لو إنت من الناس اللي حاطه أنظمة الدايت في دماغها وفي الSearch عندك علي Facebook أول صفحة معمولها Save هي سفاح الفات و Health Keepers يبقي إنت أكيد سمعت عن حاجة إسمها Military Diet أو الدايت العسكري .. لو إنت من الناس اللي أول مرة تسمع الإسم ده يبقي إنت لقطة تعالي بقي معايا أعرفك علي نظام دايت اللي عملوه بيقولوا عليه أحسن نظام دايت إتعمل لحد دلوقتي والحقيقة إنت سهل أوي تفهم هم ليه بيقولوا عليه كده .. مبدأياً هو سريع فشخ لإنك في إسبوع واحد ممكن تخس 4.5 كيلوجرام وده في حد ذاته مش إختراع بالمناسبة .. أي نظام دايت في الدنيا بيعتمد إنه بيخليك تقلل من كمية الكربوهيدرات اللي بتاكلها وده بيسمع في عدد السعرات الحرارية اللي بتدخلك يومياً ولما ده بيحصل نسبة الجلايكوجين Glycogen في جسمك بتقل وبالتالي نسبة المياه في جسمك بتقل .. في أول أسبوع دايت أيا كان إنت ماشي علي دايت إيه بتلاقي نفسك عمال تخش الحمام كتير .. فالأربعة ونص كيلوجرام دول مش شرط يبقوا دهون وغالباً بيكونوا مياه فإنت بتلاقي لما بتقف علي الميزان بتلاقي نفسك خاسس .. تبص في المراية تلاقي نفسك زي ما إنت .. حاجة كمان إن نظام الدايت ده رخيص ومش مكلف ومش محتاج إنك تتابع مع دكتور تخسيس عشان تطبقه .. اللي إنت محتاج تطلع بيه من المقالة دي هو حاجتين: أول حاجة إنك تفهم يعني إيه دايت عسكري؟ وبيتعمل إزاي؟ .. تاني حاجة إنك تفهم هل نظام الدايت ده مناسب ليك ولا لا عشان متلبسش في الحيط لما تقول لنفسك أنا حطبقه من بكره.
أظن السؤال الأولاني هو .. يطلع إيه الMilitary Diet ده يا سي دوني؟
فيه ناس بتسميه Military Diet وفيه ناس بتسميه Three Day Diet وفيه ناس بتسميها دايت القوات البحرية ودايت القوات البرية وفيه ناس بتسميه دايت الأيس كريم وحتفهم هم ليه بيسموه كده كمان شوية بس مش حتفرق هو اسمه إيه إياكش حتي إسمه يبقي (وائل) .. اللي بيدافعوا عن نظام الدايت ده بيقولوا إن اللي عمله هم دكاتره التغذية في القوات المسلحة الأميريكية عشان لو حضرتك إتطوعت عندهم في الجيش لإن معندهومش تجنيد إجباري وخدوك معسكر تدريب 45 يوم لقوا وزن سيادتك ممكن يوقع الطيارة الهليكوبتر اللي إنت حتركبها فبيضطروا إنهم يحطوك علي نظام دايت قاسي حبتين عشان توصل للوزن المناسب في أقل وقت ممكن .. الحقيقة إن الحكاية دي هبد لإن فعلياً القوات المسلحة الأميريكية لما إتقالها هو إنتي اللي عملتي نظام الدايت ده قالت عليا الطلاق كدب .. بس فكك من مين اللي إخترع النظام ده أو إسمه إيه .. خليني أركز علي نقطة هو بيشتغل إزاي؟
الأسبوع 7 أيام والنظام ده متقسم مرحلتين .. المرحلة الأولانية هي أول 3 أيام في الأسبوع والمرحلة الثانية هي الأربع أيام اللي فاضلين .. خلال المرحلة الأولانية إنت حتمشي علي نظام دايت قاسي وصارم حيتحددلك فيه تاكل إيه ومتاكلش إيه وبكميات قد إيه ومينفعش تعك ومينفعش تاكل سناكس بين الوجبات .. الدايت في أول 3 أيام متحدد علي أساس إنك تدخل لجسمك يومياً ما بين 1,100 و 1,400 سعر حراري بس .. لو ربنا قدرك وعرفت تكمل أول 3 أيام فإنت كده عديت مرحلة الوحش لإن الأربع أيام اللي فاضلين مش حقولك إنهم فري بس إنت المفروض تاكل أكل صحي ومتعكش أوي في الأكل .. لو حبيت إنت تقدر تكرر الأسبوع ده تاني لحد ما توصل للوزن اللي إنت عايزه .. من النقاط المهمة إن المياه مهم تشرب منها علي قد ما تقدر .. مفيش قيود علي كميات الشاي والقهوة طالما بتشربها من غير سكر .. أكلك أول 3 أيام حيبقي كالأتي:
اليوم الأول .. المفروض إنك تدخل لجسمك 1400 سعر حراري بس:
الفطار.. بيكون شريحة توست واحدة عليها معلقتين شاي زبدة فول سوداني مع نص ثمرة جريب فروت .. لو حضرتك كييف شاي وقهوة فإنت ممكن تاخد معاهم كوباية شاي أو فنجان قهوة عادي جداً .. الغدا .. شريحة توست برده ومعاها نص علبة تونة .. ولو سيادتك برده من الناس اللي كييفه شاي وقهوة فإنت ممكن تاخدلك كوباية شاي أو فنجان قهوة عادي خالص مع الغداء .. العشاء بقي اللي غريب حبتين .. حتضربلك 85 جرام لحمة مع فاصوليا خضراء ومعاها تفاحة ونص موزاية وخد التقيلة بقي كوباية أيس كريم فانيليا صغيرة.
اليوم الثاني .. المفروض إنك تدخل لجسمك 1200 سعر حراري بس:
الفطار .. شريحة توست مع بيضة مسلوقة ونص موزاية وبرده لو حبيت تاخدلك كوباية شاي أو فنجان قهوة .. الغداء .. بيضة مسلوقة وجبنة قريش ومعاها بسكوت مملح زي بسكوت توكTuc المملح اللي بتلاقيه عند أي بقال وبرده مسموحلك بكوباية شاي أو فنجان قهوة .. العشاء برده بيكمل في تريند الحاجات الغريبة وببيكون حتتين هوت دوج بس من غير عيش ومعاهم نص كوباية جزر ونص كوباية بروكلي ونص موزاية بس معاهم المرة دي نص كوباية أيس كريم فانيليا.
اليوم الثالث .. المفروض إنك تدخل لجسمك 1100 سعر حراري بس:
الفطار .. شريحة جبنة شيدر وعلبة بسكوت توك المملح وتفاحة صغيرة وبرده مسموحلك بكوباية شاي أو فنجان قهوة .. الغداء .. شريحة توست ومعاها بيضة تاكلها زي ما تحب سواء مسلوقة أو مقلية ومعاها فنجان قهوة أو كوباية شاي زي ما تحب .. العشاء .. علبة تونا ونص موزاية وكوباية أيس كريم فانيليا.
كده إنت خلصت أول 3 أيام واللي لو ربنا قدرك وعرفت تكملهم يبقي كده فاضلك الأربع أيام اللي فاضلين واللي الحقيقة مش بس مسموحلك فيهم إنك تاكل سناكس بين الوجبات إنما فعلياً إنت مش حتمشي علي نظام دايت .. مفيش وجبات محددة .. النقطة الوحيدة اللي إنت لازم تلتزم بيها إن السعرات الحرارية اللي تخش جسمك يومياً متزيدش عن 1500 سعر حراري .. غير كده إنت من حقك تلعب فيهم زي ما إنت عايز .. الحقيقة إن حتي في أول 3 أيام الفكرة كلها في عدد السعرات الحرارية اللي بتخش لجسمك .. يعني مثلاً لنفترض إنك بني أدم نباتي من أتباع الفاسق (باسم يوسف) لا سمح الله .. شوف يا (باسم) أنا ممكن أسامحك علي أي حاجة بس إنك تبقي نباتي مستحيل مستحيل .. أو لنفترض إنك مش بتحب طعم التونة ساعتها إنت مسموحلك تبدل التونة بشوية لوز .. لنفترض إن عندك حساسية من زبدة الفول السوداني فساعتها برده إنت تقدر تبدلها بزبدة لوز .. في النظام ده إنت مينفعش بأي حال من الأحوال تشرب بيبسي أو أي مشروبات غازية .. بس ياسلام لو تشرب كوباية لمون سخن كل يوم.
نيجي بقي للسؤال الثاني .. هل الدايت العسكري ده حيجيب معايا نتيجة؟
مبدأياً مفيش دراسات علمية إتعملت عشان تقول هل نظام الدايت ده مفيد ولا هبد فلو إنت قررت تجرب فخلي بالك إن مفيش حد بيقولك بس إفتكر إني قلتلك بلاش وفي نفس الوقت مفيش حد بيقولك جرب وإدعيلي .. لكن .. بما إن نظام الدايت ده قايم علي فكرة إنك تقلل عدد السعرات الحرارية اللي بتخش جسمك يبقي إنت أكيد حتخس .. الناس اللي بتقول إن نظام الدايت ده هو أحسن إختراع بعد اللمبة بيقولوا إحنا بنقولك إشرب قهوة وشاي أخضر براحتك ودي حاجات بتزود من معدلات الحرق وبالتالي بتخليك تخسر دهون أحسن بس في نفس الوقت لو بصيت علي الأكل اللي إنت بتاكله إنت فعلياً مش مانع عن نفسك الدهون فده مش نظام غذائي إتعمل عشان تخسر دهون عشان بس تكون فاهم .. فيه ناس بتقول قلل ناس كتر شاورما .. زي الناس بتاعة كيتو دايت ومنطقهم إنك لما تاكل بروتين كتير فإنت كده بتزود من معدلات الحرق أو ميتابوليزم Metabolism وبالتالي بتخسر دهون .. بس برده لو بصيت علي الأكل اللي إنت بتاكله في نظام الدايت العسكري تلاقيه زيادة في الكربوهيدرات وقليل في البروتين.
خلاصة الكلام .. لو إنت عايز تخس بسرعة أوي بس مش مهم بالنسبة ليك إنك تحافظ علي وزنك فالدايت العسكري ده معمول عشانك .. تاني .. ده نظام دايت معمول إن لو مثلاً فرحك قرب وإنت عايز تخس بسرعة عشان يبقي شكلك سيكسي في الفوتوسيسن فساعتها الدايت ده حيبقي مثالي ليك .. بس في نفس الوقت ده مش نظام دايت إتعمل عشان تقضي بيها حياتك أو تستخدمه لشهور خصوصاً لو إنت شخص زي حالاتي كده علاقتك بالفاكهة ضعيفة حبتين .. متنساش إن ده نظام دايت مسموحلك فيه تاكل أيس كريم وهوت دوج فهو مش معمول إنك تخس بيه مثلاً 15 كيلوجرام علي مدي 3 شهور .. الدايت ده أخرك فيه أسبوعين أو شهر بالكتير أوي لإنه مش بيحتاج منك إنك تغير الLifestyle بتاعك زي أنظمة دايت تانية.
المصدر:
- مقالة بعنوان The military diet: a beginner’s guide (with a meal plan) .. نشرت في مجلة Health Line و ده لينك المقالة الأصلية:
/www.healthline.com/nutrition/the-military-diet-101
