اللي حنتكلم عنه النهاردة هو بندقية ألية كل حاجة فيها غريبة .. شكلها غريب .. تصميمها غريب .. طريقة التنشين بيها غريبة .. عيار الطلقات اللي بتستخدمه غريب .. حتي المكان اللي مظروف الطلقة بتخرج بيه منها غريب .. يمكن عشان هي كلها غريبة فالناس بتاعة هوليوود ما بيصدقوا يطلعوها في أفلامهم .. أنا مستعد أراهنك إنك شفتها علي الأقل في فيلم أو مسلسل قبل كده .. اسمها P90 وعملتها هي شركة السلاح البلجيكية FN Herstal وعشان كده فيه ناس بتسميها FN P90 .. هي بندقية مش بطاله ويمكن عشان كده فيه فوق 40 جهة أمنية علي مستوي العالم بتستخدمها من ضمنهم جهاز حماية الرئيس الأميريكي اللي يمكن إنت عارفهم باسم سيكريت سيرفس US Secret Service خصوصاً إن البندقية دي فيها ميزة حلوة أوي إنك تنفع تستخدمها سواء كنت أيمن أو أشول.
الميلاد .. يلا نعمل حاجة مختلفة:
بداية فكرة FN P90 كانت سنة 1986 لما حلف شمال الأطلنطي NATO نزل مناقصة بين شركات السلاح إنه عايز يعمل حاجة غريبة أوي .. هو عايز شركات السلاح اللي بتعمل أسلحة خفيفة اللي هي البنادق الألية والمسدسات يقدموا تصميم شبه عرض الكومبو بتاع ماكدونالدز اللي هو سندوتش ومعاه بطاطس وبيبس .. هم عايزين تصميم لبندقية ألية ومسدس يكونوا الاتنين بيستخدموا نفس عيار الطلقة .. باااااس .. أي حد دخل الجيش بيقرأ الكلام ده هو حرفياً بيهرش في شعره دلوقتي .. السؤال اللي غالباً حيسيح الخلايا العصبية في مخك دلوقتي هو ليه؟ .. إيه اللي يخليك عايز العسكري يشيل بندقية ألية ومسدس بيستخدموا نفس عيار الطلقات؟ .. الحقيقة هو إن محدش عارف ليه بس فيه أراء .. يعني مثلاً فيه رأي يحترم الحقيقة بيقول إن مع تطور تكنولوجيا الدروع الواقية ضد الرصص بقي واضح إن عيار الطلقات التسعة مليمتر بتاعة المسدسات مبقاش بيحوق ومحتاجين طلقات بعيار جديد .. الله أعلم .. اللي إحنا عارفينه إنك عشان تعمل ده لازم الطلقة نفسها تبقي صغيرة بما يكفي إنها تتحط في خزنة مسدس وبناء عليه البندقية الألية اللي إنت بتتكلم عنها مش حينفع تتحط تحت مظلة Assault Rifle زي مثلاً الكلاشينكوف أو M-16 .. هي لازم تبقي حاجة أصغر .. عشان كده FN P90 بتتحط تحت مظلة Personal Defense Weapon أو PDW اللي هو حاجة شبه الرشاشات الخفيفة زي العوزي .. سنة 1990 شركة FN بتقدم للعالم عرض الكومبو بتاعهم اللي هم سموه Project 9.0 ومنه إتاخد اسمه P90 عشان يبقي اسم البندقية اللي هم عملوها هي والمسدس بتاعها FN Five-Seven.
طريقة الشغل .. عارف علبة الدومينو:
الناس اللي اشتغلت علي مشروع FN P90 كان ممكن يعملوا حاجة شبه العوزي اللي هو مدفع رشاش صغير شكله شبه المسدس بس خزنته بتشيل طلقات أكتر .. بس هم حبوا يعلوا علي نفسهم .. هم خدوا فكرة كانت لسه طالعه جديد اسمها Bullpup .. عشان تفهم يعني إيه Bullpup بص علي أي بندقية كلاشينكوف إنت شلتها في حالة إنك دخلت الجيش أو اتفرجت عليها في اي فيلم أو شفتها مع عسكري في الشارع في حالة إنك زي حالاتي خدت إعفاء .. حتلاقي الزناد وميكانيزم ضرب النار ورا خزنة الذخيرة .. صح .. فكرة Bullpup بمنتهي البساطة هي إنك تخلي الزناد وميكانيزم ضرب النار قدام خزنة الذخيرة .. التغيير البسيط في شكل البندقية ده بيخليك تعمل حاجة مهمة جداً إن الماسورة اللي بتجري فيها الطلقة قبل ما تطلع من البندقية بتاعتك بتكون اقصر بكتير في حالة Bullpup مقارنة ببندقية عادية .. لما الماسورة بتكون أقصر فده بيخلي طول البندقية ككل بقي أقصر بكتير مقارنة بالبندقية العادية .. في حالة FN P90 فطولها علي بعضه تقريباً قد طول كتفك.
لحد هنا زي الفل بس أخواتك في شركة FN وأخص بالذكر هنا المهندس الاكسلانس (ستيفان فيرارد Stephane Ferrard) زي ما قلتلك كانوا عايزين يعلوا علي نفسهم .. هم بدل ما يحطوا الخزنة ورا المقبض زي التصميم العادي بتاع Bullpup حطوها فوق الزناد ومظروف الطلقة بقي بيطلع من تحت مكان المقبض .. مش بس كده .. هم خلوا الخزنة معمولة من البلاستيك وتكون شفافة عشان وإنت بتضرب نار تبقي شايف حرفياً إنت فاضلك كام طلقة في الخزنة والخزنة بقت أفقية فبقت بتقدر تشيل لحد 50 طلقة .. إنت لو دخلت علي YouTube اتفرجت علي طريقة تعمير خزنة الذخيرة بتاعة البندقية P90 هي حرفياً شبه ما تكون بتعبي البلاطات في علبة الدومينو .. التعديلات دي خلت FN P90 هي عبارة عن مدفع رشاش طولة ميجيش 50 سنتيمتر ووزنها يدوبك 2.5 كيلوجرام بيشيل 50 طلقة .. يا بلاش .. إنت قصاد مدفع رشاش خفيف بيقدر يضرب 900 طلقة في الدقيقة ولحظة ما الطلقة بتطلع من الماسورة بتكون سرعتها 705 متر في الثانية بدقة تصويب لحد 200 متر .. أرقام محترمة جدأ.
عيار الطلقة .. يا أهم ميزة يا أسوأ عيب:
زي ما قلتلك من شوية فالبندقية دي اتولدت بسبب رغبة اقسملك بالله ما حد عارف جت منين إن NATO يعمل مسدس وبندقية بيستخدموا نفس عيار الطلقة .. عشان كده FN P90 بتستخدم عيار طلقات مخصوص ليها هي والمسدس اللي نزل معاها اللي اسمه FN Five Seven .. عيار أكبر سيكا من التسعة مليمتر اللي بتستخدم في أي مسدس وأصغير سيكا من العيار اللي بتضربه في البنادق الألية زي الكلاشينكوف .. الطلقة دي اسمها SS90 وهي بتتعمل بابعاد 5.7 مليمتر قطر وطولها 28 مليمتر .. قصاد إن الطلقة التسعة مليمتر ابعادها 9 مليمتر قطر و19 مليمتر طول .. الطلقة SS90 صممها اتنين مهندسين (جون بول دينيس Jean-Paul Denis) و (مارك نيوفورج Marc Neuforge) واشتغلوا عليها كتير لحد ما طوروها وبقي اسمها SS190 واللي وزنها بقي تقريباً نص وزن الطلقة التسعة مليمتر .. ده معناه إن لنفس وزن الحمولة من الذخيرة فالعسكري يقدر يشيل ضعف عدد الطلقات .. مش بس كده .. زي ما قلتلك من شوية فسرعة الطلقة SS190 وهي بتخرج من البندقية بتكون فوق 705 متر في الثانية ودي سرعة كافية إنها تخترق أي درع واقي من الرصاص معمول من الكيفلار لحد مسافة 200 متر.
خليني أختم معاك بإن سبب أساسي ورا إن FN P90 حاجة تانية خالص في عالم الأسلحة الخفيفة هي إنها طلعت من تحت إيد شركة FN .. الشركة البليجيكي Fabrique Nationale d’Herstal اللي سبحان الله علي عكس القوات المسحلة البلجيكية اللي كل ما يخشوا حرب يحتاسوا لحد ما طلعت عليهم سمعة يا حوسة البلجيك إلا إن الشركة دي ما شاء الله عليهم أيدهم تتلف في حرير .. هم اللي عملوا المسدس الأسطوري Browning Hi-Power .. هم اللي عملوا البندقية FN FAL اللي كانت البندقية الأساسية في إيد القوات المسلحة الإسرائيلية وقت حرب أكتوبر 1973 .. بس يمكن الدرس اللي يستحق نقف قدامه شوية في قصة البندقية FN P90 إنك مش شرط تعمل منتج إنت عامله لسوق معين وينجح في السوق ده .. عادي جداً تجيب فلوس من سوق إنت مكنتش مستنيه .. بمعني .. لما البندقية دي اتعملت هي كانت محطوطة تحت مظلة Personal Defense Weapon ومن اسمها فهي بندقية دفاعية مش هجومية .. هي معمولة ومتصممة عشان خاطر عناصر الشرطة أو الحراسات الخاصة وكسلاح للعساكر اللي بيخدموا كأطقم للدبابات والمدرعات بس سبحان الله أغلب زباينها بقوا من عناصر القوات الخاصة حول العالم اللي كل شغلهم هو العمليات الهجومية.
أول صفقة بيع للبندقية دي كانت للقوات المسلحة السعودية في اوائل التسعينات .. بس أول استخدام حي للبندقية دي كانت سنة 1997 لما عناصر القوات الخاصة البيروفية (اللي هم بتوع دولة بيرو يعني) قدروا ينهوا أزمة احتجاز الرهائن في السفارة اليابانية في العاصمة ليما في العملية اللي اتعرفت باسم Operation Chavin de Hauntar .. برده من الاستخدامات المعروفة للبندقية دي في الميدان كانت سنة 2011 وقت الثورة الليبية لما عناصر الأمن اللي كانت بتدافع عن حكم الرئيس الليبي (معمر القذافي) الله يرحمه استخدمتها وكتير من البنادق دي بقت تحت ايد الثوار الليبيين دلوقتي وبقوا بيضربوا بيها بعض في الحرب الأهلية اللي مكملة لحد دلوقتي .. مع الاستخدام المستمر للبندقية دي في الحروب فشركة FN بقت بتطور فيها زي ما حصل سنة 1999 لما نزلوا نسخة اسمها P90 TR حطولها حاجة اسمها سكة حديد بيكاتيني Picatinny Rail ودي عبارة عن مجري بيتركب عليها منظار تنشين وشوية أكسسوارات .. عشان يجيبوا فلوس من السوق الأميريكي فهم عملوا نسخة للاستخدام المدني سموها FN PS90 لإن الأمريكان خصوصاً صعايدة أميركا اللي عايشين في الجنوب مهووسين بفكرة إن كل مواطن يبقي عنده سلاح وأنا هنا مش بتكلم عن طبنجة أو بندقية صيد .. أنا بتكلم عن بنادق ألية زي M4-Carbine أو AR-15 .. لحد دلوقتي أغلب التوقعات بتقول إن FN باعت من P90 فوق 20,000 نسخة .. رقم مش بطال بس في نفس الوقت يوريك مشكلة البندقية دي الأساسية وهي إن الشكل مش كل حاجة.
عشان بلد ما تختار بندقية ألية تبقي سلاح معتمد في قواتها المسلحة بتبقي عملية شبه إنك تختار بنت تتجوزها .. اه الشكل عليه عامل كبير .. بس في نفس الوقت الاصل مهم .. التربية مهمة .. إنك تقدر تعتمد عليها ده عامل مهم .. هل السلاح ده فيه تكنولوجيا جديدة أوي بتخلي استخدامه صعب علي العساكر اللي مش متعلمين كويس؟ .. هل عيار الطلقات اللي بيستخدمه السلاح ده مناسب؟ متاح؟ أعرف أصنعه بسهولة؟ .. كل دي أسئلة بندقية FN P90 مش حقول إجابتها علي الأسئلة دي كلها بلا بس خلينا نتفق إن فيه أسئلة حتخليك تهرش في شعرك وإنت بتحاول تجاوب عليها من الحيرة وإنك مش متؤكد من الإجابة .. مجرد ما الشك يخش قلبك تبقي العروسة دي متنفعش.
المصادر:
- مقالة بعنوان The FN P90: A special operations and personal defense powerhouse نشرت في موقع SOFREP وده لينك المقالة الأصلية:
The FN P90: A Special Operations and Personal Defense Powerhouse | SOFREP - مقالة بعنوان FN P90: An advanced personal defense weapon نشرت في موقع Press Pulse وده لينك المقالة الأصلية:
FN P90: An advanced personal defense weapon - مقالة بعنوان An in-depth look at the FN PS90 نشرت في موقع Country Boy Artillery وده لينك المقالة الأصلية:
An In-Depth Look at the FN PS90 — Country Boy Artillery
