تفكيك منصات بترول برينت .. لو أم أكن مهندسا لوددت أن أكون مهندسا.

موضوعنا النهاردة اللي حنتكلم عنه له علاقة بالهندسة .. دي الكلية اللي بندخلها في مصر و بنتفحت فيها خمس سنين (ده لو إنت بتذاكر و موقعتش في ولا سنة) و في الأخر بتطلع تدور علي شغل في أي كول سنتر .. بس عشان نحسسك إن الهندسة حلوة بس إحنا اللي عايشين في مصر حنتكلم النهاردة عن منصات بترول برينت Brent Oil Rigs و موضوعنا النهاردة اللي حنتكلم عنه هو الإجابة عن سؤال بسيط خالص: هو إزاي شركة تعمل خطة لفك 3 منصات بترول عملاقة عشان المنصات دي قدمت و لازم تطلع بره الخدمة .. مش كده و بس ..  المنصات الثلاثة محطوطين في جوه عرض البحر في منطقة قريبة من القطب الشمالي إرتفاع الواحدة فيهم قد إرتفاع برج إيفل اللي في العاصمة الفرنسية باريس؟ .. ما تيجو نشوف.

قبل ما تبدأ تسرح بخيالك عشان تلاقي حل للمشكلة الهندسية دي خليني أشرحلك الموضوع من بدايته .. في السبعينات شركة إيكسون موبيل Exxon Mobil إتعاونت مع شركة شيل Shell العملاقة اللي مكنش ليها وجود في مصر إلا شوية محطات بنزين و إتباعوا لشركة توتال  Total بنت 4 منصات بترول عملاقة عشان تستخرج بترول من حقل بترول ضخم أوي سموه حقل برينت Brent Oil Field .. مشكلة حقل برينت ده إنه جوه البحر و كمان بعيد شوية .. هو موجود في بحر الشمال و ده زي ما هو باين من إسمه فوق خالص في شمال الكرة الأرضية لدرجة إن بينه و بين القطب الشمالي يدوبك قد المسافة من القاهرة و أسوان .. حقل برينت كان عملاق جداً لدرجة إن شركه Shell كانت بتستخرج منه حوالي 10% من إجمالي النفط اللي بيستهلكه الإقتصاد البريطاني كله .. و عشان يستغلوه لحد أخر قطرة من الحقل ده الشركة بنت 4 منصات هم ألفا Alpha و برافو Bravo و دلتا Delta و تشارلي Charlie.

منصات Brent الأربعة بدأ بنائهم سنة 1971 و دخلوا الخدمة فعلاً سنة 1976 و بعد حوالي 45 سنة من الخدمة فيه 3 منصات من الأربعة خلاص بطلوا شغل اللي هم ألفا Alpha و برافو Bravo و دلتا Delta و مفاضلش غير المنصة الرابعة تشارلي Charlie هي اللي شغالة و حتي دي مقدمهاش كتير وتطلع هي كمان بره الخدمة .. إذن كان طبيعي إن شركة شيل Shell تبدأ تحط خطة عشان تفك المنصات الأربعة عشان يتباعوا خردة و ده إجراء بيحصل مش بس في قطاع البترول إنما في أي صناعة إن بيبقي عندك مكنة معينة بتقدم في العمر خالص و مبيبقاش قدامك غير إنك تطلعها بره الخدمة فبتفكها و تبيعها خردة .. المشكلة إن لما شركة شيل Shell بدأت تحسب هم محتاجين كام فلوس و قد إيه وقت عشان يخلصوا عملية فك المنصات الأربعة لقوا نفسهم محتاجين مليارات الدولارات و ما بين 8 الي 10 سنين شغل يعني تقريباً اللي كسبوه حيرجعوا يصرفوه تاني .. الحقيقة اللي إنت لازم تكون فاهمها إن عملية فك المنصات دي أو زي ما بيسموها Decommissioning عملية هندسياً معقدة جداً و بتدخل فيها عوامل كتير حنحاول نتكلم عنهم بسرعة في المقالة دي عشان تفهم حجم المشكلة اللي شركة شيل Shell مُطالبة إنها تحلها فخلينا نقسملك المشاكل ل3 أقسام:

• مشكلة قانونية مرتبطة بإن لازم الجهات الحكومية البريطانية توافق أولاً علي الخطة اللي حتنفذها شركة شيل Shell.
• مشكلة هندسية و دي مرتبطة بموقع و ضخامة المنصات الأربعة.
• مشكلة بيئية مرتبطة بإن لازم شركة Shell تتفادي مصايب حصلت قبل كده زي الكارثة بتاعة سنة 1995 لما حبت تعمل Decommissioning لمنصة تخزين النفط العائمة سبار Spar ده غير الثغرات في الخطة بتاعه Shell و اللي ممكن أي ثغرة فيهم أو حسبة بسيطة غلط تؤدي لمصيبة بيئية سودا.

خلينا نبدأ أولاً بالمشكلة القانونية و نكلمك عن المسار القانوني اللي حتمشي عليه شركة Shell:

مبدأياً مهندسي شركة Shell بقالهم حوالي 10 سنين بيحطوا في خطة الDecommissioning بتاعة منصات Brent الأربعة و مهندسي الشركة قبل ما يخلصوا الخطة قعدوا إتكلموا مع ناس خبراء في مجال النفط و أساتذة جامعة و صيادين و علماء بيئة .. بإختصار مهندسي Shell مسابوش حد مهتم بالموضوع إلا و خدوا رأيه و في الأخر كتبوا خطة متخرش المياه .. الخطة دي في فبراير 2018 إتسلمت لوزارات العمل و الطاقة و إستراتيجيات الصناعة البريطانية عشان تاخد موافقة حكومية .. الحكومة قدامها شهرين تراجع كل كلمة في الخطة و تطمن خالص إن كل خطوة معمولة وفق اللوائح و القوانين الحكومية و بمجرد ما شركة Shell تاخد الموافقة الحكومية فالإدارة الهندسية هي اللي بتتولي التنفيذ و اللي بدأ فعلياً في شهر مايو.

نيجي للمشكلة البيئية اللي في الأخر بتدور حول إن شركة Shell تقدم ضمانات كافية بعدم تكرار كارثة منصة Spar:

سنة 1995 حبت الشركة إنها تطلع منصة تخزين نفط عائمة إسمها سبار Spar بره الخدمة .. العباقرة في شركة Shell هداهم تفكيرهم إلي هو أنا ليه أصرف فلوس عشان أقطر المنصة من جوه عرض البحر لحد الشاطيء و أدفع فلوس نقل و عمال عشان يفكوا المنصة دي حتة حتة و تتباع خردة بملاليم لما ممكن أوفر من علي نفسي الفلوس دي كلها و أغرّق المنصة .. زي ما سمعت الشركة كانت عايزة تحط أوزان تقيلة في المنصة و تخليها تغرق زي ما هي كده في قاع بحر الشمال .. طبعاً أنصار البيئة مسكتوش لدرجة إن الحكومة الألمانية كلها قررت تعمل مقاطعة لكل منتجات Shell و ده أدي إلي إن سهم الشركة في البورصة يقع زي الطيارة المحروقة و ده أجبر الشركة إنها تتراجع عن خطتها الأصلية و تعمل زي ما البني أدمين العاقلين بيعملوا و تقطر المنصة للساحل و تفكها حتة حتة .. مش كده و بس .. الضغط اللي عمله الناس بتوع البيئة أدي إلي إن العالم كله يعمل إتفاقية إسمها إتفاقية أوسبار Ospar Treaty و الإتفاقية دي بتقول إن مينفعش شركة بترول تسيب أي معدات أو مباني ليها جوه عرض البحر بعد ما تخرج بره الخدمة .. معني كده إن بحكم القانون شركة Shell متقدرش تسيب ولا أي حاجة ولا أي قطعة من منصات Brent تفضل في مكانها في بحر الشمال و ده يعتبر مصيبة هندسية زي ما حنعرف كمان شوية.

عشان شركة Shell تطمن الأخوة بتوع البيئة فهي خلت واحد إسمه (دانكن مانينج Duncan Manning) قضي 19 سنة في القوات البحرية الملكية البريطانية و حالياً هو اللي بيقود الفريق بتاع الDecommissioning للمنصات الأربعة طلع حلفلهم بأيمانات المسلمين والمسيحين و اليهود كلها بإن الشركة مركزة أوي علي إنها متعملش أي حاجة ممكن تضر البيئة لإن خلينا نكون صرحاء إن حتي لو شركة Shell حبت تلعب بديلها فاللي حيحصل إن الحكومة البريطانية مش حتسمحلها بده ..  مجرد كابوس إن الحكومة البريطانية ممكن تفرض عليهم عقوبات بمليارات الدولارات حيخلي الشركة تراجع نفسها كتير قبل ما تفكر تلعب بديلها.

أما بقي المشاكل الهندسية فدي معقدة بشكل إنت ممكن لا تتخيله:

منصات Brent مش هي الوحيدة اللي موجودة في بحر الشمال بس هي تعتبر أضخم منصات بترول موجودة هناك و اللي مخلي مهمة الDecommissioning بتاعتها معقدة أوي هي إنها جوه عرض البحر علي بعد حوال 200 كيلومتر من سواحل النرويج .. الحل اللي مهندسي Shell حيعملوه هو إنهم بدل ما يفكوا المنصات الأربعة حتة حتة و هي جوه عرض البحر فهم حيجيبوا سفينة عملاقة إسمها سبيريت Spirit ..  السفينة دي حتقف بالضبط تحت كل منصة و تيجي أوناش هيدروليك عملاقة شايلة المنصة كلها من فوق العمودين الخرسانة اللي شايلينها .. عشان الخطة المجنونة دي تنجح فيه حوالي 1500 عامل بقالهم أكثر من سنة عايشين علي متن المنصات الأربعة عشان يلحموا ألواح صلب في جسمها عشان يزودوا من قوته بحيث لما أوناش السفينة Spirit تبدأ تشيلها المنصة متفكش من بعضها .. بعد ما السفينة Spirit تشيل المنصة كلها حتبحر بيها من بحر الشمال فوق لحد الترسانة البحرية هارتلبول Hartlepool البريطانية و هناك المنصات الأربعة حتتفك حتة حتة و تتباع خردة.

لازم تكون عارف إن منصات Brent الأربعة مش هم أول Oil Rigs أو منصات بترول تبقي شغالة في بحر الشمال و يتعملها Decommissioning بس هم فعلاً من أضخم منصات البترول في العالم و فيه مشكلة تانية هي إني في وسط الكلام قلتلك إن المنصات الأربعة إتبنوا في أقل 6 سنين و ده إنت ممكن تشوفه إنجاز هندسي بس هو الحقيقة مصيبة و مرتبط بالنقطة اللي إتكلمنا عنها في الجانب البيئي المتعلق بإتفاقية Ospar Treaty .. خليني أفهمك الموضوع براحة .. منصات Brent الأربعة إتبنوا قبل ما إتفاقية Ospar تتكتب و بالتالي المهندسين و هم بيركبوهم مكانوش حاطين في حسابهم إن حيجي اليوم و المنصات دي تتشال من مكانها و مش حينفع يسيبوا ولا حتي مفك صليبة جوه المياه زي ما المهندسين و هم بيصمموا الOil Rigs دلوقتي بياخدوا بالهم من النقطة دي .. المشكلة إن المهندسين بتوع Shell لما جم يركبوا المنصات الأربعة صبوا 300,000 طن خرسانة تحت المياه عشان يعملوا قواعد أسمنتية تقف عليها المنصات و القواعد دي طويلة لدرجة إنها مكملة من قاع البحر لحد فوق سطح المياه .. مش كده و بس .. التصميم بتاع المنصات الأربعة حاطط خزانات أسمنتية عملاقة في قاع البحر عشان أثناء الحفر أي نفط بيتسرب بيتخزن في الخزانات دي .. السؤال دلوقتي و لو إنت مهندس فكر كويس أوي قبل ما تجاوب: هو أنا لو حبيت أخلص من الخرسانة دي كلها و من الخزانات العملاقة اللي مدفونة في قاع المحيط دي إزاي أعمل كده و أنا ضامن إن مش حيحصل أي تسريب نفطي؟ و بعدين هو إنت سمعت عن مبني معمول من خرسانة بيتشال زي ما هو كده؟ يعني إنت مثلاً عندك مبني مجمع التحرير بتاعنا اللي في القاهرة فاضي أهو و عايزين يلاقوا فيه صرفة هل تتخيل إن ينفع تيجي أوناش عملاقة تشيل المبني ده كله علي بعضه و تنقله حتة تانية ..  إنت لما بتمشي في الشارع بتشوف عمارات بتتهد كل الخرسانة اللي إتبنت بيها بتتحول لشوية تراب و ركام و المفروض إن حيبقي عندك 300,000 طن ركام حيلوثوا مياه البحر و حيضروا بالحياة البيئية فيه.

عشان كده شركة Shell هي و شركة Exxon Mobil بيقولوا إن و الله أحسن طريقة بيئياً صح إننا نسيب القواعد الخرسانة دي زي ما هي و ده معناه إن الشركه حتحتاج إن يتم إستثناءها من معاهدة Ospar Treaty في الحالة دي بس .. رد الناس بتوع البيئة إن كده الشركتين بيستعبطوا .. اه صح إن منصات البترول فيه أجزاء منها لما بتيجي تطلع بره الخدمة أسلم حل إنك تسيب الأجزاء دي زي ما هي بس في عرف مين تسيبلي خزانات بترول عملاقة مليان علي أخرها بالنفط في قاع البحر؟ .. إنت كده مش بتتكلم علي إنك عايز تحافظ علي البيئة قد ما إنت عايز تحافظ علي فلوسك و مش عايز تدفع ملايين عشان تشيل الخزانات دي مع إنك إنت اللي حاططها و مركبها بإيدك .. و لو إفترضنا إن فعلاً شركة Shell خدت الإستثناء ده فحتنضم لمجموعة نادرة من خمس حالات من ضمن 124 منصة بترول خرجت بره الخدمة و إتفكت بناء علي بنود الإتفاقية اللي بدأت تتنفذ من سنة 1998.

المصدر:

مقالة بعنوان Shell begins huge task of decommissioning Brent oil rigs نشرت في جريدة The Guardian البريطانية و ده لينك المقالة الأصلية:
https://www.theguardian.com/business/2017/feb/06/shell-decommissioning-brent-oil-rigs