لينك التسجيل الصوتي للمقالة علي Sound Cloud:
https://soundcloud.com/user-112011687-312727988/7zkudkqphbgd
موضوعنا النهاردة اللي حنتكلم عنه هو القوات الجوية الإسرائيلية اللي إختصاراً بتتعرف بإسم IAF اللي هي الحروف الثلاثة الأولي من جملة Israeli Air Force .. القوات الجوية الإسرائيلية ناس كتير بتعتبرها أقوي قوات جوية في الشرق الأوسط .. صحيح فيه ناس شايفة إن التقدير ده مبالغ فيه أوي و شايفين إنها عبارة عن بطل من ورق قدام أول تحدي حقيقي حيبان مدي ضعفه .. بس خلينا نكون صرحاء مع بعض إن القوات الجوية الإسرائيلية فعلاً قوية و تعتبر في رأيي الشخصي علي الأقل الند بالند للقوات الجوية المصرية مثلاً .. أي قوات جوية محترمة في الدنيا سواء كنت بتتكلم عن القوات الجوية الأميريكية أو الروسية أو البريطانية أو أي دولة كبيرة تعجبك بتبني قوتها علي أساس 3 حاجات:
- التدريب المستمر و القوي لعناصرها سواء طيارين أو ملاحين أو فنيين أو مهندسين.
- إنك تستغل نقاط الضعف في عدوك.
- إنك و إنت بتشتري طيارات جديدة أو لو إنت بتصنع طياراتك بنفسك تكون فاهم كويس إنت حتشتري أو بتصنع إيه عشان فعلاً تسد العجز اللي عندك و متكونش بتشتري طيارات إنت مش محتاجها و مش حتفيدك و بترمي فلوسك علي الأرض.
النقطة الثالثة دي هي اللي حنركز عليها .. حنتكلم عن هو علي أي أساس قيادة القوات الجوية الإسرائيلية بتشتري أو بتصنع الطيارات؟ بس ده حيخلينا الأول ناخدك في جولة سريعة في التطور الطبيعي لفكر قيادة القوات الجوية الإسرائيلية في شراء و تصنيع الطيارات بتاعتها.
المرحلة الأولي .. الإسرائيليين لسه بيفهموا هم عايزين إيه:
مع بداية نشأة دولة إسرائيل هم كانوا بيشتروا أي طيارات يلاقوها من أي حد معندوش مشكلة إنه يبيعلهم .. ده كان معناه إن في البداية خالص القوات الجوية الإسرئيلية كان تحت إيدها كوكتيل متنوع من الطيارات القديمة اللي غالباً شاريينها من دول أوروبية .. مع أواخر الخمسينات إسرائيل بقت زبون أساسي لبريطانيا و فرنسا و خصوصاً فرنسا اللي باعت لإسرائيل تكنولوجيا عسكرية متطورة من ضمنها مقاتلات ميراج Mirage اللي بقت هي العمود الفقري للقوات الجوية الإسرائيلية و اللي إستخدمتها ضد مصر و سوريا في حرب 5 يونيو 1967 اللي زي ما إحنا كلنا عارفين دمرت أغلب طياراتنا و هي لسه علي أرض المطارات .. المشكلة إن حرب يونيو 1967 شكلت أزمة كبيرة بين إسرائيل و الدول الأوروبية و بسببها فرنسا فرضت حظر بيع للمقاتلات لإسرائيل و ده حط الإسرائيليين في مشكلة إنهم مبقوش عارفين يشتروا طيارات منين؟ .. حط نفسك مكانهم .. هم محتاجين مقاتلات و محدش عايز يبيع ليهم حاجة و في نفس الوقت هم محتاجين مقاتلات ليها قدرات معينة مش موجودة في أسطول مقاتلات Mirage الفرنسية اللي تحت إيدهم .. زي مثلاً كانوا عايزين مقاتلات تنفع تنفذ غارات جوية علي أهداف أرضية بعيدة يعني محتاجين طيارة بتقدر تطير مسافات طويلة أوي أو مداها كبير .. ساعتها الإسرائيليين ملقوش قدامهم غير الحل اللي بيلجأوله في الأوقات اللي زي دي إنهم يسرقوا اللي هم عايزينه.
المرحلة الثانية .. ليه لا نصنع المقاتلات بتاعتنا؟
المخابرات الإسرائيلية سرقت التصميمات بتاعة التعديلات اللي فرنسا عملتها علي مقاتلات Mirage بتاعتها و التصميمات دي راحت لشركة تصميم و تصنيع الطيارات الإسرائيلية Israeli Aerospace Industries و إختصاراً IAI و إشتغلوا عليها لحد ما طلعوا طيارتين اللي هم نيشير Nesher و كفير Kfir و الإتنين لو بصيت علي الصور حتلاقيهم نسخة من مقاتلات ميراج Mirage الفرنسية .. اللي خدت سمعة حلوة أوي كانت طيارات كفير Kfir اللي الإسرائيليين ركبوا عليها محركات أميريكية و خلال الفترة اللي كانت فيها الطيارات دي في الخدمة كانت هي العمود الفقري للقوات الجوية الإسرائيلية .. الحقيقة إن دول كتير أعجبت بالطيارتين دول و إشتروهم من إسرائيل يعني مثلاً الأرجنتين إشترت مقاتلات نشير Nesher و دول زي كولومبيا و الإكوادور و سريلانكا إشترت مقاتلات كفير Kfir.
الفلوس اللي جت لإسرائيل من بيع الطيارتين دول حطوها كإستثمارات في قطاع صناعة الطيارات و ده كان له نتايج مهمة للإقتصاد الإسرائيلي كله .. نجاح طيارات كفير Kfir بالذات خلي الإسرائيليين يقولوا لنفسهم إحنا نقدر نصنع سلاحنا و نبيعه و الفلوس اللي بتيجي نطور بيها من قدراتنا و ننمي إقتصادنا و ده لوحده بيديك إحساس بالقوة إنك مبقتش مستني إن دولة أجنبية توافق تبيعلك سلاح .. بس في نفس الوقت ده ممنعش الإسرائيليين إنهم يشتروا طيارات من بره .. في الستينات مثلاً إسرائيل بقت زبون مهم أوي لمقاتلات F-4 Phantom الأميريكية و في السبعينات إسرائيل كانت من أوائل الزباين اللي إشتروا مقاتلات F-15 Strike Eagle الأميريكية برده .. الحياة فضلت زي الفل و مستقرة و هادية بالنسبة للإسرائيليين لحد ما عملوا طيارة جديدة إسمها لافي Lavi.
الإسرائيليين بصوا لمقاتلات F-15 Strike Eagle و لقوها مقاتلة تقيلة بمحركين بتقدر تطير لمسافات بعيدة و ممتازة في قصف الأهداف الأرضية بس ملهاش قدرة كبيرة علي المناورة و بالتالي هي مش سريعة أوي .. ده خلي الإسرائيليين يفكروا إنهم يعملوا مقاتلة متعددة المهام بتقدر تكمل النواقص اللي عند F-15 Strike Eagle و من هنا إتولدت الطيارة لافي Lavi .. المشكلة اللي الإسرائيليين مكانوش عاملين حسابهم عليها إن في الوقت اللي هم عملوا فيه الطيارة لافي Lavi كانت أميركا شغالة علي تطوير الطيارة F-16 Viper اللي هي النسخة الأولانية خالص من المقاتلة الأسطورية F-16 Fighting Falcon .. لما تبص علي الطيارة لافي Lavi حتلاقيها قريبة أوي في شكلها و حتي في قدراتها من F-16 Viper و ده حط الإسرائيليين في مشكلة.
دلوقتي إنت عشان دولة زي إسرائيل تبني طيارة زي Lavi من الصفر من أول التصميم لحد التصنيع و الإختبارات و التجربة و دخولها الخدمة و تثبت جدارتها و تشوفلها مشتري من بره .. كل ده مجهود و إستثمارات ضخمة جداً .. شغل مش بيخلص بتقوم به مؤسسات دولة كاملة و موضوع مش سهل خالص .. كمان المفروض إن علي الورق قدرات الطيارة Lavi هي هي قدرات F-16 Viper فلو أنا دولة زي مثلاً بلجيكا حبيت أشتري مقاتلة و قدامي في السوق إختيارين اللي هم Lavi الإسرائيلية و F-16 Viper الأميريكية فطبعاً حروح أشتري الأميريكية حتي لو كانت إمكانيات الإتنين زي بعض بس المنطق إن الأمريكان أضمن و متجربين .. عشان أقربهالك تخيل إن شركة تصنيع Smartphones زي Oppo الصينية عملت موبايل بنفس إمكانيات iPhone 5s مثلاً و إنت معاك فلوس تكفي تشتري الموبايل اللي عملاه Oppo أو تشتري iPhone 5s فأغلبنا حيقول لنفسه أروح أشتري المضمون و أريح دماغي و حيروح يشتري iPhone 5s أهو علي الأقل حتبقي ماسك في إيدك Smartphone ماركة أو Brand .. الأهم من كل ده إن الأمريكان نفسهم مش زي الفرنسيين .. الإسرائيليين سرقوا تصميمات Mirage و عملوا منها مقاتلتي Kfir و Nesher و الإتنين إتباعوا و الفرنسيين مفتحوش بقهم .. الأمريكان لما شافو إن الطيارة Lavi معمولة بمكونات كتير منها أميريكية و بمواصفات و إمكانيات قريبة من F-16 Viper فهم وقفوا للإسرائيليين و إشترطوا إنهم يوافقوا علي كل صفقة تتعمل لشراء طيارات Lavi من إسرائيل .. الفكرة إن الأمريكان مكانوش عايزين إن Lavi تنافس سوق الF-16 Viper .. مع الوقت الإسرائيليين إكتشفوا إن مشروع الطيارة Lavi واقف عليهم بخسارة.
المرحلة الثالثة .. بما إن التصنيع مش جايب همه تعالي نشتري و نطور في اللي بنشتريه:
في أغسطس 1987 الحكومة الإسرائيلية قررت إنها تلغي مشروع تصنيع الطيارة Lavi رغم إعتراضات كتير أوي من مسئولي شركة IAI و من الكنيست الإسرائيلي اللي هو مجلس الشعب عندهم و قررت الحكومة الإسرائيلية إنها تبدأ تشتري عدد كبير من مقاتلات F-16 عشان تبقي هي العمود الفقري للقوات الجوية الإسرائيلية .. لما إتلغي مشروع Lavi الإسرائيليين مكانوش متخيلين اللي حيحصل بعدها .. المخابرات الأميريكية بالصدفة عرفت إن الإسرائيليين باعوا تصميمات Lavi للصين .. الفكرة إن المقاتلة Lavi كتصميم هو تقريباً نسخة طبق الأصل من تصميم F-16 فالصينيين خدوا التصميمات دي و إستخدموها إنهم يعملوا أول مقاتلة صينية معمولة من الألف للياء في الصين اللي هي الطيارة J-10 .. لما الأمريكان عرفوا ده قرروا إن الإسرائيليين مش حيستلموا ولا طيارة F-22 Raptor اللي كانت أول مقاتلة يتقال عليها فعلاً إنها من مقاتلات الجيل الخامس اللي ليها قدرة علي التخفي من الرادارات و فعلاً قرر الكونجرس الأميريكي إن مش حيتم تصدير ولا مقاتلة F-22 Raptor لا لإسرائيل ولا لغيرها.
لما قيادة القوات الجوية الإسرائيلية لغت فكرة إنها تصمم و تصنع المقاتلات بتاعتهم و بقوا يعتمدوا علي شراء مقاتلات أميريكية حديثة بدأوا هم يعملوا تعديلات و تطوير علي المقاتلات اللي هم بيشتروها .. يعني مثلاً .. هم إشتروا مقاتلات F-15 Strike Eagle من أميركا و عدلوا عليها كتير أوي لدرجة إنهم طلعوا في الأخر بطيارة جديدة تقريباً سموها F-15I Thunder و حرف I في الإسم ده إختصار لكلمة إسرائيل Israel .. نفس الكلام عملوه مع المقاتلات F-16 Fighting Falcon اللي إشتروها من أميركا اللي عدلوا عليها كتير أوي لدرجة إنهم طلعوا برده بطيارة جديدة سموها F-16I Storm .. حتي مقاتلات F-35 Joint Strike Fighter اللي إسرائيل حتستلمها من أميركا حتتعمل عليها تعديلات كتير بحيث إسمها حيبقي F-35I Adir.
المصدر:
مقالة بعنوان Why the Israeli Air Force Destroys its Enemies in Battle نشرت في Website إسمه The National Interest و ده لينك المقالة الأصلية:
http://nationalinterest.org/blog/the-buzz/why-the-israeli-air-force-destroys-its-enemies-battle-22875?page=2
