لينك التسجيل الصوتي للمقالة علي ساوند كلاود:
https://on.soundcloud.com/Fwuhi
اللي حتكلم عنه النهاردة هو الصورة اللي مفيش حد علي Social Media معملهاش Share و تحتها تعليق يا إما سبحان الله أو إن إزاي القران الكريم مليان إعجازات علمية أو إن ياااااه ده (كريستوفر نولان Christopher Nolan) ده بني أدم عبقري .. اللي حتكلم عنه هو الصورة اللي نشرتها وكالة الفضاء و الطيران القومية الأميريكية اللي إنت عارفها باسم ناسا NASA كأول صورة يقدر البشر يصوروها للثقب الأسود أو Black Hole .. الحقيقة إن الموضوع ده عامل زي سماعة موبايلك لما السلك بتاعها يتكعبل في بعضه و فيه تفاصيل كتير محتاجة تتفك من بعضها و خليني أبدأ معاك بأول حاجة و هي إن حضرتك اللي إنت شايفها دي مش صورة .. دي مش إن حد Photographer عمل Photo-session للثقب الأسود زي اللي بتعملوها قبل الفرح دي .. إنت عشان تصور أي حد بكاميرا فأهم حاجة إن لازم الحد ده يكون قاعد في مكان إضاءته كويسة .. الثقب الأسود من إسمه لونه أسود .. ليه لونه أسود؟ .. عشان مفيش ضوء بيعرف يهرب منه .. تخيل إنك عايز تصور حد في أوضة داهنينها أسود و مفيهاش أي لمبة .. الصورة اللي حضرتك شفتها دي تبقي خلاصة شغل 8 تليسكوبات فضائية ضمن مشروع كبير أوي إسمه Event Horizon Telescope Project و إختصاراً بيتعرف بإسم EHT و حنعرف كمان شوية يطلع إيه المشروع ده بس خليني الأول أفصصلك الموضوع.
ثاني حاجة عايزك تعرفها إن الثقب الأسود اللي إنت شفت صورته ده بعيد حبتين .. هو بسم الله الرحمن الرحيم كده مش معانا في المجرة اللي إحنا عايشين فيها أساساً .. المجرة اللي إحنا فيها إسمها الطريق اللبني أو Milky Way .. الثقب الأسود ده كان في مجرة ثانية إسمها Messier 87 و بعيد عننا مسافة 500 مليون ترليون كيلومتر .. و علي فكرة Messier 87 دي مجرة كبيرة .. كبيرة أوي .. كبيرة خالص .. الناس بتوع NASA قبل كده حاولوا يصوروا ثقب أسود تاني بنفس الطريقة كان موجود في المجرة بتاعتنا بس معرفوش بسبب الحجم إن المجرة بتاعتنا إلي حد ما علي قدها .. الثقب الأسود اللي NASA صورته أقرب وصف له إنه جاحد .. تخيل حفرة قطرها 100 مليار كيلومتر .. دي حفرة ممكن تبلع المجموعة الشمسية كلها و كتلة الحاجات اللي ممكن تتحط في الحفرة دي تعتبر 6.5 مليار مرة من كتلة الشمس .. أرقام صعب تستوعبها أنا عارف.
علي حسب كلام واحد زي (هاينو فالكي Heino Falcke) أستاذ فيزياء الفلك في جامعة إسمها رادبود Radboud في هولندا و اللي ماسك مشروع EHT فاللي إنت شايفه ده عبارة حلقة من النار بحيث إن السواد اللي في النص ده يبقي الثقب الأسود و الضوء ده يبقي غازات درجة حرارتها عالية بشكل إنت ممكن متتخيلوش بتدخل جوه الثقب ده .. الصورة لما طلعت بالشكل ده فهي طلعت زي الحسابات بتاعة (ألبيرت أينشتاين Albert Einstein) و دي نفس الحسابات اللي لما (كريستوفر نولان) عمل فيلم Interstellar الفريق بتاعه تخيل إن ده حيكون شكل الثقب الأسود و ده يفسرلك البوستات اللي إنت شفتها علي Social Media.
نيجي بقي لأهم سؤال .. هو بالصلاة علي النبي كده يطلع إيه الEvent Horizon Project ده؟
إنت محتاج تعرف إن الثقب الأسود من إسمه هو أسود فإنت مبتقدرش تصوره .. ثاني اللي إنت شفته ده مش ثقب أسود .. اللي إنت شفته ده حاجة إسمها Event Horizon و فكك من الإسم لو ترجمته بالعربي أساساً الإسم ده ملوش معني بالإنجليزي هو بس إسم سيكسي عشان كده إختاروه لوصف ظاهرة محدش قادر يستوعبها أوي .. تخيل إن الثقب الأسود ده عبارة عن دوامة زي الدوامة اللي في الساحل الشمالي لما تنزل المياه و يكون الموج عالي حبتين .. فيه مرحلة أثناء لما الدوامة بتشفطك بتتسمي نقطة اللاعودة اللي هي النقطة اللي إنت مهما حاولت تقاوم و مهما حاولت تعوم مش حتعرف تهرب من قوة شد الدوامة ليك .. اللحظة دي بتتسمي Event Horizon إن الجسم أو الضوء أو أي حاجة خلقها ربنا بتوصل لمرحلة إنها مش بتقدر تقاوم قوة الجذب بتاعة الثقب الأسود.
كان فيه عالم الله يرحمه يعني إسمه (ستيفن هوكينج Stephen Hawking) اللي هو الرجل القعيد اللي إتحكت قصة حياته في فيلم The Theory of Everything و لما إتوفي الSocial Media إتملت ببوستات عنه و طلع كمية سف عليه مش طبيعية .. المهم إن الرجل ده وصف اللي بيحصل في لحظة Event Horizon ده بوصف سماه Spaghettification .. عارف إنت المكرونة الإسباجيتي؟ .. أهو الجسم لما بيخش مرحلة Event Horizon بسبب قوة الجذب الرهيبة للثقب الأسود بيتحول لشرايح زي شرايح الأسباجيتي كده .. يمكن عشان الأخ (ستيفن هوكينج ) مش مصري فميعرفش مفرمة اللحمة فإنت تخيل إن الثقب الأسود ده هو المفرمة و حضرتك اللحمة .. لما برميك في المفرمة فإنت مش بتقدر تهرب منها و ده بيتسمي Event Horizon .. لما بتعدي بقي في المفرمة أو الثقب الأسود بتتحول لعيدان لحمة مفرومة .. أهي اللحظة دي هي القوس المضيء اللي حضرتك شفته في الصور .. أتمني تكون فهمت.
مشروع EHT ده بدأ كرسالة دكتوراه كتبها (هاينو فالكي) سنة 1993 .. الرجل كان عنده نظرية بس محدش كان شايف إنها ينفع تُطبق و النظرية دي كانت مبنية علي حاجتين: الحاجة الأولانية إن الثقب الأسود أكيد بيطلع موجات راديو قوية بما يكفي إن تليسكوب فضائي علي الأرض يقدر يلقطها لإن مستحيل جسم أيا كان هو إيه يسخن لدرجة حرارة ممكن توصل مليار درجة مئوية و ميطلعش موجات راديو ينفع تتلقط .. الحاجة الثانية إن كان فيه رأي بيقول إن الثقب الأسود مش كبير أوي زي ما إحنا متخيلين و إن بسبب حتة Event Horizon دي فالثقب الأسود لما بيتصور بيبان أكبر من حجمه الطبيعي زي كده لما بيتقال إن الكاميرا بتكبر من عمر اللي بيتصور.
لأكتر من 20 سنة (هاينو فالكي) بيسعي إنه يقنع جامعات أوروبا كلها بفكرته لحد ما أخيراً مجلس البحث العلمي الأوروبي عطوله 40 مليون جنيه إسترليني عشان يمولوا بيها المشروع .. و هم شغالين إكتشفوا إن عندهم خازوق كبير حبتين و هو إن مفيش تليسكوب واحد جامد بما يكفي إنه يلقط الإشارات اللي الأخ (هاينو فالكي) بيتكلم عنها .. هنا جه واحد تاني إسمه (شيبارد دولمان Shepard Doeleman) شغال في مركز سميثونيان-هارفارد لفيزياء الفلك عشان يبدأ يحط System إزاي يربط 8 تليسكوبات أرضية ببعض بحيث إن كلهم مع بعض يبدأوا يلقطوا الإشارات اللي بتطلع من الثقب الأسود .. التليسكوبات دي متوزعة علي مستوي العالم في مناطق غريبة حبتين يعني متستغربش لما تسمع إن فيه تليسكوب مثلاً علي قمة جبل بركاني في جزيرة هاواي الأميريكية أو فوق قمة جبل في صحراء نيفادا في أميركا أو صحراء سييرا نيفادا في إسبانيا و حتي في القارة القطبية الجنوبية .. حاول تتخيل إن فيه أكتر من 200 عالم و مهندس علي مستوي العالم فضلوا 10 أيام مبيعملوش حاجة غير إنهم يلقطوا في الإشارات اللي جايه من الثقب الأسود لمجرد إن فيه عالم تاني غالباً هم ميعرفهوش ولا قابلوه قبل كده قضي 20 سنة من حياته بيحاول يثبت نظرية حطها في رسالة الدكتوراه بتاعته.
الحمد لله كل تليسكوب سجل القرايات بتاعته و جه الوقت إن القرايات دي كلها تروح للمركزين بتوع التحليل اللي واحد منهم موجود في مدينة بوسطن الأميريكية و الثاني في مدينة بون الألمانية .. هوبا إكتشفوا إن كمية الداتا كبيرة لدرجة إن مينفعش تتنقل بالإنترنت .. زي ما إنت كده تحمل فيلم 20 جيجا من علي التورينت و تحاول تبعته لواحد صاحبك بإنك ترفعه علي موقع رفع زي Mediafire أو WeTransfer و تكتشف إنك محتاج تصبر جنب الفيلم عشان يتحمل أكتر من شهر .. الحل كان إن الداتا دي كلها تتحط علي هاردات و تسافر للمركزين و هناك بقي إكتشفوا أكبر خازوق .. محدش عارف يبدأ منين؟ ولا يحل إيه؟ و لا إيه كمية الداتا دي كلها؟ .. هنا ربنا بعتلهم هدية في السما تجسدت في بنت إسمها (كايتي بومان Katie Bauman) كانت بتحضر دكتوراه في معهد MIT و هي اللي إشتغلت علي برنامج كومبيوتر أو Algorithm زي ما بيتسمي عشان يبدأ هو يفنط الداتا الكتير دي و يحللها لحد ما في الأخر ده تجسد في الصورة اللي حضرتك شفتها علي الإنترنت.
المصادر:
- مقالة بعنوان The first black hole image: what can we really see? .. نشرت في جريدة The Guardian البريطانية وده لينك المقالة الأصلية:
tps://www.theguardian.com/science/2019/apr/14/the-new-black-hole-what-can-we-really-see - مقالة بعنوان First ever black hole image released .. نشرت علي موقع هيئة الإذاعة البريطانية BBC وده لينك المقالة الأصلية:
ttps://www.bbc.com/news/science-environment-47873592
