ستاد توتنهام الجديد .. دليل المهندس الفريش لبناء الاستادات.

لينك التسجيل الصوتي للمقالة علي ساوند كلاود:
https://soundcloud.com/user-112011687-312727988/aac-3?si=34a709972451463db5961ccbb5b02733&utm_source=clipboard&utm_medium=text&utm_campaign=social_sharing

فيه ناس كتير مش بتحب فرقة توتنهام .. لو إنت أرسنالاوي فإنت بتكرهم و لو إنت تشيلساوي فإنت بتلعن سلسفينهم .. لو إنت مانشستراوي من بتوع الحتة الحمرا من مانشستر فإنت مش بتطيقهم لله في لله كده .. بس أنا أوعدك إنك علي أخر المقالة دي حتبقي مستني تتفرج علي ماتشات توتنهام اللي حيلعبوها علي أرضهم في استاد توتنهام الجديد .. مش لإن الفرقة بتلعب كورة حلوة علي أرضهم .. لا .. عشان استادهم يعتبر معجزة هندسية و أنا مش ببالغ لما بقول كده ..  فعلياً لو إنت مهندس معماري أو مدني أو ميكانيكا فإنت محتاج تتعلم منه دروس مهمة فشخ في الشغلانة بتاعتنا دي .. مهم تبقي فاهم إن الاستاد من وجهة نظرنا كمصريين إتعودنا نبصله زي ما العماير بالضبط .. لو بصيت علي عماير إسكان الشباب مثلاً أو حتي العماير اللي إتبنت في المدن الجديدة تلاقيها كلها أسطمبة واحدة .. شوية خرسانة و بلكونات و خلاص .. نفس الكلام في الاستادات في مصر .. استاد القاهرة ميفرقش حاجة في تصميمه عن استاد برج العرب .. ملعب كرة حوليه مدرج من الخرسانة و الأسمنت من غير Roof أو سطوح و بره فيه Parking كبير و كفا الله المؤمنين شر القتال و المهندسين شر التفكير بره الصندوق.

 معلومة إنه استاد بيستوعب 62,000 متفرج ممكن تكون عادية بالنسبة ليك .. ده استاد يعتبر أكبر استاد في العاصمة البريطانية لندن و إتصرف علي بناءه مليار دولار .. استاد إتبني علي إيد 5,000 بني أدم علي مدي 3 سنين .. استاد إتصبله 72,000 متر مربع خرسانة .. لو إنت مهندس ديكور تخيل إن مشروع إتركبله 1,600 باب و أعملنا إنت بقي لوحة الSchedule بتاعتهم و أعمل الحصر بتاعهم  .. مدرجات الدرجة الثالثة في الاستاد معمولة بزاوية ميل تعتبر أكبر زاوية ميل في كل استادات إنجلترا .. شوف رغم كل اللي أنا لسه قايله ده بالنسبه لينا كمشجعين كرة ولا يفرق معانا ..  بالنسبة لينا حنرد عليك و نقولك و إيه يعني ما الحيطة الصفرا Yellow Wall في استاد سيجنال إيدونا بارك بتاع بروسيا دورتموند زاوية ميلها أكبر فعادي يعني .. لو جيت قلتلك إن الشاشات العملاقة في الاستاد تعتبر أكبر شاشات معلقة في كل استادات أوروبا .. عادي برده يعني .. لو جيت قلتلك إن الاستاد ده فيه أطول بار في الFood Court بتاعه من أي استاد تاني في العالم .. ده أول استاد في العالم يتعمله مصنع بيرة مخصوص جواه .. و خد دي بقي .. الاستاد ده الوحيد في أوروبا اللي له ملعبين .. ملعب علوي بيتلعب عليه ماتشات كرة القدم بتاعتنا .. و ملعب تحته بيتلعب عليه ماتشات كرة القدم الأميريكية .. غالباً لو إنت مهندس معماري بتقرأ الكلام ده بتحط إيدك علي قلبك و بتسأل هو معلش هم جابوا مساحة لكل ده إزاي؟ ده أنا في أي مشروع بتخانق مع بتوع ميكانيكا علي مساحة الShafts عشان متاكلش من مساحة المكان.

اللي عايزين نعمله مع بعض سوا النهاردة إننا نبص للاستاد من وجهة نظر هندسية و أهم نقطة إنك تبقي فاهم يعني إيه استاد؟ .. عشان كده خلينا نقسم المقالة دي  لأربع حتت رئيسية:

• أول جزء و يمكن أهم جزء هو نجيلة الاستاد .. يعني إيه (من وجهة نظر هندسية) نجيلة استاد كرة قدم؟
• إزاي تلاقي طريقة إنك تشرب 62,000 متفرج بيرة تكون طازة؟
• مينفعش يبقي عندك استاد من غير سقف .. مش عشان الجمال .. لا .. عشان الكورة للجماهير.
• إزاي تعمل استاد له أرضيتين نجيلة؟ واحدة يتلعب عليها كرة قدم بتاعتنا و الثانية يتلعب عليها كرة قدم أميريكية.

نجيلة الاستاد .. أهم جزء و أكتر جزء بيتنسي و محدش بيجيب سيرته:

 لو فهمت إن المليار دولار اللي إتصرفوا علي الاستاد ده إتصرفوا أولاً و أخيراً علي شوية نجيلة يبقي إنت إتحطيت علي أول الخط إنك تبقي فاهم يعني إيه استاد .. أرضية الإستاد ده فيها حوالي 500 مليون ورقة نجيلة و دول هم أهم حاجة في المشروع و أي حاجة تانية بتخدم عليهم  .. استاد  توتنهام بيشتغل علي النجيلة بتاعته فريق من عشرين بني أدم و الفريق ده تقريباً عايشين في الاستاد مبيروحوش و علي فكرة شغلهم مش صعب و مفيهوش تريكات كتير .. هو بس شغل كتير .. كتير فشخ .. بس شغل بتحكمه شوية Standards أو معايير مينفعش بأي حال من الأحوال إنها متتطبقش.

• بسم الله الرحمن الرحيم طول ورقة النجيلة لازم يبقي بين 25-30 مليمتر .. الصبح قبل الماتش العمال بيبقي معاهم مكن جز النجيلة اللي بيكون صوتها عالي دي و بيبقي مكن نظيف بتضبط Setting بتاعته و الموضوع بيبقي سهل و بسيط .. بعد كده بيبقي خطوة المراجعة إن ناس بيبقي معاها حته صفيح كده مدرجة بيتأكدوا طول النجيلة فعلاً مضبوط.
• الجو في إنجلترا بسم الله ما شاء الله مينفعش يتلعب فيه كرة قدم .. الدنيا بتشتي كتير و ده كان زمان بيخلي اللاعيبة بتلعب في الطين مش بتلعب علي نجيلة .. دلوقتي النجيلة نفسها بقت معدلة جينياً .. نظام الري بالتنقيط بقي مستخدم في كل الاستادات الكبيرة .. في أوروبا بالذات فيه شبكة تسخين في أرضية الملعب.
• فيه حاجات تافهة إنت ممكن متفكرش فيها أوي بس هي مهمة زي الخطوط البيضاء بتاعة منطقة الجزاء و دايرة خط النص .. الخطوط دي بتترسم بجير أبيض و بطريقة بدائية جداً شبه الطريقة اللي البنايين عندنا في مصر بيرصوا بيها الطوب الأحمر .. بيتشد خيط و العامل بيمسك مكنه بتتجر يدوي بعجلة شبه البراويطة بتاعة البنايين برده و بيرسم الخط.

ناس كتير بيتوه من دماغها فكرة إن أرضية الملعب دي نجيلة .. نجيلة يعني زرع .. زرع يعني ربنا خلقه محتاج يعمل عملية البناء الضوئي .. بناء ضوئي يعني شمس .. حتجيب منين الشمس لنجيلة مش بس في إنجلترا .. لا كمان إنت محاوطها بمدرجات عالية و كمان فيه سقف فوق الاستاد .. صحيح الشمس ممكن تنزل علي حتة من النجلية بس أغلب النجيلة مش حتشوفها .. طب و الحل؟ .. نعملها شمس صناعي .. ده إسمه Artificial Lighting System أو نظام إنارة صناعي .. ده حضرتك عبارة عن جمالوم وزنه 120 طن متركب عليه 164 لمبة.

زي ما في مصر مفيش ماتش كورة من غير حاجة ساقعة .. في إنجلترا عندهم بيرة:

بص محدش قال إن كل اللي بيتفرجوا علي الماتش في الاستاد خمورجية .. استاد توتنهام بيساع 62,000 متفرج و بالميت خالص الناس اللي ماسكين الاستاد لقوا نفسهم مطالبين يلاقوا طريقة إنهم يوفروا 23,000 كوباية بيرة في الماتش و الناس دي بتشرب بيرة في كوبايات شبه كوبايات عصير القصب عندنا .. فعلياً التعامل مع البيرة هو هو التعامل مع القصب .. زي ما عصير القصب بيسود لو إتساب في الهواء و لازم يتشرب طازة فبرده البيرة لازم ما بين إنها تتعمل و بين إنها تتشرب ميعديش فوق اليوم و عشان كده استاد توتنهام فيه مصنع بيرة مخصوص عشان يوفر إحتياجات المتفرجين من البيرة الطازة قبل الماتش بيوم .. بس شوف مش دي القضية .. إنت عملت مصنع بيرة صغير في استاد طب برافو و الله مع إني مش فاهم إيه الإنجاز في كده يعني؟ .. الإنجاز في إنك تحاول تستوعب مسألة حساب صغيرة و أرجوك حاول تفكر فيها قبل ما تجاوب:

لنفترض إن عندك استاد بيساع 62,000 بني أدم و عشان إحنا مسلمين تعالي نتخيل إن الناس دي كلها حتعوز تشرب كوباية عصير قصب كبيرة مشبرة و المذيع الداخلي مشغل أغنية أكاد من فرط الجمال أذوب .. المشكلة إنك محتاج تلاقي طريقة إن ال62,000 بني أدم دول في الإستراحة الربع ساعة بين الشوطين إن كل واحد فيهم يقوم من علي كرسيه و يروح للمعصرة بتاعة الاستاد ياخد كوباية عصير القصب بتاعته و يرجع تاني الكرسي بتاعة .. بمعني أخر .. إزاي توفر 62,000 كوباية قصب في أقل من 15 دقيقة؟

الحل سيدي القاريء في ميكس بين النصاحة و المفهومية .. أولاً هم عملوا أطول بار أو معصرة في أوروبا كلها .. استاد توتنهام فيه بار طوله 65 متر تقريباً بطول أرضية الملعب عشان يخدم علي الناس دي كلها .. ثانياً و ده المهم إن الكوبايات اللي الناس بتشرب فيها خاصة شوية .. هي كوبايات بلاستيك مخرومة من تحت و كل كوباية بيبقي فيها قرص متمغنط .. بتحط الكوباية علي مكنة شبة البوتاجاز بحيث طالع منها حنفية صغيرة شبه عين البوتاجاز .. بتحط الكوباية علي الحنفية بحيث القرص المتمغنط اللي جوه الكوباية بيطلع لفوق و خلال 5 ثواني بس كوبايتك بتتملا عصير قصب من تحت من مكان البتاعة اللي شبه عين البوتاجاز و كل اللي عليك تعملة إنك ترفع الكوباية لفوق عشان القرص المتمغنط يرجع مكانه في قعر الكوباية و يقفلها عشان متسربش .. البار ده بيقدر يوفر 10,000 كوباية عصير قصب أو كوباية بيرة في الدقيقة الواحدة .. اه نسيت حاجة .. بالنسبة لمهندسين الصحي .. هل تعلم إن الإستاد ده فيه 471 حمام عمومي؟ .. تخيلت؟

سقف الاستاد .. التجسيد الهندسي لجملة الكورة للجماهير:

و أنا صغير مرة أبويا وداني أتفرج علي ماتش للإتحاد السكندري في استاد إسكندرية .. الحقيقة أنا مش فاكر إحنا كنا بنلاعب مين بس مش دي القضية .. تجربتي دي رغم إني كنت صغير إلا إن هي اللي خلتني أولاً إتحاداوي زي أي إسكندراني بيحترم نفسه .. معلش يعني إيه إسكندراني و تقولي إنك أهلاوي ولا زملكاوي؟ أومال سيد البلد و زعيم الثغر راح فين؟ .. تاني حاجة إتعلمتها هي إن فعلاً الكورة للجماهير دي مش مجرد كلمة بتتقال و خلاص .. وجودك في استاد مليان و ناس بتشجع ده إحساس مرعب .. مرعب للمتفرج أومال اللاعيب نفسه بيبقي حاسس بإيه؟ .. عشان كده استادات أوروبا خصوصاً الإستادات الإنجليزية كلها بتتصمم علي أساس حاجتين .. أول حاجة إن كراسي المتفرجين تبقي قريبة قدر الإمكان من أرضية الملعب .. ثاني حاجة إن مينفعش استاد كرة قدم ميبقاش له سقف .. مش لازم السقف يغطي الإستاد كله .. إحنا مش عاملين السقف ده كتندة البلكونة عشان المطرة و الشمس .. إحنا عاملين السقف ده عشان مهندسي الصوت زي (مارك ميرفي Mark Murphy) اللي صمم سقف استاد نادي توتنهام يحسسك و إنت في المدرجات إنك بتتفرج علي فيلم SAW أو The Conjuring و تكون Live .. خصوصاً لو إنت بتتفرج من الدرجة الثالثة.

استاد توتنهام متصمم بشكل مختلف شوية عن التصميمات اللي إنت متعود عليها في الإستادات المصرية .. خد عندك الدرجة الثالثة مثلاً أو South Stand في الاستاد .. اللي الباشمهندس (مارك ميرفي) عمله إنه خلي كراسي مدرجات الدرجة الثالثة أكتر كراسي في الاستاد كله لازقة في بعضها .. خلي زاوية ميل المدرج نفسه كبيرة و مع زاوية ميل السقف فوقيك و إنت بتتفرج فإنت فعلياً حضرتك مبقتش قاعد في استاد .. إنت بقيت قاعد جوه ميكرفون .. التصميم بتاع الدرجة الثالثة في استاد توتنهام بيخليه مرعب لأي فرقة بتلاعبهم علي أرضهم .. المدرجات بتاعة الدرجة الثالثة بتقدر تستوعب لوحدها 17,000 متفرج بزاوية ميل 35 درجة .. الصف الأول من مدرجات الدرجة الثالثة بُعده عن أرضية الملعب أقل من 5 متر بس .. زود علي كده تأثير السقف أو الشفة المعمولة فوق أرضية الاستاد و اللي بتعكس صوت الجماهير فده كفيل إنه فعلاً يخليك تقول إن الكورة للجماهير مش مجرد جملة بتتقال و خلاص.

لو إنت مهندس مدني و بتاع إنشاءات فالحتة اللي جاية دي علشانك .. إنت تعرف إن السقف ده كله إترفع حتة واحدة؟ .. حاول تتخيل عشان خاطري إن عندك أستك من اللي بنربط بيه الفلوس أو اللوح ده .. بيبقي مرن و ملوش شكل صلب صح؟ .. تخيل إنك عايز تشكل الأستك ده علي شكل مربع بإنك تجيب اربع خيوط و تشد الأستك من أربع أركان بحيث يتمط ياخد شكل مربع .. فعلياً الأستك إنت تقدر تشكله بأي شكل إنت عايزه لو إنت عارف تشده من أنهي حتة بالضبط و تشد بمقدار قد إيه .. في حالة استاد توتنهام إحنا جبنا أستك برده بس في الحالة دي جبنا كابلات صلب طولها 10 كيلومتر  .. و زي ما شدينا الأستك من أربع جهات عشان نشكله علي شكل مربع فإحنا شدينا الكابلات دي من 54 نقطة تثبيت مختلفة .. سقف وزنه 600 طن عبارة عن كابلات صلب بتتشد بمكابس هيدورليك علي مدي 3 أسابيع لحد ما في الأخر الكابلات دي إتشكلت علي شكل بيضاوي اللي هو سقف الاستاد متعلق علي إرتفاع 40 متر من الأرض.

علي فكرة أنا لسه مخلصتش جحيم الإنشاءات و شغل مدني في الاستاد .. عادة سقف الاستاد بيتركب علي عمدان .. حاجة زي استاد سان سيرو أو جوزيبي مياتزا علي حسب إنت بتشجع مين في ميلان .. و لسه التصميم بتاع الاستاد بيتحط كConcept الكلاينت اللي هو في حالتنا رئيس نادي توتنهام (دانييل ليفي Daniel Levy) جه قالك لا أنا مش عايز عمدان في الإستاد .. يهديك يرضيك يا عم الحاج؟ .. قالك لا أنا عايز اللي قاعد يتفرج علي الماتش في الاستاد ميحسش إن فيه عمدان مضايقاه و مش عارف يتفرج بسببها .. طب و الحل؟ .. الحل إنك تحزم السقف .. حتلاقي في الصور صورة منهم من الجو للاستاد .. واضح إن السقف بيتكون من كابلات صلب و هم بالضبط 108 كابل متحزمين داخلي و خارجي .. التحزيمة دي هي اللي بتضبط الشد أو Tension في الكابلات عشان يفضل السقف ده متعلق من غير عمدان.

إزاي كمهندس معماري تعمل استاد له ملعبين .. واحد بتاع كرة قدم .. و الثاني بتاع كرة قدم برده بس أميريكية؟

الإنبهار فيما يتعلق بأرضية استاد توتنهام مخلصش .. لو إنت مهندس معماري .. اللي فات ده كان ممكن يبقي من إختصاص المهندسين الزراعيين أو الإنشائيين بس لو إنت معماري و إتقالك يا باشمهندس إن والله الكلاينت بتاعنا عايز يعمل استاد .. و مش بس كده .. هو عايز استاد ينفع يتلعب عليه ماتشات كرة قدم من بتاعتنا و كمان ماتشات كرة قدم أميريكية عشان الكلاينت بتاعنا دني و يعشق الفلوس عشق .. الناس اللي بتشجع كرة قدم و متابعاها عارفين كويس مين هو (دانييل ليفي) رئيس نادي توتنهام .. المهم .. إزاي يا باشمهندس تحل المشكلة دي؟

استاد توتنهام هو الإستاد الوحيد في تاريخ الهندسة المعمارية اللي له ملعبين تحت بعض .. ملعب كرة القدم اللي بتتلعب عليه ماتشات الدوري الإنجليزي الممتاز و تحت منه بإتنين متر ملعب تاني بيتلعب عليه ماتشات كرة القدم الأميريكية .. بمعني أخر .. استاد توتنهام  اللي إنت بتتفرج عليه ده عبارة عن 3 حتت بيتركبوا جنب بعض .. و لما يتلعب ماتش كرة قدم أميريكية ال3 حتت دول و اللي كل حتة فيهم وزنها بيعدي 3000 طن بيتجروا علي 168 عجلة عن طريق 68 موتور كهرباء و يتركنوا في الجراج أو Parking بتاع الإستاد تحت مدرجات الدرجة الثالثة أو South Stand .. مجرد إنك تستوعب إزاي ملعب كرة قدم يتقسم حتي حتتين مش 3 حتت و إن اللاعيبة و هي بتلعب متحسش بحاجة دي لوحدها عايز مقاول فلوسه حلال .. استاد توتنهام هو الإستاد الوحيد علي مستوي العالم اللي من ضمن الوظايف بتاعة الناس اللي شغاله فيه هي حاجة إسمها Chief Engineer of Moving Structures يعني ده مهندس مطلوب منه إنه يحرك حاجات المفروض يعني إنها إتصممت عشان متتحركش .. زي قلب أي رجل إسمه (احمد) كده علي رأي البنات .. في حالة إنك بتسأل طب إشمعني يعني الأرضية بتتقسم ل3 حتت مش حتتين فالإجابة بمنتهي البساطة عشان المعماري إتخانق مع الإنشائي و لبسوها لبتاع ميكانيكا.

فاكر لما قلتلك إن الكلاينت أو (دانييل ليفي) أصر علي إن الاستاد ميبقاش فيه عمدان تشيل السقف؟ .. ده مش معناه إن المدرجات نفسها حتشيل نفسها .. أكيد فيه عمدان شايلة المدرجات .. مدرجات الدرجة الثالثة شايلها عمودين شكلهم غريب و لو إنت مهندس إنشائي بصلهم كويس و خد فكرتهم يمكن تعجبك و تطبقها في مشروع .. هم عمودين فقط شايلين مدرج بيشيل 17000 بني أدم .. العمودين عشان رأسهم متفرعة زي ورق الشجر فالمهندسين اللي صمموا الاستاد مسميينهم الشجرتين .. طبعاً العمدان مش حتتحرك .. فالمعماري قالك بسيطة إحنا نقسم الأرضية 3 حتت مش حتتين .. مين لبسها بقي يا معلم؟ .. بتاع ميكانيكا اللي بقي مُطالب إنه يحرك 3 كتل كل واحدة فيهم فوق 3000 طن .. إنت رايح فين .. لبس مهندس الميكانيكا لسه مخلصش.

طب دلوقتي إحنا ركنا أرضية النجيلة في الجراح .. هي مش النجيلة دي عايزة شمس؟ .. طب ما كانت أرضية الملعب في مكانها مكشوفة كنا بنركبها Artificial Lighting System لكن هنا حنعمل إيه؟ .. قالك حنجيب لمض L.E.D و نركبها في السقف عشان تقوم بنفس الدور .. و إلبس إنت يا بتاع Coordination بين الأقسام .. ميزة لمض L.E.D إنها مش بتخلي الزرع ينمو بمعدل كبير فإنت مش محتاج تقلق أوي علي طول العشب و عشان كده بيتساب 7 مكن أوتوماتيك لقص النجيلة.

استاد توتنهام ده فعلاً معجزة هندسية .. استاد اللي صممه ناس فاهمة يعني إيه كرة قدم .. مهندسين عارفين إن الكرة للجماهير .. الاستاد ده دليل علي إن الهندسة مش شرط تبقي حاجة واو تصميمها غريب كله كيرفات .. الهندسة حلاوتها لما تبقي فاهمة الحكاية ورا المبني .. إنت عايز تعمل استاد فبتبدأ تسأل نفسك هو يعني إيه استاد؟ .. إنت كمتفرج عايز إيه من الاستاد؟ .. استاد توتنهام فعلياً اللي بيصممه كان دايماً بيسأل نفسه هو يا تري المشجع في المدرجات حيبقي حاسس بإيه؟ .. عشان كده دايماً بقول الهندسة حلوة بس إحنا اللي عايشين في مصر.

المصدر:

حلقة من برنامج Richard Hammond’s Big و ده لينك الحلقة علي YouTube: