احنا ناس عندنا ذاكرة اضعف من ذاكرة السمكة (دوري Dori) في فيلم Finding Nemo .. عرفنا في الاعلام ان فيه فيروس عمال ينتشر في الصين و الناس عماله تموت و اسمه فيروس كورونا فنصنا اترعب و النص الثاني قعد يطلع كوميكسات علي ان وزارة الصحة بتاعتنا لا يفرق معاها كورونا ولا كوفرتينا .. المشكلة ان زي ما قلت ان احنا بننسي .. احنا عيشنا نفس ذات الموقف ده مرتين قبل كده .. مره سنة 2003 و مره سنة 2012 بس انت نساي .. المرة الاولانية انت تعرفها باسم سارس SARS و المرة الثانية انت تعرفها باسم ميرس MERS .. شفت بقي انت نساي ازاي؟ .. في حالة ان حالتك صعبة وانت برده مش فاكر ايه اللي حصل في المرتين فخليك معايا شوية عشان الحكاية حتحلو.
كان يا مكان كان فيه حاجة اسمها سارس SARS:
في شتاء 2003 الاخوة في الصين اكتشفوا حاجة غريبة اوي .. فيه ناس عماله تعيا جامد و اعراض المرض لو تعرفها تحس انه دور برد عادي بس جامد حبتين .. ارتفاع في درجات الحرارة .. رعشة برد .. صداع .. جفاف .. شوية و دور البرد يقلب لحالة ارتهاب رئوي حاد لدرجة تحسسك ان فيروس البرد زي ما يكون ماسك مدفع رشاش و عمال يخرتق في رئة العيان لحد ما يموت .. مش كده وبس .. الدكاترة الصينيين قالوا ان اذا كان في المعتاد يعني انا لا قدر الله لو جالي دور انفلونزا جامد شوية فانا اخري يعني اني اعدي 3 بني ادمين .. في حالة الفيروس الغريب ده لقوا ان فيه ناس بيتصنفوا Superspreader اللي هو حد عيان ممكن يعدي اكتر من 12 بني ادم بعطسة واحدة .. الصينيين سموا الفيروس ده Severe Acute Respiratory Syndrome او SARS اختصارا و لمدة 7 شهور من اول ما ظهر لحد ما اختفي قدر يصيب 8,000 بني ادم قتل منهم 800 علي مستوي 32 دولة .. فضل السؤال اللي لاحس دماغ الدكاترة .. هو فيه ايه؟
بعد شوية مذاكرة الدكاترة لقوا ان فيروس SARS ده بعيد عنك بيتصنف انه من عيلة فيروسات بتتسمي زونوتيك Zoonotic يعني دي فيروسات بتتخلق في الحيوانات قبل ما تنتقل للبشر .. حلو .. عيلة فيروسات Zoonotic دي تعتبر من اشرس الفيروسات اللي اتخلقت واللي من ضمنهم مثلا فيروس نقص المناعة المكتسبة اللي انت عارفه باسم الايدز او HIV .. من ضمنهم فيروس الايبولا Ebola .. من ضمنهم H5N1 Influenza اللي انت عارفها باسم انفلونزا الطيور .. اتخضيت ولا لسه؟ .. بس برده ايه علاقة ده بSARS؟ .. بشوية تدوير لقوا ان 40% من الحالات الاولانية خالص اللي اتصابت بالفيروس كانوا ناس شغالين في بيزنس الاكل خصوصا اعداد الاكلات و ذبح الحيوانات البرية اللي المطبخ الصيني مشهور بيها .. الناس اتصدمت انهم لما راجعوا هو مين اتصاب بالفيروس؟ لقوا ان نسبة كبيرة منهم ناس يا شغالة يا عايشة جنب سوق اكل .. برده ايه المشكلة؟ .. بعد اربع شهور من ظهور حالات SARS في اوائل 2003 فيه شوية دكاترة من هونج كونج خدوا عينات دم من شوية حيوانات انا لو قلتلك اساميهم دلوقتي حتتخفض .. الراكوون زي شخصية روكيت في سلسلة Guardians of the Galaxy .. حيوان تاني اسمه زباد النخيل الاسيوي او Palm Civets .. حيوان تالت اسمه الغرير او Badgers ودي كلها حيوانات لو بصيت علي صورها حتلاقيها من القوارض يعني من نفس العيلة اللي بتنتمي ليها الفيران .. الدكاترة لقوا ان الحيوانات دي كلها بيجري في دمها فيروس SARS وده كان اول دليل علي ان فيروس SARS ممكن تلاقيه في الحيوانات مش بس البشر .. انت ممكن تسال نفسك طب مين جه الاول الكتكوت ولا الفرخة؟ .. مين عدي مين الاول؟ البني ادمين عدوا الحيوانات ولا الحيوانات هي اللي عدت البني ادمين؟ .. الحقيقة ان الاجابة كانت صدمة للكل و اللي طلعت سنة 2005 علي ايد فريق من الدكاتره بقيادة واحدة اسمها (زينج لي شي Zheng-Li Shi) من معهد ووهان للفيروسات .. ايوه ووهان اللي ظهر فيها الفيروس الجديد و الدنيا حتبدأ تربط في بعضها بدايه من دلوقتي.
الفريق بتاع الاخت (زينج) لقوا ان فيه طرف ثالث هو اللي عدي الحيوانات و بعد كده عدوي SARS اتنقلت للبشر .. الطرف الثالث كان فصيلة من الخفافيش اسمها خفاش حدوة الحصان Rhinolophus Horseshoe Bat .. الدكاترة جاتلهم صدمة لما اكتشفوا ان الخفافيش بيجري في دمهم فيروس SARS مش بس في اسيا انما في افريقيا و اوروبا بقالهم سنين .. مش كده وبس .. فيروس SARS بينتمي لعيلة من الفيروسات اسمها كورونافيروس Coronavirus و العيلة دي المصدر بتاعها اللي نقله لباقي المخلوقات كان الخفافيش.
غالبا اللي حصل كان كالاتي .. الخفافيش كائنات بطبيعتها مش نظيفة و بتعمل بيبي علي اي حاجة و بتاكل الحاجة بالبيبي بتاعها عادي جدا .. فيه خفاش غالبا عمل بيبي علي ثمرة فاكهة و الثمرة دي وقعت .. فيه حيوان حظه زي الزفت وليكن راكون اكل التفاحة دي .. الراكون اللي اكل التفاحة اتمسك علي ايد شوية صيادين و اتباع لمحل بيع اكل في الصين و هناك هو اتدبح و اتطبخ و الفيروس اتنقل للبني ادمين .. زي ما انت شايف حالة SARS دي من الحالات اللي تقدر تقول عليها اتجمع المنحوس علي خايب الرجا .. فيه ملايين الخفافيش اللي بتعمل بيبي علي الاكل بتاعها بقالهم الاف السنين و ملايين الحيوانات بتاكل ثمر الفاكهة اللي غالبا برده الخفافيش عامله عليه بيبي و مفيش حاجه حصلت .. ان فيروس من فيروسات عيلة الكورونا تحصله الطفرة الجينية اللي تخليه ينتقل من الحيوانات للبشر بتبقي حاجه في غاية الندرة و مبتحصلش كتير .. خلال الفترة اللي SARS ظهر فيها هو اصاب 8,098 بني ادم قتل منهم 774 علي مستوي العالم .. دي كانت حكاية SARS .. حكاية MERS بقي انيل.
فاكر لما موسم الحج اتضرب بسبب MERS؟
سنة 2012 فعليا موسم الحج في السعودية اتضرب بسبب فيروس يعتبر ابن عم SARS اسمه Middle East Respiratory Syndrome اللي اختصارا بيتسمي ميرس MERS .. سبب اني قلت علي MERS انه يبقي ابن عم SARS ان الاتنين فيروسات من عيله Zoonotic يعني في الاصل اتخلقوا في اجساد الحيوانات و بعد كده انتقلوا للبشر .. و الاتنين من عيله كورونا يعني فيروسات بتضرب الجهاز التنفسي ومن اعراضها ان المريض بيجيله التهاب رئوي حاد .. الاتنين كمان مصدرهم الاساسي كان الخفافيش .. بس الفرق كان هو الكوبري .. الفرق كان مين الحيوان اللي الفيروس خده كوبري عشان يعدي من الخفافيش للبني ادمين .. في حالة SARS كان حيوان من القوارض زي الراكون مثلا .. في حالة MERS الحيوان ده كان الجمل .. في 2012 كان فيه مواطن سعودي مربي 4 جمال في حظيرة جنب بيته ومنه الفيروس انتشر .. علي فكرة فيروس MERS لما جم يدوروا علي اصله لقوه موجود في الجمال في السعودية من 1993 ومحدش كان حاسس بيه .. عارف ليه؟ .. عشان فيروسات كورونا زي ما قلتلك من النادر انها تنتقل للبشر .. يا مؤمن دول السعوديين لما الفيروس انتشر وبقت مصيبة سودا عملوا حملات علي مذابح الجمال و لقوا ان فيه لحمة جمال بتتعبي في كياس وكانت رايحة تتطبخ للحجاج وكان فيها فيروس MERS .. و متفتكرش ان المشكلة في السعوديين .. السعودية عشان تكفي احتياجات الاكل بتوع حجاج بيت الله كل سنة بتستورد كميات ضخمة من لحم الجمال من دول مختلفة زي اثيوبيا و كينيا و تونس و نيجيريا و مصر .. احتمال اي جمل فيهم يكون اتنقله الفيروس من اي خفاش و كمل معاه لحد ما جه السعودية.
اذا كان SARS ظهر واختفي خلال سنة فMERS كمل معانا شوية .. هو ظهر في 2012 و فضلت فيه حالات منه بتظهر لحد سنة 2017 .. لحد دلوقتي MERS اصاب 2,495 بني ادم قتل منهم 858 .. بس سواء SARS او MERS ملهمش اي ادوية مضادة و حكاية ان مفيش ادوية مضادة للفيروسات من عيلة كورونا دي بالذات حتخليني اتكلم شويه عن اللي بيحصل في الصين دلوقتي.
يوم 31 ديسمبر 2019 اترصدت اول حالات للفيروس الجديد في مدينة اسمها ووهان Wuhan في جنوب الصين عايش فيها حوالي 11 مليون بني ادم .. فيه ناس كتير دخلت المستشفي وعندهم اعراض شبه الاعراض اللي بتشوفها في حالات الالتهاب الرئوي الحاد .. بدأوا يشوفوا هي الناس دي عايشة فين؟ او شغالة فين؟ اكتشفوا انهم عايشين و شغالين في سوق سمك .. لما الخبر اتعرف وكالة انباء CNN نشرت شوية فيديوهات بتثبت ان السوق ده مش مجرد سوق سمك ده سوق بتتباع فيه و بتتدبح و بتتطبخ حيوانات برية من ضمنها الراكوون و الغزلان بعد ما بيتحطوا مع بعض في اقفاص صغيرة .. بدأت تفهم المشكلة فين اظن .. الفيروس الجديد اللي احنا بنسميه بنوع من الكسل كورونا فيروس فاسمه بالكامل nCov-2019 اللي دلوقتي بقي Covid-19 .. اسم عبيط انا عارف تحسه Password الفيسبوك بتاعة حد بس هو الحقيقة اختصار Novel Coronavirus of 2019 .. اللي انا عايز اقف قدامه شوية هو ازاي ده حصل؟ .. الصينيين خدوا علي قفاهم بسبب SARS و اقتصادهم اتعور جامد فطبيعي انهم ياخدوا احتياطاتهم ان اللي حصل ده ميتكررش تاني .. عشان كده انت لازم تفهم ازاي الفيروس ده ظهر؟ .. عشان تفهم ده انا لازم ارجعك للست (زينج) فاكرها؟ .. دي الست اللي الفريق بتاعها في 2005 اثبت ان فيروس SARS و كل فيروسات كورونا بدات في الاساس في الخفافيش و انتقلت للحيوانات و بعد كده انتقلت للبشر .. الست دي من 2017 وهي بتصوت ان يا جدعان فيه مصيبة جاية بس محدش مصدقها .. و دلوقتي الكل بقي بيسمعها.
بعد ظهور فيروس MERS في 2012 فالاخت (زينج) و الفريق بتاعها قعدوا يشتغلوا خمس سنين كاملة بياخدوا عينات من بيبي الخفافيش اللي عايشه في كهف اسمه يونان Yunnan جنب منطقة ظهور اول حالات اصابة بSARS .. سنة 2017 اتنشرت دراسة علمية فيها نتايج البحث ده والخلاصة انهم لقوا شكل جديد من فيروس SARS موجود في 4 فصائل مختلفة من الخفافيش مش بس فصيلة معينة زي ما حصل مع SARS .. صدق او لا تصدق ان الفيروس اللي اكتشفته (زينج) نسبة الشبه بينه و بين الفيروس اللي طايح في الصين دلوقتي وصلت 96% .. مش كده و بس .. الفريق خد عينات دم من 24,000 بني ادم عايشين في منطقة كهف يونان و لقوا ان 3% منهم دمهم فيه اجسام مضادة لفيروس كورونا .. خد نفس عميق كده و اهدي و حاول تستوعب ان فيه دكتورة من 2017 وهي بتقول ان فيه فيروس جديد ظهر و حيفرقع في وشنا و محدش سمع كلامها و لا عبرها .. الفريق بتاع الدكتورة (زينج) هو اللي قدر يعزل الفيروس الجديد وهم اللي سموه باسمه الغريب ده .. استهبال الحكومة الصينية موقفش لحد كده .. هم مش بس مسعموش كلام (زينج) و الفريق بتاعها اللي من 2017 وهم بيحذروا من المصيبة انما كمان لما المصيبة حصلت هم مارسوا هوايتهم المفضلة وهي الكذب .. مهم تكون فاهم ان مع ظهور اول حالات لفيروس nCov-2019 العالم كان عنده شوية معلومات:
- معلومة رقم واحد وهي ان الفيروس ظهر لاول مرة في سوق سمك في مدينة ووهان.
- معلومة رقم اتنين ان Patient Zero او اول اصابه للفيروس كان رجل اتقال انه اتشخص بالفيروس يوم 31 ديسمبر بس كان بيعاني من اعراضه بقبلها باسبوعين يعني بتتكلم عن 12 ديسمبر.
- خلال الحالات الاولي من الفيروس مكنش لسه الفيروس عرف ينتقل بين البشر .. الفيروس كان بيصيب البشر من تعاملهم المباشر مع الحيوانات في السوق.
المعلومات دي صحيح تخض بس مش لدرجة تخليك تجيب اللي في بطنك من الخوف .. لحد دلوقتي الفيروس تحت السيطرة و بشوية شغل صغيرين الفيروس ده حيختفي خالص .. فجأة الدنيا خربت .. فجأة عدد المصابين نط من 2,800 بقي حوالي 4,500 و دلوقتي بقوا 17,200 اغلبهم جوه الصين مع وجود 140 حالة بره الصين .. لحد دلوقتي ماتت 362 حالة منهم واحدة في الفلبين و الباقي كله في الصين .. وده خلي دكاتره تسال نفسها هو ازاي ده حصل؟ .. فيه شوية دكاترة من ووهان اللي هي المدينة الصينية اللي طلع منها الفيروس كتبوا دراسة علمية اتنشرت يوم 24 يناير 2019 في مجلة علمية اسمها Lancet قالوا ان السبب ورا ان الحالات فرقعت اوي كده بعد ما كان بيتقال ان الوضع تحت السيطرة ان الصين خبت معلومات كتير عن بداية ظهور الفيروس .. فاكر النقط الثلاثة اللي انا رصتهم ليك علي اساس ان دي كانت المعلومات المتاحة عن الفيروس و اللي وزارات الصحة علي مستوي العالم اشتغلت عليها؟ .. كل النقط دي طلعت غلط و ان الوضع اسوأ من اللي الصينيين رسموه .. بس قبل ما اطلع الصينيين كدابين انت لازم تفهم هم الدكاترة دول كتبوا الدراسة بتاعتهم علي اي اساس.
الدكاترة دول جابوا التشخصيات و نتايج التحاليل و صور الاشعة المقطعية بتاعة اول 41 بني ادم اتصابوا بالفيروس في مدينة ووهان ومن فحص التقارير دي كلها بدأوا يرسموا صورة تانية خالص عن حقيقة فيروس nCov-2019 مختلفة عن اللي الحكومة الصينية رسمتها:
- معلومة رقم واحد .. اكتر من 30% من الحالات الاولي للفيروس مكنش ليهم علاقة اصلا بسوق السمك في ووهان .. الحكومة الصينية قالت ان اول حالة لظهور الفيروس اترصدت يوم 31 ديسمبر بس الحقيقة ان كان قبله فيه حالات كتير فشخ .. اول حالة فعليا اترصدت يوم 1 ديسمبر .. يوم 23 ديسمبر كان فيه 8 حالات مرة واحدة .. مش بس كده .. الفيروس كان بدا ينتقل بين البشر بدري اوي عن المعاد اللي الصين قالت عليه .. من ال41 حالة اللي الدكاترة راجعوها منهم 27 حالة مكنش ليهم اي علاقة اصلا بسوق السمك في ووهان.
- معلومة رقم اتنين ودي المعلومة اللي فعلا حتخيك تخاف .. اول حالة تترصد باصاباتها بفيروس nCov-2019 اللي كانت بتاريخ 1 ديسمبر مش 31 زي ما الحكومة الصينية قالت اساسا مكنش له علاقة بسوق السمك في ووهان .. عارف ده معناه ايه .. ان اول حالة ورقه موجود عند الصين فعليا مش هو Patient Zero وده بيؤكد نظرية دكتورة (زينج) اللي قلتها من بدري .. الفيروس ده معشش في الصين بقاله اكتر من سنتين .. فعليا انت عندك احتمالين اسوأ من بعض .. ان يكون اول اصابة ده اللي بتاريخ 1 ديسمبر اتعدي بشكل مباشر من حيوان بس في الحالة دي حيكون اتعدي من سوق اكل غير سوق ووهان لان زي ما قلتلك اول حالة ده طلع مهوبش ناحية سوق السمك بتاع ووهان اصلا و دي تبقي مصيبة اننا قاعدين نركز علي ووهان ومش علي السوق الاصلي اللي احنا مش عارفين هو ايه؟ .. او ان يكون اول اصابة اتعدي من بني ادم تاني محدش عارفه و دي تبقي مصيبة اكبر لان اللي عداه اكيد اتعرض لحيوان هو الحامل الاساسي للفيروس واحنا لاعارفين البني ادم ولا الحيوان .. شوية و عرفنا ان الاحتمال الثاني هو اللي كان صح .. Patient Zero كان رجل عنده 55 سنة اتصاب بالفيروس يوم 17 نوفمبر يعني حتي بدري اوي عن معاد واحد ديسمبر.
- معلومة رقم تلاتة .. اول حالة مؤكدة لنقل العدوي بين البشر كانت حوالي يوم 9 يناير وده بدري اوي عن التقديرات الرسمية بتاعة الحكومة الصينية اللي قالت ان اول حالة انتقال للفيروس بين البشر كانت يوم 20 يناير .. اللي حصل ان يوم 9 يناير ده حصلت اول وفاة لحد اتصاب بالفيروس .. لما كشفوا علي مراته لقوها هي كمان مصابه بالفيروس مع انها مراحتش سوق ووهان.
- معلومة رقم اربعة .. انسي خالص الكلام اللي بتسمعه من الحكومة الصينية ان اغلب ضحايا الفيروس ناس كبيره في السن او ناس عندها امراض مزمنة اثرت علي كفاءة الجهاز المناعي بتاعها .. اغلب الحالات اللي دخلت المستشفيات او اللي اتحطت في العناية المركزة اعمارهم من 64 سنة و انت نازل .. اكتر من 50% من المرضي اللي اتحطوا في العناية المركزة اعمارهم بتتراوح ما بين 25-49 سنة .. حوالي 30% من المصابين دول كلهم بس عندهم امراض مزمنة.
الحقيقة ان انا مش عايز ابان اني مفتري و متحامل و جاي ع الصين اوي .. فيه تفسيرات كتير توريك ليه الكلام الرسمي اللي طلع من الحكومة الصينية مختلف كتير عن التقرير بتاعة الدكاترة اللي كتبوا الدراسة اللي اتكلمت عنها؟ .. فيه اسباب تخليك تعذر الحكومة الصينية و فيه اسباب تانية تخليك بتشد في شعرك و فعليا انت ممكن تصدق اي مبرر فيهم علي حسب هو انت قاعد في مدرجات مين .. لو انت قاعد في مدرجات تشجيع الحكومة الصينية فانت ممكن بسهولة اوي تقول ان رصد الحالات الاولي لاي فيروس جديد عامله زي بالضبط لما تلعب Ligo او تجمع Puzzle وانت قاعد في اوضة ظلمة ومن غير ما يبقي معاك شمعة حتي .. كتير ممكن تفترض حاجات و تطلع غلط .. حصلت مع الامريكان نفسهم في تعاملهم مع فيروسي الايدز و الايبولا فمحدش يلوم الصين و حكومتها علي انها بتحاول لان بلد تانية معهاش موارد و قدرات الصين اكيد كان الموضوع خرج عن سيطرتها بشكل اسرع من كده وانا من موقعي هذا بقول بصوت (فؤاد المهندس) الله يرحمه في مسرحية سك علي بناتك .. علي يدي .. علي الناحية الثانية انت لو قاعد في مدرجات الناس اللي بتشتم الصين فانت ممكن تلوم الروتين البطيء فشخ اللي الحكومة الصينية بتتعامل به .. لو انا دكتور شاب رصدت حاجة معينة و كتبت تقرير ممكن ينقذ ارواح ناس بس التقرير بتاعي ده معجبش رئيس الحي اللي الحكومة معيناه فغالبا مش بس تقريري مش حيشوف النور ده انا شخصيا مش حشوف اهلي تاني .. اهم سلاح في ايد اي حكومة عشان تتعامل مع كارثة صحية زي فيروس هو الشفافية و سرعه اتخاذ القرار .. اللي عنده فكرة يقولها ولو كويسة حتتسمع و تتطبق .. في ظل جو روح لمداف (عفاف) في الدور الرابع امضيها و تعالي اللي عايشه فيه الحكومة الصينية فلو حصل و ظهر اي فيروس عندهم فالدنيا بتمشي ببطيء فشيخ رغم ان التعامل مع الفيروسات هو فعليا سباق سرعه مع الزمن .. الدقيقة بتفرق .. لو حتصدق مثلا الرواية الحكومية ان اول حالة ظهور للفيروس كانت يوم 31 ديسمبر مش 1 ديسمبر فاول ظهور للرئيس الصيني (جي جينبيج Xi Jinping) علي التليفيزيون عشان يتكلمم ع الامة الصينية كان يوم 20 يناير اللي هو حاجة تحسسك انك بتتفرج علي الكوميكسات اللي بتتريق علي ويندوز انترنت اكسبلورير.
دي كانت حكاية فيروس nCov-2019 .. الوضع سيء و مرشح انه يبقي اسوأ ويمكن رحمة ربنا بينا هي اللي ممكن تلحقنا .. فيه ناس حتتكلم ان السبب هو العادات الغذائية عند الاخوة بتوع جنوب شرق اسيا .. دكتور (احمد خالد توفيق) الله يرحمه كان اتكلم كتير عن تربية الخنازير مع الفراخ مع المواشي في حتة واحدة وان ده قنبلة فيروسات موقوتة ممكن تفرقع في اي لحظة .. ممكن حد تاني يقول طب ما انت الفيروس زي ما انت قلت ظهر اساسا في الخفافيش يبقي الناس دي احنا ظالمينها .. رايي الشخصي ان كل اللي يعجبك و البس اللي يعجبك برده و يولع راي الناس بس في نفس الوقت لو حنتكلم في ارواح ناس يبقي تسيب السياسة علي جنب .. مشكلتي مع رد فعل الحكومة الصينية .. فكرة ان الدنيا حلوة و الخير كتير و السكر كتير و الرز كتير دي تقولها لو انت قلقان من مظاهرات بس لو بنتكلم في ارواح ناس مش بس في بلدك انما في بلاد تانية يبقي نحترم نفسنا و نبقي صرحا مع خلق الله.
المصادر:
مقاله بعنوان New coronavirus can spread between humans- but it started in a wildlife market نشرت في مجله National Geographic وده لينك المقاله الاصليه:
https://www.nationalgeographic.com/science/2020/01/new-coronavirus-spreading-between-humans-how-it-started/
مقاله بعنوان We made the coronavirus epidemic نشرت في جريده The New York Times وده لينك المقاله الاصليه:
s://www.nytimes.com/2020/01/28/opinion/coronavirus-china.html
مقاله بعنوان Did China downplay the coronavirus outbreak early on? نشرت في موقع Vox وده لينك المقاله الاصليه:
http://avirus-outbreak-wuhan-china-early-on-lancet
