لينك التسجيل الصوتي علي ساوند كلاود:
https://on.soundcloud.com/pLhLd
موضوعنا النهاردة اللي حنتكلم عنه هو شركة SpaceX اللي فيه ناس نفسها تشتغل فيها و فيه ناس متعرفش أصلاً الشركة دي إيه و عمرها ما سمعت عنها حاجة .. كعادتنا لما نيجي نتكلم عن موضوع زي ده إن فيه ناس عارفاه وناس مسمعتش عنه قبل كده خلينا نبدأ براحة و من بره لجوه لحد ما نفهم الدنيا من غير ما نكلكع الأمور.
دلوقتي يا ريس فيه حاجة اسمها محطة الفضاء الدولية International Space Station أو ISS و دي محطة فضاء بتدور حول الأرض و تقدر تشبهها بإنها عبارة عن معمل أبحاث كبير البشر حاطينه في الفضاء .. زي أي معمل أبحاث في الدنيا بيحتاج كل فترة شوية معدات و إن رواد الفضاء اللي شغالين فيه ينزلوا الأرض و يتبدلوا بأطقم تانية فإنت محتاج وسيلة تنقل بيها بشر و معدات بين الأرض و ISS .. زمان كانت NASA عامله زي هيئة النقل البري و كان عندها أسطول من مكوك الفضاء اللي شغال زي أتوبيس النقل العام كده و ده كان وسيلة الإنتقال الوحيدة بين الأرض و بين ISS .. أيام حكم الرئيس (جورج بوش الإبن) كانت NASA شغالة علي مشروع اسمه Constellation Program أو مشروع الكوكبة و ده فكرته إن إن شاء الله بما إن NASA حتطلع برنامج مكوك الفضاء علي المعاش فإحنا عايزين نروح القمر نعمل عليه قاعدة فضائية و ربنا يسهل و حنروح هناك عن طريق صواريخ كبيرة شوية حتعملها شركة بوينج Boeing و لوكهيد مارتن Lockheed Martin.
لما جه الرئيس الأميريكي (باراك اوباما) قالك لا إلغيلي بقي الكلام بتاع Constellation Program ده و إرميه في الزبالة و طب بما إن NASA قررت تطلع أسطول مكوك الفضاء بتاعها بره الخدمة و إن بدل ما نخلي NASA تفكرلنا في طريقة تانية للنقل طب ما نفتح الباب قدام أوبر و كريم .. اللي كان (أوباما) بيفكر فيه إنه ليه لا نخلي شركات القطاع الخاص زي بوينج Boeing و SpaceX تعملنا مراكب فضاء صغيرة و رخيصة و يبقي ده هو التاكسي اللي NASA تأجره عشان تبعت اللي هي عايزاه لISS .. ده الفكر بتاع (أوباما) .. إن NASA تشيل إيدها خالص من موضوع الإنتقالات بين الأرض و ISS و تركز شوية في رحلات استكشاف الفضاء البعيد زي إنها تلاقيلنا طريقة كده نروح القمر و المريخ و نرّجع تاني أيام المجد بتاعة NASA لما ودولنا 12 رائد فضاء للقمر ضمن مشروع أبولو .. طبعاً مش كل الناس أول ما سمعت الكلام بتاع (أوباما) ده قالوله إيه الدماغ العالية بتاعتك دي يا ريس و إنت كنت فين زمان ..ناس كتير جوه NASA و جوه الكونجرس لما سمعت الكلام ده رقعت بالصوت و إتهمت (أوباما) إنه جاي يخرب بيت NASA.
(أوباما) بقي رئيس في 2008 و في 2010 كان في زيارة لمركز كينيدي للفضاء عشان يتكلم مع الناس بتوع NASA يقنعهم بفكره و يطمنهم إنه مش جاي عشان يقفل NASA و يقعد الناس اللي فيها في البيت و في نفس الوقت (أوباما) كان عايز يتكلم مع شركتي Boeing و Lockheed Martin عشان يؤكدلهم و يؤكد برده للشعب إنه صحيح (أوباما) لغي الConstellation Program بس هو حاطط رهان كبير علي شركات القطاع الخاص إنها تدخل مجال Space Travel أو السفر الفضائي .. المفروض إن Boeing و Lockheed Martin عاملين مع بعض Joint Venture أو شركة مشتركة اسمها United Launch Alliance و دي تبقي الشركة اللي ماسكه ملف الSpace Travel و كان المفروض إن (أوباما) يروح يتكلم مع الناس هناك و ياخد معاه صحفيين و إعلاميين و يبقي مهرجان .. المشكلة إن وقتها الشركة كانت شغالة علي مشروع سري لبناء مركبة فضاء اسمها X-37B لحساب وزارة الدفاع بحيث المركبة دي تفضل طايرة في مدار حول الأرض بالشهور و لإنه مشروع سري و المخابرات مكنتش عايزه الصحفيين يفضلوا يزنوا فوق ودان (أوباما) عشان يديلهم شوية تفاصيل عن المشروع فهم ضغطوا علي (أوباما) إنه بدل ما يروح يزور مقر United Launch Alliance فهو ممكن يروح يزور مقر شركة صغيرة تانية اسمها SpaceX ماسكها واحد مجنون اسمه (إيلون ماسك Elon Musk) شغالة برده في نفس المجال و عايزين يبقوا أوبر و كريم بتاع NASA.
زياره (أوباما) لمقر SpaceX و اللي جت بالصدفة البحتة خلت الناس بتتكلم عن إن فيه بني أدم اسمه (إيلون ماسك) هو ده حيكون الواجهة لخطة (أوباما) .. (ماسك) في حالة إنك مسمعتش اسمه قبل كده ده يبقي ملياردير عمل فلوس حلوة أوي من شركة اسمها PayPal و دي حاجة زي Amazon أو OLX كده و سنة 2002 أسس شركة اسمها SpaceX عشان يبقي هدفها إن إن شاء الله حيبعتوا ناس للمريخ اللي هو الناس لما سمعت ده يا إما قالوله أحسنت يا ابني و الله يا إما ضحكوا عليه .. من 2002 لحد 2008 و شركة SpaceX دي بتعاني و تحس إنهم مش فاهمين هم بيعملوا إيه لحد ما في 2008 لما (أوباما) استلم الحكم ربنا كرمهم و قدروا يطلقوا كبسولة الفضاء بتاعتهم اللي سموها دراجون Dragon أو التنين و ده خلاهم يكسبوا عقد بقيمة 1.6 مليار دولار مع NASA عشان يبقوا هم أوبر بتاع NASA.
من 2008 لحد 2013 و الناس بتوع SpaceX عاملين يشتغلوا علي الكبسولة Dragon دي .. الفكرة إنك عامل حاجة زي صالون العربية حتحط فيها يا إما رواد فضاء أو بضاعة و تحطها علي صاروخ فضاء و تطيره لحد ما يقابل ISS و يركن فيها .. كم الحاجات اللي ممكن تحصل غلط لا يعد ولا يحصي .. في واحد مارس 2013 كان معاد الإطلاق الرسمي لكبسولة Dragon عشان تطلع لمحطة الفضاء الدولية .. اليوم ده كان فيه ناس كتير حاطه إيدها علي قلبها .. لو حصل حاجة غلط أو لو لا قدر الله الصاروخ إنفجر أو إن الكبسولة معرفتش تركن في ISS فساعتها الشركة كلها حتقفل خلاص و الناس بتوع NASA اللي كانوا معترضين علي الفكر بتاع (أوباما) حيطلعولهم لسانهم و سمعة (أوباما) شخصياً قدام الناس حتبقي زي الزفت.
يمكن أهم حاجة محتاجة تتشرحلك هو إيه الفرق بين NASA و SpaceX؟ .. فكر فيها كده .. هو إيه اللي يخلي NASA تلجأ أساساً لSpaceX؟ يعني هم الناس بتوع NASA ناقصين إيد ولا رجل عشان يعملوا مركبات فضاء صغيرة تنفع تبقي هي التاكسي بين الأرض و ISS؟ عشان تفهم الفرق بين طريقة شغل الإتنين خليني أحكيلك موقف حصل سنة 2010 في أول رحلة إختبار لكبسولة الفضاء Dragon علي متن أحدث صواريخ الشركة Falcon 9 .. الإختبار ده كان تاني مرة الشركة تجرب تطلق صاروخ Falcon 9 و كانت أول مرة يحطوا الكبسولة علي الصاروخ و يجربوا يطلقوهم سوا و خلال مرحلة التفتيش النهائية قبل الإقلاع بدقايق واحد من المهندسين بتوع الشركة إكتشف إن فيه شرخ في الNozzle أو Skirt بتاعة الصاروخ اللي هي أخر حتة في الصاروخ من تحت اللي في الصور الحتة السودا اللي شبه القمع .. طبعاً إنت مينفعش تطير بأي حاجة فيها شرخ فما بالك بصاروخ فضاء .. دي مصيبة سودا و عايزك بقي تبص علي الفرق بين طريقة التعامل بتاعة الناس بتوع NASA و الناس بتوع SpaceX في إدارة مصيبة سودا زي دي:
- الناس بتوع NASA اللي كانوا حاضرين قالوا إن الصح اللي المفروض يحصل إننا نوقف الإطلاق و ناخد الصاروخ نفكه و نبدل الSkirt المشروخة بواحدة سليمة و نطلقه .. الكلام ده شاكب راكب حياخد بإذن الله شهر اللي هو تكاليف العطلة لوحدها حتخلي المحاسبين بتوع الشركة يلطموا.
- كان وسط القعدة دي موجود (ماسك) اللي بمنتهي البرود إقترح طب ما نقطع الحتة المشروخة من الSkirt زي ما إنت بتقص ظوافرك بالقصافة كده .. الفكرة إن الSkirt دي معمولة بأبعاد معينة بحيث لو إنت قللتها فإنت كده بتقلل من أداء و كفاءة المحرك بس إنت فعلياً مصمم المحرك علي Factor of Safety عالي يعني لو قطعت حتة من الSkirt مش حتفرق معاك في حاجة .. و فعلاً خلال نص ساعة كان القرار إتاخد و جابوا صنايعي معاه لمبة قطعية و قطع الحتة المشروخة من الSkirt و الصاروخ طار و زي الفل.
ده الفرق بين SpaceX و NASA زي الفرق بين شوية مهندسين شغالين في شركة قطاع خاص و مهندسين شغالين في شركة حكومة .. اللي شغالين في القطاع الخاص بيتعلموا إن العطلة وحشة و إن مش لازم نمشي زي ما الكتاب ما بيقول طالما فيه حل سريع و ينفع يشتغل نعمله مهما كان حل غريب و يبان إنه حل أهبل .. في SpaceX إنت بتتعلم إن أسوأ حاجة في الدنيا هو تضييع الوقت .. (ماسك) شخصياً بيقول للناس بتوعه لو أنتوا قاعدين في إجتماع معايا و حسيتوا إن الإجتماع ده طول زيادة عن اللزوم و بقي بيضيع وقتكوا قوموا أمشوا و سيبوني .. و في نفس الوقت الفكر اللي إنت بتتعلمه في SpaceX هو إن ليه تشتري جديد لما ممكن تجيب شوية خردة تصلحهم و حيشتغلوا زي الفل و عشان تفهم النقطة دي خليني أحكيلك موقف تاني حصل برده.
شركة SpaceX جاتلها شغلانة هي عمرة كاملة في منصة إطلاق صواريخ فضاء اسمها Launchpad 40 موجودة في قاعدة كايب كانيفرال Cape Canaveral و دي تابعة للقوات الجوية الأميريكية و هناك واحد من المهندسين ال10 بتوع الشركة اللي شغالين في المشروع شاف خزان نيتروجين مسال سعة 125,000 جالون مرمي علي جنب بقاله سنين محدش بيجي جنبه .. اللي ماسك المشروع كلم قائد القاعدة الجوية عشان ياخدوا الخزان يستفيدوا به بدل ما هو مرمي كده بس محدش عبره بس هو فضل ينخرب لحد ما جاب رقم الشركة اللي القوات الجوية إتعاقدت معاها عشان تاخد الخزان ده خردة و الشركة دي كانت موافقة إنها تبيع الخزان ( المرمي علي جنبه بس حالته ولا كأنه جديد لانج) لSpaceX ب86,000 دولار ..بعدها سمعة الناس بتوع SpaceX في المحطة إن دول الناس بتوع الخردة .. واحد فيهم لقي عربيات قطر قديمة من أيام الستينات كانت مستخدمة في نقل الهليوم من ولاية نيو أورلينز للقاعدة الجوية فالمهندسين بتوع SpaceX خدوا التانكات القديمة بتاعة عربيات القطر دي نظفوها و خلوها تنفع تشتغل تاني .. كانوا محتاجين تشيلرات Chillers تكييف مركزي فبدل ما يدفعوا 75,000 دولار في شراء واحد من شركة Carrier مثلاً واحد من المهندسين لقي تشيلر مستعمل علي ePay ب10,000 دولار بس.
هي مش نتانة قد ما هي مفهومية .. (إيلون ماسك) مش منوفي هو بس شغال في Business مبيرحمش و لازم يوفر كل مليم يقدر عليه .. موقف تاني حصل إن لما هو عرف إن تكلفة نظام التكييف اللي حيتركب في مقدمة الصاروخ Falcon 9 و اللي معمول عشان يحافظ علي درجة حرارة القمر الصناعي اللي حيشيله الصاروخ حيتكلف 3 مليون دولار قام راح إتكلم مع فريق التصميم و حضرت الإجتماع ده (جوين شوتويل Gwynne Shotwell) رئيسة الشركة و كان سؤاله منطقي بصراحة .. هو بالصلاة علي النبي حجم الفراغ اللي إنت محتاج تكيفه قد إيه؟ فكان الرد إنك بتتكلم عن تقريباً حجم شقة كبيرة شوية ف(ماسك) بص ل(جوين تشاتويل) و سألها هو لو أنا عندي شقة كبيرة و عايز أعملها نظام تكييف كامل حيكلفني كام؟ فكان ردها إنها لسه مغيره التكييف بتاع شقتها و الموضوع وقف عليها بحوالي 6000 دولار ف(ماسك) قالهم طب شوفولي إيه المشكلة ليه أدفع 3 مليون ما دام أقدر أدفع 6000 دولار؟ و فعلاً المهندسين بتوع SpaceX حطوا 6 وحدات تكييف Split زي اللي بيتركب عندك في الشقة في الصاروخ و شغال و زي الفل.
اللي شغالة عليه SpaceX دلوقتي هو فكرة مجنونة شويتين تلاتة و هي إنهم يعملوا صاروخ فضاء حيسموه BFR و دي إختصار Big Fucking Rocket و أنا مش بهزر في الاسم علي فكرة بحيث إن الصاروخ ده طوله حيبقي 47 متر يعني تقريباً أطول من طيارة Boeing 747 و عرضه 9 متر يعني تقريباً أطول بشوية صغيرين من عرض جسم طيارة Airbus A380 Super Jumbo و الصاروخ حيبقي 3×1 يعني يقدر يشيل بشر أو معدات أو وقود بحيث لو حبيت إن شاء الله يعني تبعته المريخ ضمن حملة استعمار البشر للكوكب الأحمر مش حيقول لا .. الصاروخ ده حيبقي حاجتين في بعض: مركبة فضاء أو Spacecraft و صاروخ يطيره المركبة من الأرض لحد الفضاء الخارجي بس كده و ده حيرجعنا تاني للكلام عن الفرق بين SpaceX و بين NASA و هو إن لما NASA مثلاً عملت مشروع أبولو اللي بعتوا به رواد فضاء للقمر فالناس دول عملوا صاروخ اسمه ساترن أو (زحل) خمسة Saturn V و ده صاروخ عملاق إرتفاعه 126 متر و بمجرد ما الصاروخ ده طلع بره الغلاف الجوي للأرض فهو بيتفك ل4 حتت:
- حتة اسمها Service Module.
- حتة اسمها Command Module و دي الكبسولة اللي رواد الفضاء رجعوا بيها للأرض.
- حتة اسمها Lunar Lander و دي اللي رواد الفضاء هبطوا بيها علي القمر و إتسابت علي القمر.
- حتة اسمها Ascent Stage و دي اللي رواد الفضاء عشان يطلعوا من القمر ركبوها عشان توصلهم لCommand Module.
اللي SpaceX عايزه تعمله إنها تعمل Spacecraft فيها كل دول مرة واحدة .. مجرد ما تسرح بخيالك كده لحجم المشاكل اللي حتواجه المهندسين اللي حيصمموا المركبة دي حتحس إن مخك بيسيح .. إنت بتتكلم عن مركبة بتقدر تطير ب4 سرعات مختلفة اللي هم Subsonic يعني أقل من سرعة الصوت و Transonic اللي هي سرعة الصوت و Supersonic يعني أسرع من سرعة الصوت و Hypersonic يعني تطير بسرعات أعلي من 5 أضعاف سرعة الصوت أو Mach 5 و دي عمرها ما حصلت إن البشر عملوا المركبة الفضائية السوبرمان دي .. بلاش دي .. لو إنت حتبعت الSpacecraft دي للمريخ فإنت عايز تخليها تهبط في المجال الجوي للمريخ علي أرض مش ممهدة و إن شاء الله لما تخلص مهمتها تطلع من سطح المريخ و تخترق الغلاف الجوي بتاعه و تسافر للأرض و تخترق المجال الجوي بتاعها و تهبط بسلام اللي هو تقول للناس بتوع SpaceX عبط إحنا يا عصام؟
تاني الكلام ده مش خيال علمي .. بناء علي كلام (ماسك) فأول إختبارات التجارب بتاعة BFR إتعملت في 2019 و قدامهم كمان 4 سنين شغل لحد ما في الأخر الSpacecraft دي تتعمل بالصاروخ بتاعها اللي حيبقي قائم علي 31 محرك مش بس 9 محركات زي صاروخ Falcon Heavy اللي SpaceX استخدمته عشان تبعت عربية (ماسك) للمريخ في 2018.
المصدر:
مقالة بعنوان With a spacecraft in trouble and the White House watching, SpaceX had to deliver نشرت في جريدة The Washington Post الاميريكيه و ده لينك المقالة الأصلية:
https://www.washingtonpost.com/business/economy/with-a-spacecraft-in-trouble-and-the-white-house-watching-spacex-had-to-deliver/2018/03/15/553d89cc-2701-11e8-874b-d517e912f125_story.html?noredirect=on&utm_term=.b6ff0beae18e
