لينك التسجيل الصوتي للمقالة علي Sound Cloud:
https://soundcloud.com/user-112011687-312727988/je1a1m5myemn?si=29d222b20c1344c79d5a1ee42278d41b&utm_source=clipboard&utm_medium=text&utm_campaign=social_sharing
يحكي أن الإمبراطور الروماني (أغسطس قيصر) اللي شهر أغسطس إتسمي علي إسمه من كتر ما الرومان كانوا شايلين الرجل ده فوق راسهم إتكتب علي قبره إنه إستلم روما و هي مبنية من طوب و سابها و هي مبنية من رخام .. يقال برده إن مبدأ الرجل ده في إنه يبني إمبراطورية من أقوي الدول اللي إتخلقت في تاريخ البني أدمين هو إنه يتك علي الصبر .. الرجل مكنش بيستعجل .. هو و مجموعة المستشارين بتوعه يقولوا مثلاً إنهم محتاجين يعملوا طريق في الحتة الفلانية أو إنهم يبنوا ميناء في المدينة الفلانية فالرجل بيجيب المقاول اللي حينفذ المشروع و يقوله فلوسك أهي و الوقت اللي إنت محتاجه عشان تخلص المشروع بما يرضي الله خده .. لكن لو جيت إستلمت منك المشروع و لقيت فيه مشاكل فأنا حطلع عينك و عين اللي خلفوك بما لا يرضي الله .. إيمان (أغسطس قيصر) بفكرة إتك علي الصبر دي خلاه يطبع الجملة دي علي العملة الرسمية للبلد .. واضح إن الدرس ده في منهج التاريخ محدش في الحكومة الصينية خد باله منه و هم بيمضوا علي قرار بناء سد الممرات الثلاثة أو The Three Gorges Dam.
فيه شوية معلومات لازم تتحط قدامك و لما ترصهم كلهم جنب بعض حتقدر تكون صورة عن إزاي المشروع ده فشيخ .. معلومة رقم واحد إن ده أكبر سد يتبني في تاريخ البني أدمين .. معلومة رقم إثنين إن ده مشروع إتكلف 200 مليار يوان اللي هي عملة الصين يعني بتتكلم عن 28.6 مليار دولار و عشان يتبني قعد الصينيين في النكد ده عشرين سنة كاملة و دي مش غلطة مطبعية .. السد بدأ بناءه في 1994 و خلص في 2006 .. معلومة رقم ثلاثة إن زي ما عشان السد العالي يتبني أضطرينا نرحل الالاف من سكان النوبة من بيوتهم فكمان عشان السد ده يتبني الحكومة الصينية رحلت حوالي مليون بني أدم من بيوتهم علي ضفاف نهر اليانجتسي أكبر أنهار الصين و اللي السد ده إتبني عليه .. معلومة رقم أربعة إن بناء علي كلام وكالة NASA فسد الممرات الثلاثة ده من الحاجات القليلة اللي بناها البشر اللي إنت تقدر تشوفها بعنيك من الفضاء .. معلومة رقم خمسة و حاول تستوعبها كويس إن ده سد إرتفاعه 181 متر و عرضه 2,335 متر .. إستوعبت؟ .. معلومة رقم ستة إن التربينات بتاعة السد اللي خلصت سنة 2012 بتقدر تديلك 22,500 ميجاوات كهرباء يعني بتتكلم عن قدرة إنتاج كهرباء تمثل 13 ضعف قدرة السد العالي.
المشاريع اللي زي دي بعد ما بتفهم قد إيه هي فشيخة عقلك بيحاول يستوعب السبب .. ليه؟ .. ليه أبني حاجة خزعبلية زي ده؟ .. ليه وجع القلب؟ .. الحقيقة إن السبب اللي الصينيين قالوه لنفسهم و هم بيوافقوا علي المشروع سنة 1994 لما إتمضي قرار إنشاءه ده هو إنه مشروع مش بس حيوفر كمية كهرباء تساعد الإقتصاد الصيني إنه يحقق معدلات نمو تخليه يتخطي الإقتصاد الأميريكي إنما كمان حيساعد إنه يحمي ملايين الصينيين من خطر الفيضانات .. هنا إنت غالباً بتقول لنفسك طب إيه اللي حصل غلط؟ .. معني إني بتكلم عن المشروع ده في حد ذاته إن فيه حاجة باظت و لو إنت فكرت في ده فإنت عندك حق و عشان تعرف إيه اللي باظ أنا محتاج أرجعك ليونيو 2020 يعني من سنة بس مش من بعيد أوي يعني .. في يونيو 2020 إتعرضت الصين لأكبر فيضان من 60 سنة .. فيضان من اللي بيتقال عليهم بيجي في العمر مرة .. فيضان كان السبب في موت 158 بني أدم و ترحيل 3.67 مليون بني أدم من بيوتهم .. و فوق ده كله كان السبب في خساير وصلت قيمتها 144 مليار يوان يعني بتتكلم علي 20.5 مليار دولار .. اللي إتصرف علي السد في عشرين سنة راح في يوم.
قبل ما تفهم ليه السد مقامش بدوره؟ لازم تفهم هو السد ده فكرة تصميمه إيه؟
فكرة سد الممرات الثلاثة هي هي فكرة السد العالي يمكن بإسثناء الموقع .. السد العالي إتبني في مصر اللي هي تعتبر المصب بتاع نهر النيل .. سد الممرات الثلاثة إتبني عند المنبع بتاع نهر يانجتسي بحيث إنك لما بتلاقي الأمطار الموسمية نزلت و مستوي المياه في النهر زاد تقوم حابس المياه الزيادة في بحيرة صناعية اللي في حالة السد العالي تبقي بحيرة ناصر و بعد كده تتحكم إنت في منسوب النهر بعد السد عن طريق فتحات في السد عشان تفضي شوية المياه اللي في البحيرة الصناعية .. سهلة أهي .. نخش بقي في شوية تفاصيل.
بالنسبة ليك كمهندس تصميم سدود فالسنة مقسومة نصين .. النص الأول هو موسم الجفاف اللي مفيهوش أمطار .. في حالة سد الممرات الثلاثة فالفترة دي هي من أكتوبر لحد مايو .. في الفترة دي عمق المياه في البحيرة الصناعية بيبقي ثابت عند 175 متر .. إشمعني العمق ده؟ .. ده العمق المثالي اللي بيخلي التربينات تشتغل و تولد كهرباء .. أول ما شهر يونيو بيخش فالأمطار الموسمية بتبدأ تنزل و بيبدأ النص الثاني من السنة .. هنا منسوب المياه في البحيرة الصناعية بيقل ل145 متر .. لما ده بيحصل فإنت بتفضي في البحيرة الصناعية مكان يساع 22 مليار متر مكعب مياه و المكان ده بتملاه مياه الأمطار الموسمية اللي بتنزل و هي دي المشكلة .. اللي بيصمم السد عمل حسابه علي كمية المياه الAverage أو المتوسطة اللي بتنزل كأمطار موسمية .. محدش عمل حسابه علي الفيضان اللي بيجي في العمر مرة .. الفيضان اللي مش بيجي و معاه 22 مليار متر مكعب مياه .. أنا بتكلم عن الفيضان الفشيخ اللي بيجي و شايل علي كتافه 244 مليار متر مكعب مياه يعني مرة و نص كمية المياه اللي موجودة في بحيرة ناصر.
في الهندسة أكتر حاجة ممكن تبوظ أي تصميم مش الأخطاء إنما إن السياسيين يعلوا سقف طموحاتهم من التصميم و بالتالي سقف طموحات الناس اللي مش دارسة هندسة و معندهمش أي خلفية عن المجال هي كمان بتزيد و بالتالي لما بتحصل مشكلة كلهم بيبصوا للمهندس اللي صمم المشروع و يقولوله إنت اللي أكلت الجبنة .. نهر يانجتسي هو ثالث أكبر نهر في العالم من حيث كمية المياه اللي بتمشي فيه .. ده نهر مينفعش تسيطر عليه بسد واحد .. بس للأسف إحنا دلوقتي مضطرين نتكلم شوية عن الجواز الغير شرعي بين السياسة و الهندسة .. إزاي إنت كمهندس بتلاقي نفسك مضطر تعك و تهبد عشان خاطر اللي قاعد علي الكرسي ميزعلش .. دلوقتي حنتكلم بسرعة عن قصة حياة السد ده.
الهندسة و السياسة .. جواز (عتريس) من (فؤادة) باطل:
مبدأياً مفيش حاجة بتخلي الحاكم لما يبص لنفسه في المراية يلاقي نفسه بيقول يا أرض إتهدي ما عليكي قدي زي مشاريع البنية التحتية .. الرئيس (حسني مبارك) الله يرحمه كان فرحان أوي بإنه هو اللي بني الطريق الدائري و كوبري أكتوبر .. دلوقتي الرئيس (السيسي) واحدة من أكتر الإنجازات اللي هو فرحان بيها هي شبكة الطرق اللي بيعملها .. طبعاً الرئيس (جمال عبدالناصر) التاريخ حيفضل فاكره بإنه هو اللي عمل السد العالي و إنه هو اللي عمل النكسة بس مش دي القضية .. مشاريع البنية التحتية بتبقي حاجة حلوة تتحط في الC.V. بتاع الحاكم .. الكلام ده يمشي علي مصر و يمشي علي الصين.
خلال تاريخ الصين الطويل فيه قصص كتير لحكام مكنش عندهم مشكلة يدفعوا اللي وراهم و اللي قدامهم علي مشاريع بنية تحتية للري و بناء السدود مش بس عشان المشاريع دي بتجيب فلوس إنما كمان عشان الحاكم بيستمد شرعيته من المشاريع اللي زي دي .. الأباطرة الصينيين زمان كان بيتبصلهم علي إن الإمبراطور اللي لأجل حظه الأسود يعني يحصل في عهده الفيضان اللي بيجي في العمر مرة اللي أنا لسه متكلم عنه ده فالمواطن الصيني البسيط كان بيشوف ده علي إنه علامة إن الألهة خلاص مبقتش راضية عن الحاكم ده و بالتالي بقت بتبليه بالمصايب و مفيش مصيبة أكبر من الفيضان اللي بيشيل كل حاجة قدامه.
فكرة بناء سد يتحكم في نهر اليانجستي دي بدأت تتولد في دماغ الحكام الصينيين من زمان .. أول واحد فكر فيها كان إسمه (سون يات سين Sun Yat-Sen) و تقدر تقول عليه مؤسس الصين الحديثة .. بالنسبة للصينيين ده (محمد علي باشا الكبير) بتاعهم .. الرجل ده سنة 1919 يعني وقت ما العالم بيتفشخ من وباء الأنفلونزا الإسبانية و لسه طالع من مدعكة الحرب العالمية الأولي حط هو الرسومات الأولية لبناء سد الممرات الثلاثة بس ملحقش و معرفش يحقق حلمه .. اللي جه وراه (شيانج كاي شيك Chiang Kai-Shek) كانت برده الفكرة عاملاله هسهس و خد خطوة زيادة إنه دعي المهندس المعماري الأميريكي (جون إل سافادج John L. Savage) و ده نفس الرجل اللي صمم سد هووفر Hoover Dam و اللي يعتبر فعلاً تحفة هندسية في تصميمه عشان زي ما بنقول كده يدرس الموضوع و يحط رسومات مبدئية و يقول للصينين مشروع زي ده يتكلف كام و حيقعد كام سنة .. هوبا جه أغسطس 1927 و ولعت الحرب الأهلية الصينية.
الحرب الأهلية دي خلصت علي إن الصين بقي بيحكمها الناس اللي إنت شايفهم دلوقتي .. الحزب الشيوعي .. الشيوعيين في الصين عدي عليهم مراحل تطور زيهم زي الأهلاوية كده .. يعني دلوقتي تتكلم مع الأهلاوية يحسسوك إنهم بيشجعوا ريال مدريد أو مانشستر سيتي بس هو جه فترة علي الأهلي زيه زي أندية كتير كانت إدارته بتعك و بتهبد عادي جداً .. فترة الهبد العظمي زي ما بسميها كانت الفترة اللي مسك الصين وقتها بني أدم لازم فعلاً تقرأ عنه شوية هو (ماو تسي تونج Mao Zedong) .. الرجل ده برده كان بيفكر كتير في المشروع بس في نفس الوقت هو كان شغال في مشروعين داسوا علي وش الإقتصاد و المجتمع الصيني اللي هم الثورة الثقافية Cultural Revolution و القفزة العظمي للأمام Great Leap Forward .. كم المصايب اللي حصلوا بسبب المشروعين دول و اللي إن شاء الله نتكلم عنهم في وقت تاني كانوا هم السبب ورا تأجيل المشروع بتاع سد الممرات الثلاثة.
بيموت (ماو تسي تونج) و بيجي وراه (دينج شياو بينج Deng Xiaoping) و اللي بمجرد ما قال فكرة ليه لا نبني سد علي نهر اليانجتسي الحزب هاج عليه زي ما الفيمينيستس بيهيجوا علي أي بوست يعمله (عبدالله رشدي) علي السوشيال ميديا .. مهندسين إعترضوا .. علماء بيئة إعترضوا .. علماء أثار إعترضوا .. وجهة نظر الناس دي هي إنهم شافوا اللي (جمال عبدالناصر) عمله في النوبة لما قرر يبني السد .. الناس دي كانت وجهة نظرها إن الضرر اللي حيحصل لملايين البني أدمين اللي إنت حتجبرهم يسيبوا بيوتهم و يمشوا و كمان المعالم الأثرية اللي حتتدفن بمياه البحيرة الصناعية اللي إنت حتعملها و الضرر اللي حيحصل للنظام البيئي بسبب إنك حجزت طمي النهر إنه يتحرك أكبر بكتير من الكام مليار دولار اللي حيخشوا للإقتصاد الصيني لما السد يشتغل .
هو اه السد فكرته حلوة و كل حاجة و دي حاجة تحترم و تتحط علي الراس بس في نفس الوقت الثمن اللي حيتدفع غالي أوي .. عشان بس تبقي مستوعب بالأرقام فإنت بتتكلم عن 1.4 مليون بني أدم حيجبروا إنهم يسيبوا بيوتهم و يمشوا .. صحيح إن ترحيل ناس من بيوتها ده طبيعي في حالة بناء السدود بس لو جيت تشوف إيه هم أكبر 3 سدود إتبنوا في تاريخ الصين حتلاقي لو جمعت عدد الناس اللي إترحلت من بيوتها بسبب بناء السدود دي كلها و جمعتهم علي بعض حيطلعوا برده أقل من عدد الناس اللي حتترحل بسبب سد الممرات الثلاثة .. البحيرة الصناعية اللي حتتعمل مع السد حتدفن تحتها مدينتين و 114 مدينة صغيرة و 1,680 قرية .. حاول بس عشان خاطري تستوعب الأرقام دي.
وقتها زي ما قلتلك الحزب الشيوعي الصيني مكنش زي دلوقتي .. وقتها كان حزب الناس بتعرف تقول رأيها فيه .. مكنش حزب الناس اللي فيه بيصحوا الصبح يقولوا لزعيم الحزب طويل العمر يطول عمره يزهزه عصره و ينصره علي مين يعاديه .. لحد ما جه يوم 4 يونيو 1989 و حصلت مذبحة ميدان تيانانمين أو النسخة الصيني من فض إعتصام رابعة العدوية .. بغض النظر عن مين صح و مين غلط خلينا نتفق علي الحقايق اللي حصلت علي الأرض .. بعد أربع شهور من المذبحة السلطات الصينية صادرت كتاب إسمه (يانجتسي يانجتسي) كان يعتبر مرجع لأي حد عايز يقرأ عن مشروع سد الممرات الثلاثة لإن الكتاب كان بيشرح إيه هي أسباب رفض المشروع .. مش بس كده .. السلطات إعتقلت اللي كتب الكتاب (داي كينج Dai Qing) .. سنة 1992 الحزب قدم مقترح بناء سد الممرات الثلاثة قدام البرلمان .. صحيح المشروع إتوافق عليه بس تلت أعضاء البرلمان إمتنعوا عن التصويت .. ليه ده حصل؟ .. الحزب قال للبرلمان السد حيتبني و هو كده و اللي مش عجبه يشرب من أي خرارة .. كل ما حد يقول للحزب لكن يترد عليه ملكنش .. السد حيتبني و اللي مش عاجبه باب المعتقل يفوت جمل.
مشاريع البنية التحتية و الثمن الغالي اللي بيدفعه المواطن البسيط:
لما مشروع زي ده بيتبني و بيتقالك يا مواطن يا كحيان عشان خاطر البلد إنت لازم تسيب أرضك و بيتك و شغلك و تروح تعيش في حتة تانية و كله عشان خاطر الوطن .. بس متقلقش .. إحنا مش حنرميك رمية الكلاب .. إحنا حنديلك قرشين تعويض .. إنت كمواطن غلبان بتيجي تسأل هي الفلوس فين يتقالك مفيش .. تيجي تعترض تلاقي البوليس بيضربك و بيرميك في المعتقل .. الحكومة الصينية سنة 2013 يعني بعد سبع سنين من إفتتاح السد قالت إن أيوه حصلت جرايم إختلاس لفلوس التعويضات و فيه ناس كبيره جوه الحزب الشيوعي خدت الفلوس دي في جيبها .. طب يا سيدي حنستعوض ربنا و نقول حسبنا و نعم الوكيل .. تيجي تشوف إنت كمواطن غلبان إنت بقي بيخشلك كام بعد ما سبت أرضك إذ تكتشف إن دخلك السنوي قل بنسبة عدت 20% .. ليه؟ .. عشان زمان إنت كنت عايش في أرض خصبة فبتزرع و بتطلع محصول بإنتاجية حلوة و بتبيع و بتكسب .. دلوقتي إنت إترميت في أرض في أخر بلاد المسلمين فطبيعي إن إنتاجية أرضك متكونش زي الأول .. بس كل ده كوم و الضرر البيئي كوم .. الضرر البيئي ده عامل كابوس للصين إسمه الإنزلاقات الأرضية.
سنة 2007 الحزب الشيوعي الصيني طلع تقرير إعترف فيه إن حوادث الإنزلاقات الأرضية علي طول إمتداد نهر اليانجتسي زادت بشكل خزعبلي بعد ما البحيرة الصناعية بتاعة سد الممرات الثلاثة إتبنت .. الأرض الطينية مش مستحملة وزن المياه ده كله ده غير إن الوزن مش ثابت هو بيتغير مرتين في السنة .. حاول تتخيل بني أدم ربنا ابتلاه بسمنة مفرطة نايم علي السرير .. طول ما هو ثابت مبيتحركش مش حتحس إن السرير فيه مشكلة .. بمجرد ما يتقلب في نومته حتسمع صوت مفصلات السرير و هي تقريباً بتحارب عشان متفكش من بعضها .. بداية إن الناس تفهم إن فيه حاجه غلط كانت سنة 2003 و ده بعد أول ملي للبحيرة الصناعية بتاعة السد .. بمجرد ما إرتفاع المياه في البحيرة وصل 135 متر بدأت المصايب تهل .. إنزلاقات أرضية أكبرها كان إن فيه حتة كبيرة من جبل وقعت فوق دماغ الناس في النهر أدت لموت 24 بني أدم .. الموجة اللي نتجت من سقوط الحتة الكبيرة دي من الجبل في المياه سببت دمار 346 بيت علي ضفاف النهر و غرق 20 سفينة .. و مش بس الإنزلاقات الأرضية .. فيه الزلازل كمان.
بناء علي تقرير طلع من هيئة الزلازل الصينية فإنت من يناير 2000 لحد مايو 2003 حصل 94 زلزال في محيط نهر اليانجتسي .. معلومتين ليك إن نهر اليانجتسي أصلاً من المناطق اللي بتحصل فيها زلازل كتير و إن مايو 2003 هو الشهر اللي بدأ فيه ملي البحيرة الصناعية بتاعة السد .. من يونيو 2003 لحد أغسطس 2020 حصل 3,429 زلزال بزيادة 35% في معدلات الزلازل .. الزيادة الفشيخة دي في معدلات الزلازل كانت هي السبب في ظهور 80 شرخ في جسم السد .. تاني .. ده مش خطأ كتابي .. السد فعلاً ظهر فيه 80 شرخ.
أنا بس حابب أختم بإن المبدأ اللي أي دولة بتبني عليه نيتها إنها تعمل سد علي عيني و علي راسي .. الفيضانات بتأثر علي حياة الناس اللي عايشه علي ضفاف النهر و دي حاجة أنا مقدرها بس إنت محتاج تفهم نقطة .. المشكلة مش في الفيضان .. المشكلة في البني أدمين .. أنا عايز أقولك إن الإتجاه الجديد دلوقتي في الهندسة مش إنك تبني سدود .. أميركا بدأت تهد السدود اللي هي بنتها في السنين اللي فاتت .. ليه؟ .. عشان هم لقوا إن السد لما بيتبني بيمنع حركة هجرة الأسماك .. السمك مش بيهاجر فحيموت .. السمك يموت يعني تلوث .. يعني الناس اللي إنت بنيت السد عشانها هي اللي حتدفع الثمن .. مشكلتك مش في الفيضان .. مشكلتك في إن ضفاف الأنهار هي أكثر المناطق المأهولة بالسكان في العالم و ده لازم يتغير .. الصين بلد عندها 23,841 سد من اللي بيتصنفوا علي إنهم سد كبير يعني الصين لوحدها عندها 41% من إجمالي السدود علي مستوي العالم .. ثاني أكتر بلد عندها سدود هي أميركا اللي معندهاش غير يدوبك 9,263 سد بس .. أرقام تخليك تبص للصين و تسألهم هو أنتوا كان مخكوا فين لما عملتوا كل المصايب دي؟
المصدر:
مقالة بعنوان China’s Three Gorges Dam is One of the Largest Ever Created. Was it Worth it? نشرت في موقع وكالة أنباء CNN و ده لينك المقالة الأصلية:
https://edition.cnn.com/style/article/china-three-gorges-dam-intl-hnk-dst/index.html
