لينك التسجيل الصوتي للمقالة علي Sound Cloud:
https://soundcloud.com/user-112011687-312727988/god8qthmg4sh?si=00eea02d38954ef7895aabf88125064d&utm_source=clipboard&utm_medium=text&utm_campaign=social_sharing
موضوعنا النهاردة اللي حنتكلم فيه هو ملح الطعام .. الملح اللي إنت بتحطه علي الأكل ده .. السؤال اللي حنحاول نجاوب عنه هو هل المفروض إنك تزود الملح في الأكل ولا تقلله؟ .. طبعاً إنت غالباً ليك رأي معين في الموضوع ده وتقريباً إنت رايح ناحية سكة إن المفروض تقلل من استهلاك الملح في الأكل .. لو إنت فعلاً شايف كده فخليني أخدك من إيدك وأوريك وجهة نظر مختلفة شوية عن بتاعتك.
الرجل الأمور اللي عندك في الصورة ده اسمه (جيمس دي نيكولانتونيو James DiNicolantonio) وده عالم تغذية أميريكي عايش في مدينة نيويورك الأميريكية كتب كتاب اسمه The Salt Fix بيقول فيه إن طول السنين اللي فاتت ومنظمة الصحة العالمية وهيئات التغذية الأميريكية والبريطانية كانوا فاهمين الموضوع غلط .. الصح من وجهة نظره مش إنك تقلل من كمية الملح في الأكل .. هو شايف إن الملح مهم جداً لصحتك وإنك كل ما بتكتر من كمية الملح اللي بتاكلها فده بشكل أوتوماتيكي بيقلل من كمية السكر اللي إنت بتاكلها وبالتالي إنت بتخس أسرع .. مش كده وبس .. هو بيقول إنك لو ماشي علي نظام غذائي بيقلل من كمية الملح فإنت مع الوقت عظامك بتضعف وممكن يجيلك ضعف في الذاكرة ده غير إنه بيقول إن الملح بيساعد في علاج مرض السكر .. الأخ ( جيمس دي نيكولانتونيو) بيقول في كتابه إن طول السنين اللي فاتت وخبراء التغذية بيحذرونا إن كتر استهلاك الملح بيؤدي لإرتفاع ضغط الدم وأمراض القلب والفشل الكلوي مع إنه هو شايف إن كل الأمراض دي سببها مش الإسراف في تناول الملح قد ما سببها الإسراف في تناول السكر.
بيقول ( جيمس دي نيكولانتونيو) في كتابه The Salt Fix إن مفيش دليل علمي بيقول إنك لو عشت علي نظام غذائي بتقلل فيه من كمية الملح اللي بتاكلها فإنت كده حتقلل من مستوي ضغط الدم .. مش كده وبس .. هو بيقول إنك لو بصيت علي الأبحاث العلمية في المجال ده حتلاقي إن 80% من البشر اللي ضغط دمهم كويس اللي هو 120/80 مليمتر زئبق معندهمش حساسية من الملح يعني الناس العادية اللي ضغط دمها كويس لو كلو ملح كتير ضغط دمهم مش بيعلي .. مش كده وبس .. فيه حاجة اسمها بري-هايبرتنشن Prehypertension وده مقياس بيحددلك هل البني أدم ده عنده قابلية إنه يجيله مرض إرتفاع ضغط الدم أو لا .. هو بيقول إن من ضمن 75% اللي عندهم قيمة Prehypertension عالية يعني إحتمالات إنهم يجيلهم مرض إرتفاع ضغط الدم عالية أساساً لو أسرفوا في تناول الملح فضعط الدم عندهم مش بيعلي برده.
طب أزيدك من الشعر بيت .. هو بيقول إن 50% من الناس اللي قيمة الPrehypertension معدية المقاييس الطبيعة يعني اللي وش حيجيلهم مرض إرتفاع ضغط الدم برده لو أسرفوا في تناول الملح ضغط دمهم مش حيعلي .. نقطة تانية بيقولها (جيمس دي نيكولانتونيو) في كتابه وهي إن لما حضرتك بتتمرن أو بتروح الجيم أو بتجري فإنت بتعرق كتير وبالتالي بتفقد نسبة كبيرة من الملح اللي إنت بتاكله.
عشان بس متفتكرش إن ( جيمس دي نيكولانتونيو) من الناس اللي بتدور علي الشهرة وخلاص فلازم تعرف الCV بتاعه فيه إيه .. الرجل ده محرر جريدة علمية إسمها BMJ بتنشر الأبحاث ورسايل الماجستير والدكتوراة في مجال عمليات القلب المفتوح ده غير إنه باحث في أمراض القلب في معهد القديس لوك لأمراض القلب.
علي الناحية الثانية منظمة الصحة البريطانية Public Health England أو PHE بيترد علي الكلام ده إنه مش بس غلط إنما خطير كمان .. رئيس قسم علم التغذية في PHE واسمه (لويس ليفي Luis Levy) وده بروفيسور في الجامعة بيقول إن أهم سبب لضعف صحة البني أدم هو الأكل الغلط وإنك ماشي علي نظام غذائي غلط أو إنك مش ماشي علي نظام غذائي أصلاً وبتعك في أكلك .. المشكلة إن أغلب الأبحاث العلمية بتقول إن فعلاً الإسراف في تناول الملح بيؤدي لإرتفاع ضغط الدم وهو أهم سبب لأمراض القلب .. الأهم من كده إن PHE بقالها سنين شغالين مع شركات الأغذية البريطانية لحد ما قدروا إنهم يوصلوا بالشركات إنها تقلل من نسبة الملح في الأغذية المصنعة اللي بتتباع في بريطانيا بنسبة 11% وفيه دول كتير في العالم ناوية تقلد التجربة البريطانية دي.
عشان بس تكون عارف إن PHE وكمان منظمة إتحاد القلب الأميريكية American Heart Association أو AHA إختصاراً بينصحوا إن أخرك في إستهلاك الملح يومياً هو معلقة واحدة بس يعني بتتكلم عن 2,300 مليجرام من الصوديوم .. وده أخرك .. يعني الصح إنك تقلل استهلاكك عن النسبة دي كمان بحوالي النص .. طبعاً عشان إحنا في مصر بنسف الملح زي الهروين وبنحط الملح في أي حاجة بكميات رهيبة فحتي لو إنت شخصياً مشيت علي الحد الأقصي اللي هو 2,400 مليجرام صوديوم يومياً فده لوحده كفيل إنه يحسن صحتك بشكل لا تتخيله.
متنساش إن كل حاجة معلبة بتاكلها فيها ملح .. كيس الشيبسي فيه ملح .. الكاتشاب فيه ملح .. علبه التونة فيها ملح .. عشان كده 75% من الملح اللي بيدخل جسمك يومياً مش بيجي من الملح اللي إنت بتحطه علي الأكل .. جهة تانية اللي هي لجنة الإرشاد العلمية للتغذية التابعة للحكومة البريطانية Scientific Advisory Committee on Nutrition أو SACN قالت إن المفروض المواطن البريطاني يقلل من استهلاكه من الملح من 9 جرام يومياً وده المتوسط اللي هو 6 جرام يومياً وهم فتوا الفتوي دي بناء علي أبحاث إتعملت علي الفئران سنة 2003 لقوا فيها إن الإسراف في تناول الملح مربوط بإرتفاع ضغط الدم .. جهة ثالثة هي المعهد الوطني للصحة وجودة الرعاية في بريطانيا قال في تقرير نشر سنة 2013 إن الخطوات اللي الحكومة البريطانية بتاخدها عشان تقلل من استهلاك المواطن اليومي من الملح ممكن ينقذ حياة 20,000 بني أدم سنوياً كان ممكن يموتوا بأزمات قلبية.
مش PHE بس اللي معترضة علي كلام (جيمس دي نيكولانتونيو) .. عندك واحد اسمه (جراهام ماكجريجور Graham MacGregor) بروفيسور أمراض القلب والرجل ده عمل حملة كبيرة لتوعية الناس بمخاطر الملح اسمها Campaign for Action on Salt and Health أو CASH إختصاراً .. الرجل ده مقتنع إن الإسراف في تناول الملح مٌضر ومينفعش تقول غير كده وأي كلام غير كده يعتبر هراء .. الرجل ده حملته كان ليها تأثير كبير أوي في بريطانيا لدرجة إنه قدر يقنع الحكومة البريطانية إنها تضغط علي كل مطاعم Fast Foods اللي موجودة في بريطانيا كلها إنها تقلل من نسبة الملح اللي بتقدمه مع الوجبات الجاهزة .. وجهة نظر (جراهام ماكجريجور) إن (جيمس دي نيكولانتونيو) غرضه شريف بس مشكلته إنه من العلماء اللي شايفين إن السكر هو الشيطان الأكبر لصحة البشر وضرره أكبر من ضرر الملح وده في حد ذاته مش صح .. كمان (جراهام ماكجريجور) عنده مشكلة مع نقطة إنك لما بتتمرن أو بتجري أو بتلعب جيم وبتعرق فإنت بتفقد نسبة كبيرة من الملح في جسمك لإن القوات الخاصة البريطانية SAS عملت تجربة علمية لجنود أُسقطوا بالبارشوت في الصحراء لقوا إن لازم الجنود يكون معاهم أكل نسبة الملح فيه قليلة أوي لإن كل ما زادت نسبة الملح في أكلهم حيحتاجوا يشربوا مياه أكتر وبالتالي حيحتاجوا يشيلوا كمية مياه أكتر معاهم في المهام القتالية.
عشان بس نكون منصفين .. (جيمس دي نيكولانتونيو) مش بيقول إنك تخلص نص كيس ملح كل يوم .. الرجل بيقول إن الإعتدال حلو برده بس الإعتدال من وجهة نظره إن استهلاكك اليومي من الملح يبقي في حدود ما بين 3000 إلي 6000 مليجرام من الصوديوم ولإن نسبة الصوديوم في الملح حوالي 40% فهو بيقولك إنك يومياً تاخد ما بين 7.5 الي 15 جرام ملح .. تاني .. هو في رأيه إن ده هو الإعتدال .. الإسراف بقي في تناول الملح ده لو عايز تجربه فروح اليابان أو كوريا الجنوبية أو فرنسا لإن الناس دي بتستهبل في نسب الملح اللي بياكلوها ورغم كده معدل الأعمار عندهم عالي أوي وعندهم أقل نسبة إصابة بأمراض القلب .. سبحان الله يا أخي.
المصدر:
- مقالة بعنوان A danger to public health? Uproar as scientist urges to eat more salt نشرت في جريدة The Guardian البريطانية وده لينك المقالة الأصلية:
https://www.theguardian.com/science/2017/aug/08/a-danger-to-public-health-uproar-as-scientist-urges-us-to-eat-more-salt
