مانشستر يونايتد .. نشر الغسيل الوسخ للجليزر.

يا مشجعي مانشستر الكرام .. جئت لكم ببشري السلام .. ها قد أتي السير (جيم راتكليف Sir Jim Ratcliffe) لينقذ ناديكم ويجعله متربعاً علي عرش الدوري العام .. ده الحقيقة غير إنه عرض فشيخ لقدراتي الخزعبلية في إلقاء الشعر بس هو كمان الشعور اللي بيحس بيه كتير من مشجعي المارد الأحمر أو خليني أقول بصيص الأمل اللي جالهم بعد ما جالنا خبر إن السير (جيم راتكليف) اللي عنده 71 سنة دفع من جيبه 1.3 مليار جنيه إسترليني عشان يشتري حصة 25% من أسهم نادي مانشستر يونايتد خصوصاً إن (جيم راتكليف) مش من الأغنياء اللي سيرتهم علي كل لسان .. يعني هل عدي عليك قبل كده إسم (شفيق جبر)؟ .. هو يبان إسم مواطن عادي بس الحقيقة إن ده يبقي ثامن أثري أثرياء مصر وثروته بتعدي 750 مليون دولار وهو اللي عمل شركة أرتوك للاستثمارات والتنمية .. برده (جيم راتكليف) بيتصنف علي إنه ثاني أغني أغنياء بريطانيا بثروة قيمتها 29.7 مليار جنيه إسترليني وهو بني ثروته من شغل الشركة اللي هو أسسها إينيوس INEOS ودي شركة بتروكيماويات رغم إن إسمها يوحي بإنه دواء كحة .. بس اللي أنا عايز أقف قدامه دلوقتي هو سر الحماس والفرحة اللي في عيون مشجعي مانشستر يونايتد لإن في المواقف اللي زي دي السر ورا الشعور ده مش بيكون وراه إن اللي جاي جامد قد ما بيكون إن اللي قبله كان عايز ضرب القبابيب وده اللي عايزين نتكلم عنه النهاردة وهو إحساس القرف اللي عند مشجعي النادي من الملاك بتوعه .. عيلة جليزر Glazer Family.

في المواقف اللي زي دي أنا بحب أقف قدام حلاوة البدايات اللي لما بتتعمل صح وبيبان فيها إن الناس اللي في مراكز صنع القرار فاهمة هي بتعمل إيه فبتحس إن فيه أمل إننا منشوفش خوازيق النهايات .. من المواقف اللي أنا عايز أقف قدامها الحقيقة إن في أول يناير 2024 السير (جيم راتكليف) خد في إيده دراعه اليمين السير (ديف برايلزفورد Sir Dave Brailsford) وراحوا عملوا إجتماع مع فوق ال100 موظف اللي شغالين في مانشستر يونايتد من أول بتوع الأمن للطباخين لعمال النظافة اللي هو بإختصار أي حد شغال في النادي باستثناء اللاعيبة وفي الإجتماع ده الاستراتيجية اللي السير (جيم راتكليف) ناوي يحطها للنادي إتشرحت للناس كلها وهي قايمة علي نقطتين .. الأولانية إن من هنا ورايح النادي حيرجع يشتغل كنادي مش شركة كل هم الناس اللي ماسكينها إنهم يحققوا التارجيت السنوي بتاعهم .. الثانية إن نجاح أي نادي في الدنيا مش بس بيتبني علي كتاف ال11 لاعيب اللي في الملعب والمدير الفني بتاعهم إنما بيتبني علي مجهود كل الناس اللي شغاله في النادي من أول عامل الأمن علي البوابة لحد العامل في أوضة اللبس اللي بيرص التي شيرتات بتاعة اللاعيبة .. ليه ده من المواقف اللي أنا عايز أقف قدامها؟ .. لإن خلال السنين اللي فاتت اللي النادي كان مملوك فيها لعيلة الجليزر محصلش ولا مرة إن واحد فيهم فكر يجي يزور النادي أو يتكلم مع الموظفين زي ما يكونوا جربانين مثلاً والنهاردة عايزين سوا نجاوب علي السؤال المهم: مالهم عيلة الجليزر كفا الله الشر؟

سنة 2005 كانت السنة اللي مشجعي مانشستر يونايتد والناس كلها اللي بتتفرج علي كرة قدم الحقيقة سمعوا إسم عيلة الجليزر لأول مرة .. دي عيلة أميريكية عايشة في أميركا والأمريكان عارفينهم كويس لإنهم بيملكوا نادي بيلعب كرة قدم أميريكية اللي هي اللعبة اللي بيلعبها ناس لابسة خوذ في رأسها وماسكين كورة شبه القلقاسة دي إسمه تامبا باي باكانييرز Tampa Bay Buccaneers .. المهم إن في مايو 2005 في صفقة حوليها كلام كتير عيلة الجليزر إشتروا مانشستر يونايتد وعايزك تعرف إن قبل الصفقة دي مانشستر يونايتد كان نادي مش مديون بقرش صاغ واحد وهوبا بعد الصفقة ما إتمضت بقي نادي مديون بفوق 500 مليون جنيه إسترليني ودي لوحدها حاجة بتخلي أي مشجع لمانشستر يونايتد ضغطه يعلي لما حد يجيب قدامه سيرة عيلة جليزر .. عايز أقولك إن في أول ماتش لمانشستر يونايتد في الدوري الممتاز بعد ما الصفقة إتعملت العربية اللي كان راكبها أفراد العيلة البؤس دي الجمهور هجم عليها والعربية مدخلتش الباركينج بتاع الاستاد إلا بحماية البوليس .. سنة 2010 قرف الجمهور من عيلة جليزر وصل إنهم بدأوا حملة سموها حملة الأخضر والذهبي ودي كانت الألوان الأصلية لتي شيرت النادي قبل ما يتغير إسمه لمانشستر يونايتد ويبقي اللون الأحمر هو اللون الرسمي للتي شيرتات بتاعته .. من 2005 ومشاعر القرف ولاحظ إني مختار لفظ القرف مش الغضب مسيطرة علي جمهور مانشستر يونايتد تجاه ملاك النادي يعني حالة اليأس اللي مسيطرة علي مشاعر مشجعي النادي دلوقتي الحقيقة هي إحساس جديد بدأوا يجربوه أول إمبارح .. لو ربنا أراد وبقي معاك فلوس تروح تتفرج علي أي ماتش علي استاد الأولد ترافورد حتلاقي جرافيتي واستيكرات وبانرات كتير مكتوب عليها حب يونايتد بس إكره الجليزر Love United Hate Glazer.

مشكلة جمهور مانشستر يونايتد مع عيلة الجليزر إنت تقدر تلخصها في نقطتين:

• الأولانية إن سيطرة العيلة دي علي النادي واقفة علي النادي بخسارة وده يبقي الجزء المالي من القضية المتعلق بالفلوس وده محتاج إنك تبقي فاهمه كويس.
• الثانية هي إن من 2005 لحد 2024 إنت قصاد واقع متقدرش تنكره إن نتايج مانشستر يونايتد كنادي كرة قدم بقت في النازل قصاد إن الغريمين التقليديين للنادي اللي هم مانشستر سيتي وليفربول نتايجهم في الطالع ودي نقطة أي مشجع كرة قدم عارفها كويس.

مشكلة الفلوس .. دي حق النادي يا ولاد الرفضي:

مش لازم تبقي بتشجع مانشستر يونايتد عشان الجملة اللي جايه دي تحرق دمك .. جاهز؟ .. لأكثر من 20 سنة مش بس نادي مانشستر يونايتد كان وسيلة إن عيلة جليزر تخلص من الديون اللي عليها إنما كان هو النادي الوحيد في إنجلترا اللي ملزم إنه يدفع أرباح الأسهم بتاعته لأعضاء مجلس الإدارة اللي هم أفراد عيلة الجليزر .. خلال الخمس سنين اللي فاتوا مفيش نادي في إنجلترا كان مطلوب منه يدفع فلوس للملاك بتوعه إلا مانشستر يونايتد والوضع مبدأش يتغير غير بداية من سنة 2023 لما أعضاء مجلس الإدارة قرروا إن فلوس أرباح أسهم النادي في البورصة تروح في ميزانية شراء اللاعيبة مش لجيوبهم الشخصية .. اللي أنا عايز أقوله إن عيلة الجليزر كلت الشهد من إمتلاكها للنادي ودي حاجة معصبة جمهوره جداً وده شعور مفهوم يعني لما تعرف إن سنة 2015 بعد 10 سنين من شراءهم للنادي تلاقي إن العيلة دي إسترزقت من النادي بفوق المليار جنيه إسترليني راحت في شكل سداد لديون كانت علي العيلة وأرباح لأسهم النادي في البورصة كانت من نصيب أعضاء مجلس الإدارة اللي هم الست أخوات بتوع العيلة يبقي من حقك إنك تستني اليوم اللي العيلة دي تغور في ستين ألف داهية بعيد عن باب النادي.

علي الناحية الثانية خالص من المحيط الأطلنطي لما تشوف جمهور نادي تامبا باي باكانييرز رأيهم إيه في عيلة الجليزر فشوية وحيشيلوهم فوق الراس وده منطقي جداً بالنظر إن العيلة إشترت النادي سنة 1995 ودفعت دم قلبها عشان تبني أستاد جديد ومقر جديد للنادي .. مش بس كده .. سنة 2016 بدأت عملية إعادة تأهيل شاملة لاستاد رايموند جيمس Raymond James Stadium اللي هو الاستاد بتاع النادي عشان يتلعب عليه نهائي دوري كرة القدم الأميريكية اللي الأمريكان بيسموه سوبر بول Super Bowl سنة 2021 واللي كسب البطولة في السنة دي يبقي نادي تامبا باي باكانييرز بعد ما عيلة الجليزر في أول الموسم دفعت دم قلبها عشان تشتري لاعب كرة القدم الأميريكية الأسطوري (توم برايدي Tom Brady) اللي تقدر تقول عليه (كريستيانو رونالدو Cristiano Ronaldo) بتاع كرة القدم الأميريكية .. طبعاً جمهور مانشستر يونايتد بيبص لكل المصاريف دي كلها وبيقول بفلوسي يا ولاد الرفضي بفلوسي.

الشعور العام المسيطر علي جمهور مانشستر يونايتد هو إنهم ولاد البطة السودا .. عيلة الجليزر تصرف علي نادي تامبا باي باكانييرز عشان يكسب Super Bowl 2021 قصاد إن اليونايتد مش عارف ياخد لقب Premier League في الوقت اللي من 2005 مانشستر سيتي خدوا 6 أقاب دوري ولقب دوري أبطال أوروبا وليفربول معاهم بطولة دوري وبطولة دوري أبطال أوروبا .. عيلة الجليزر تصرف علي استاد جديد عشان خاطر عيون مشجعي نادي تامبا باي باكانييرز في الوقت اللي استاد أولد ترافورد Old Trafford متحطش فيه مسمار جديد من 2005 ولما الدنيا تمطر سقف الاستاد بيسرب مياه .. يارجل ده بقي أي فرقة تيجي تلاعب مانشستر يونايتد في الأولد ترافورد لازم جمهور الفرقة اللي بتزور الاستاد يهزقوا مشجعي اليونايتد ويغنولهم الاستاد بتاعكوا بيفك من بعضه .. هو فيه أكتر من قرار الإتحاد الإنجليزي لكرة القدم استبعاد استاد أولد ترافورد من قائمة الاستادات اللي حتتلعب عليها ماتشات بطولة أمم أوروبا 2028؟ .. علي الناحية الثانية عيلة الجليزر لو سألتهم يقولولك والله ظلم عشان إحنا في إبريل 2022 جبنا شركة استشارات هندسية إسمها بوبيولوس Populous ودي الشركة اللي صممت استاد توتنهام الجديد Tottenham Hotspur Stadioum وأستاد لوسيل في قطر اللي إتلعب عليه نهائي كأس العالم 2022 عشان يعملوا تصميمات تطوير أستاد أولد ترافورد بس الحق يتقال إننا أدينا أهو في 2024 ومفيش لوحة واحدة توحد ربنا طلعت تورينا شكل الأستاد حيبقي عامل إزاي.

علي سبيل المقارنة بس وعشان تعرف إزاي الأندية الكبيرة بتهتم أوي بتكبير استاداتها فعايزك تعرف إن من 2016 إدارة ليفربول صرفت فوق 195 مليون جنيه استرليني عشان تبني مدرجين أضافيين في استاد أنفيلد بحيث السعة الإجمالية للاستاد تزيد بحوالي 15,000 مشجع .. إدارة مانشستر سيتي هي كمان صرفت 200 مليون جنيه إسترليني علي مقر تدريب جديد للنادي سنة 2014 ومش بس مقر التدريب لإن ناس كتير متعرفش إن إستاد الإتحاد أساساً إتبني سنة 2002 عشان تتلعب عليه ماتشات دورة ألعاب الكومنويلث الأوليمبية فهو أستاد فعلياً قديم وعشان كده إدارة السيتي بتخطط إنها لحد سنة 2026 حتبعزقلها 300 مليون جنيه إسترليني علي تجديدات فيه .. وعشان تاني أنا بقف قدام المواقف اللي تحسسك إنك بتتفرج علي ناس فاهمة شغلها فمن ضمن القرارات اللي السير (جيم راتكليف) خدها إنه ناوي يرميله 250 مليون جنيه إسترليني علي تجديدات في استاد الأولد ترافورد وعلي مقر تدريب النادي اللي بيسموه كارينجتون Carrington وإتبني سنة 2000 وزيه زي الاستاد متحطش فيه مسمار من ساعة ما إتبني .. برده من ضمن القرارات اللي وقفت قدامها إن سير (جيم راتكليف) خطف المدير التنفيذي لمانشستر سيتي (عمر برادة Omar Berrada) عشان يجي يونايتد.

مشكلة النتايج .. كان يوم أسود لما مشيت يا (رونالدو):

ناس كتير مقتنعة إقتناع تام إن مشكلة اليونايتد بدأت سنة 2013 لما قرر المدير الفني الأسطوري سير (أليكس فيرجسون Sir Alex Ferguson) إنه يعتزل .. ومش لوحده .. هو خد معاه في لستة اللي طالعين معاش المدير التنفيذي للنادي (ديفيد جيل David Gill) وده خلق زي ما دايماً بحب أقول زي ما بيغني الهضبة سبت فراغ كبير .. بعد 27 سنة في خدمة النادي بصفته مدير فني ومدرب وكشاف مواهب فالحقيقة مكنش ينفع إنك تلاقي حد يجي بسهولة كده يحل محل السير (أليكس) حتي لو كان الحد ده من إختياره الشخصي اللي هو (ديفيد مويس David Moyes) .. حالة الفراغ دي هي اللي سمحت لناس علي الله حكايتها إنها تحاول تملاه زي (إيد وودورد Ed Woodward) اللي بصفته مدير تنفيذي لبس النادي في الحيط .. دي النظرية اللي كل عشاق اليونايتد حافظينها صم وتلاقيهم كل ما يشوفوا السير (أليكس) بيحضر أي ماتش لليونايتد في الأولد ترافورد في سرهم يقولوا بعدك يابا أنا شفت الويل عاشرت الخاين وفاكره أصيل .. بس يمكن الرأي اللي أنا جاي أكلمك عنه إن السير (أليكس) مش بريء براءة الذئب من دم سيدنا (يوسف) عليه السلام زي ما إنت متخيل لإن السير (أليكس) في رأيي أنا الشخصي بيتحمل جزء مش صغير من المسئولية وخليني أفهمك ليه.

في رأيي بداية الإنهيار اللي عايشه اليونايتد دلوقتي بدأت سنة 2009 يعني بعد 4 سنين من استحواذ عيلة الجليزر علي النادي لما إتاخد القرار الغريب إن (كريستيانو رونالدو) إتساب يروح ريال مدريد برقم خزعبلي وقتها اللي هو 80 مليون جنيه إسترليني وفي نفس السنة يطلع القرار الأغرب إن النادي ينسحب من صفقة الشراء الرسمي بتاعة (كارلوس تيفيز Carlos Tevez) من شركة Media Sprots Investments اللي كانت بتمثل اللاعب .. خليني أفكرك إن لحد سنة 2009 (تيفيز) كان بقاله سنتين بيلعب في اليونايتد علي سبيل الإعارة وكان المفروض فيه إتفاق إن في السنة دي اللاعب ينتقل بشكل رسمي للنادي واللي طلع قرار بالتراجع عنه .. فاكر إيه اللي حصل وقتها؟ .. (تيفيز) راح السيتي في الوقت اللي اليونايتد صرف 24 مليون جنيه إسترليني عشان يجيبوا البديل المنتظر بتاعه (أنتونيو فالنسيا Antonio Valencia) واللي المفروض إنه كان ينسي جمهور اليونايتد سيرة (رونالدو) وكان (مايكل أوين Michael Owen) اللي كان عنده وقتها 29 سنة.

إنت فاهم انا رايح فين .. سنة 2009 كانت بداية التريند إن السيتي بيصرف واليونايتد بيستنصح .. سنة 2009 السيتي صرف 160 مليون جنيه إسترليني علي 6 صفقات .. الموسم اللي وراه اللي هو 2010 (فيرجسون) طلع قال إن السيتي بيودوا نفسهم في داهية لما صرفوا 125 مليون جنيه إسترليني علي 3 صفقات بس اللي هم (يايا توريه Yaya Toure) و(ديفيد سيلفا David Silva) و(جيمس ميلنر James Milner) وال3 صفقات بسم الله ما شاء الله كانوا زي الفل قصاد إن في نفس السنة اليونايتد جاب جناح إسمه (بيبي Bebe) محدش فاكره وجاب المهاجم المكسيكي (خافيير هيرنانديز Javier Hernandez) ب39 مليون جنيه إسترليني .. الإثنين كان ثمنهم علي بعض 39 مليون مش الواحد خلي بالك .. اللي كان بيعمله السير (أليكس) وقتها إتقال إنه إستنصاح اللي الناس بتوع الكورة بيحبوا يسموه Value in the Market بس السر اللي بعد كده عرفناه إن عيلة الجليزر هي اللي كانت بتودي السير (أليكس) لده بإنه كل ما يطلب فلوس يقولوله كان علي عيني .. سنة 2009 لما (رونالدو) و(تيفيز) مشيوا اليونايتد خرج من المولد بلا حمص .. زيرو بطولات .. الغريبة إن ده وقتها علي قلب عيلة الجليزر كان زي العسل لإن ده إتشاف إن معناه إن مفيش فلوس حتتدفع كBonus للاعيبة .. طول ما اليونايتد بيلعب في دوري أبطال أوروبا زي الفل .. مش مهم نكسب دوري الأبطال .. المهم نتأهل .. فجأة اليونايتد قلب علي أرسنال وقت ما كان بيدربه (أرسين فينجر Arsene Wenger) بعد ما النادي صرف اللي وراه واللي قدامه علي بناء استاد الإمارات.

في أكتوبر 2010 (واين روني Wayne Rooney) اللي كان بيتبصله وقتها علي إنه قائد الفرقة راح قعد مع (ديفيد جيل) وقاله حال النادي مش عاجبني والحقيقة إن (ديفيد جيل) جابهاله علي بلاطة .. النادي مفيهوش فلوس ولو فيه فالفلوس دي مش حتتصرف علي لاعيبة .. سنة 2011 ميركاتو مانشستر يونايتد بجلالة قدره كانت 60 مليون جنيه إسترليني راحوا في شراء (ديفيد دي خيا David de Gea) و(فيل جونز Phil Jones) و(أشلي يونج Ashely Young) .. خلال الفترة من 2009 ودي السنة اللي بدأت فيها الدنيا تبوظ لحد 2013 ودي السنة اللي السير (أليكس) إعتزل فيها اليونايتد جاب بطولتين دوري بس السر وراهم كان خبرة ودهلكة السير (أليكس) و(ديفيد جيل) مش حاجة تانية قصاد إن السيتي كان بيصرف بغباوة .. يعني أنا مثلاً بقف كتير قصاد صفقة شراء (روبين فان بيرسي Robin van Persie) من أرسنال سنة 2012 بيدوبك 24 مليون جنيه إسترليني عشان تجيب لاعيب يجيبلك 26 جون في 38 ماتش ومعاه أخر لقب دوري يخش النيش بتاع النادي .. اللي أنا عايز أقوله إن الدنيا كانت بتفك من بعضها من 2009 بس بمجرد ما الكبار طلعوا معاش وجه حد مش مؤهل يمسك كاشير ماكدونالدز بتاع كارتة مصر أسكندرية الصحراوي زي (إيد وودورد) مسك النادي فالدنيا باظت باظت خالص.

ودي النقطة اللي عندها مشكلة الفلوس ومشكلة النتايج بياخدوا بعض بالحضن .. عيلة الجليزر كانت جايه تسترزق من النادي فهم مكانوش بيبصوا للنادي علي إنه مؤسسة قد ما كانوا بيبصوله علي إنه بيزنس معمول عشان يجيب فلوس بغض النظر عن الكواليتي بتاعة البيزنس .. بمعني .. أنا من الناس المقتنعة إن مطعم صبحي كابر لما قرر يسيب مكانه القديم وسط حواري روض الفرج وينقل لمول جديد لانج فهو صحيح كبيزنس هو نجح لإن الأرباح اللي بتجيله من المكان الجديد أكيد أعلي من القديم بس قصاد الربح المادي هو خسر روح المكان .. خسر الكواليتي .. عيلة الجليزر من أول يوم وهي مش شايفة غير الرقم النهائي بتاع أرباح النادي .. أي خطوة بتتعمل هدفها مش إن النادي يجيب بطولة قد ما كانت عشان في أخر السنة مجلس الإدارة يحقق التارجيت بتاعه وتجيله النسبة بتاعة أرباح أسهم النادي في البورصة .. كل صفقات شراء اللاعيبة اللي برخص التراب كان ده السبب اللي وراها .. حتي تعيين (إيد وودورد) برده ده كان المبرر وراه .. سنة 2005 هو كان شغال في بنك J.P. Morgan & Co. واللي بالمناسبة كان واحد من البنوك اللي كانت ورا الأزمة المالية العالمية بس كشغل Freelance هو كان المستشار المالي لعيلة جليزر وهي بتشتري النادي .. سنة 2007 جابوه يبقي المستشار المالي بتاعهم وبمجرد ما السير (أليكس) طلع معاش خلوه مدير تنفيذي مش لسبب غير إن (إيد وودورد) بحكم إنه بتاع بنوك فهو فاهم دماغ صحاب الشغل كويس وعشان كده مهما هو عك الدنيا .. مهما اليونايتد عمل صفقات زي الزفت .. مهما طلع من مواسم زيرو بطولات .. هو عارف إن دي أخر حاجة بتفكر فيها عيلة جليزر طول ما في أخر السنة أرباح النادي جايبه همها ودي كانت النقطة اللي بتخلي مشجعي اليونايتد بتشد في شعرها .. إزاي النادي في النازل والرجل ده مكمل في منصبه عادي؟

ده حقيقة الفشل اللي عاشه اليونايتد خلال السنين بتاعة عيلة جليزر .. الناس كلها تقولهم إن مفيش حاجة إسمها نادي كرة قدم من غير مدير رياضي .. يطلعوا يقولوا للناس إنهم حيعينوا واحد سنة 2019 .. يبصوا للمرتبات اللي الناس طلبتها يلاقوها كبيرة يفضلوا سنتين ميجيبوش حد .. يجيبوا (جوزيه مورينيو Jose Mourinho) يمسك الفرقة يقولهم عايز أجيب جناح إنترميلان (إيفان بيريسيتش Ivan Perisic) والكلام ده كان سنة 2017 يلاقي إن (إيد وودورد) باعتله Email يقوله معلش مش حينفع أجيبلك اللاعيب اللي إنت عايزه عشان أنا مش شايف إننا لما نجيبه حنعرف نبيع تي شيرتات كتير عليها أسمه .. بعد كاس العالم 2018 (مورينيو) طلب إن (أنتوني مارسيال Anthony Marcial) يتباع لإنه ملوش لازمه .. يلاقي جاله Email من (إيد ووردورد) إن والله مينفعش نبيع اللاعيب عشان (جويل جليزر Joel Glazer) واحد من الست أخوات بتوع مجلس الإدارة بيحبه ومش عايزه يمشي من النادي .. الدنيا ماشيه بالكوسة وبالحب .. يامؤمن ده لما (أولي جونار سولشاير Ole Gunnar Solskjaer) مسك الفرقة كان حاطط خطة إنه ينزل بمعدل أعمار الفرقة كلها فحط 3 صفقات للاعيبه هو شايفهم حيبقوا مستقبل النادي اللي هم (إيرلينج هالاند Erling Haaland) أيام ما كان لسه ناشيء في أر بي سالزبورج النمساوي .. (جود بيلينجهام Jude Bellingham) وقت ما كان لسه ورور في نادي بيرمنجهام .. (ديكلان رايس Declan Rice) اللي كان لسه مطرود من أكاديمية تشيلسي وراح يجرب حظه في ويستهام .. طبعاً (إيد وودورد) بحكمته شاف إن ولا لاعيب من دول ينفع يبقي الوجه التجاري لمانشستر يونايتد وقرر يجيب (دوني فان دي بييك Donny van de Beek) من أياكس أمستردام ب40 مليون جنيه إسترليني.

إنك لما نادي تقرر مين يجي ومين يمشي بناء علي مين حيتباعله تي شيرتات أكتر ومين عنده فولورز أكتر علي أنستاجرام يبقي إنت مينفعش تبقي نادي .. تبقي بيزنس كل همه الفلوس بس مش نادي بينافس علي بطولات .. إنك في ميركاتو 2021 يتقالك إنك إيه رأيك تجيب (كيرين تريبيير Kieren Trippier) اللي كان وقتها بيلعب في أتليتيكو مدريد وعايز يمشي وعنده لسه 31 سنة فتقول لا يا عم مينفعش فيروح نيوكاسل مقابل 12 مليون جنيه إسترليني ويبقي هو حجر الأساس في المشروع السعودي للنادي بس يبقي علي قلبك زي العسل إنك بعدها بأسبوع تجيب (رونالدو) اللي عنده 36 سنة من يوفينتوس وتدفع فيه نفس 12 مليون جنيه إسترليني فده ملوش غير تفسير واحد إنك مش فاهم يعني إيه نادي كرة قدم .. إنت فاهم يعني إيه بيزنس بس مش فاهم يعني إيه كرة قدم لإن صحيح صفقة (رونالدو) دخلت فلوس حلوة للنادي بس منقلتش النادي لقدام .. يمكن عشان كده أنا شايف إن اللي بيعمله السير (جيم راتكليف) لازم تقف قدامه وتتابعه وتهتم بيه .. صحيح الرجل قدامه سنين عشان يرجع اليونايتد ينيم أوروبا كلها من المغرب زي زمان بس علي الأقل هو ماشي في الطريق الصح.

المصدر:

• مقالة بعنوان What’s gone wrong at Manchester United under Glazer ownership? نشرت في موقع وكالة ESPN وده لينك المقالة الأصلية:
  https://www.newsbreak.com/news/3325385837749-what-s-gone-wrong-at-manchester-united-under-glazer-ownership