لينك التسجيل الصوتي علي ساوند كلاود:
https://on.soundcloud.com/MmmHJq1xVO4cinngpw
ياتري لو أنا جيت قلتلك كلمة سلاح نووي ياتري إيه أول حاجة بتيجي في دماغك؟ .. هل خيالك حيوديك لمنظر سحابة عيش الغراب Mushroom Cloud والدمار الشامل لمدن كاملة في لمح البصر؟ .. ياتري ذاكرتك بتوريك صور الدمار اللي اتعرضت له هيروشيما وناجازاكي في الحرب العالمية الثانية مع الموسيقي التصويرية لفيلم أوبينهايمر Oppenheimer؟ .. رغم إن ده تبسيط صارخ للموضوع بتاع الأسلحة النووية التكتيكية بس صدقني لو قلتلك ده الإنطباع العام عند أغلب الناس واللي صادف إن فيه منهم ناس في مناصب تقيلة .. يعني مثلاً في مارس 2023 طلع الرئيس بتاع بيلاروسيا (أليكساندر لوكاشينكو Aleksandr Lukashenka) قال إن روسيا بعتتله أسلحة نووية تكتيكية قدرتها التدميرية شبه بتاعة هيروشيما وناجازاكي وكان فرحان بنفسه أوي وهو بيقول كده قدام الناس .. هو في دماغة كلمة سلاح نووي تكتيكي يعني قنبلة بتعمل بوم كبيرة أميركا بتخاف منها .. الحقيقة إن سبب إننا حنتكلم عن الموضوع ده إن ناس كتير متعرفش إن السلاح النووي أو Nuclear Weapon هو في الأول وفي الأخر سلاح .. إذن هو مش حاجة واحدة .. السلاح النووي ده عيلة كبيرة وعشان كده إحنا محتاجين نفتح الموضوع ده بإننا بسم الله الرحمن الرحيم كده محتاجينك تفهم إن كلمة سلاح نووي دي بيتحط تحتيها سكتين:
- السكة الأولي هي ما يسمي الأسلحة النووية الأستراتيجية Strategic Nuclear Weapon ودي بتاعة هيروشيما وناجازاكي .. دي أسلحة هدفها إن مدن كاملة تروح في ستين داهية ودي الأسلحة النووية اللي في الأفلام الأمريكاني يقولك أميركا وروسيا رافعين النووي بتاعهم علي بعض .. النووي اللي رافعينه ده قصدهم بيه ترسانة الأسلحة النووية الأستراتيجية.
- السكة الثانية ودي اللي إحنا حنركز عليها النهاردة لإنها مصيبة مستخبية محدش بيتكلم عنها كتير وهي الأسلحة النووية التكتيكية Tactical Nuclear Weapons أو TNW .. دي بتبقي سلاح نووي نونو صغير هدفه إنك تدمر هدف محدد مش إنك تمحي مدينة من الوجود وده السبب ورا خطورتها .. هي أولاً وأخيراً سلاح نووي بس الضرر الإشعاعي الناتج عنه قليل .. القدرة التدميرية بتاعته قليلة نسبياً لو قارنتها بالسلاح النووي الاستراتيجي .. تقدر تستخدمها في أي خناقة وده بيخليها مغرية جداً إنك تهوش بيها علي أساس إنك لو رميتها علي حد محدش حيقولك سلامات يا أم أحمد .. هو سلاح نووي بس تقدر تضربه بكذا طريقة يا بطيارة يا بغواصة يا بصاروخ بعيد المدي يا إما حرفيا تحطها في ترلة وتبعتها للمكان اللي عايز تخلص منه .. ومفيش أسهل من إنك تحطها في شنطة ظهر وتبعت انتحاري يفرقع نفسه في داون تاون أي مدينة تعجبك .. مجرد التفكير في سيناريو زي ده يخليك ممكن متنامش بسهولة.
الكلام اللي إحنا عارفينه إن فيه 9 دول علي مستوي العالم هم اللي عندهم أسلحة نووية تكتيكية اللي هم أميركا وروسيا والصين وفرنسا وبريطانيا والهند وباكستان وإسرائيل وكوريا الشمالية .. فيه كلام علي إن بريطانيا وفرنسا تخلصوا من ترسانة الأسلحة النووية التكتيكية بتاعتهم .. روسيا لوحدها ما شاء الله عندها 2000 رأس نووي تكتيكي .. علي الناحية الثانية أميركا عندها 200 رأس نووي تكتيكي منهم 150 متوزعين في القواعد العسكرية الأميريكية في أوروبا وكلهم قنابل B61 بتتوجه بالجاذبية الأرضية يعني بترميها زي الطوبة فوق الهدف اللي إنت عايز تدمره .. الموضوع ده مهم لسبب .. في كل مرة بتسمع في الأخبار أو علي السوشيال ميديا إن فيه مسئول ما وسبحان الله دايما بيكون رفيع المستوي في الكريملين اللي هي الحكومة الروسية بيقول إن بلده بتفكر في استخدام السلاح النووي ضد أوكرانيا عشان يحسموا الحرب اللي شبه اللحمة الجملي دي .. لما الناس دي بتجيب سيرة استخدام سلاح نووي فهم بيتكلموا عن سلاح نووي تكتيكي مش سلاح نووي استراتيجي.
القدرة التدميرية .. إنت بيتقالك إنها محدودة بس هي مش كده:
السلاح النووي التكتيكي برده زيه زي أي سلاح في الدنيا له مدي واسع من القدرة التدميرية .. جري العرف إنك عشان تقيس القدرة التدميرية لأي سلاح نووي فإنت بتستخدم وحدة قياس بيسموها كيلوطن .. عشان تفهمها تخيل معايا إنك مثلاً عايز عايز تفرقع الشارع اللي عايشة فيه الإيكس بتاعتك .. حضرتك غلاوي شوية فبتقول أنا حجيب مادة شديدة الانفجار زي TNT اللي هي اختصار تراي نيترو تولويين Trinitrotoluene وحقول مثلاً إني عشان أجيب عاليها واطيها ححتاج طن كامل يعني 1000 كيلوجرام من مادة TNT وحفرقعها .. الأنفجار بتاع السلاح النووي التكتيكي عشان تفهمه إنت بتتكلم عن إنك تجيب كيلوطن يعني 1000 طن من مادة TNT وتفرقعهم .. وبالمناسبة دي أصغر قنبلة نووية تكتيكية في السوق .. إنت متخيل القدرة التدميرية قد إيه؟ .. مدي القدرة التدميرية للقنابل النووية التكتيكية بيتراوح ما بين كيلوطن لحد 100 كيلوطن .. للمقارنة برده .. السلاح النووي الاستراتيجي القدرة التدميرية بتاعته بتتقاس بالميجاطن .. قنبلة نووية تكتيكية واحدة ممكن تمسح من الوجود نص مدينة القاهرة في لحظة.
مدي التوصيل .. أسرع ديليفري في مصر:
واحده من المشاكل المرتبطة بالسلاح النووي اللي محدش بيتكلم عنها كتير هي ما يسمي Delivery System اللي هو باختصار حترمي السلاح ده علي عدوك إزاي؟ ودي المشكلة اللي للأسف محدش بيستوعبها لما تيجي تتناقش معاهم مثلاً في البرنامج النووي الإيراني .. إن بلد زي إيران يبقي عندها تكنولوجيا تخصيب اليورانيوم لحد ما يبقي Military Grade اللي هو جاهز يتعمل منه قنبلة ده حمادة .. وإن يبقي عندك طريقة ترمي بيها القنبلة دي علي بلد تانية ده حمادة تاني خالص .. وعلي فكرة ده السبب ورا ارتفاع تكاليف الترسانة النووية اللي بتروح اغلبها في تطوير أنظمة التوصيل وصيانتها سواء بقي بتتكلم عن طيارات أو غواصات أو صواريخ .. في حالة الأسلحة النووية التكتيكية فهي عشان قدرتها التدميرية قليلة وحفضل دايماً أقول إن دي حاجة نسبية مقارنة بالأسلحة النووية الأستراتيجية فده بيترجم إن السلاح النووي التكتيكي هو عبارة في الأخر عن قنبلة وزنها صغير .. قنبلة وزنها صغير يبقي ينفع تحطها علي طيارة مقاتلة أو ينفع تلزقها في صاروخ كروز مثلاً .. في كل الحالات إنت مينفعش يبقي عندك سلاح نووي تكتيكي تقدر ترميه لمسافة أبعد من 500 كيلومتر.
بما إن روسيا هي أكتر بلد في العالم عندها ترسانة أسلحة نووية تكتيكية فتعالي نشوف هم لو حبوا يضربوها حيعملوا إيه؟ .. هم عندهم صاروخين عاديين جداً بيقدروا يشيلوا رؤوس متفجرة عادية خالص اللي هم صاروخ اسكندر إم Iskander-M وده صاروخ باليستي يعني صاروح لما بتضربه بيطلع لفوق في السماء يخترق الغلاف الجوي للأرض ويلف شوية في الفضاء لحد ما ينزل فوق دماغ الهدف اللي إنت عايز تدمره بحيث أقصي مسافة ممكن يطيرها 400-500 كيلومتر .. الصاروخ الثاني هو صاروخ كاليبر Kaliber وده بقي حكاية لوحده لإنه بيقدر يطير مسافة 1500 كيلومتر.
إحنا إزاي وصلنا لكده .. طريق طويل أوله سؤال أشمعني هم؟
- المرحلة الأولي: اللي يلحق يعمل حاجة يعملها:
لما الأمريكان رموا القنبلتين النوويتين علي هيروشيما وناجازاكي في أغسطس 1945 عشان ينهوا الحرب العالمية الثانية وبالمرة يخلصولهم علي 210,000 بني أدم محدش كان متخيل القدرة التدميرية للسلاح ده حتبقي كده .. لمجرد إنك تستوعب اللي حصل فقنبلة العيل الصغير Little Boy وده كان الاسم الكودي للقنبلة اللي اترمت علي هيروشيما القدرة التدميرية بتاعتها كانت 15 كيلوطن .. قنبلة الرجل الطخين Fat Man وده كان الاسم الكودي للقنبلة اللي اترمت علي ناجازاكي القدرة التدميرية بتاعتها كانت 21 كيلوطن .. دي أرقام قريبة من القدرات التدميرية بتاعة السلاح النووي التكتيكي اللي وصلنا ليها دلوقتي ورغم كده كانت كافية إنها تمسح مدينة صغيرة من علي الخريطة .. معاك إن الأمريكان قبلها جربوا يفجروا قنبلة نووية في اختبار اتسمي اختبار الثالوث Trinity Test وده اللي انت شفته في فيلم Oppenheimer بس تاني ده اختبار اتعمل بليل وفي حتة صحراء فإنت مكنتش قادر أوي تستوعب شكل الدمار علي مدينة سكنية حيبقي عامل ازاي.
لما الحرب العالمية الثانية خلصت طلع قرار من الرئيس (هاري ترومان Harry Truman) بإن القوات المسلحة الأميريكية مش حتستخدم تاني السلاح النووي تحت أي ظرف بس ده ممنعش إن من بعدها وحنفية تجارب نووية اتكسرت وغرقت الدنيا وخربت التوازن البيئي للكرة الأرضية .. مئات التجارب النووية أميركا عملتها في صحراء نيفادا وفي المحيط الهاديء عشان يفهموا أكتر هو الأنفجار النووي بيتم إزاي وايه العوامل اللي بتأثر فيه .. من أول الحرب العالمية الثانية ما خلصت لحد النكسة تقريبا في 1967 كان سباق بين الأمريكان والسوفييت مين اللي يلحق يعمل قنابل نووية ويلا نجرب طرق جديدة لفرقعتها .. خليك فاكر إن السبب ورا إن الأمريكان أصلا يعملوا كل ده هو الخوف الأزلي من اليوم اللي الإتحاد السوفيتي يتجنن في نفوخه وياخد أوروبا وضع يد .. طب دلوقتي هل نضرب نووي ونمحي أوروبا كمان من الوجود؟ .. طب هو مينفعش نعمل سلاح نووي نونو صغير يدوبك مثلاً يبقي كافي لضرب لواء مدرع كامل؟ .. هو مفيش حاجة كده؟ لازم كله دمار شامل؟
خلال المرحلة اللي بنتكلم عنها اللي هي محشورة بين نهاية الحرب العالمية الثانية سنة 1945 لحد مثلاً حرب أكتوبر سنة 1973 كان فيه عندك أربع أو خمس دول عندهم تكنولوجيا نووية طلعولهم فوق السبعين طريقة لفرقعة القنابل النووية .. .. مرة ندفنها .. مرة نحطها في صاروخ .. مرة نرميها من طيارة زي القنبلة Mark 7 اللي كانت أول قنبلة نووية تكتيكية تعملها اميركا .. ولو رميناها من طيارة مرة نوجهها بالجاذبية .. مرة نوجهها بالليزر .. مرة نوجهها بالرادار .. من ضمن محاولات للإجابة علي السؤال ده كانت في الخمسينات لما الأمريكان عملوا دانة مدفعية سموها أني النووية Atomic Anny .. دي عبارة عن دانة مدفع عادية خالص بس بتقدر تشيل رأس نووي بقدرة تدميرية 15 كيلوطن اللي هو أخت القنبلة اللي اترمت علي هيروشيما بس هي عشان في الأخر دانة مدفع فكانت أخرها تطير 27 كيلومتر وشكراً .. للمقارنة برده .. القاذفة أينولا جاي Enola Gay وده الاسم الكودي للقاذفة طراز B-29 اللي شالت قنبلة Little Boy ورمتها فوق هيروشيما طارت 4350 كيلومتر كاملين عشان ترمي القنبلة وبعد كده رجعت تاني .. الأمريكان وصل بيهم الحال إنهم عملوا رأس نووي متفجر سموها Special Atomic Demolition Munition ودي عبارة وأنا مش بهزر معاك قنبلة نووية بتتحط في شنطة بتتشال علي الظهر عشان يلبسها إنتحاري يفجر نفسه في المكان اللي إنت عايز تدمره .. طبعاً التطور الرهيب اللي حصل في تكنولوجيا الصواريخ بعيدة المدي بدأ يحل المشكلة دي.
سنة 1949 الأتحاد السوفيتي بيفرقع أوي قنبلة نووية ليه عشان يبدأ سباق مين بيفرقع قنابل اكتر يولع .. سنة 1952 أميركا بتعمل أول تجربة تفجير لقنبلة نووية هيدروجينية اللي كانت القدرة التدميرية ليها 10.4 مليون طن من TNT .. كان فيه سفه بيحصل .. السفه ده تجسد سنة 1960 لما إدارة الرئيس الأميريكي (دوايت أيزنهاور Dwight Eisenhower) بدأت تحط أساس الترسانة النووية الأميريكية بإنهم عملوا خطة إن أميركا يبقي عندها رأس نووي لكل مدينة سوفيتية ضمن جزء من سياسة سموها New Look .. يعني اللي اعرفه إن الناس لما بتعمل New Look بيغيروا تسريحة شعرهم مش بيدوروا علي طريقة جديدة لدمار العالم.
- المرحلة الثانية: شكلنا خربناها وقعدنا علي تلها:
من أول السبعينات الحقيقة والأمريكان والسوفييت تقريباً وقفوا قصاد المراية واكتشفوا إن الكلام بيجيب نتيجة أكتر من تخزين السلاح النووي .. يمكن من الزهق .. يمكن من تعب الأعصاب اللي بقاله سنين .. أنا مش بهزر معاك لما بقولك إن بمنتهي البساطة الأمريكان والسوفييت زي ما يكونوا زي اتنين متطلقين مجرجين بعض في المحاكم ومرة واحدة اتهدوا وقالوا لبعض يلا نخرج منها بالمعروف .. سنة 1970 بتتمضي اتفاقية حظر إنتشار الأسلحة النووية Non-Proliferation of Nuclear Weapons أو NPT ودي اتفاقية ركزت فشخ علي إن كل بلد تقلل من مخزونها من الرؤوس النووية الاستراتيجية وكمان مخزون الصواريخ العابرة للقارات ICBMs اللي بتقدر تشيلها وبالمرة كمان مش كل شوية نعمل غواصة نووية تقدر تشيل رؤوس نووية .. في التسعينات حصلت حاجتين بدأوا يخلوا سفه الأمريكان والسوفييت في تكويش الترسانة النووية بتاعتهم يقل وهي إن العالم بدأ يفهم إننا بنفشخ الأرض بكم التجارب النووية اللي اتعملت والثانية هي سقوط الإتحاد السوفيتي إنت بقدرة قادر تحولت من عالم فيه أميركا تحت إيدها 19,000 رأس نووي والإتحاد السوفيتي معاه 35,000 رأس نووي لعالم فيه الأمريكان محيلتهمش غير 3,700 رأس نووي والروس معاهم 4,480 في يناير 2022 .. وده سبب خطورة الموضوع .. روسيا مكتش عندها مشكلة تخسف مخزونها من السلاح النووي الاستراتيجي الأرض بس راسها وألف سيف إن محدش يقرب من ترسانة السلاح النووي التكتيكي بتاعها.
بسبب إصرار السوفييت إن محدش يهوب ناحية مخزونها من الأسلحة النووية التكتيكية لإن السوفييت كانوا شايفين إن ده أهم سلاح في إيدهم عشان يزرعوا الرعب في قلوب دول أوروبا فلما جم الأمريكان والسوفييت يمشوا الخطوة اللي بعد توقيع إتفاقية NPT وهي إتفاقية اسمها Intermediate-Range Nuclear Forces Treaty أو اتفاقية INF اللي هي حظر استخدام الصواريخ متوسطة المدي .. بمنتهي البساطة الاتفاقية دي قالت إن لا السوفييت ولا الأمريكان مسموح ليهم تطوير صواريخ كروز أو صواريخ باليستية مداها من اول 500 لحد 5,500 كيلومتر والاتفاقية دي اتمضت سنة 1987 .. مهم اوي بالنسبة لي إنك تبقي فاهم إن اتفاقية INF دي واللي مهم اكتر بالنسبة لي إنك تبقي عارف إن الإتفاقية دي كيس الشيتوس الحجم العائلي (دونالد ترامب Donald Trump) وقف استخدامها سنة 2018 خلت الدول اللي تحت ايدها سلاح نووي تحط في اعتبارها إن السلاح النووي اللي معايا خلاص كده بقي للردع بس .. اللي هو فكرة لو حد ضربني بالنووي فانا حهد المعبد علي دماغنا كلنا ونسيب الكرة الأرضية للصراصير تعيش من بعدنا .. فكرة إنك شلت من إيد الدول أداة إنها تطور من الصواريخ متوسطة المدي خلت إن علي الورق علي الأقل الأسلحة النووية التكتيكية دي تبلوها وتشربوا ميتها .. سنة 1995 الرئيس الفرنسي (جاك شيراك Jaque Chirac) طلع قرار بإن فرنسا تتخلص من مخزونها من الأسلحة النووية التكتيكية .. قبلها سنة 1992 الرئيس الأميريكي (جورج بوش الأب) عملها ومبقاش لأميركا رؤوس نووية تكتيكية في أوروبا .. سنة 1998 بريطانيا حصلتهم.
- المرحلة الثالثة: راجعين .. نعشق وندوب ونرجع تاني البوم بوم:
فيه نقطة مهم تبقي واضحة ليك عشان دي اللي حنبنبي عليها كلامنا هنا وهي الحقيقة بعيد شوية عن موضوع السلاح النووي وهي فكرة إن الحرب بمفهومها التقليدي مبقتش نافعة ولا بتجيب نتيجة .. خليني أسالك سؤال .. النكسة كانت حرب .. النكسة هي صراع عسكري بين كذا دولة نتج عنها في الاخر إن طرف منهم اللي هو إسرائيل ادي الطرف التاني اللي هو مصر وسوريا والأردن علي قفاهم وخد حتة من أرضهم وضع يد .. العبور كان حرب .. صراع مسلح لفترة محددة إنتهي بنتايج ملموسة وهي توقيع معاهدة السلام .. إمتي اخر حرب إنت سمعت عنها بدأت وإنتهت بنتيجة كل الأطراف معترفه بيها .. مفيش غير حرب الخليج الثانية اللي هي حرب تحرير الكويت .. حرب قامت بسبب غزو العراق للكويت .. إنتهت بتحرير الكويت وشكراً .. اي حرب تانية بعدها مكملة ومخلصتش .. حرب الخليج الثالثة اللي هي احتلال العراق لسه نظريا مخلصتش لان لسه اميركا ليها قوات في العراق .. حرب افغانستان مخلصتش .. غزو روسيا لأوكرانيا مخلصتش .. باكستان والهند حربهم ضد بعض مخلصتش .. بدأت تفهم التريند؟
الحروب مبقتش تجيب نتيجة ولإن صعب إن القيادة العسكرية في أي بلد تستوعب فكرة إنها مبقاش ليها لازمة أو خليني أعيد صياغة الجملة دي إن دور القوات المسلحة بقي مجرد ورقة ضغط مش عصاية (هاري بوتر) السحرية اللي حتحل كل المشاكل فالدول اللي تحت إيدها سلاح نووي بقت لبانة في بقها دلوقتي إن تطلع القيادة العسكرية بتاعتها تهدد باستخدام قنابل نووية تكتيكية تحت مسمي هبداية جديدة كده سموها التصعيد بعدف إنهاء التصعيد Escalate to de-Escalate اللي هو الاسم المجعلص لجملة حتعورني حعورك وحشوهلك منظرك.
اللي إحنا عايشينه دلوقتي إن مؤسسة عسكرية فشلت إنها تحقق أهدافها زي مثلا روسيا أو إسرائيل تبدأ تقولك خلوا بالكوا أنا أقدر أضرب أوكرانيا او أضرب إيران بقنابل نووية تكتيكية مش عشان امحي مدن كاملة من الوجود .. لا ده مجرد إني أقضي علي قدراتهم العسكرية فيا عيني القيادة السياسية الأوكرانية والإيرانية ميلاقوش حل غير إنهم يحطوا في بقهم جزمة قديمة ويقبلوا يقعدوا علي طرابيزة المفاوضات اللي إحنا حملي فيها شروطي .. اللي حبة المجانين دول مش فاهمينة إن زي ما قلتلك أصغر قنبلة نووية تكتيكية في السوق قدرتها التدميرية 10 كيلوطن .. هي صحيح أصغر من 15 كيلوطن بتاعة القنبلة اللي اترمت علي هيروشيما بس لو حضرتك تفتكر الانفجار اللي حصل في مرفأ بيروت لما صومعة فرقعت ودمرت جزء محترم من الميناء لو تفتكر .. ده كان انفجار شدته واحد كيلوطن .. يعني قنبلة نووية تكتيكية واحدة تقدر تدمرلك بيروت مستريح.
خليني أختم معاك بمشهد الحقيقة محفور في دماغي من فيلم يمكن مش كتير شافوه وهو فيلم The Peacemaker مش ححرق قصته ليك عشان لو مكنتش شوفته وحبيت تشوفه .. في الفيلم ده فيه جملة اتقالت عجتني وعايز انهي بيها كلامنا وهي إن المرعب مش الرجل اللي عايز يبقي تحت ايده 10 قنابل نووية .. المرعب واللي مش حيخليك تنام بليل هو إنك تعرف إن فيه رجل مش عايز غير يبقي تحت ايده قنبلة نووية واحدة.
المصادر:
- مقالة بعنوان Tactical Nuclear Weapons نشرت في موقع Vajiram & Ravi وده لينك المقالة الأصلية:
What are Tactical Nuclear Weapons? - مقالة بعنوان A brief but terrifying history of tactical nuclear weapons نشرت في مجلة Popular Science وده لينك المقالة الأصلية:
A look at the history of tactical nuclear weapons | Popular Science - مقالة بعنوان What are tactical nuclear weapons? An international security expert explains and assesses what they mean for the war in Ukraine نشرت في مجلة The Conversation وده لينك المقالة الأصلية:
What are tactical nuclear weapons? An international security expert explains and assesses what they mean for the war in Ukraine - مقالة بعنوان Ending Tactical Nuclear Weapons: A brief history & a path forward نشرت في موقع Council on Strategic Risks وده لينك المقالة الأصلية:
Ending Tactical Nuclear Weapons: A Brief History and a Path Forward – The Council on Strategic Risks
