الواد الحليوة الأسمراني الأمور اللي عندك في الصورة ده يبقي عبقال عندكوا مهندس من دولة في أفريقيا إسمها أوغندا إسمه (بريان جيتا Brian Gitta) .. الواد ده عنده 24 سنة و من فترة قريبة كسب جايزة قيمتها 33,000 دولار لإنه إخترع جهاز سماه (ماتيبابو Matibabu) و دي كلمة باللغة السواحيلي معناها العلاج .. و في حالة إنك متعرفش فاللغة السواحيلي هي اللغة اللي بيتكلم بيها الأفارقة اللي عايشين علي الساحل الغربي لأفريقيا .. البتاع اللي إسمه (ماتيبابو) ده بيكشف عليك هل إنت مصاب بالملاريا ولا لا من غير ما ياخد منك عينة دم .. خلينا نبقي نرجع كام خطوة لورا و نعلمك كام حاجة عشان تفهم الواد ده عمل إيه بالضبط.
لو إنت بعد الشر عليك أصبت بالملاريا فاللي بيحصل إن المرض بيعيد تشكيل كرات الدم الحمراء و عشان كده زمان لو إنت شكيت إنك أصبت بالملاريا بتروح لأي مستشفي أو صيدلية بياخدوا منك عينة دم صغيرة و بيحللوها .. الفكرة اللي بيقدمها الإختراع اللي إسمه (ماتيبابو) إن المريض بيحط صباعه علي شاشة و الشاشة دي شغالة بإنك دمجت فكرتي الليزر و المغناطيسية مع بعض في الخلاط بحيث إن فيه شعاع ليزر بيعمل Scan لصباعك عشان يدور علي أي تغيير في اللون أو الشكل أو التركيز في كرات الدم الحمرا اللي في الدم اللي بيجري في صباعك .. عشان تعرف النتيجة مش بتحتاج غير أكتر من دقيقة و بتقدر تعرفها عن طريق App بتعمله Install علي أي Smartphone .. أنا بس عايزك تستوعب الواد اللي إسمه (بريان جيتا) ده عمل إيه .. هو عملك طريقة إنك تكشف علي واحد من أسوأ الأمراض الموجودة علي الأرض بحيث الطريقة دي رخيصة و تقدر تستخدمها كذا مرة مش زي الإبرة اللي بتترمي بعد مرة إستخدام واحدة و كمان الطريقة دي بيسموها Non-Invasive يعني مش بتخترق جلدك و مش بتنزل دم و ده بيخلي (ماتيبابو) يقدر أي حد يستخدمها حتي لو بتتكلم عن بني أدم مش دكتور ولا صيدلي ولا تمرجي حتي.
شوية معلومات سريعة عن الملاريا عشان تعرف قد إيه المرض ده كابوس مرعب و أفريقيا مش عارفه تفوق منه:
- مرض الملاريا واقف علي دول أفريقيا بحوالي 1.3% من إجمالي الدخل القومي بتاعهم.
- أغلب ضحايا المرض في أفريقيا بيكونوا أطفال أقل من خمس سنين.
- بناء علي إحصائيات اليونيسيف فالمرض إبن الكلب ده بيصيب سنوياً ما بين 300-600 مليون بني أدم و ده رقم خزعبلي .. حط الرقم ده جنب معلومة إن 580,000 بني أدم و دول بيمثلوا 90% من اللي بيموتوا سنوياً من الملاريا عايشين في أفرييقيا في الدول اللي هي جنوب الصحراء الكبري .. تقريبا الملاريا عاملة زي مراتك اللي منكده عليك عيشتك و إنت مش عارف لا تطلقها ولا عارف تعيش حياتك سعيد في وجودها.
علي فكرة دي الأرقام بعد ما الدنيا خفت شوية .. حضرتك من بداية القرن ال21 نسبة الوفيات بسبب الملاريا في أفريقيا قلت بنسبة عدت ال66% يعني الوضع اللي أنا رصيتهولك في الكام نقطة اللي فاتوا كان فيه أسود و أنيل منه زمان .. حالياً فيه دولتين في أفريقيا اللي هم المغرب و مصر أعلنوا رسمياً إنهم تخلصوا من المرض ده و فيه 6 دول تانية هي جنوب أفريقيا و إيستواني و بوتسوانا و جزر القمر و الجزائر و كيب فيردي حاطين لنفسهم إنهم علي سنة 2020 هم كمان حيكونوا تخلصوا خالص من المرض.
اللي أنا عايز أوصله ليك إن خلال السنين اللي فاتت فيه شغل كتير أوي إتعمل من علماء و مهندسين أفارقة عشان يطهروا قارتهم من المرض اللعين ده و الشغل ده محدش حاسس بيه علي الأقل عندنا في مصر .. يعني عندك مثلاً سنة 2015 فيه مجموعة دكاترة نيجيريين قدروا يعملوا طريقة للكشف عن الإصابة بالملاريا عن طريق عينة بول مش عينة دم .. ناس تانية في جامعة كيب تاون في جنوب أفريقيا لقوا طريقة إزاي يمنعوا أي مريض إتصاب بالملاريا إنه يعدي حد تاني .. في بوركينا فاسو اللي إحنا منعرفش عنهم حاجة غير إننا كسبناهم 2-0 في كأس أمم أفريقيا 1998 فيه فريق من المهندسين هناك إخترع صابونة معموله من الأعشاب الطبيعية و ليها القدرة علي إنها تطرد الناموس و الباعوض اللي يعتبر أكتر كائن حي بينقل مرض الملاريا .. فيه منطقة اسمها زانزابير إتعملت فيه حاجة جديدة أوي إن شوية مهندسين إستخدموا طيارات بدون طيار Drones عشان يقدروا يرسموا خريطة لإنتقال الناموس و الباعوض بحيث طيارات الرش تقدر تصطادهم بمبيدات حشرية بدقة أعلي بكتير .. أنا بس عايزك تتخيل إني جيت قلتلك إن شوية شباب في كلية هندسة عاملين مشروع تخرج عشان يعملوا Drone تفضل تراقب إنتقال أسراب الناموس و أنا متؤكد إن أول حاجة حتفكر فيها هي إزاي تتريق عليهم .. ده الفرق بين مشاكلنا في مصر و مشاكل أفريقيا .. لا إحنا حاسين بيهم ولا هم شايفينا عايشين معاهم في نفس القارة.
الأمم المتحدة كان عندها أمل إن لما تيجي سنة 2030 يكون مرض الملاريا ده إختفي خالص من علي الأرض بس للأسف الهدف ده عمال يتأخر لإن الملاريا هو كائن طفيلي قدر إنه يكتسب مناعة ضد المضادات الحيوية و الأمصال اللي بتستخدم ضده لإن كتير أوي من الأمصال اللي بتستخدم في أفريقيا مغشوشة و متقلدة.
المصدر:
مقالة بعنوان A bloodless malaria test by a young Ugandan inventor won Africa’s topengineering prize يعني إختبار من غير أخد عينة دم عمله مخترع أوغندي كسب أكبر جايزة هندسية في أفريقيا إتنشرت علي موقع إسمه Quartz و ده لينك المقالة الأصلية:
https://qz.com/africa/1307524/malaria-bloodless-test-by-uganda-engineer-wins-africa-engineering-prize/
