ألبوم صور .. دبي عندها نخلة بس الصين عندها شمس و قمر و وردة.

يحكي أن لما دبي حبت تلفت نظر المستثمرين الأجانب ليها كانوا عارفين إن ده عامل زي واحدة عايزه تتجوز و تلم عليها العرسان .. سوري في التشبيه اللي ممكن يتشاف مسيء للبنات بس إستحملني للأخر .. إحنا كرجاله عادة عشان نختار عروسة عقلنا بيقولنا زي ما ربنا قال إختر ذات الدين تربت يداك .. محتاج بنت عاقله دماغها تخليها قادرة تشيل مسئولية بيت .. بس نصنا التحتاني بيمشي في سكة تانية خالص وهي انا عايز واحدة تدلعني و شكلها حلو و تبقي مزة .. لو ربنا سهلك و لقيت بنت فيها الصفتين يبقي انت من سعداء الحظ .. نفس الموضوع بالنسبة للدول اللي عايزه تجذب ليها إستثمارات أجنبية .. مش بس القوانين و التسهيلات في إجراءات إنك تفتح Business عندهم هي اللي حتخليك تروح إنما كمان محتاج تخلي البلد شكلها سيكسي .. المكياج و اللبس و الدلع بالنسبة للدول بيكون في صورة مشاريع ملهاش أي ستين لازمة غير إنها بتبقي حلوة أوي انها تتصور و تاخد اللقطة جنبها .. دبي من أوائل المشاريع اللي هي عملتها كان بالم الجميرا Palm Jumeira ودي مجموعة جزر صناعية علي شكل نخل و الحقيقة إن المشاريع من النوع ده جابتلهم شغل زي الفل .. الصينيين لإنهم شعب بيعشق التقليد و مش قادرين يتخلصوا من مرض الCopy & Paste لما حبوا برده يجذبوا ليهم إستثمارات أجنبية قلدوا دبي بالضبط .. الصينيين بقوا بيبنوا جزر صناعية بمعدل انت ممكن متبقاش قادر تتخيله أحياناً بس ححاول أخليك تستوعبه.

خلال الفترة من 2013 لحد 2016 الصينيين عملوا جزر صناعية لو جيت تحسب مساحتهم الإجمالية جنب بعض تلاقيهم 420 كيلومتر مربع .. عشان بس أحطك في الصورة .. حتة زي جزيرة مانهاتن اللي إتبنت عليها مدينة نيويورك مثلاً مساحتها 59 كيلومتر مربع .. بس خلي بالك .. الجزر الصناعية دي كلها إتعملت لاغراض الهلس .. الصين ليها ساحل طويل علي بحر إسمه بحر الصين الجنوبي و عاملين عليه جزيرة صناعية واحدة بس عشان يبنوا عليها قاعدة بحرية .. فتاني الجزر الصناعية الصينية دي مش معمولة عشان الصين تبني عليها مصانع ولا مناطق تكنولوجيا .. لا أبوسولوتلي خالص.

مهم تبقي فاهم إن الموضوع كله Business و بيتحسب بالورقة و القلم .. عشان أقربهالك خليني أديلك مثال بمصر .. تخيل شركة زي أوراسكوم أو عامر جروب حبت تعمل مشروع منتجع سياحي مثلاً علي البحر الاحمر .. حتيجي الحكومة تقولها عشان أديكي الأرض حتدفعي مبلغ محترم و حتدفعي فوقه انتي تكاليف البناء .. لما تيجي الشركة تبص هي حتصرف قد إيه عشان تردم مياه البحر حتكتشف إن تكاليف الردم كلها متجيش حاجه جنب تكاليف إنها تاخد الأرض من الحكومة .. خد عندك الصين مثلاً .. تكلفة ردم 100 متر مربع بتوصل 21,000 دولار بس وده خلي شركات مقاولات كتير في الصين تفتري في الردم لدرجة إن ده بقي بيشكل تهديد صريح للبيئة .. الحل إن الحكومة الصينية قفلت الباب علي أي مقاول أو مستثمر عايز يبني جزيرة صناعية بس طبعاً بعد ما الدنيا خربت.

كان المفروض إن الأرض تبقي جزيرة صناعية إسمها جزيرة روي Ruyi Island فيها منتجع حاجه فخيمة الصراحة .. بعد 5 سنين من البناء كل اللي إتعمل هو مجرد حتة أرض رملة .. شركة المقاولات اللي ماسكه المشروع إسمها زونج-هنوج القابضة Zhonghong Holding Ltd. إتفرض عليها غرامة 5.5 مليون دولار .. ليه بقي؟ .. أصلهم ردموا مياه البحر من غير ترخيص و الغرامة اللي إتفرضت عليهم خلت الشركة تفلس و دلوقتي مش لاقيين شركة مقاولات تانية يبيعولها المشروع.

مشروع جزيرة وردة المحيط Ocean Flower Island عبارة عن جزيرة صناعية أكبر مرة و نص من Palm Jumeira في دبي .. بناء علي تقرير إتنشر في يناير 2018 من وزارة البيئة الصينية فالمشروع ده خلي محار اللؤلؤ في مياه بحر الصين الجنوبي من الكائنات البحرية المهددة بالإنقراض.

ده كان مشروع تحت إيد شركة مقاولات صينية إسمها إيفرجراندي جروب Evergrande Group و طلع قرار بوقف البناء بعد ما الشركة إتوجه ضدها إتهام بإنها ردمت مياه بحر من غير إذن وفي مارس 2018 إتسمح للشركة تكمل المشروع بعد ما دفعت غرامة 300 مليون يوان.

مشروع خليج جزيرتي الشمس و القمر علي مساحة كيلومتر مربع و اللي بدأ من سنة 2015 من غير ما يتعمله أي دراسة بيئية.

صورة لعملية البناء في مشروع خليج جزيرتي الشمس و القمر إتصورت في أكتوبر 2018 و مكنش لسه المشروع خلص.

مشروع جزيرة العنقاء Phoenix Island كان أول مشروع جزيرة صناعية كبير يتعمل وهو مقسوم نصين شرقي و غربي .. النص الشرقي خلاص خلص بس الغربي لسه .. المشروع ده إتوقف فترة بداية من 2017 عشان الحكومة الصينية قالت إن المشروع ده له أضرار بيئية.

المصدر:
مقالة بعنوان Dubai has palm islands, but China has a sun, moon and flower .. نشرت في مجلة Bloomberg وده لينك المقالة الأصلية:
https://www.bloomberg.com/news/features/2019-03-04/dubai-has-palm-islands-but-china-has-a-sun-moon-and-flower