موضوعنا النهاردة اللي حنتكلم عنه هو أكتر رجل بيتسبله مية ملة في كل ماتش .. لا مش الحكم .. المدير الفني .. كان زمان ممكن أقولك الحكم بس مع دخول تكنولوجيا VAR أخطاء التحكيم قلت كتير بس طبعاً الكلام ده ملوش دعوة باللي بيحصل في الإيجيبشن بريميير لييج .. فعلياً كل واحد فينا متخيل إنه يعرف يمسك شغلانة المدير الفني و يمكن عشان أثبتلك ده إعمل الحركة اللي حقولك عليها دلوقتي .. نقيلك أي ماتش للنادي الأهلي في الدوري المصري و أقعد علي القهوة و إتفرج علي تعليقات الناس اللي بتتفرج حوليك .. حتلاقي ناس تقولك المفروض(بيتسو موسيماني) يلعب بمين مكان مين .. مين يلعب الفاول .. مين كان المفروض يتغير بين الشوطين و كأن الناس كلها بقت خلاص محترفة FIFA Football Manager بس الواقع اللي أنا للأسف جاي أفكرك بيه إن شغلانة المدير الفني دي حضرتك مش حتستحمل تشتغلها .. المدير الفني بيتشتم من الجماهير .. بيتحط عليه من إدارة النادي اللي جابته .. بيترخم عليه من مدير نشاط الكورة اللي شغال معاه ..ده غير إن الإعلام الرياضي بيتسلي عليه .. و خليني أثبتلك ده إننا مع بعض طول المقالة دي حنفضل نهري و نتخانق سوا علي إجابة سؤال واحد بس .. جاهز؟
إزي (فرانز بيكنباور) و (ماريو زجالو) و (ديديه ديشامب) هم الثلاث بني أدمين الوحيدين في التاريخ اللي كسبوا كأس العالم كلاعيبه و كمديرين فنيين؟ .. سؤال غريب أنا عارف بس هي الفكرة اللي إنت ممكن متكونش واخد بالك منها إن نسبة كبيرة من لاعيبة كرة القدم بعد ما بتبطل كورة بتروح لسكة التدريب من أول (دييجو أرماندو مارادونا) ل(لوتر ماتيوس) ل (يوهان كرويف) ل(أندريا بيرلو) بس الحقيقة إن الإجابة علي السؤال ده مش بالبساطة اللي إنت متخيلها لإن قبله لازم نجاوب علي كذا سؤال تانيين:
هو أنا لو رئيس نادي أو رئيس إتحاد كرة قدم أجيب مين يدرب الفرقة أو المنتخب؟
الإجابة البسيطة اللي ناس كتير بتلجأ ليها إننا نجيب أسطورة من أساطير النادي أو المنتخب نعينه يمسك الليلة .. برشلونة عملوها مع (بيب جوارديولا) و (لويس إنريكي) و أخيراً (تشافي) .. تشيلسي عملوها لما جابوا (فرانك لامبارد) .. ريال مدريد عملها لما جابوا (زين الدين زيدان) و غيرهم كتير بس المنطق ورا التعيين ده اللي مهم تبقي فاهمه كويس إن رئيس النادي أو الإتحاد بيقول لنفسه إني لو جبت الأسطورة اللي جاب بطولات فهو عارف إزاي يكسب .. جرب إحساس أوضة اللبس .. عاش بنفسه الضغط بتاع الماتشات .. حيعرف يوصل روح الفانلة للاعيبة .. نفس المنطق اللي خلي الإتحاد المصري لكرة القدم يعين (وائل جمعة) و (محمد شوقي) و حتي (عصام الحضري) كمساعدين ل(كارلوس كيروش) .. الأسطورة بيبقي له هيبة .. الهيبة بتجيب بطولات مش الكورسات و التدريبات و الفكر و التشكيلة و نلعب 4-3-3 ولا 4-4-2 .. زمان إنك تبقي أسطورة نادي إعتزلت فتاني يوم بتلاقي النادي كلمك قالك تعالي درب .. طب حضرتك مؤهلاتك إيه؟ .. مفيش .. خد كورسات إيه في التدريب؟ .. مفيش .. طب حضرتك عارف يعني إيه مدير فني؟ .. علي رأي (حزلقوم) مش يمكن لما أجرب ألاقي نفسي بعرف.
علي فكرة الفكر ده نجح كتير عشان بس متفتكرش إني بهاجم كده و خلاص .. (فرانز بيكنباور) اللي إخترع مركز الليبرو و (ماريو زجالو) الإتنين دربوا منتخبات بلدهم ألمانيا و البرازيل و من غير ما ياخدوا شهادة ولا كورس و الإتنين كسبوا كأس العالم مع بلادهم كمدربين .. (رودي فولر) أسطورة منتخب ألمانيا كلاعب و لما مسك مدير فني وصل لنهائي كأس العالم 2002 في كوريا الجنوبية و اليابان و خسر النهائي قصاد البرازيل .. (يورجين كلينسمان) هو كمان أسطورة منتخب ألمانيا إتعين مدير فني من غير ما إسم النبي حارسه يمسك مدير فني لمركز شباب قبل كده و وصل ببلده لثالث عالم في بطولة 2006 .. بس هي النقطة إن دول الإستثناء مش القاعدة.
عايزك تستهدي بالله و تبص علي المنتخبات اللي كسبت كاس العالم من أول سنة 1990 لحد سنة 2010 .. بتتكلم عن 6 بطولات كاس عالم شارك فيهم 135 لاعيب .. من ضمن ال135 لاعيب دول فيه 44 لاعيب بعد ما بطلوا كورة إتجهوا للتدريب .. من ضمن 44 مدرب فيه منهم 7 بس اللي تقدر تقول عليهم مديرين فنيين كويسين.
ليه ده بيحصل؟ .. ليه معدل الفشل الرهيب ده؟ .. الفكرة إن من غير كورسات و من غير ما تتعلم يعني إيه مدير فني و بيعمل إيه و إيه المطلوب منه بتبقي متخيل إنك لما تمسك المنصب ده مش حيفرق كتير عن كونك كابتن الفرقة .. فكر فيها كده .. إنت دايما بتشوف (جوردان هيندريسون) أو (فيرجيل فان دايك) بيشاور للاعيبته يدوا الكورة لمين في الملعب علي أساس إنهم كباتن الفرقة .. نفس الكلام مع (كيفين دي بروين) في مانشستر سيتي أو (لوكا مودريتش) في ريال مدريد .. المشكلة إن كابتن الفرقة ممكن يوجه اللاعيبه اللي حوليه بس لكن المدير الفني بيبقي مطلوب منه يوجه 11 لاعيب بالإحتياطي اللي قاعدين علي الدكة.
طب أنا لو حبيت أبقي مدير فني في أوروبا مطلوب مني أعمل إيه؟
الأول و بسم الله الرحمن الرحيم حضرتك محتاج شهادة إسمها UEFA Pro License و ده كورس بتاخده برعاية الإتحاد الأوروبي لكرة القدم و كل إتحاد محلي بيعلمه للناس بشكل مختلف .. يعني مثلاً .. في ألمانيا حضرتك بتروح تاخد كورس في الإتحاد الألماني لكرة القدم مدته 13 شهر و بتفضل سنة تذاكر و تمتحن و يطلع عينك عشان في الأخر تتعلم تجاوب علي 3 أسئلة:
- هو اللاعيبه بتاعتي بيبقوا محتاجين إيه؟ بمعني أخر إنت بتحاول تفهم هي اللاعيبه مستنيين مني إيه كمدير فني؟ إزاي إنت تبقي فاهم إن شخصيات اللاعيبه بتفرق و إزاي تتعامل مع كل شخصية عشان تقدر تطور من أداء اللاعيب ده؟ إزاي تصعد لاعب ناشيء للفرقة الأولي و تعمل إيه عشان تأهل اللاعيب الصغير ده إنه ميخافش و ميتخضش؟
- هو إنت ليك كام مساعد؟ و بيعملوا إيه؟ هو الطاقم الطبي بيعمل إيه؟ مين بيتعامل مع الإعلام؟ و تقول إيه للصحفيين و متقولش إيه؟ .. هو إيه دور وكلاء اللاعبين و إزاي تحجم من تأثيرهم؟
- اخر حاجة بتتعلمها هي اللي إحنا متخيلين إنها أهم حاجة في كرة القدم اللي هو الفرق بين 4-4-2 و 4-3-3 و إمتي تلعب بثلاثة في خط الظهر؟(aviأخيراً (تشافي (بيب جوارديولا إننا نجيب أسطورة من أساطير النادي أو المنتخب نعينه يمسك الليلة .. دم بعد ما بتبطل كورة بتروح لس و إمتي تركن الأوتوبيس و يعني إيه سيكسي فوتبول؟
عادة و إنت لاعيب حتي لو إنت أسطورة و إسمك علي كل لسان مش بتاخد بالك من كل الجوانب دي اللي في الكورس بتاع UEFA Pro License و لو إنت مش فاهم تأثير الجوانب دي و إترميت في سكة التدريب من غير ما حد يرسيك علي الليلة غالبا حتغرق و حتغرق النادي كله معاك حتي لو كنت أسطورة ناديك .. لما بتبطل كورة و إنت أسطورة نادي و بتروح تدرب فيه حاجة جواك بتقولك إنت مش محتاج تتعلم حاجة جديدة أصلك في الCareer بتاعتك شفت كل حاجة لحد ما بتلبس في الحيط .. (أولي جونار سولشاير) مثال صارخ علي ده لإن كان واضح في ماتشات كتير إنه مش عارف يخلي لاعيبته تلعب بأسلوب واضح و بتكتيك إحنا كناس بتتفرج تبقي فاهماه .. نفس الكلام علي واحد زي (توني أدامز) واحد من أساطير نادي أرسنال و الدوري الإنجليزي و منتخب إنجلترا و يمكن واحد من أحسن المدافعين في تاريخ كرة القدم و اللي لما بقي مدير فني مكنش فاهم الألف من كوز الدرة .. (خريستو ستويتشكوف) أسطورة برشلونة و اللاعيب البلغاري الوحيد اللي خد البالون دو أور و اللي لما بطل كورة كان مدير فني مينفعش يتقاله إلا يا فاشل يا فاشل و اللي طلع بمنتهي الجليطة يقولك أنا رجل مش مؤمن بفكرة التكتيك في كرة القدم.
عشان تبقي مدير فني كويس لازم أعمل إيه؟
أول خطوة إنك تبقي فاهم إن المدير الفني ده شغلانة زيها زي التجارة و الطب و الهندسة يعني ليها أصول و قواعد .. يعني فيه ناس شاطرة فيها لازم تتعلم منها .. و الأهم إنك تخش الشغلانة و إنت حابب تشتغلها .. (جوارديولا) مثال علي ده .. قبل ما يدرب هو قعد سنة كاملة يتعلم الشغلانة من أساتذته و إتفرج عليه دلوقتي بسم الله ما شاء الله 31 بطولة مع برشلونة و بايرن ميونيخ و مانشستر سيتي .. طب علي الأقل (جوارديولا) كان لاعب كرة قدم محترم شوية بس فيه مدربين ناجحين و مكانوش لاعيبه كويسه بس الفرق إنهم عرفوا إن التدريب شغلانة لازم تبقي فيها صبي قبل ما تبقي معلم .. (كارلو أنشيلوتي) واحد منهم .. هو مكنش لاعيب عبقري بس لما بطل خد سلم التدريب من أوله عشان يبدأ كماساعد مدرب في دوري المظاليم لحد ما بقي المدير الفني الوحيد اللي كسب الدوري المحلي في دوريات أوروبا الخمسة الكبيرة .. (لويس إنريكي) كان لاعيب كويس بس حتي لما بطل كورة إتكحرط حبة حلوين في فرقة الناشئين بتاعة برشلونة و دربهم 3 سنين عك فيهم براحته .. راح روما عك أكتر بس مع كل مرة بيعك كان بيتعلم لحد ما مسك برشلونة حقق معاهم الثلاثية و دلوقتي بيعمل من الفسيخ شربات مع منتخب إسبانيا .. (جوزيه مورينيو) بطل كورة و هو عنده 24 سنة و بدأ حياته كمترجم لسير (بوبي روبسون) لما كان ماسك برشلونة و بدأ يكبر و يكبر لحد ما بقي السبيشال وان.
سير (أليكس فيرجسون) اللي في رأيي واحد من أنجح المديرين الفنيين في التاريخ كان دايماً يقول اللي أنتوا بتقولوا عليه علم نفس أنا بسميه علم الإدارة .. لما حضرتك تبقي مدير فني لفرقة كرة قدم بيبقي تحت منك لاعيبه فاهمه تلعب كرة قدم إزاي .. المطلوب منك مش إنك تقوله يمرر الكرة إزاي و تشرحله يعني إيه كرة قدم .. المطلوب منك إنك تلاقي طريقة توصل أفكارك بتاعة إزاي نلعب ليه بطريقة هو يفهمها و يعرف يطبقها في الملعب .. بمعني أخر .. عشان تنجح كمدير فني لازم تبقي شخصيتك تنفع إنك تبقي مدير فني و مش حتفرق بقي إنت كلاعيب خدت كام بطولة ولا كسبت كام ماتش .. إنت لو كنت لاعيب أسطورة لناديك بس علي الله حكايتك كمدرس و مبتعرفش تشرح أو توصل معلومة حتبقي مستني من اللاعيب اللي تحت منك إنه يفهمك و يقلدك و يبقي أسطورة زيك و هو برده الله حكايته بس كلاعيب.
النقطة دي تفسرلك ليه لاعيبه كتير بعد ما تبطل كورة و تشتغل مدير فني بيبوظوا الدنيا زي مثلاً (لوثار ماتيوس) .. الرجل ده كان لاعيب عالمي .. اللاعيب الألماني الوحيد اللي خد البالون دو أور .. لما مرن فرقة سيلتا فيجو في إسبانيا أو لما مسك منتخب بلغاريا و المجر كلها كانت تجارب فاشلة بشكل كبير بسبب عيب شنيع في شخصيته و هي إنه مبيعرفش يتعامل مع بني أدمين .. حتي لما كان محلل في قناة الجزيرة الرياضية إتخانق مع إدارة القناة .. أو (مارادونا) اللي صحيح هو يمكن من أحسن خمس لاعيبه في تاريخ كرة القدم بس عشان معندوش القدرة إنه يوصل أفكاره للاعيبه بتاعته لما مسك منتخب الارجنتين في كاس العالم 2010 شال 4-0 من منتخب ألمانيا في دور الثمانية .. بعدها مسك فرقة الوصل الإماراتية و مقعدتش في منصبه أكتر من سنة .. نفس الكلام مع (جينارو جاتوزو) اللي شخصيته بتخليه أحياناً غير مؤهل إنه يعمل أي حاجة ليها علاقة بناس حوليه.
تاني .. الفكرة كلها في الشخصية .. الشخصية هي اللي بتعمل من الفسيخ شربات .. إنت ممكن تبقي لاعيب مجاش زيك و عندك شخصية تخليك بتعرف تتعامل مع بشر فتبقي مدير فني كويس زي (يوب هاينكس) المدير الفني الألماني اللي أنا شخصياً بموت فيه .. ده رجل كسب Champions League و كأس العالم كلاعب و كسب بطولتين Champions League كمدير فني لريال مدريد و بايرن ميونيخ .. فلسفة (يوب هاينكس) إن صحيح الفرقة فيها 11 لاعيب في الملعب بس فيه لاعيبه علي الدكة و فيه لاعيبه بره القايمة و كل دول لازم يحسوا إنهم جزء من الفريق .. (دييجو سيميوني) من المدربين اللي كانوا ناجحين كلاعيبه و كمديرين فنيين و كفاية بالنسبة لي إنه كسر هيمنة برشلونة و ريال مدريد و كسب بطولة الدوري الإسباني مرتين و خلق فرقة بتلعب زي ما هو كان بيلعب كلاعيب و دي حاجة مش سهلة .. (زيدان) سنة 1998 خد البالون دور أور و بعدها بعشرين سنة بيقود لريال مدريد لثالث بطولة Champions League ورا بعض .. ولا واحد من دول تقدر تقول عليه مدير فني عبقري بيقلب الماتش بتغيير بس الفكرة في الشخصية إنك تعرف توصل إنت عايز إيه للاعيبة بتاعتك .. عشان تبقي مدير فني ناجح مش لازم يبقي IQ بتاعك ضارب للسما بس محتاج تعرف توصل معلومة.
و ممكن تبقي حد ملعبش كمحترف و ملكش Career كبيرة كلاعيب و تكبر و تلاقي نفسك بتعرف تدرب .. ده حقيقي .. فيه ناس كتير من اللي بتتفرج علي كورة حالياً ميعرفوش حاجة عن واحد إسمه (أريجو ساكي) .. لو مش عارف ده مين فأحب أقولك إنه كان مدير فني للبيج ميلان AC Milan و تحت إيده الفرقة كسبت بطولتين Champions League ورا بعض سنة 1989 و سنة 1990 .. طب هل تعلم سيدي القاريء إن (أريجو ساكي) مكنش لاعيب كرة قدم محترف أصلاً؟ .. (ساكي) كان دايماً يقول إن الأندية لازم تفتح بابها للناس اللي مكانوش لاعيبة كرة قدم محترفين عشان يبقوا مديرين فنيين و الغريبة إن لما ده بيحصل و نادي بيجيب حد مكنش لاعيب كبير عشان يمسك الفرقة متفهمش إيه اللي بيحصل .. سير (أليكس فيرجسون) مكنش لاعيب كويس ولا (أرسين فينجر) .. الأولاني بقي أعظم مدير فني في تاريخ الدوري الإنجليزي و الثاني المدير الفني الوحيد اللي خد الدوري من غير أي هزيمة في موسم 2004 .. عندك (يورجين كلوب) اللي عمره ما لعب ولا ماتش رسمي في الدوري الألماني و رغم كده لما بقي مدير فني خد الدوري الألماني و الإنجليزي و الChampions League كمان.
اللي عايز أقوله إنك ممكن تقرالك في تكتيك كرة القدم و تاخد كورسات و تتفرج علي فيديوهات علي YouTube و يبقي ليك نظريات في الضغط العالي و الضغط العالي المعكوس و التيكي تاكا و ركن الأوتوبيس .. بس هو السؤال دلوقتي .. هل حضرتك حتعرف توصل أفكارك دي 11 لاعيب بشخصيات مختلفة و كل واحد فيهم مستواه العقلي مش زي التاني .. هل حضرتك حتعرف تمرن لاعيبتك علي أفكارك دي؟ .. خدت بالك إنك بتكلم عن مستوي تفكير عالي حبتين اللي هو مش حتفرق إذا كانت (محمد أبوتريكة) أو كنت بتلعب في بترول أسيوط و عمرك ما لعبت في الدوري الممتاز .. السؤال دلوقتي هي دماغك حلوة ولا لا؟
خلال العشرين سنة اللي فاتوا كرة القدم بقت بتتغير معدل إحنا في مصر مش واخدين بالنا منه .. سنة 2000 كان فيه 34 نادي بس من أصل 78 بيشكلوا أندية الدوريات الأربعة الكبري في أوروبا اللي هم الإيطالي و الإنجليزي و الإسباني و الألماني ماسكهم مديرين فنيين يا مكنش ليهم أصلاً أو ليهم Career مش قد كده كلاعيبه .. جري الشريط لسنة 2022 الرقم بقي 44 نادي .. مين أنجح مديرين فنيين في العالم دلوقتي و اللي حيفضلوا ينافسوا بعض علي بطولات أوروبا في السنين الجايه؟ .. (كلوب) في ليفربول .. (توماس توخيل) في تشيلسي .. (جوليان ناجلزمان) في بايرن ميونيخ .. (جوارديولا) في السيتي .. ثلاثة من الاربعة مكانوش لاعيبة كرة قدم معروفين .. (توخيل) بطل كورة و هو عنده 26 سنة و (ناجلزمان) بقي مدير فني لفرقة هوفينهايم وهو عنده 28 سنة .. بمناسبة (ناجلزمان) .. أنا عايز أختم بجملة هو قالها و أنا شايفها مهمة جداً الحقيقة .. عشان تبقي مدير فني فإنت محتاج شطارة في التكتيك بنسبة 30% إنما ال70% الباقيين إنك تقدر تتعامل مع بني أدمين.
المصدر:
فيديو بعنوان Why great players often fail as coaches نشرت علي قناة DW Kick Off علي YouTube و ده لينك الفيديو:
https://www.youtube.com/watch?v=kAzjQ-IvXIU
