لينك التسجيل الصوتي علي ساوند كلاود:
https://soundcloud.com/user-112011687-312727988/stsio9jegcvh?si=ca2c2d141d5d49a7804986f86f820526&utm_source=clipboard&utm_medium=text&utm_campaign=social_sharing
مبدأياً عايزك متركزش أوي في العنوان .. حنتخانق أنا و إنت عن نظرية النشوء و التطور و إن الإنسان أصله قرد و كل الكلام اللطيف اللي بتقراه علي السوشيال ميديا .. كل ده حيجي وقته بعدين بس مش دلوقتي .. دلوقتي إحنا عايزين نروح مع بعض نزور مكان من أجمل المناطق اللي خلقها ربنا علي الأرض .. هضبة التبت Tibetan Plateau .. عشان بس تستوعب اللي حقوله حاول تحط دايماً في خيالك هضبة المقطم .. أي حد راح زار كورنيش المقطم أكيد عجبه الفيو بتاع القاهرة من فوق .. تخيل بقي إن كورنيش المقطم إرتفاعه عن سطح البحر 4200 متر يعني حوالي 4 كيلومتر .. تخيلت؟ .. الظروف المناخية و الطبيعية علي إرتفاع خزعبلي زي ده فوق سطح البحر محتاج منك إنك تبقي متخيل إني في الشتاء قعدتك جوه الفريزر بتاع الثلاجة و مش بس كده أنا جبتلك مروحة و فضلت مشغلها عليك و إنت قاعد جوه الفريزر .. بس ده مش معناه إن هضبة التبت مفيش حد عايش فيها .. لا خالص .. بناء علي دراسة إتنشرت في يناير 2017 فإحنا متؤكدين إن بداية إن يبقي فيه بشر عايشين هناك كانت من 12,700 سنة .. ففيه ناس عايشة هناك .. السؤال دلوقتي .. هي الناس دي زينا كده؟ .. هل الناس دي طبيعية؟
بناء علي كلام (مارك ألديندير Mark Aldender) أستاذ علم تاريخ الإنسان في جامعة كاليفورنيا و واحد من الناس اللي كتبت الدراسة اللي أثبتت إن كان فيه ناس عايشه فوق هضبة التبت من زمان إن المنطق بيقول إن مفيش بني أدم طبيعي يقدر يعيش في بيئة زي دي .. تاني .. المشكلة مش في الشتاء ولا إنك تستحمل تعيش في ديب فريزر و مشغلين عليك مروحة .. فيه ناس بتحب الساقعة عادي .. المشكلة في الإرتفاع .. لما بتعيش علي إرتفاع 4000 متر فوق سطح البحر فالهواء اللي إنت بتتنفسه بيكون فيه بس تلت كمية الأكسجين اللي بتبقي في الهواء اللي إحنا بنتنفسه .. مش بس كده .. أي حد راح رحلة جبل سانت كاترين حيفهم اللي أنا حقوله دلوقتي .. مشكلة الإرتفاعات العالية زي دي إن الضغط الجوي بيقل .. الضغط الجوي علي إرتفاع 4000 متر فوق سطح البحر بيكون حوالي 21% من قيمة الضغط الجوي اللي إنت عايش فيه و إنت بتقرالي دلوقتي .. ده معناه إن جزئيات الهواء بتبعد عن بعض أكتر .. ده بيخلي رئتك يحصلها Stretching .. أي حد جرب يطلع جبل سانت كاترين جاله الإحساس الغريب ده .. إن زي ما يكون رئته بتتمط .. زي ما يكون حد بيشدها عشان تعرف تلاقي أكسجين.
مش بس أهل التيبيت اللي عايشين في منطقة عالية عن سطح الأرض .. أكتر مكان كان معروف لينا كبشر إنه عالي عن سطح البحر و عايش عليه ناس هو هضبة الألتيبلانو Altiplano في سلسلة جبال الإنديز في أميركا الجنوبية و دي هضبة ممتدة بين بيرو و بوليفيا .. أي حد بيتفرج علي ماتشات كورة كتير عارف إن بوليفيا بلد صعبة أوي علي أي فرقة كورة بتلاعبها في تصفيات أميركا الجنوبية عشان بوليفيا بلد عالية عن سطح البحر بسبب إن جزء كبير من بوليفيا بيقع علي هضبة الألتيبلانو دي .. الفكرة إننا كبشر عرفنا إن أهل بوليفيا لوحدهم دونا عن باقي أهل أميركا الجنوبية من ألاف سنين فاتت بدأوا يبقي شكل الرئة بتاعهم مختلف .. شكل الرئة بتاعهم بقي واخد شكل إسطواني أكتر عشان الرئة تعرف تسحب كمية أكسجين كافية .. فاكر إحساس إن رئتك بتتمط؟ .. مش بس كده .. بداية من سنة 1800 و إحنا بقينا عارفين إن أهل بوليفيا لو جيت تعملهم تحليل دم CBC اللي هو Complete Blood Composition حتلاقي إن دمهم بيجري فيه كرات دم حمرا و هيموجلوبين و مفيهوش كرات دم بيضا .. ده حصل بشكل طبيعي إن بسبب الظروف الجوية و بسبب إن بوليفيا عالية عن سطح الأرض فالبني أدمين هناك عايشين في مكان الضغط الجوي فيه واطي .. عشان كده جسمهم إتعلم إنه لازم كثافة الدم تبقي أعلي عشان يقدر يشيل كمية أكسجين أكتر.
إن دمك ميبقاش فيه كرات دم بيضا و يبقي كثافته أعلي من أي بني أدم طبيعي دي حالة طبية إسمها هيما-توبويتيك Hematopoietic و دي عبارة عن ميكس كلمة دم مع كلمة يولد باليوناني .. الحالة الطبية دي حتشوفها مع أي حد بقي غاوي تسلق جبال .. ولإن أغلب الدراسات العلمية اللي ركزت علي إزاي البشر بيعيشوا في المناطق العالية عن سطح البحر كانت بتتم في أميركا الجنوبية فلسنين و سنين فضل الإعتقاد اللي عند العلماء إن عشان تعيش في منطقة مرتفعة عن سطح البحر يبقي لازم جسمك تلقائياً يتعلم إنه يغير من تركيبة الدم بتاعتك .. لحد ما جت الثمانينات و الناس بدأت تدرس أهل التيبت و هنا النظرية دي إترمت في الزبالة.
بناء علي كلام (سينثيا بيل Cynthia Beall) أستاذة علوم الإنسان في جامعة كايس ويسترين ريسيرف في ولاية أوهايو الأميريكية إن العلماء لما بدأوا يدرسوا أهل التيبيت لقوا إن الرئة بتاعتهم شكلها مش إسطواني زي أهل بوليفيا بس في نفس الوقت معدل التنفس بتاعهم أعلي بكتير .. سنة 1981 لما (سينثيا) و الفريق بتاعها عملوا تحليل CBC لناس من اللي عايشين في التيبيت لقوا إن نسبة الهيموجلوبين عندهم قليلة جداً مقارنة بالناس اللي عايشة في مناطق قريبة من سطح الأرض .. بعد سنين من الإختبارات و إعادة الإختبارات (سينثيا) لقت إن أهل التيبيت بيتعاملوا مع إرتفاعهم عن سطح الأرض بطريقة مختلفة خالص عن طريقة أهل بوليفيا .. إذا كان أهل بوليفيا جسمهم تكيف إنه يغير من تركيبة الدم و شكل الرئة عشان يزود نسبة الأكسجين اللي بتوصل للخلايا فأهل التيبيت مشيوا .. أو خليني أقول أجسامهم بشكل تلقائي و طبيعي مشيت في سكة تانية خالص و هي إنها تكيفت إنها تعيش علي نسبة أكسجين قليلة .. مستغرب صح؟
اللي أنا عايزك تعرفة إن جسمك تلقائياً بيتعامل مع المشاكل زيك كبني أدم .. لنفترض إن عربيتك عطلت في نص السكة .. حضرتك الأول بتفتح الكبوت تقيس نسبة الزيت .. لو قليل يبقي العربية سخنت منك و مينفعش تدورها .. لو نسبة الزيت كويسة فبتبدأ تبص علي مستوي المياه في الريدياتير .. لو مستوي المياه كويس بتبص علي البوجيهات و بعد كده الكهرباء و هكذا .. ده في الهندسة إسمه Trial and Error .. بتجرب و تشوف الدنيا حتمشي معاك إزاي .. جسمك بشكل طبيعي بيعمل نفس الحركة .. خد عندك أهل بوليفيا و بيرو مثلاً .. الناس دي جسمهم بدأ يشوف إن عنده مشكلة و هي إن نسبة الأكسجين المتاحة قليلة .. يعمل إيه؟ .. زود من كثافة الدم .. بشكل تلقائي و طبيعي خلي بالك .. هل ده جاب نتيجة؟ .. اه .. هل ده كان له أثار جانبية؟ اه برده.
زيادة كثافة الدم معناها حاجتين .. معناها إن الأوعية الدموية و الأوردة بتاعتك بتتهلك بدري بدري .. و معناها برده إن قلبك بيشتغل أوفر تايم علي طول .. إنت عندك مضخة بتضخ سائل لزج زيادة عن اللزوم في مواسير مش بتستحمل الضغط العالي ده و المشكلة إن المضخة دي شغالة 24 ساعة 7 أيام في الأسبوع .. سنة 1925 فيه دكتور من بوليفيا اسمه (كارلوس مونجي ميدرانو Carlos Monge Medrano) شخّص حالة طبية سماها CMS و دي إختصار Chronic Mountain Sickness يعني مرض الجبال المزمن و فيه ناس بتسميه مرض مونجي Monge’ Disease و دي بتحصل إنك من كتر ما قلبك فضل شغال أوفرتايم لسنين فزي أي مكنة بتلاقيها باظت منك بدون أي مقدمات .. ده مرض ملوش علاج غير إن المريض يسافر بره بوليفيا أو بيرو و يروح يعيش في مكان مش عالي عن سطح البحر .. بس ده مش معناه إن فيه نسبة من المرضي حالتهم بتسوء بسبب إن مع كثافة الدم العالية فيه شوية دم صغيرين بيتجلطوا سواء جوه الرئة أو المخ أو علي أي عضو داخلي .. في بلد زي بيرو 18% من سكان البلد اللي عايشين فوق هضية الألتيبلانو بيجيلهم مرض CMS .. ده قصاد إن النسبة بتاعة أهل التيبيت اللي بيجيلهم نفس المرض أقل من 1%.
أهل التيبت الناس حبت تفهم هم إزاي بيعملوا ده؟ .. إزاي بيعيشوا علي نسبة أكسجين قليلة أوي كده من غير ما يحتاج جسمهم إنه بشكل طبيعي يغير من شكل الرئة أو من تركيب الدم؟ .. الإجابة عن السؤال ده كانت إنهم يبصوا علي الجينات بتاعة أهل التيبيت .. سنة 2010 إتنشرت 3 دراسات علمية في وقت واحد كلها بتحاول تجاوب علي سؤال بسيط .. إيه الفرق في جينات المواطن اللي عايش في التيبت عن ابن عمه من عرق الهان اللي عايش في الصين؟ .. الحقيقة إن ال3 دراسات طلعوا نفس الإجابة و دي حاجة مبتحصلش كتير في الدنيا .. نسبة التشابه بين جينات المواطن التيبيتي و المواطن الصيني عدت ال95% .. الفروقات كانت في الجينات اللي بتتحكم في نسبة الهيموجلوبين في الدم و أخص بالذكر هنا إتنين من الجينات اللي هم EPAS1 و EGLN1 .. بمعني أخر .. جينات المواطن التيبيتي هي هي جينات المواطن من عرق الهان يمكن باستثناء إن عشان المواطن اللي عايش في التيبت عايش في حتة عالية حبتين عن سطح الأرض فجسمه إحتاج إنه يعدل شوية من نسبة الهيموجلوبين في الدم عشان يعرف يعيش .. هنا بقي يجي دور الخناقة بتاعة نظرية النشوء و التطور.
سنة 1831 كان فيه شاب عنده 22 سنة بيدرس أحياء في جامعة كامبريدج في بريطانيا اسمه (تشارلز روبيرت داروين Charles Robert Darwin) .. زي ما إنت لما تبقي معيد في الكلية بتحضر ماجستير بتشمشم علي منحة دكتوراه في جامعة بره مصر فبرده (داروين) جاتله فرصة مش بتيجي في العمر كتير .. هو إتقاله حضر شنطتك عشان حتسافر لمدة 5 سنين علي المركب الكبيرة اللي هناك دي و كان إسمها إتش إم إس بيجل HMS Beagle .. بالمناسبة HMS دي إختصار Her Majesty’s Service يعني في خدمة جلالة الملكة و بيجل ده نوع من أنواع الكلاب .. المهم إن الرحلة دي حتروح أميركا الجنوبية تاخدلك لفة هناك و ترجع.
و هو هناك بدأت لمبة في دماغه تنور .. و هو هناك في أميركا الجنوبية البعثة اللي هو رايحها بدأت تلاقي حفريات لحيوانات إنقرضت من زمان .. واحدة من الحفريات دي كانت حيوان اسمه مايلودين و ده لما تيجي تمسك الهيكل العظمي بتاعه تدرسه تلاقيه هو هو حيوان الكسلان اللي إنت شفته في فيلم الكرتون Zootobia بس مضروب في Scale .. بلاش دي .. البعثة عدت علي حتة اسمها أرخبيل غالاباغوس Galapagos Islands و هنا (داروين) جه عند السلاحف اللي عايشة هناك و بلم .. أرخبيل غالاباغوس دي عبارة عن شوية جزر لازقة في بعضها بس زي ما يكونوا شلة بنات .. هم صحيح شلة بنات صحاب بس كل بنت فيهم تلاقيها شخصيتها كوكب تاني خالص عن باقي الشلة .. هنا برده .. كل جزيرة كانت عالم مستقل بذاته .. فيه جزر سبحان الله يعني تلاقي نسبة الرطوبة فيها عالية النباتات فيها بتنمو علي وش الأرض و تلاقي السلاحف اللي هناك رقبتها صغيرة و الصدفة بتاعتها علي شكل قبة .. تلاقي جنبها جزيرة تانية بس جوها جاف سبحان الله يعني و تلاقي عايش فيها سلاحف رقبتها طويلة و الصدفة بتاعتها زي ما تكون شبه السرج مش شكل قبة .. حاول تحط نفسك مكان (داروين) .. نفس السلحفاة .. بشكلين مختلفين بناء علي طبيعة المناخ .. ليه؟
الإجابة خبطت (داروين) في وشه بمجرد ما رجع إنجلترا .. إنت لو هوايتك تربية الحمام أو الكلاب أو الخيل فإنت كمان عارف الإجابة .. حضرتك لما بتربي كلاب أو حتي قطط و تكون مربي قطة شيرازي و عايز تجوزها فإنت بتدور علي حد يكون عنده قطة شيرازي برده .. لو إنت بتربي كلاب فإنت ممكن تكون سحلت دماغك كتير في إزاي تجوز دكر من فصيلة معينة علي نتاية من فصيلة تانية عشان يخلفوا فصيلة جديدة .. ده بحر واسع و فيه كتب إتكتبت في الحكاية دي بس ده كله بيتحط تحت مظلة حاجة إسمها Artificial Selection .. حضرتك اللي بتنقي دكر من أنهي فصيلة يتجوز أنهي نتاية من فصيلة تانية عشان يخلفوا فصيلة تالتة متهجنة واخد من صفات الدكر و النتاية .. السؤال دلوقتي و هنا مربط الفرس .. لو الطبيعة أو زي ما أنا شخصياً بسميها تدابير ربنا هي اللي حتقرر الإختيار ده فعلي أي أساس الNatural Selection أو الإختيار الرباني ده بيحصل؟
اللي جاوب علي السؤال ده مكنش (داروين) .. كان واحد تاني خالص اسمه (تشارلز روبيرت مالثوس Charles Robert Malthus) .. الرجل ده زي ما تقول كده كان الوحي اللي أتولدت منه شخصية (ثانوس Thanos) في سلسلة The Avengers .. (مالثوس) جاب ورقة و قلم و ألة حاسبة و قعد يحسب هو بعد سنين تعداد سكان أوروبا حيبقي كام؟ و إمتي عدد السكان حيعدي قدرة أوروبا إنها توفرلهم أكل و شرب؟ .. لما ده يحصل فإنت تقدر تقول إن البشر حيلعبوا مع بعض Free for All زي اللي كنا بنلعبها في Counter Strike أو Call of Duty .. اللي يلاقي حد معاه أكل يقتله و ياخد أكله .. زي ما قلتلك تقريباً (ثانوس) خد الفكرة منه .. المهم إن (داروين) خد كلام (مالثوس) و قال زينة والله زينة .. لنفترض إنك ذئب عايش في غابة .. حضرتك معاكش ورقة و قلم و ألة حاسبة و تقدر تحسب هي مساحة الغابة كام و عدد الغزلان اللي في الغابة كام و بالتالي لو إصطدت غزالة كل يوم فإمتي الغزلان حتخلص و أنا حموت من الجوع .. الحيوانات مش بتحسبها كده .. الحيوانات مش بتحسبها .. الحيوانات بتحسها.
الحيوانات بتحس إن بقاءها عايشة بيعتمد إنها تتجوز و تخلف .. لو الحيوانات متجوزتش و مخلفتش حينقرضوا و يموتوا .. كل جيل بيسلم جيل .. الجيل الأولاني مثلاً الطقس اللي كان عايش فيه ساقعة فلما خلفوا خلفوا عيال جلدهم كان عليه فرو .. الجيل اللي وراه الطقس بقي دافي سيكا فبيخلفوا عيال تلاقي إن الفرو علي جلدها هو كمان بقي خفيف سيكا .. عشان كده لما (داروين) راح أرخبيل غالاباغوس لقي نفس السلحفاة ليها شكلين مختلفين بناء علي الطقس و الطبيعة الجغرافية.. سواء حتقول الطبيعة أو Natural Selection أو تدابير ربنا إختار اللفظ اللي يريحك مش مهم بالنسبة لي بس خليك عارف إنها هي اللي خلت الجيل الأولاني من السلاحف يلاقي إن الزرع قريب من الأرض فإحنا مش محتاجين رقبة طويلة فالجيل ده إتجوز و خلف سلاحف رقبتها قصيرة و العكس سلاحف تانية لقت إن بسبب إن الجو جاف فالنباتات علي شجر عالي فإحنا محتاجين نخلف سلاحف رقبتها طويلة.
(داروين) راح الرحلة دي سنة 1831 .. رجع سنة 1836 .. فضل لحد سنة 1858 و هو بيحتفظ باراءه لنفسه .. فيه ناس بتقول إن السبب كان إنه عايز يبقي تحت إيده أدلة غير قابلة للنقض علي صحة نظريته .. ناس تانية بتقول إنه كان مرعوب ينشر أراءه لإنه كان عارف إن المشانق حتتعلقله .. اللي خلاه يغير رأية إن جاله جواب من واحد إسمه (ألفريد راسل والاس Alfred Russell Wallace) بتاع أحياء برده و شرح في جوابه ده إنه وصل لنفس النظرية بتاعة (داروين) و هي إن النشوء و التطور للمخلوقات الحية سببه Natural Selection .. (داروين) إترعب من فكرة إن حد تاني ينشر قبله فكلم (ألفريد) إنهم هم الإتنين يقعدوا مع بعض و ينشروا أبحاثهم سوا في بحث مشترك .. بعدها بسنة يعني 1859 (داروين) نشر لوحده و خزوق (ألفريد) و صدم العالم بالPaper بتاعته اللي كان عنوانها The Origins of Species أو أصل الأنواع.
لو فكرت فيها شوية حتلاقي إن نظرية النشوء و التطور بتاعة (داروين) هي المشكلة اللي فيها إن (داروين) قال إن Natural Selection بيتم بشكل طبيعي بدون تدخل إلهي .. إحنا أو أنا بقول إنها بتتم بتدابير ربنا .. غير كده النظرية زي الفل .. يمكن ده السبب ورا إن الكنيسة الكاثوليكية بعد سنين من العناد أعلنت إن نظرية النشوء و التطور لا تتعارض مع تعاليم الكنيسة .. أنا مقتنع جداً بإن كل واحد حر في رأيه بس صدقني لو قلتلك إنك بتبقي بتظلم نفسك لو كل اللي تعرفه عن نظرية النشوء و التطور إنها بتقول إن الإنسان أصله قرد .. طبيعي إن المقالة دي مش حتبقي كافية إنك تفهم بيها النظرية بشكل كامل و أكيد حنفتح سيرة الموضوع ده تاني.
المصادر:
- مقالة بعنوان How Tibetans Survive Life on the ‘Roof of the World’ نشرت في موقع هيئة الإذاعة البريطانية BBC وده لينك المقالة الأصلية:
https://www.bbc.com/future/article/20170227-how-tibetans-survive-life-on-the-roof-of-the-world - تقرير مصور بعنوان Theory of Evolution: How did Darwin Come Up with it? عملته هيئة الإذاعة البريطانية BBC وده لينك التقرير علي YouTube:
https://www.youtube.com/watch?v=JOk_0mUT_JU
