النهاردة حنتكلم عن فيروس كورونا اللي حياتنا كلها بقت قايمة عليه بس بشكل مختلف شوية .. النهاردة حنتكلم عن تجربة 3 دول اللي هم كوريا الجنوبية و السويد و الدانمرك .. 3 تجارب مختلفة ب3 دروس مختلفة ومن غير ما أطول عليك خلينا نخش في الموضوع علي طول:
التجربة الكورية الجنوبية .. يكفيك ربنا شر السوبرسبريدر:
تجربة كوريا الجنوبية مع فيروس Covid -19 الحقيقة من التجارب اللي لازم نقف قدامها وده لسبب .. مش إني فقر عشان جبت سيرتها وقلت إن كوريا الجنوبية مع سنغافورة و هونج كونج من الدول اللي إتعاملت مع الأزمة بطريقة مثالية جداً وزي ما حنشوف كمان شوية لبسوا في الحيط .. السبب هو إن كوريا الجنوبية تجربتها مع الفيروس بتعلمنا درس إنك ممكن تعمل كل اللي تقدر عليه .. إنت ممكن تنفذ كل الإجراءات اللي حتخليك تنجح و تبقي متخيل إن خلاص كده الدنيا حتمشي و الأزمة حتعدي .. و إذ تفاجيء بخازوق متفهمش جالك منين بوظلك كل اللي إنت بتخططله.
أول حالة تظهر بالفيروس في كوريا الجنوبية كانت يوم 19 يناير 2020 ومن اليوم ده لحد 18 فبراير وعدد حالات الإصابة وصلوا 30 بس من غير أي حالة وفيات .. إنت متخيل حجم النجاح .. متخيل يعني إيه خلال شهر كامل ميبقاش عندهم إلا 30 حالة اللي هم تقريباً حالة كل يوم .. لحد اليوم ده و كوريا الجنوبية كانت فرحانة بنفسها أوي .. البلد بتقول لنفسها يا أرض إتهدي ما عليكي قدي .. لحد ما الحالة 31 إتصابت .. الحالة 31 هي الخازوق اللي لبسته كوريا الجنوبية .. خلال 10 أيام بس من بعد يوم 18 فبراير و عدد الحالات نط بقي 2,300 حالة .. الحالة 31 دي واحدة ست بتتوصف هي و ناس تانيه زيها علي إنهم Super-Spreader أو ناقل سوبر للعدوي .. قصة الست دي و اللي ححكيلهالك دلوقتي بسرعة تثبتلك فعلاً إن الدنيا دي كلها ماشية بستر ربنا زي ما دايماً بقول.
الست دي أساساً من مدينة إسمها دايجو Daegu .. قبل ما تتشخص رسمي بالفيروس و غالباً قبل ما تظهر عليها الأعراض حضرت حفلة في المدينة و بعد كده سافرت العاصمة سيول بعربيتها .. وهي في سيول عملت حادثة بالعربية و ودوها المستشفي .. وهي في المستشفي راحت كنيسة المستشفي مرتين .. بعد ما خرجت من المستشفي قابلت حد تعرفه في فندق .. كل ده وهي حرارتها عالية بس مهماش .. هي إفتكرت إنه دور برد عادي .. اللي هو إنت عايز تقولها ما تتهدي بقي يا ست إنتي .. بعد ما إتشخصت بإنها مصابة بالفيروس و حكت للدكاتره خط سيرها بدأوا يكشفوا علي كل الناس اللي هي قابلتهم سواء في المستشفي أو في الكنيسة أو في الفندق .. الست دي لوحدها مسئولة عن إصابة مئات الناس بالفيروس و اللي بدورهم نقلوه لناس تانية .. الحالة 31 دي أجبرت كوريا الجنوبية كلها إنها تراجع تاني الطريقة اللي هم بيبصوا بيها لإزاي يواجهوا الفيروس.
أول حاجة إن رئيسة الوزراء بتاعتهم بدل ما كانت كل ولاية شايلة شيلتها لوحدها فالنظام إتغير شوية بحيث إن الحكومة بقت بتتعامل مع كل الولايات كوحدة واحدة .. لو ولاية من الولايات عدد السراير اللي فيها خلص فالولاية اللي جنبها بتجري تروح تسلفها سراير .. لو ولاية من الولايات عدد الدكاتره بتاعها مبقاش مكفي الولاية اللي جنبها بتسلفها دكاتره.
ثاني حاجة إن كوريا الجنوبية إتعلمت من درس سنة 2015 لما بشكل ملوش أي تفسير البلد إتضربت بفيروس MERS ودي يبقي إختصار Middle East Respiratory Syndrome واللي رغم إنه فيروس يبقي إبن عم Covid-19 لإنهم هم الإثنين من عيلة فيروسات كورونا بس ظهر أساساً في المملكة العربية السعودية و زي ما قلتلك بشكل ما مش مفهوم ظهرت منه 185 حالة في كوريا الجنوبية وده لوحده خلي كوريا الجنوبية أكتر بلد بره الشرق الأوسط تتعور جامد من فيروس MERS.
ده علم الكوريين درس مهم أوي وهو إن لو أي فيروس من عيلة كورونا دي ظهر عندهم فخط الدفاع الأول و أهم حاجة تتعمل هي إنهم يوفروا أجهزة الإختبار .. الكوريين لحد دلوقتي في الأزمة دي إختبروا 350,000 بني أدم ده معناه إن واحد من كل 150 بني أدم عايشين في البلد إتكشف عليه .. علي فكرة كوريا الجنوبية من الدول اللي مطبقتش فكرة الحظر الكامل أو Lockdown زي دول كتير منها إيطاليا و أميركا و الصين .. اه صحيح المدارس قافلة و الدراسه أون لاين بس الحياة مكملة عادي هناك.
التجربة السويدية .. شايف حبايبك يا (نجيب ساويرس):
السويد في تعاملها مع فيروس كورونا كانت فعلياً (نجيب ساويرس) بتاع الدول .. هي بلد من أول يوم قالت إن مفيش حاجة إسمها حظر كلي .. و رغم كده لبسوا في الحيط برده .. السويد قالت للناس إشتغلوا من البيت لو تقدروا بس المطاعم و المولات و الجيم مش حتقفل .. المدارس حتفضل مفتوحة إلا للطلبة تحت سن 16 سنة .. أرقام السويد بتاعة أعداد الإصابات و الوفيات مش مبشرة خالص .. عدد الإصابات 46,814 و عدد الوفيات وصل 4,795 ودي أعلي أرقام وسط الدول الإسكندافية كلها.
البنك المركزي السويدي طلع توقعاته للأداء الإقتصادي للسويد لسنة 2020 و الحقيقة إنه كان إحتمالين و الإحتمالين أنيل من بعض .. قبل بس ما نتكلم عن اللي قاله البنك المركزي السويدي ففيه تعريف مهم لازم يتشرحلك اللي هو الناتج الوطني الإجمالي Gross Domestic Product أو GDP .. الGDP ده يبقي إجمالي كل الفلوس اللي بتخش البلد في السنة .. زي ما إنت شايف فالسيناريو الأولاني اللي باللون الازرق بيقول إن GDP بتاع السويد حيقل خلال سنة 2020 بنسبة 6.9% .. و إن شاء الله خلال سنة 2021 حيرجع يزيد تاني بس بنسبة 4.6% .. و نسبة البطالة حتزيد تبقي 8.8% مع إنها حالياً 7.2% .. السيناريو الثاني باللون الأصفر بيقول إن خلال سنة 2020 فالGDP السويدي حيقل بنسبة 9.7% و لما حيزيد سنة 2021 حيكون بنسبة 1.7% بس .. و كمان نسبة البطالة حتزيد تبقي 10.1%.
ده معناه إيه؟ .. الحقيقة معناه كذا حاجة .. معناه إن ربنا ساترها معانا لإن إنهيار اسعار البترول حيخلي مفيش زيادة في سعره في مصر .. هو المفروض يرخص بس ده مش حيحصل .. علي الأقل الأسعار مش حتزيد .. معناه إن مش زي ما ناس كتير قالت لازم منطبقش حظر كلي عشان إقتصادنا ميقعش لإن فعلياً مش حتفرق إذا كنت عملت حظر كلي أو معملتش .. إقتصادنا حيتهز في الحالتين .. النظام الإقتصادي اللي إحنا عايشين فيه مخلي العالم كله أوضة و صالة .. لما دول زي ألمانيا و فرنسا و إنجلترا وحتي دول جيران السويد زي الدانمرك و فنلندا إقتصادهم يتضرب جامد بسبب فيروس كورونا فإحنا مش حنبقي الفالحين أوي اللي إقتصادنا حيمشي زي الفل .. التجارة الدولية وقفت فإنت سواء طبقت حظر أو مطبقتش حينولك من الضرب جانب .. يبقي الأولي إنك تحمي حياة أهل بلدك بما إن التضحية بيهم مش حتجيب نتيجة.
التجربة الدانمركية .. علشان نعلي لازم نطاطي:
بمناسبة النتيجة .. أنا عايز أقف قدام أخر تجربة معانا وهي التجربة الدانمركية لإن التجربة دي حتخلي (كارل ماركس) بيرقص في قبره .. لو شركة قطاع خاص هناك قالت إنها حتمشي يا إما 50 موظف فما فوق أو 30% من الموظفين في الشركة فالحكومة حتدفع من جيبها 75% من مرتبات الناس دي لمدة 3 شهور علي شرط إن الشركة متنهيش عقود الناس دي .. هم كده كده مش حيشتغلوا في الشركة .. هم حيقعدوا في بيوتهم بس بدل ما عقودهم تنتهي حيفضلوا علي ذمة شركاتهم و حياخدوا تلت إربع مرتبهم من الحكومة .. إنت متخيل إيه اللي إنت قاريه دلوقتي ده؟
مهم عندي بس تبقي فاهم يعني إيه اللي الدانمرك عايزه تعمله ده؟ .. الدانمرك حتدفع في 3 شهور بس 2.5 ترليون دولار .. دول 13% من إجمالي ثروة البلد كلها .. السؤال دلوقتي هو ليه؟ .. ليه الدانمرك حتعمل كده؟ .. الحقيقة هم كذا سبب .. يمكن أكتر سبب واضح إن الحكومة مش عايزه البلد تخش في كساد إقتصادي .. فيه أسباب تانية ممكن متبقاش واضحة أوي زي إن الحكومة عارفه إن الإقتصاد زي ما بيحركه الأرقام و الفلوس فكمان بتحركه مشاعر الناس .. العامل النفسي مهم في الإقتصاد .. الحكومة مش عايزه الناس تفقد ثقتها في شركات القطاع الخاص .. نقطة تانية وهي إن أكيد الأزمة دي حتعدي و الشركات حتلاقي نفسها عايزه تعين تاني .. فليه تضيعوا وقت في تعيين ناس طالما أنتوا ممكن تحافظوا علي الموظفين بتوعكوا.
دي 3 تجارب ل3 دول مختلفة .. إتعلمنا من كوريا الجنوبية إن فيه حاجة إسمها Super-Spreader ممكن الواحد فيهم يعدي أكتر من 100 بني أدم لوحده .. إتعلمنا من السويد إن سواء عملت حظر كلي أو جزئي مش حتفرق و إقتصادك حيتعور فبلاش موجة خلي الناس تنزل شغلها عشان الإقتصاد ومش مشكلة نضحي بنسبة من السكان .. صدقني مش حتفرق فبما إنها خربانة خربانة فمفيش داعي نضحي بحياة حد .. إتعلمنا من الدانمرك إن الطبقة المتوسطة هي اللي بتشيل الإقتصاد ولو الضرورة حكمت الحكومة ترمي ثروتها كلها عشان تحميهم مفيش مشكلة ده يحصل .. 3 دروس باسم الله ما شاء الله متعلمناش ولا واحد فيهم هنا.
المصادر:
- مقالة بعنوان South Korea’s foreign minister explains how the country contained Covid-19 نشرت في موقع المنتدي الإقتصادي العالمي World Economic Forum وده لينك المقالة الأصلية:
https://www.weforum.org/agenda/2020/03/south-korea-covid-19-containment-testing/ - مقالة بعنوان Sweden had no Lockdown but its Economy is Expected to Suffer Just as Badly as its European Neighbors نشرت في موقع وكالة أنباء CNBC وده لينك المقالة الأصلية:
https://www.cnbc.com/2020/04/30/coronavirus-sweden-economy-to-contract-as-severely-as-the-rest-of-europe.html - مقالة بعنوان Denmark’s Idea could Help the World Avoid a Great Depression نشرت في مجلة The Atlantic وده لينك المقالة الأصلية:
https://www.theatlantic.com/ideas/archive/2020/03/denmark-freezing-its-economy-should-us/608533/
