النكد الزوجي .. العادات السبعة اللي ممكن تقتل أي جوازة.

لينك التسجيل الصوتي للمقالة علي ساوند كلاود:
https://on.soundcloud.com/35Y7q

لو عايز جوازتك تكمل لتأبيدة فإنت محتاج تاخد بالك كويس أوي من تصرفاتك و تصرفات شريك حياتك .. عشان تفهم كلامي حاول تتخيل الجواز ده عامل زي ماتش البوكس أو الملاكمة .. إنت عشان تكسب ماتش ملاكمة عندك حل من إتنين .. يا إما تكسب بالضربة القاضية إنك تدي اللي قدامك بالبوكس في وشه توديه ورا الشمس .. أو إنك تفضل تضرب فيه تضرب فيه لحد ما عدد الجولات يخلص .. إنت صحيح مخلصتش عليه بضربة واحدة بس كتر الضرب المستمر خلاك تكسب الماتش .. فيه ناس عندها إعتقاد إن اللي بيقتل أي جواز هو الضربة القاضية اللي غالباً بتتمثل إن واحد من الطرفين يخون الثاني و الناس دي إحتمال كبير يكون عندها حق .. فيه ستات كتير بترفض فكرة مش إن جوزها يخونها دي بترفض فكرة إنه يتجوز عليها زي ما قلع شرع ربنا .. بس اللي أنا حتكلم عنه النهاردة هو الموت البطيء لأي جوازة .. إزاي ممكن الحياة الزوجية لأي حد تموت و محدش من الزوجين بيحس بده إلا بعد فوات الأوان.

عشان أي جوازة تنجح لازم الزوجين يبقوا بينهم تواصل .. عشان أفهمك يعني إيه تواصل .. لو إنت ولد فعايزك تفتكر إزاي (محمد أبوتريكه) كان بيفهم تحركات (عماد متعب) من غير ما يحتاج يبصله أو إزاي (حازم إمام) كان عارف (حسام حسن) حيبقي فين قبل الكورة تطلع من رجله .. عارف إنت الإحساس ده إنك تفهم اللي قدامك من غير ما تحتاج تبصله .. لو إنتي بنت بقي فعارفه إزاي إنتي بتفهمي ذوق صاحبتك في الهدوم فدايماً بتاخدك معاها عشان تعملوا Shopping .. أهو ده اللي إنت محتاج تخلقه بينك و بين شريك حياتك عشان حياتكوا الزوجية تكمل .. محدش قال إن الموضوع سهل ما هو لو كان سهل مكنش فيه إتنين إتطلقوا بس من غير التفاهم ده مش حتبقي فيه حياة في الجوازة .. عشان كده روح إسأل أي إتنين متجوزين قرروا إنهم يروحوا لدكتور نفسي أو حد بتاع علاقات زوجية عشان يساعدهم ينقذوا جوازهم .. حتلاقي فعلياً الإتنين مش بيشتكوا من حاجة معينة من بعض .. يعني الزوجة مثلاً مش بتروح للدكتور تقوله جوزي مثلاً مفيهوش مشكلة محددة زي لما يكون عندي بوتاجاز ماركة يونيفرسال كل ما أحط فيه الكيكة علي درجة حرارة عالية ألاقي الفرن حامي و الكيكة بتتحرق .. ولا مثلا الزوج يروح للدكتور يقوله مراتي يا دكتور بتسرب فريون و مش بتسقع الحاجة في الثلاجة .. مش حتلاقي سبب محدد أي من الزوجين بيشتكي منه بس حتسمع كلمة مشهورة أوي .. أصله/أصلها مش فاهمني .. صدقني لو قلت أنكوا وصلتوا لمرحلة عدم التفاهم دي بسبب سنين و سنين من العادات اللي مع الوقت قتلت التفاهم بينكوا و خليني أناقشها معاكوا واحدة واحدة.

عادة رقم 1: حد فيكوا أو أنتوا الإتنين تخيلتوا إن الحياة الرومانسية بتاعة شهر العسل هي دي الحياة الNormal:

فيه دراسة حلوة أوي إتعملت و إتنشرت في مجلة Journal of Personality and Social Psychology قالت إن الأزواج اللي كانت الحياة بينهم في أول سنة جواز مليانة رومانسية بشكل أوفر الحقيقة غالباً بيتطلقوا خلال 7 سنين جواز .. أرجوك متتصدمش .. الفكرة إن الرومانسية الأوفر اللي أنتوا بتعيشوها بلاش في أول شهر خليها في أول سنة جواز مينفعش تكملوا حياتكوا بيها .. ده حتي الأهلي مبيفضلش طول الموسم يكسب بالسبعة و الستة .. اللي بيحصل إن بعد فرحة البدايات علي رأي (أدهم سليمان) يكتشف الزوجين الحقيقة المرة و هي إن هو مش إحتمال إحنا الإتنين منبقاش مناسبين لبعض؟ .. بمجرد ما عقلك بدأ يسأل السؤال ده أعرف إن لمبة الرومانسية أو المشاعر اللي بينك و بين شريك حياتك بدأت تنور زي ما لمبة البنزين بتنور كده في التابلوه لما تانك البنزين بيخلص .. غالباً ده بيحصل لما إتنين يتجوزوا و هم عارفين إن بينهم إختلافات في الشخصيات زي الإختلافات بين شخصية (سيمبا) و عمه (سكار) بس بيقرروا يكملوا في علاقتهم و يتجوزوا لإنهم شايفين إن الكيمياء بينهم مجاش زيها .. بالنسبة للمتجوزين اللي إلي حد ما شخصياتهم متجانسة مع بعض بتلاقي إن جفاف المشاعر ده بياخد وقت شوية عشان يحصل.

عادة رقم 2: واحد فيكوا مبيحبش الخناق و بيتفادي المواجهة:

سنة 2018 إتنشرت رسالة في مجلة علمية اسمها American Psychological Association قالت إن لو حد من الزوجين عنده عادة تفادي الخناق و المواجهة و إنه مبيحبش الزعيق فده بيؤثر بشكل سلبي أوي علي العلاقة الزوجية .. فيه ناس طبيعتها إنها مبتحبش المواجهة و بتحاول تتفادي الصراعات بس المشكلة إن الطرف الثاني في العلاقة بيشوف ده علي إنه تجاهل لطلباته و مشاعره مش بيشوفه علي إن دي تصرفات بني أدم مسالم مبيحبش الخناق .. خد دي بقي .. لو صادف إن الزوجين بيشتغلوا شغلانة حلوة أوي و دخلهم الشهري إلي حد ما عالي يعني يقدروا يستحملوا فاتورة إنهم يروحوا لدكتور نفسي يحاول يساعدهم يحلوا مشاكلهم بس واحد من الطرفين سواء كان الزوج أو الزوجة مبيحبش الخناق و المواجهة فبيقول لنفسه علي إيه أروح و يتحرق دمي و ضغطي يعلي فده بيؤدي لدمار أكبر للجوازة .. العيب ده مش بيتلاحظ أوي لو كان الزوجين دخلهم يدوبك علي قدهم .. مع الوقت الشخص اللي مبيحبش الخناق بيفضّل إنه يمشي من البيت أو يقعد ساكت لإنه مش عايز يرد أو زي ما بنسميه Silent Treatment .. زي ما قلتلك الطرف الثاني مش بيشوف ده علي إنه تفادي مواجهة قد ما هو حيشوفه إنك مش عامله إعتبار ولا أهمية.

عادة رقم 3: بلاش تستلفوا فلوس و بلاش تخشوا في جمعيات تقسم وسطوا:

لما البنك المركزي الأميريكي يطلع دراسة علي تأثير الديون علي الجوازة فخليك عارف إن فعلاً الفلوس لو دخلت في الجواز بتفسده .. فيه حاجتين لازم تكونوا حاطينها في دماغكوا كويس أوي .. البيت ده مسئولية مشتركة يعني القرارات المتعلقة بالفلوس بالذات لازم تتم بالإشتراك بينكوا و لو حد فيكوا ركب دماغه و حط في إيده الصلاحيات المالية كلها فده بيخرب البيت بشكل إنت لا تتخيله .. تاني نقطة هي إن لو حد فيكوا مرتبه أعلي من الثاني بكتير فخلي بالكوا إن الإحصائيات بتقول إنكوا غالباً حتطلقوا بعد أقل من 5 سنين .. فيما يتعلق بالفلوس بالذات أتكلموا مع بعض و أوصلوا لحل وسط يرضيكوا و بلاش كل واحد يتصرف من دماغه.

عادة رقم 4: لو إتخانقتوا علي مين يعمل إيه في شغل البيت أعرفوا إن لمبة الطلاق بتنور:

سنة 2018 كلية الإقتصاد في جامعة هارفارد طلعت دراسة قالت فيها إن 25% من حالات الطلاق بتحصل بسبب الخناق علي مين دوره إيه في شغل البيت .. طبيعي إن الناس اللي دخلها يسمح إنهم يجيبوا حد ينظفلهم البيت مش بيحسوا أوي بالمشكلة دي بس بالنسبة لأي إتنين متجوزين و كانوا الإتنين بيشتغلوا فالزوجة بعد يوم شغل طويل أخر حاجة بتفكر تعملها هي إنها تغسل المواعين و طبعاً تراكم شغل البيت اللي مبيتعملش ده بيكون سبب في خناق و المصيبة لو كان الزوج نفسه مكبر دماغه و معتبرها مش شغلته .. و في نفس الوقت بلاش تصيد الأخطاء .. لو شريك حياتك عمل حاجة كويسة زي مثلاً إنه غسل المواعين أو كنس الشقة من غير ما حد يقوله فياريت الطرف الثانيه يشجعه و لو لقي غلطة يتغاضي عنها أو يكلمه فيها بعدين .. الحاجة الكويس اللي تتعمل نشكره عليها و الغلطة يا نعديها وقتها و نتنتاقش فيها بعدين يا إما لو حبكت أوي نتكلم فيها دلوقتي يبقي ننقي نبرة صوت هادية.

عادة رقم 5: إدمان أي حاجة من أول السجاير لحد الVideo Games:

لسبب ما لو ست شافت جوزها ماسك دراع البلاي ستيشن و بيلعب و مبسوط و علي وشه إبتسامة عريضة فبيجيلها نوبة نكد متفهمش جت منين و بيبقي راسها و ألف سيف تنكد عليه عيشته .. تفسيري الشخصي إنها بتقول لنفسها طب إنت ليه مش مبسوط معايا زي ما إنت مبسوط و إنت بتلعب؟ أو ليه الساعات اللي إنت بتقضيها في التفاهات دي متقضيهاش معايا؟ .. سنة 2018 فيه مؤسسة اسمها Divorce Online في بريطانيا طلعت إحصائية قالت فيها إن فيه 200 حالة طلب طلاق قدمتها ستات كان السبب الأساسي فيها إن الزوج مدمن لعبة Fortnite: Battle Royale .. متستغربش .. سنة 2014 فيه مركز أبحاث محترم أوي اسمه Pew Research طلع دراسة قال فيها إن واحد من كل خمس بني أدمين شايف إن التكنولوجيا أثرت بشكل سلبي علي علاقته العاطفية و إن 25% من المتجوزين قالوا إن وجود الSmartphone في البيت بيخليهم مش مركزين أوي مع شركاء حياتهم.

عادة رقم 6: الكلام الكتير مع الناس علي مشاكل البيت:

إتعملت دراسة إتنشرت في مجلة Journal of Family Psychology قالت إن لو إنتي زوجة كل شوية تتكلمي مع صاحباتك أو مع أي حد تعرفيه عن مشاكلك مع جوزك فاللي إنتي بتقوليه هو اللي بيقدر يحدد هل فعلاً أنتوا حتطلقوا أو لا .. و الكلام ده يشمل الرجاله كمان .. الدراسة دي عملها دكاترة نفسيين و عشان تتعمل كانوا بيطلبوا من أي من الزوجين إنه يدي ملخص شفوي كده عن هو/هي شايف الجوازة إزاي .. في الغالب لو اللي بيتكلم قال كلام سلبي عن الجوازة ففي الغالب الجوازة بتنتهي بالطلاق.

عادة رقم 7: الغيرة من نجاح شريك حياتك:

علي حسب كلام دراسة سويدية إتنشرت سنة 2018 فلو إنتي واحدة كنتي بتشتغلي و إتجوزتي و وقت ما إتجوزتي كان مرتبك أقل من مرتب جوزك بس بعد الجواز ربنا فتحها عليكي و بقيتي بتاخدي مرتب أعلي منه فياريت تعرفي إن إحتمالات إنك تطلقي بتنط الضعف .. بلاش دي .. لو إنتي ست متجوزة و بتشتغلي و فضلتي تترقي لحد ما وصلتي لمنصب قيادي في شركتك فإحتمالات طلاقك أعلي بكتير من واحدة شغالة معاكي في نفس الشركة بس موظفة عادية مش مديرة .. في رأي علماء كتير فده سببه إن الست اللي بتوصل لمنصب قيادي فالأسهل ليها إنها تضحي بعلاقتها العاطفية لو كانت العلاقة دي مفيهاش أي درجة مرونة و مش بتديها الدعم النفسي اللي هي محتاجاه عشان تكبر الCareer بتاعها أكتر بس برده مهم تكون فاهم إن الكلام ده قاصر علي الجوازات اللي في بدايتها كانت الست بتاخد مرتب أقل من جوزها.

العادات السبعة دي كلها زي ما قلتلك مش هي الضربة القاضية إنما العادات اللي تكرارها مع السنين بيقتل الجواز بالبطيء لحد ما بتوصلوا لمرحلة إنكوا تصحوا الصبح مش طايقين بعض .. الجواز عشان يعيش لازم تبدأ تاخد بالك من التفاصيل الصغيرة و تلقطها و تبدأ تشتغل عليها عشان تخلص منها لإنك لو سبتها فهي بتعمل شرخ و الشرخ ده مع الوقت بيكبر لحد ما حيوقع البيت كله.

المصدر:
مقالة بعنوان 7 Surprising Habits that Lead to Divorce, According to Science .. نشرت في موقع Bustle وده لينك المقالة الأصلية:
https://www.bustle.com/p/7-surprising-habits-that-lead-to-divorce-according-to-science-16294789