العوزي .. قد الكف يقتل مية وألف.

لينك التسجيل الصوتي للمقالة علي Sound Cloud:
https://soundcloud.com/user-112011687-312727988/uzi-m4a

موضوعنا النهاردة عن واحد من أشهر المدافع الرشاشة الخفيفة في العالم .. المدفع الرشاش ده مشهور لدرجة إنك صعب أوي تلاقي حد ميعرفوش أول ما يشوف صورته وهو مدفع رشاش إسرائيلي الصنع إسمه عوزي Uzi .. اللي حنتكلم عنه هو قصة إن إزاي مدفع رشاش اللي إخترعه كان واحد كل فكره إنه يعمل سلاح خفيف ينفع كسلاح ألي لجيش لسه مولود زي الجيش الإسرائيلي بس الفكرة تحولت لقصة نجاح تجاري كبير أوي وبقي المدفع الرشاش العوزي Uzi من أكثر الأسلحة اللي إتباعت في التاريخ وحط إسم إسرائيل ضمن قائمة الدول اللي مش بس بتعرف تصنع سلاح إنما كمان بتصنع سلاح كويس.

مهم تكون عارف إن قصة العوزي Uzi تعتبر تجسيد لحكمة إن الحاجة أم الإختراع .. فيه مقدمة تاريخية لازم تكون عارفها عشان تفهم كويس هو إزاي فكرة العوزي Uzi إتولدت؟ .. أول نقطة إن لما أُعلن قيام دولة إسرائيل في مايو 1948 اللي بيحكموا إسرائيل إكتشفوا إن عندهم كذا مشكلة كبار أوي بخصوص إزاي حيقدروا يدافعوا عن نفسهم ضد الحرب اللي أعلنتها ضدهم 5 جيوش عربية اللي هي مصر وسوريا ولبنان والعراق والأردن والمشاكل دي تقدر تشوفها في النقط الجاية:

• كتير من العساكر اللي المفروض إنهم يدافعوا عن الدولة اللي لسه مولودة دي مش محترفين ومش مُدربين بشكل كافي بس محتاجين يبقي معاهم سلاح فعال يستخدموه في الحرب اللي قامت بسرعة وإسرائيل لقت نفسها محتاجة أي حاجة تدافع بيها عن نفسها.
• إسرائيل وقتها كان معندهاش جيش بالمعني اللي إنت تعرفه .. حاول تتخيل إن دي دولة كل اللي كان حيلتها هم شوية عصابات أشهرها عصابة الهاجانا إتجمعوا مع بعض وإتحدوا عشان يدافعوا عن بلدهم وهنا كانت بداية جيش الدفاع الإسرائيلي اللي دلوقتي معروف بإسم IDF اللي هو إختصار جملة Israeli Defense Forces.
• التسليح اللي كان في إيد الإسرائيلين كان فيه مصيبتين كبار .. أولاً هو مش كتير يعني يدوبك بتتكلم عن 200 مدفع رشاش و 10,000 بندقية يدوي Manual Rifles اللي بتضرب طلقة وبعد كده لازم تعمرها بإنك تشيل الفارغ وتحط طلقة جديدة قبل ما تضرب الطلقة التانية و 3,600 مدفع رشاش خفيف من اللي بيتسموا Submachine Guns .. ثاني مشكلة إن السلاح ده مش جاي من حتة واحدة لإنه سلاح أغلبه إن لم يكن كله سلاح رخيص مستعمل .. إسرائيل وقتها كانت دولة فقيرة معهاش فلوس تشتري سلاح نظيف وكمان السلاح اللي تحت إيدهم كان متهرب من دول مختلفة زي بريطانيا وفرنسا وخصوصاً تشيكوسلوفاكيا لإن وقتها حلفاء إسرائيل حول العالم مكانوش كتير فإنت بتتكلم عن مصيبة كبيرة هي إن إزاي توفر الذخيرة الصح لكوكتيل الأسلحة ده؟ .. إزاي يبقي عندك عسكري معاه بندقية بريطاني بتستخدم طلقات عيار معين وزميله معاه بندقية تشيكي بعيار مختلف والإتنين يتوفرلهم الذخيرة الصح وقت الحرب؟

لما الحرب خلصت وإنتصرت إسرائيل والحرب إتعرفت بإسم حرب فلسطين أو حرب 1948 بقي فيه شبه إجماع وسط اللي بيحكموا إسرائيل إنهم بقوا محتاجين يصنعوا سلاحهم بنفسهم .. الحقيقة إن الإسرائيليين مكانوش عايشين في اللالاند ومكانوش هبل .. هم بصوا لنفسهم وإكتشفوا إنهم ناس جايين من دول مختلفة اللي جاي من روسيا واللي جاي من بولندا واللي جاي من ألمانيا واللي جاي من أميركا وكلهم ناس متعلمين كويس أوي والأهم إن كتير منهم شارك في الحرب العالمية الثانية اللي بفكرك إنها خلصت سنة 1945 يعني يدوبك قبل نهاية حرب فلسطين ب3 سنين بس .. كل اللي الحكومة الإسرائيلية كانت محتاجاه إنها تلاقي أكتر ناس بتفهم في السلاح يقعدوهم في مكان واحد عشان يصمموا سلاح موحد بعيار موحد عشان يبقي السلاح الأساسي لIDF ودي كانت بداية ميلاد العوزي Uzi.

سنة 1952 فيه مواطن إسرائيلي من أصل ألماني كان شغال في جيش الدفاع الإسرائيلي ورتبته ملازم أول إسمه (عوزيل جال Uziel Gal) خد براءة إختراع لمدفع رشاش جديد سماه علي إسمه عوزي Uzi  .. المدفع الرشاش اللي إخترعه الأخ ده خلي أي حد يشوفه في الأول يستغرب وبعد كده الإستغراب ده بيتحول لإعجاب .. بص علي الصور بتاعة المدفع الرشاش وقولي رأيك .. مبدأياً ده مدفع رشاش حجمه صغير ميجيش حاجة جنب مثلاً البندقية الألية AK-47 أو كلاشينكوف اللي يعتبر السلاح الرسمي لكتير من القوات المسلحة في العالم من ضمنها القوات المسلحة المصرية .. عكس ما AK-47 الكعب بتاعها عبارة عن إما خشب أو معدن اللي بتحطه علي كتفك عشان تعرف تنشن فالعوزي Uzi الكعب بتاعه كان معدن وبيتطبق فوق الخزنة وفجأة بقي عندك مدفع رشاش تقدر تطبقه عشان يبقي في نفس حجم المسدس .. الخزنة بتاعة الذخيرة ملهاش مكان مستقل ليها زي AK-47 إنما الخزنة بتخش في نفس مكان مقبض المدفع الرشاش زيها زي خزنة المسدسات والخزنة بتاعة العوزي Uzi يا بتشيل 25 طلقة يا إما 32 طلقة.

ده بالنسبة للشكل .. حتي في طريقة ضرب النار العوزي Uzi كان بسيط جداً في طريقة شغله وبتقدر تستخدمه إما نصف ألي Semi-Automatic يعني بتضرب طلقة طلقة مع كل ضغطة علي الزناد أو بتقدر تستخدمه ألي Automatic يعني طالما إنت ضاغط علي الزناد فهو حيفضل يضرب طلقات بحيث إنه بيقدر يضرب 600 طلقة في الدقيقة وده إلي حد ما معدل ضرب نار بطيء .. سن الدبانة أو Sight اللي إنت بتنشن به فيه منه واحد في مقدمة المدفع وواحد في أخره والإتنين متثبتين كويس أوي بحيث إن لو المدفع وقع منك أو إتخبط فسن الدبانة مش بيتني ولا بيتكسر .. الأهم إن العوزي Uzi له 3 إجراءات أمان Safety Mechanisms عشان ميحصلش إنك بالغلط تتك علي الزناد وتلاقي نفسك ضربت طلقة ممكن يا تقتل نفسك بيها يا تقتل حد من زمايلك.

فيه شوية حاجات هي اللي خلت العوزي Uzi يتباع ويبقي سلاح له إسمه في السوق العالمي:

• فكرة إن كل حتة من أجزاء المدفع بتتصنع من المعدن وبالكبس عن طريق مكابس هيدروليك بسيطة فده خلاه سلاح بسيط ورخيص خصوصاً في الإنتاج بكميات كبيرة أو Mass Production زي ما بنسميه وده خلاه مغري أوي للدول الفقيرة بالذات.
• إنك حطيت الخزنة بتاعة الذخيرة في نص المدفع خلاه موزون أوي ولما بتستخدمه رغم إنه مدفع رشاش بس إنت بتحس كأنك ماسك مسدس.
• ميزة إن فيه 3 إجراءات أمان خلاه مناسب أوي إنك تديه لناس معندهاش فرصة كافية إنها تاخد تدريب مكثف لضرب النار.
• أهم حاجة إن عندك مدفع رشاش بيستخدم ذخيرة عيار 9 مليمتر بتاعة المسدسات العادية بس بيقدر يضرب 600 طلقة في الدقيقة وده بيخليه سلاح فعال جداً.

رغم كل ده وعلي عكس زي ما ناس كتير متخيلة فالعوزي Uzi مش هو السلاح الرسمي للقوات البرية الإسرائيلية والسبب في كده هو أهم عيب في العوزي Uzi وهو إن مداه محدود وأخره يجيب أهداف علي بعد 200 متر وده خلاه سلاح فعال أوي لو ناوي تستخدمه في حرب المدن أو لمكافحة الإرهاب إنما تستخدمه في ميدان مفتوح زي صحراء مثلاً فهو مش حيساعدك أوي .. عشان كده أغلب القوات البرية الإسرائيلية معاها بنادق ألية FN-FAL البلجيكية الصنع بحيث إن اللي بيستخدم العوزي Uzi في القوات المسلحة الإسرائيلية هي قوات المظلات وأطقم الدبابات والقوات الخاصة.

أول تجربة حقيقية للعوزي Uzi كانت في حرب العدوان الثلاثي علي مصر سنة 1956 وعشان أكون دقيق أكثر أول ناس تستخدمه كانت عناصر من وحدة القوات الخاصة الإسرائيلية اللي هي وحدة 202 اللي كانت مكلفة بإنها تحتل مضيق متلا في شبه جزيرة سيناء .. وقتها الإسرائيليين أعجبوا به أوي لإنه ثبت إنه فعال في النوع ده من المعارك اللي دارت بين القوات الإسرائيلية ضد القوات المصرية والسودانية اللي كانت مكلفة بالدفاع عن سيناء وكانت أغلبها معارك في كهوف ومناطق جبلية وعرة .. مشاكل العوزي Uzi بدأت تبان في حروب الإستنزاف وحرب أكتوبر 1973 لإن وقتها السلاح اللي كان في إيد القوات المصرية والسورية كان بنادق AK-47 الألية ودي بنادق عيار الطلقات بتاعها كبير علي عكس عيار ال9 مليمتر بتاع المسدسات اللي بيستخدم في العوزي Uzi .. الأهم إن إذا كان أقصي مدي للعوزي Uzi هو 200 متر فطلقة بتاعة الAK-47 مداها علي الأقل 600 متر يعني علي بعد مسافة أكتر من طول ملعبين كرة قدم .. ده معناه إن الجندي المصري اللي معاه AK-47 يقدر يجيب الجندي الإسرائيلي اللي معاه Uzi من مسافة بعيدة أوي وده خلي زي ما قلتلك إن السلاح الرسمي للقوات البرية الإسرائيلية هو إما بنادق FN-FAL البلجيكية أو M16 و M4 Carbine الأميريكية.

بره إسرائيل فالعوزي Uzi ناس كتير أوي أعجبت به .. دول ملهاش علاقة ببعض زي اليابان وألمانيا وبلجيكا وبيرو والبرازيل إما إشترت العوزي Uzi أو خدت رخصة تصنيعه علي أرضها .. دول كتير في أفريقيا وأسيا قامت فيها حروب أهلية كان الطرفين بيستخدموا العوزي Uzi وده يوريك إن الإسرائيليين مكنش عندهم مشكلة يبيعوا لأي حد مهما كان عشان يكسبوا فلوس .. حتي العصابات الإجرامية في أميركا والمكسيك وقعت في غرام العوزي Uzi وبقت بتستخدمه كتير أوي.

بعد كل ده تفتكر إيه الدرس اللي استفدناه من العوزي؟ .. استفدنا إنك تقدر تصنع سلاح رخيص وفعال عشان جنودك يستخدموه وفي نفس الوقت تبيعه بره وناس كتير تعجب به وتشتريه .. العوزي ما هو إلا مدفع رشاش متصمم صح أوي ويُعتمد عليه والأهم إنه رخيص ومش محتاج عشان تعمل مصنع لتصنيعه غير خط إنتاج من كام مكبس هيدروليك وخلاص علي كده.

المصدر:

• مقالة بعنوان Uzi: The Israeli Machine Gun That Conquered The World نشرت في مجلة The National Interest وده لينك المقالة الأصلية:
  http://nationalinterest.org/blog/the-buzz/uzi-the-israeli-machine-gun-conquered-the-world-23504