتصنع طيارات مدنية في أميركا إتجوزت أحسن شركة بتصنع طيارات مقاتلة في أميركا .. دي الجوازات اللي مكانها بوست أساسي علي صفحة جرنان اليوم السابع .. جوازة كان المفروض تطلعنا أكبر كيان في مجال هندسة الطيران في العالم بس هي كانت فيه مشكلة محدش خد باله منها:

دلوقتي بوينج بتعرف تصنع طيارات مدنية وليها شغل حلو في حتة صواريخ الفضاء بس مهندسين بوينج ميعرفوش الألف من كوز الدرة في حتة تصنيع الطيارات المقاتلة .. علي الناحية الثانية المهندسية بتوع ماكدونيل دوجلاس شاطرين في حتة الطيارات المقاتلة بس بهايم في تصميم الطيارات المدنية ويمكن أكبر دليل علي إنهم شوية بهايم إن الطيارة المدنية اللي طلعت من تحت إيدهم قبل دمجهم مع بوينج كانت كارثة بجناحين اسمها الطيارة DC10 كانت السبب في وفاة أكتر من 1,100 بني أدم .. يعني تقريباً ماكدونيل دوجلاس عملوا طيارة مدنية قتلت نفس العدد من المدنيين اللي قتلته الطيارت المقاتلة بتاعتهم .. وهي دي المشكلة .. كان المفروض إن صحيح بوينج وماكدونيل دوجلاس اندمجوا بس المفروض يفضلوا منفصلين في شغلهم يعني يبقي فيه إدارتين ملهمش علاقة ببعض .. واحدة للطيارات المدنية وواحدة للطيارت المقاتلة .. المشكلة إن ده محصلش .. اللي حصل إن رغم إن بوينج هي اللي اشترت مكدونيل دوجلاس بس الغريبة إن المديرين بتوع مكدونيل دوجلاس ركبوا فوق مديرين بوينج ودلدلوا رجليهم وواحدة واحدة بدأوا يغيروا طريقة شغل بوينج من شركة بتدمج بين الأمان والأرباح لشركة مش شايفة قدامها غير الأرباح .. تولع الهندسة المهم نجيب فلوس.

يدوبك بعد سنة بس من إعلان دمج الشركتين بقي واضح مين اللي بيسوق لما إدارة الشركة بدأت مشروع غريب الشكل بإنهم يجيبوا فلوس الشركة اللي كان المفروض تروح لقسم الأبحاث والتطوير Research & Development اللي إحنا عارفينه أكتر بالاسم السيكسي بتاعه R&D وحطوا الفلوس دي عشان يعلوا من قيمة سهم الشركة في البورصة .. شوية ونزلت لايحة جديدة للمهندسين بتوع الشركة اسمها Share Value Trust Program يعني برنامج إعادة الثقة في قيمة سهم الشركة في البورصة بحيث الفكرة بمنتهي البساطة إن إنت كمهندس في بوينج مش دورك إنك تصمم طيارة علي أعلي مستوي من الكفاءة والأمان .. لا خالص ده كان زمان .. دلوقتي دورك كمهندس في الشركة إنك تعملنا تصميم يجيبلنا أعلي أرباح عشان سعر سهم الشركة يفضل في العالي .. شوية ومقر الشركة إتنقل من مدينة سياتل اللي كان فيها مصنع الطيارات لمدينة شيكاغو علي الناحية الثانية خالص من أميركا لمجرد إن مقر الشركة يبقي جنب مقر البورصة والبنوك مع إن ده ملوش علاقة بده .. اللعب في مباديء الشركة بدأ يسمع لما الشركة حبت تشتغل علي مشروع إنتاج طيارة جديدة وده حيودينا للمصيبة اللي اسمها Boeing 787 Dreamliner.

سنة 2004 بدأت بوينج شغلها علي مشروع طيارة جديدة اسمها Boeing 787 Dreamliner بحيث الفكرة بتاعتها إن ليه لا نعمل طيارة خفيفة رخيصة مش بتاخد وقت في تصنيعها ولا تطويرها ونقدر نبيع منها كتير .. بإختصار هم كانوا عايزين يعملوا حاجة شبه العربية الجيلي .. هي شبه الميرسيدس بس بلاستيك .. المشروع ده بدأ في عهد واحد اسمه (هاري ستونسايفر Harry Stonecipher) كان المدير التنفيذي لمكدونيل دوجلاس بس بعد ما بوينج اشترتها بقي هو المدير التنفيذي لبوينج وده يوريك إزاي الناس بتاعة مكدونيل دوجلاس ركبت شركة بوينج وبرطعوا فيها .. المهم .. (هاري ستونسايفر) كان رجل بيتعامل مع المهندسين بتوع بوينج علي إنهم عبيد عنده لدرجة إنه لما مسك الشركة نزل لايحة جديدة سماها يلا نقضي وقت أطول في الشغل بعيد عن العيلة .. أيوه زي ما سمعت .. ده واحد عايز المهندسين يشتغلوا ضعف الوقت بنص الميزانية لإن زي ما قلتلك هم كانوا ساحبين من الفلوس اللي بتروح في R&D عشان يعلوا سعر سهم الشركة في البورصة .. بوينج كانت عايزة الطيارة Dreamliner تتباع برخص التراب بحيث يبيعوا منها نسخ كتير وياكلوا بيها السوق وده هم تخيلوا إنه حيحصل بحاجتين:

• أول حاجة إنهم صرفوا علي تطويرها حوالي نص الفلوس اللي بتتدفع في تطوير أي طيارة مدنية عادية.
• ثاني حاجة إنهم طلعوا شغل تصميمها وتصنيعها من الباطن لأكتر من 50 شركة وده أثبت فشله بإعتراف بوينج نفسها اللي قالت إن كتير من الشركات اللي خدت الشغلانة من الباطن عملت شغل زي الزفت ومكنش فيه حد بيراجع ولا بينسق حجم الشغل ده كله.

فشل مشروع الطيارة Dreamliner أجبر (هاري ستونسايفر) إنه يقدم استقالته عشان يجي وراه (جيم ماكنيرني Jim McNerney) اللي عشان ينقذ سمعته أعلن في 2007 إن الطيارة Dreamliner خلصت في معادها وحيتعملها حفلة كبيرة لعرضها لأول مرة علي الجمهور وفعلاً الحفلة اتعملت بس عرفنا بعدها إن النسخة اللي أتعرضت في الحفلة من الطيارة كانت مجرد ماكيت خشب ومش طيارة حقيقية .. الحقيقة اللي المستثمرين اللي حاطين فلوسهم في بوينج عرفوها متأخر إن مشروع الطيارة Dreamliner كان فاشل لدرجة إنها عملت أول رحلة تجريبية ليها سنة 2020 بعد تأخير 3 سنين وبميزانية كسرت الميزانية الأصلية اللي كانت محطوطة ليها بحوالي 25 مليار دولار .. يعني 25 مليار دولار ده مش ثمن المشروع .. لا خالص .. دي الفلوس الزيادة اللي دفعوها .. لسه الناس حتقول هييييه لقينا إن المصايب مخلصتش .. يدوبك هم 9 شهور بعد ما الطيارة بدأت تطير لقينا إن طيارتين ولعوا واحدة في بوسطن والثانية في اليابان بسبب مشكلة في بطارية كانت معمولة علي ايد مقاول من الباطن والمهندسين بتوع بوينج ملحقوش يراجعوا التصميم بتاعها .. المشاكل دي كلها خلت FAA اللي بفكرك إنها وزارة الطيران الأميريكية تطلع قرار بحظر طيران الطيارة Dreamliner سنة 2014 عشان تبقي أول مرة يطلع قرار بحظر طيران موديل طيارة من وقت الطيارة DC10 اللي فرصة أفكرك عملتها شركة ماكدونيل دوجلاس.

مشروع الطيارة Dreamliner كان كارثة بكل المقاييس والمشكلة إن الناس اللي جوه بوينج كانوا عارفين إنهم لبسوا في الحيط من بدري .. سنة 2014 بعد إعلان حظر طيران الطيارة Dreamliner قناة الجزيرة نزلت فيلم وثائقي عنها وفي الفيلم سألوا 15 مهندس جوه بوينج من اللي كانوا شغالين في مشروع الطيارة Dreamliner هل هم ممكن يطيروا بالطيارة دي فكانت إجابة 10 من 15 هي لا عشان هم شايفين إنها طيارة مكانها المزبلة .. هل بقي بتوع بوينج يتعلموا؟ .. هل يصلحوا من نفسهم؟ .. المفروض اه .. المفروض يفهموا إن ربنا سترها معاها مرة فبلاش يكرروا نفس البلوة تاني .. ده المنطق .. ده اللي الرأسمالية بتقوله .. ده اللي السوق بيعلمه للناس .. مش كده برضه؟

سنة 2011 شركة Airbus اللي هي المنافس الأول لبوينج كانت فرحانه بنفسها وهي بتقدم للسوق طيارتها الجديدة A320 Neo النسخة المعدلة والأقل في استهلاك الوقود من الطيارة A320 اللي هي فعلياً واحدة من أنجح موديلات الطيارات المدنية في تاريخ هندسة الطيران .. تقريباً بوينج غارت من Airbus فقرروا إنهم هم كمان ينزلوا طيارة جديدة اللي هي Boeing 737 Max لمجرد إن ميتقالش عليهم المتأخرين أهم .. (جيم ماكنيرني) المدير التنفيذي لبوينج وقتها يا عيني جاتله حالة رعب من خبر إن Airbus ركبت بوينج في السوق لدرجة إنه طلع أعلن خبر تطوير الطيارة Boeing 737 Max من غير ما يكون ليها أي تصميم أو لوحة واحدة توحد ربنا تقول هم ناويين يهببوا إيه في عيشتهم جديد فيها .. اللي كان واضح ومعلن للناس كلها إن Boeing 737 Max حتكون حاجة شبه الموبايلات الصيني كده اللي هي طيارة رخيصة بتؤدي الغرض .. المشكلة مش في كده .. مش عيب إنك تنزل للسوق حاجة رخيصة تتباع عشان تجيب فلوس .. العيب إن كل المصايب اللي بوينج عملتها في Dreamliner إتطبقت هي هي لا مصيبة زادت ولا مصيبة قلت في 737 Max:

• زي ما وقت تطوير Dreamliner ميزانية R&D بتاعتها راحت في شكل أرباح أتوزعت علي المستثمرين ومجلس الإدارة فبرده (جيم ماكنيرني) وحتي المدير التنفيذي لبوينج اللي جه من بعده (دينيس مولينبيرج Dennis Mullenberg) فالشركة كملت في نفس السياسة .. خلال الفترة من 2014 لحد 2018 الإتنين البهايم دول حولوا 92% من الفلوس اللي كانت مخصصة لتطوير الطيارة Boeing 737 Max بدل ما تتصرف في R&D راحت كأرباح لأعضاء مجلس الإدارة وللمستثمرين اللي شاريين أسهم للشركة في البورصة.
• إذا كانت Dreamliner إتعملت بالإعتماد المبالغ فيه علي المقاولين من الباطن فالطيارة Boeing 737 Max إتعملت زي ما بنقول In-House بس المشروع كان Fast Tracked ومطلوب منه يخلص بسرعة لدرجة إن فيه حاجات كتير إتعملت غلط ومن غير ما تتراجع وحتي الناس اللي إعترضت علي اللي بيحصل طلع قرارات برفدهم.

نتايج ده كانت كارثية .. يوم 29 أكتوبر 2018 طيارة تابعة لشركة Lion Air الأندونيسية تحطمت بعد دقايق من إقلاعها ومات ركابها 189 كلهم من ضمنهم 3 أطفال .. التحقيقات اللي اتعملت علي حطام الطيارة طلعت بلاوي بس يمكن البلوة الكبيرة هي الفكرة العامة أو Concept اللي اتبنت عليها الطيارة Boeing 737 Max وهي إن بوينج كان عندها فقر فكري بسبب سنين الاهمال والسربعة وإن مفيش صرف علي R&D لحد ما وصلوا لمرحلة إن مبقاش عندهم المهندسين اللي يقدروا يعملوا حاجة جديدة .. اللي حصل إنهم جابوا موديل 737 القديم هو هو بنفس الشاسيه بنفس الجناحات بنفس كل حاجة وكل اللي هببوه إنهم حطولها موتور كبير شوية .. طب إيه مشكلة إنك تركب موتور عفي علي شاسيه قديم؟ .. اللي بيحصل إن والطيارة طالعه ممكن يحصل إن بسبب وزن الموتور الزيادة فالطيارة يحصلها Stall .. يطلع إيه البتاع ده؟ .. لو حصل والطيار وهو طالع زاوية ميل بوز الطيارة مكنتش صح فممكن الجناحين ميقدروش يوفروا Lift أو القدرة علي رفع الطيارة في الجو فالطيارة حتقع زي الشوال .. طب والحل؟ .. الأخوة في بوينج عملوا المصيبة اللي اسمها MCAS.

كلمة MCAS دي اختصار Maneuvering Characteristics Augmentation System .. البتاع ده هو جهاز بيقرأ لو الطيارة حصلها Stall وبقت علي وشك إنها تقع زي كيس الزبالة اللي بترميه من الشباك في الشارع عشان إنت مكسل تنزل بيه لحد أقرب صندوق زبالة في شارعكوا وبيتصرف من تلقاء نفسه إنه يتحكم في زاوية ميل ديل الطيارة عشان تعدل نفسها .. طبعاً واضح من الكام كلمة اللي أنا قلتها دول إن MCAS ده نظام معقد ابن ستين كلب المفروض إنه يشتغل بناء علي قرايات عدد كبير من الحساسات Sensors ويكون ليه كومبيوتر مركزي مستقل عن كومبيوتر الطيارة .. الحقيقة لا .. بسبب فلسفه عبيله واديله اللي مشت بيها بوينج لسنين فهم قالوا لنفسهم ليه الصرف الكتير هو حساس واحد حنركبه اسمه حساس زاوية الهجوم Angle of Attack Sensors اللي بيقيس زاوية ميل بوز الطيارة والحساس ده بيتركب قدام في شاسيه الطيارة تحت قمرة القيادة .. طبعاً ده اسمه هراء .. إنت ممكن شوية تراب أو هواء جامد أو زلطة أو بالونة أو حتي عصفورة تخبطلك الحساس ده وكل سنة وإنت طيب في نظام MCAS والطيارة لو حصلها Stall حتقع زي ازازة الكانز اللي بترميها من شباب العربية في الشارع عشان إنت مكسل تركن جنب أقرب مقلب زبالة زي البني أدمين.

ودي مكنتش مشكلة MCAS الوحيدة .. بوينج ضمن حملتها لبيع الطيارة 737 Max قالت لشركات الطيران إن الطيارة عشان هي مجرد طيارة 737 عادية متركبلها موتور جديد فشركات الطيران مش محتاجة تصرف فلوس عشان تمرن الطيارين بتوعها علي الطيران بيها لا علي محاكيات طيران Flight Simulators ولا حتي في كورس في أي سنتر وبالتالي مفيش طيار أمه داعيه عليه طار بالطيارة 737 Max إتقاله إن فيه حاجة اسمها MCAS أصلاً .. كل شركة طيران بتقرر تبعزق فلوسها علي شراء طيارة 737 Max بيجيلها مع الطيارة فيديو مدته ساعتين لشرح قد إيه الطيارة دي موفرة وبيجي معاها شوية كاتلوجات ولا واحد فيهم بيجيب سيرة MCAS .. التحقيقات في تحطم الطيارة Lion Air أثبتت إنها وقعت بسبب عطل في Angle of Attack Sensor وبالتالي MCAS مشتغلش.

في ديسمبر 2020 بوينج قالت للناس بتوع FAA إن المهندسين بتوعها حيعملوا شوية برمجة لنظام MCAS وإن خلال 6 أسابيع بس المشكلة حتتحل في مقابل إن FAA متطلعش قرار بحظر طيران 737 Max وعشان دي ناس وسخة متعرفش ربنا الفلوس اللي كانت المفروض تروح عشان الكارثة دي تتعالج وكانوا حوالي 20 مليار دولار شوية الحرامية اللي ماسكين الشركة خدوها لنفسهم عشان يعلوا سعر السهم في البورصة .. عدت الأيام ومفيش حل .. الست أسابيع بقوا 4 شهور عشان في إبريل 2021 تقع الرحلة 302 التابعة للخطوط الجوية الأثيوبية عشان يطلع القرار اللي أتاخر فشخ من وزارة الطيران الأميريكية بحظر طيران التابوت الطاير ده .. يوم 17 إبريل 2024 اتعملت جلستين استماع في الكونجرس اللي هو مجلس الشعب في أميركا عشان يسمعوا شهادات ناس كانت شغالة في بوينج عشان يفهموا إزاي الشركة تحولت من منارة الحنتفة في الشغل لورشة شغالة بمبدأ علي الله محدش ينخرب ورانا.

المصادر:

• فيديو بعنوان Boeing: Last Week Tonight with John Oliver (HBO) وده لينك الفيديو الأصلي:
  https://www.youtube.com/watch?v=Q8oCilY4szc&t=1090s