لينك التسجيل الصوتي للمقالة علي Sound Cloud:
https://soundcloud.com/user-112011687-312727988/5jmswebwhsov
الحرب العالمية الأولي عشان تفهم إزاي هي كانت صدمة للناس فحاول تتخيل لو لا قدر الله إنت عملت حادثة بالعربية .. الناس اللي عاشت التجربة دي حتفهم كلامي أكتر .. إنت كنت بيتقالك عن حوادث العربيات .. كنت لما بتسوق في الطريق بتشوفها بعنيك و أحياناً كنت بتشوف الناس واقعة علي الأرض و الإسعاف بيشيلها بس إحساس جواك بيقولك إن الحوادث دي للناس التانية مش ليك .. إنت شطور بتسوق كويس و إيدك تتلف في حرير .. ده إنت مش عارف الناس بتوع Formula-1 تايهين عنك فين .. لحد ما تجرب تعمل حادثة بالعربية و هنا أنا بتكلم عن حادثة جامدة شوية .. ده بالضبط اللي حصل للناس بعد الحرب العالمية الأولي .. هم إتقالهم إن فيه حروب و إن الناس بتموت في الحروب بس محدش كان متخيل إن ممكن حرب تبقي كبيرة أوي كده .. الحرب بين أي دولتين أخرها يوم ما تبقي مجزرة يموت فيها 100,000 أو نص مليون أو مليون لما توصل لإبادة جماعية .. بس إن حرب تقوم يموت فيها 16 مليون بني أدم و يتصاب فيها 21 مليون فده جاب للناس صدمة .. اللي حتكلم عنه النهاردة هو إزاي أكتر ناس إتفحتت في الحرب دي كانت الدكاترة و خصوصاً الجراحين .. لو إنت جراح عشت أيام الحرب العالمية الأولي فإنت كم المعلومات و الخبرة اللي إستفدتها في أربع سنين الحرب قد سنين و سنين و سنين من الدراسة في الكلية خصوصاً في أخر سنتين في الحرب .. الأرقام لوحدها توريك قد إيه الجراحين خدوا خبرة كبيرة أوي وقت الحرب العالمية الأولي.
عشان كلامي ميكونش كله أرقام و تتوه مني تعالي ناخد أرقام القوات البريطانية بس .. خلال الأربع سنين بتوع الحرب الدكاترة الإنجليز قدروا يعالجوا 1.6 مليون عسكري .. هم مش بس عالجوهم عشان يروحوا بيوتهم .. لا دول عالجوهم عشان يرجعوا تاني للجبهة .. خلال الأربع سنين بتوع الحرب فيه 735,487 عسكري بريطاني دخلوا المستشفيات الميداني بين الحياة و الموت طلعوا عايشين بعد ما الدكاترة أنقذوهم و أغلب العساكر دول إتصابوا خلال القصف المدفعي و الجوي يعني العساكر دول مكانوش مضروبين بطلقات إنما إتصابوا بشظايا الإنفجار بتاعة دانات المدافع و القنابل .. من ال735,487 عسكري دول 16% منهم إصابتهم كانت في الوش .. من ال16% دول فيه منهم حوالي 30% إتصنفوا علي إن إصابتهم خطيرة .. ده معناه إن فيه حوالي 38 ألف مقاتل رجعوا بيوتهم بعد الحرب لا عارفين ياكلوا ولا يشربوا و لا يتنفسوا زي باقي خلق الله ده غير إن شكلهم بقي مشوه و بقوا مش طايقين حياتهم .. المشكلة إن في الوقت ده محدش في مجال الطب كله كان مهتم يشوف الناس دي حتعيش إزاي لحد ما جه جراح شاب مش بس إيده تتلف في حرير إنما دماغه تستاهل سجارة عناب.
اللي بتكلم عنه كان جراح أنف و أذن و حنجرة نيوزيلندي إسمه (هارولد جيليز Harold Gillies) كان بيخدم في المستشفيات الميدانية وقت الحرب و شاف بنفسه قد إيه اصابات الوش بالذات محتاجه حد يبصلها و يشوفلها حل .. في الوقت ده القيادة العسكرية البريطانية كانت ماشي فيها إتجاه إننا محتاجين نشوف نعمل إيه في مجالات خاصة أوي في الطب مكناش كبشر محتاجين نبصلها زي مثلاً إصابات الجهاز العصبي اللي بسبب التعرض للأسلحة الكيماوية .. ده فرع في الطب محدش كان بيبصله ولا مهتم به لحد ما الأسلحة الكيماوية بدأ إستخدامها في الحروب و ساعتها بقينا محتاجين ندرس الحتة دي من الجسم البشري نقدر نعالجها إزاي؟ .. في يناير 1916 يعني بتتكلم تقريباً في نص الحرب العالمية الأولي (هارولد جيليز) عطوله فريق طبي و حتة يشتغل فيها جوه مستشفي كامبريدج العسكري في مكان إسمه ألدرشوت Aldershot في بريطانيا .. (هارولد جيليز) خد بعضه و بدأ يلف علي المستشفيات الميدانية في فرنسا عشان يلاقي عساكر بريطانيين متصابين في وشهم عشان ياخدهم كمرضي عنده في الوحدة بتاعته يحاول يلاقي علاج لإصاباتهم دي .. هو كان رايح و حاطط في حسابه إنه يلاقي مثلاً 200 مريض يشتغل عليهم .. حظه الأسود إن في الوقت ده قامت واحدة من أشرس و أبشع المعارك في التاريخ البشري كله و هي معركة سوم Somme Offensive و بدأ العساكر المصابين ينزلوا زي المطر علي المستشفيات الميدانية في فرنسا و فجأة (هارولد جيليز) بدل ما كان مخطط إنه يرجع ب200 عسكري لقي نفسه راجع ب2000.
مهم تكون فاهم إن (هارولد جيليز) مكنش عارف هو حيعالج الناس دي إزاي .. هو كان بيعك و بيفتي و أحياناً كتير بيهبد .. طريقة شغله إعتمدت علي Trial and Error يعني نجرب حل نلاقيه باظ نقوم مجربين حل تاني و هكذا .. هو شخصياً وصف الجراحات التجميلية اللي إحنا دلوقتي بنسميها Plastic Surgery بإنها فن جديد و غريب Strange New Art .. فيه كتير من الطرق اللي هو إشتغل بيها جت من كتب طب كانت إتنشرت في الهند زمان .. و فيه طرق تانية هو اللي عملها زي طريقة إسمها Tube Pedicle Skin-Grafting .. فكك من الإسم و خليك معايا عشان أفهمك هو كان بيعمل إيه .. لنفترض مثلاً إن عندك حرق جامد شوية في بطنك مشوهلك الحتة دي خالص فاللي بيحصل إنه بياخد حتة من الجلد السليم و ليكن من ظهرك بس مش بيقطعها إنما بيقطع حته جلد و يخيطها في انبوبه و يمطها لحد الحتة المشوهة في بطنك و يسيبها فترة لحد ما الدم يمشي ما يوصل للمنطقة المشوهة من بطنك .. بعد الفترة دي الخياطة بتتفك و بتشيل الأنبوبة و بتلاقي إن الجلد اللي إنت مطيته بقي مغطي الحتة المشوهة من بطنك.
أنا عارف إن اللي إنت قريته ده يحسسك إن (هارولد جيليز) كان زي ما يكون بيحشي محشي كرنب مش بيعالج ناس عندها تشوهات بس الطريقة دي الحقيقة عالج بيها ناس كتير أوي .. أول حالة تتجرب عليه الطريقة دي كان إسمه (والتر ييو Walter Yeo) عسكري مدفعية علي مدمرة بريطانية إسمها HMS Warspite إتصاب بقذيفة فرقعت جنبه في معركة جوتلاند Jutland سنة 1916 طيرت نص وشه من فوق مناخيره لحد حواجبه .. اللي عمله (هارولد جيليز) إنه زرعله طبقه جلد زي ما يكون قناع Mask .. صحيح إن النتيجة مش قد كده بس أهي أحسن من مفيش.
لإن زي ما قلتلك الدكاترة كانوا لسه بيتعلموا يعني إيه جراحة تجميل فمن ضمن اللي إتعلموه إن الجراح مبيشتغلش لوحده .. فيه طقم دكاترة معاه بيشتغلوا قبل العملية و بعدها .. فيه دكاترة علاج طبيعي و تخدير و تحاليل و أشعة و ليلة كبيرة أوي سعادتك .. مع الوقت إكتشفوا إن الوحدة بتاعة (هارولد جيليز) مش كفاية و إشتغل مع فريقه عشان يعزلوا لقسم خاص بيهم في مستشفي الملكة ماري في حتة إسمها سيدكب Sidcup في العاصمة لندن .. القسم بدأ يشتغل و فيه 320 سرير و لما الحرب خلصت سنة 1918 كان فيه 600 سرير و إتعمل فيه 11,752 عملية تجميل .. القسم ده بطل شغل سنة 1929 يعني بعد الحرب ما خلصت ب11 سنة و خلال الفترة من 1920 لحد 1925 بس يعني بتتكلم في 5 سنين إتعالج في القسم ده 8,000 عسكري.
من أكتر الحاجات اللي (هارولد جيليز) كان مهتم بيها أوي هي إنه يسجل كل صغيرة و كبيرة في شغله .. هو كان معاه مصورين فوتوغرافيين و رسامين محترفين يمكن أهمهم كان رسام شاطر أوي إسمه (هنري تونكس Henry Tonks) عشان هو كان عارف إنه بيخترع حاجة جديدة في الطب و بالتالي هو محتاج يسجل كل حاجة عشان اللي يجي وراه يعرف يكمل .. المجال الطبي اللي فعلاً كان عمال يتطور يوم عن يوم مع جراحة التجميل كان التخدير .. إسأل أي حد تعرفه درس تخدير حيقولك إن طب التخدير كبر و بقي قد الدنيا بسبب الشغل اللي إتعمل في قسم عمليات التجميل في مستشفي الملكة ماري .. دكاترة التخدير اللي إشتغلوا مع (هارولد جيليز) طلعوا طرق تخدير لسه مستخدمه لحد دلوقتي .. التاريخ بيقولنا إن الحرب العالمية الأولي محدش كسبها .. دي كانت حرب خسرانة من أول طلقة إتضربت فيها .. بس يمكن الحاجة الوحيدة اللي البشر إستفادوها من الحرب اللي مكنش ليها أي ستين لازمة دي هي النطات اللي حصلت في الطب .. أنا كنت إتكلمت في مقالة قديمة عن إزاي (ماري كوري Marie Curie) خدت مفهوم أشعة إكس أو الأشعة السينية و نقلته للمستشفيات الميدانية في الحرب .. و اللي إستفدناه النهاردة إن جراحة التجميل بدأت وسط الحرب علي إيد جراح أنف و أذن و حنجرة شاف حاجة محدش غيره شافها.
المصدر:
مقالة بعنوان How World War I invented a $16 billion industry: Cosmetic plastic surgeries .. إزاي الحرب العالمية الأولي إخترعت صناعة بتتقدر ب16 مليار دولار اللي هي جراحة التجميل .. نشرت علي موقع إسمه Inverse.com و ده لينك المقالة الأصلية:
http://of-plastic-surgery-and-modern-anesthesia
