لو إنت بتعمل دايت بس ملاحظ إن وزنك مبيقلش فأنا عايزك تركز شوية معايا في اللي حقوله .. لو إنت برده من الناس اللي بتعمل دايت بس مش بتتمرن ومش بتمارس رياضة بشكل مستمر ولا بتروح جيم ومجرد ماشي علي نظام غذائي فإنت برده محتاج تركز معايا شوية في الكلام اللي حقوله .. لو إنت من الناس اللي بتعك في أكلك وقال يعني عشان تحافظ علي وزنك لما تيجي تشرب حاجة ساقعة بتشربها دايت فإنت برده محتاج تركز شوية في الكلام اللي حيتقال.
كلكوا غالباً بتدخلوا لجسمكوا حاجة إسمها Artificial Sweeteners أو محليات الطعم الصناعية أو خلينا نسميها سكر الدايت .. فيه منكوا مش بيحب سكر الدايت وبيخاف منه عشان هو مقتنع أو عشان حد قاله إن سكر الدايت ده بيجيب سرطان أو لإنك شايف إن السكر الطبيعي هو أحسن حاجة فلما بتشرب كوباية شاي بتحليها بمعلقة عسل نحل .. الحقيقة إن أيا كان رأيك في سكر الدايت أو Artificial Sweeteners فأنا عندي ليكوا خبر حلو وخبر وحش .. الخبر الحلو إن خلاص رأي العلم في سكر الدايت إتحدد بما لا يدع مجال للشك وخلاص العلم أنهي الجدل في الموضوع ده ومبقاش فيه أي داعي للفتي .. الخبر الوحش إن سكر الدايت مش بيخليك تخس ومش بيساعدك إنك تخس.
إنت ممكن يكون الكلام ده صادم بالنسبة ليك بس الحقيقة إن العلماء وخبراء التغذية اللي شغالين علي الموضوع ده كانوا عارفين المعلومة دي من زمان .. فيه علماء قضوا سنين عشان يثبتوا إنك لما تسيب السكر العادي وتروح لسكر الدايت فإنت فعلياً معملتش حاجة .. إنت بالنسبة لك الموضوع صدمة لإن مؤخراً إتعمل ما يسمي Meta-Analysis نشرت نتيجته يوم 17 يوليو اللي فات في مجلة علمية محترمة أوي إسمها Canadian Medical Association Journal .. كلمة Meta-Analysis دي معناها إن فيه فريق من العلماء جمعوا كل الأبحاث العلمية اللي إتعملت في موضوع سكر الدايت وقروهم كلهم لحد ما يوصلوا هل فيه إجماع أو علي الأقل شبه إجماع بين نتائج الدراسات دي كلها علي رأي معين؟ .. في الدراسة اللي إتعملت هم كانوا عايزين يعرفوا هل من كل الدراسات العلمية اللي إتعملت في مجال الArtificial Sweeteners هل فعلاً سكر الدايت بيساعدك إنك تخس؟
عشان هم يجاوبوا علي السؤال ده إكتشفوا مشكلتين:
- المشكلة الأولي إن أغلب الدراسات العلمية اللي إتعملت في الموضوع ده كانت Observational يعني إعتمدت علي قراءات نظرية إنهم يفضلوا يخلوا متطوعين يشربوا مثلاً حاجة ساقعة دايت ويبدأوا يقيسوا وزنهم كل فترة .. النوع ده من الدراسات العلمية مش بيديك دليل علمي قوي تمسكه في إيدك وتحطه قدام أطخن طخين.
- عدد الدراسات العلمية اللي إتعملت لمدد طويلة وتكون بتجمع متطوعين عشوائيين قليل أوي وحتي الدراسات اللي إنطبق عليها الشرط ده كانت ممولة من شركات زي مثلاً شركة بيبسي Pepsi وده في حد ذاته يخليك تقلق من أي نتائج تطلع من دراسة علمية مصروف عليها من شركة بتبيع حاجة ساقعة دايت.
رغم المشكلتين دول إلا إن الMeta-Analysis اللي إتعمل وصل لإستنتاج إن فعلاً سكر الدايت مش بيجيب نتيجة إنك تخس .. مش كده وبس .. فيه دراسات حذرت إن الناس اللي بتسرف في تناول سكر الدايت بتعرض نفسها لخطر إنها يجيلها مشاكل قلبية .. قبل ما تتخض وتقلق وتحلف إنك مش حتشتري سكر دايت تاني فإنت لازم تهدي كده وتركز في 3 حاجات:
- إنت لازم تكون فاهم إن سكر الدايت فكرته إنه يضحك علي جسمك ويخليه يغير طريقة حرقه للسكر .. حضرتك لما بتاكل قطعة جاتوه أو لما بتشرب كوباية عصير مانجة متحلية بسكر دايت جسمك مش بيقدر يميز هو مين اللي معمول بسكر عادي ومين اللي معمول بسكر دايت .. هو كل اللي بيفهمه إن لسانك داق إنك أكلت أو شربت حاجة مسكرة فبيدأ يتعامل مع العصير المتحلي بسكر دايت زيه زي قطعة الجاتوه .. المشكلة لما جسمك يبدأ يفهم إنك بتضحك عليه وإن الحاجة المسكرة اللي لسانك ذاقها مفيهاش سكر أصلاً ومفيهاش سعرات حرارية وفجأة لما تيجي إنت يوم الفري تضربلك طبق كنافة نابلسية جسمك بيجيله حالة من الغباء إنه مبقاش فاهم هو ده سكر حقيقي ولا سكر كده وكده.
- برده إنت لازم تكون فاهم إن مش بس الناس اللي بتعمل دايت هي اللي بتستخدم سكر الدايت .. لو إنت تعرف حد عنده مرض السكر خصوصاً النوع الثاني فهو تقريباً عايش علي سكر الدايت فلما إنت تقرأ رسالة علمية عن تأثير سكر الدايت ممكن اللي عمل الدراسة ميقولكش أصل من ضمن المتطوعين ناس عندها مرض السكر فتلاقيه في النتايج يقولك إن سكر الدايت ده وحش لصحتك ومٌضر لإنه أساساً باني نتائجه علي متطوعين عندهم مرض سكر وهو مقالكش.
- فيه ناس مش بتعمل دايت ومش ماشية علي نظام غذائي وبتعك في أكلها وتلاقيه لما يروح يتغدي يطلب سندوتشين شاورمة وباكت بطاطس ويحلي بطبق كنافة بس أهم حاجة إن الحاجة الساقعة اللي بيبلع بيها تبقي بيبسي دايت .. الناس دي لو دخلتها كمتطوعين في أي دراسة علمية ممكن تبوظلك الدنيا وتديك نتائج غلط وإنت مش عارف .. ناس تانية اللي تلاقيه يقولك أنا عايز أخس بس مش حعمل دايت أنا حروح جيم كل يوم وأتمرن بس تلاقيه بياكل بغباء برده ومش بياكل أكل صحي ومش بيحافظ علي أكله لمجرد إنه شايف بما إنه بيتمرن فده مبرر إنه يعك في الأكل زي ما هو عايز .. لو حضرتك بعد الشغل رحت إتمرنت ساعة في الجيم فمينفعش تقول لنفسك أنا لما أروح أضربلي طبق محشي عشان أعوض المجهود اللي إتعمل .. حضرتك كده إنت مش بتعوض إنت بتخرب الدنيا لإن السعرات الحرارية اللي في طبق المحشي أعلي بكتير من السعرات الحرارية اللي إنت حرقتها في الجيم .. برده الناس دي لو دخلتها معاك كمتطوعين في أي دراسة علمية حيدوك نتايج غلط خالص.
طب إيه الخلاصة بعد كل الهري ده كله؟
بس يا إبن الحلال السكر غلط علي صحتك .. مش معني إنك تقرأ الكلام ده إنك تقول لنفسك بما إن مفيش فرق بين بيبسي الدايت والبيبسي العادية فخليني أشرب بيبسي دايت .. لا يا ظريف الإتنين غلط وياريت تبطل تشرب حاجة ساقعة خالص .. السكر عموماً وخصوصاً السكر المُكرر كل اللي بيعمله إنه بيخلي البنكرياس عندك يفرز كمية أكبر من الأنسولين وده كارثة لإنه بيخليك تدمن السكر زي ما إنت ممكن تدمن الهروين بالضبط .. إنت لو قلت لنفسك أنا أخري حشرب كنزاية بيبسي واحدة بس في اليوم فإنت زيك زي اللي بيقول أنا حشرب سيجارة واحدة بس في اليوم .. فجأة الكنزاية في اليوم بقت كنزاية مع كل وجبة ومع الوقت حتلاقي إن لسانك مبقاش يستطعم أي حاجة مش مسكرة .. وعلي فكرة الكلام ده يمشي علي السكر العادي وسكر الدايت .. فيه دراسة علمية شهيرة أوي جابوا فئران تجارب وخلوهم يدمنوا هروين .. وبعد فترة جابوا للفئران دي طبقين .. طبق فيه شوية هروين وطبق فيه شوية سكر دايت من مادة إسمها ساكارين Saccharin .. صدق أو لا تصدق إن الفئران جرت علي سكر الدايت .. الفئران مدمنة الهروين أدمنت سكر الدايت لدرجة إنها مبقتش تتكيف من الهروين خالص.
البشر مش زي الفئران .. طبيعة جسمنا بتخلينا مش بندمن سكر الدايت زي إدمانا للهروين لإن ببساطة الفاكهة اللي بناكلها فيه نسبة سكر طبيعي .. إنت عشان تقول لنفسك كبني أدم إنك مدمن حاجة سواء كانت أكل معين أو مخدرات أو سجاير أو حتي جنس فالإدمان مع البشر مش بيبقي مجرد إحساس إنك عايز الحاجة قد ما بيكون إنك مبتبقاش قادر تعيش من غير ما تحصل علي الحاجة اللي إنت مدمن عليها .. السكر والكافيين بيشتغلوا علي حاجة في المخ إسمها Positive Reward Loops بمعني إنك لما بتطل سكر أو سجاير بتعاني من أعراض إنسحاب زي ما بيحصل مع مدمن الهروين بالضبط بس بمجرد ما يعدي يوم أو يومين من غير ما تشرب سجاير أو تاكل سكر فإنت خلاص جسمك بيتأقلم وعشان كده إحنا كبشر مش بندمن السكر زي ما الفئران بتدمنه .. صحيح السكر إنت مش بتدمنه بس صدقني مضر لصحتك .. مش بقولك إمنعه بس قلل منه قدر الإمكان وحتشكرني بعدين.
المصدر:
- مقالة بعنوان Sorry, but artificial sweeteners won’t help you lose weight نشرت في Website إسمه Popular Science وده لينك المقالة الأصلية:
http://www.popsci.com.au/gadgets/fitness/sorry-but-artificial-sweeteners-wont-help-you-lose-weight,468607
