قبل ما نبدأ نتكلم في موضوعنا النهاردة و تبدأ تفهمه خليني أبدأ معاك بسؤال خيالي شوية .. لو إفترضنا إن بكره الصبح كل العربيات اللي في العالم بقت Autonomous يعني بتسوق نفسها بنفسها من غير ما تحتاج إنك تسوقها .. تفتكر إيه اللي ممكن يتغير في تصميم العربية عن التصميم اللي موجود دلوقتي؟ .. فكر فيها كده .. إنت مبدأياً مش حتحتاج دريكسون Steering Wheel و مش حتحتاج الإسكترة اللي هو الميكانيزم Mechanism اللي بينقل حركة الدريكسيون للعجلات .. إنت ممكن تفكر إنك ليه لا تحط أرفف كتب جوه صالون العربية أصل إنت مش حتبقي مُطالب إنك تسوق و حتبقي قاعد فاضي؟ .. إيه اللي يخليك تحط الكراسي مش في وش بعضها يعني كإنك قاعد في صالون بيتكوا بالضبط؟ .. بما إنك مش إنت اللي حتسوق إنما كومبيوتر هو اللي حيسوق فهل إنت كمهندس تصميم حيهمك إنك و إنت بتصنع عجل العربية إنك تدي للسواق قدرة علي السواقة بسلاسة اللي بيسموها Handling؟ يعني هل حيفرق معاك أصلاً إن تصميم العجلات يبقي هو التصميم الموجود حالياً ولا لا .. إنت محتاج ترمي كل اللي تعرفه عن التصميم الهندسي للعربيات ده في الزبالة و تبدأ تشتغل علي تصميم جديد لانج؟ إنت فعلياً مبقتش محتاج إسكترة ولا أكس أمامي ولا أكس خلفي و غالباً مش محتاج كرونة و الأهم إنك حتلغي خالص فكرة العجلة الكاوتش اللي بتتركب علي طنبور.
مجرد ما إنت حتروح لسكة العربيات اللي بتسوق نفسها بنفسها أو Autonomous فكل إضافة هندسية إنت حتطها في العربية لراحة السواق عشان يسوق و هو مستريح مش حتبقي محتاجها .. إنت لو حتشتري عربية Autonomous كل اللي يهمك إنك تنزل من بيتكوا الصبح الساعة 6 عشان تكمل نومك في العربية لحد ما توصل شغلك .. ساعتها الHandling مش حتبصله قد ما حيهمك إنك و إنت نايم لحد ما توصل الشغل تبقي مرتاح و مفيش دوشة و مش كل شوية تتفجع من المطبات .. لو إنت ناوي تلحق تعمل شغلك المتأخر قبل ما توصل فإنت برده عايز تعيش كأنك في مكتبك .. إنت عايز العربية بتاعتك توفرلك جو يعزلك خالص عن العالم الخارجي اللي حوليك .. شفت بقي قد إيه طلباتك كمستهلك حتتغير خالص و إنت رايح تشتري عربية جديدة في عصر الAutonomous Cars؟
شركة ميشلان Michelin الفرنسية اللي عمرها أكثر من 128 سنة و المتخصصة في تصنيع إطارات السيارات بدأت تشتغل علي فكر جديد خالص لتصميم إطارات السيارات و الفكر ده في الأخر طلّع العجلات اللي شكلها غريب اللي عندك في الصورة .. دي إطارات مفيهاش هواء جواها خالص و بتعيش علي طول و لو إشتريت واحدة منها فإنت مش حتحتاج تغيرها طول حياتك .. شكلك مبسوط و بتقول إيه الإختراعات الجامدة دي .. هو قبل ما تتحمس أوي و تستني اليوم اللي الإطارات دي تنزل السوق أحب أقولك إن دي مجرد فكرة .. شركة ميشلان Michelin عملت منها عدد محدود جداً بتكنولوجيا 3D-Printing و سموها الرؤية Vision و قدموها للعالم لأول مرة في بداية السنة دي في مؤتمر Movin’ On اللي بتعمله شركة ميشلان Michelin كل سنة و عملته المرة دي في مدينة مونتريال الكندية.
عشان أبسطلك الموضوع هم رسموا الإطارات دي علي برنامج رسم هندسي و حطوها علي Printer شبه الPrinter الHP اللي عندك في البيت بس الحبر اللي في ال3D- Printer مش حبر إسود بيتطبع به زيه زي الأحبار في الPrinters العادية .. الحبر ده معمول من خلطة من مواد عضوية قابلة للتحلل زي المطاط و شجر البامبو و الورق و كانزات الحاجة الساقعة و الخشب و شوية أسلاك كهرباء و شوية بلاستيكات علي شوية قماش و ورق كرتون و قشر برتقال .. تحس إنهم جابوا كيس الزبالة بتاعك في البيت و ضربوه في الخلاط و طلعلهم في الأخر بودرة حطوها جوه ال3D-Printer و هي دي المشكلة .. شركة ميشلان Michelin صنعت نموذج بس هي لحد دلوقتي مش عارفه حتصنع الإطارات دي إزاي؟ ولا من أنهي مادة؟
الموضوع مش بس إن شركة ميشلان Michelin حتجيب مواد عضوية تعمل منها حبر و تصنع منه الإطارات .. الموضوع مش بالبساطة دي .. الإطارات دي حتتحط فيها حساسات Sensors إسمها RFID وظيفتها إنها تجمع كم ضخم من المعلومات زي طبيعة الطريق اللي العجلات ماشية عليه و طبيعة المرور و هل المرور زحمة ولا السكة سالكه و بينك و بين العربية اللي جنبك قد إيه و هل العربية اللي جنبك ملاكي ولا ترلة ولا نقل و بعد ما تجمع كل المعلومات دي تبدأ تخلي العجلات تتأقلم علي طبيعة السواقة .. اللي بتفكر فيه شركة ميشلان Michelin إنها تعمل عجلات لكل طبيعة سفر .. يعني مثلاً .. لو إنت معاك عربية 4X4 و ناوي تعمل رحلة سفاري في الصحراء فإنت حتروحلهم تشتري أربع عجلات معمولين مخصوص للسفاري.
فكرة الإطارات اللي مفيهاش هواء خالص مش جديدة علي فكرة .. عندك شركة Bridgestone بتلعب بالفكرة دي من سنة 2013 و في السنه دي الشركة قدمت للعالم أول إطارات مفيهاش هواء خالص و كانت الفكرة إنك لما يبقي إن شاء الله عندك عربية بتسوق نفسها .. بفكرك إن الكلام ده كان سنة 2013 .. فإنت مش حتبقي محتاج إنك كل فترة تركن علي جنب عشان تغير العجلات و كمان عشان يقللوا شوية من إنبعاثات غاز ثاني أكسيد الكربون .. شركة Bridgestone قعدت تشتغل علي الفكرة لحد ما من فترة قريبة نزلوا أول إطارات مفيهاش هواء خالص ينفع تشتغل علي العجلات Bicycles اللي إنت بتركبها في المصيف دي .. حتي شركة ميشلان نفسها إشتغلت علي فكرة العجلات اللي مفيهاش هواء و من حوالي 10 سنين أنتجت عجلة سموها تويل Tweel ولحد دلوقتي مستخدمة في العربيات الصغيرة أوي زي العربيات الكهربية اللي بتشوفها في ملاعب الجولف.
ده يرجعك لنفس النقطة اللي إتكلمنا عنها في البداية و هي إن تصنيع الإطارات اللي مفيهاش هواء أساساً صعب فلما تيجي تبص لفكرة زي Vision فحاول تحط نفسك مكان مهندسي الشركة .. إنت أساساً مش عارف حتصنع الإطارات دي من إيه؟ ولا عارف إنت حتصنعها إزاي؟ ولو صنعتها متعرفش حتختبرها إزاي؟ ولا حتركبها إزاي؟ لإن لحد دلوقتي العالم قدامه سنين علشان يبدأ يدخل فكرة Autonomous Cars حيز التنفيذ بشكل موسع .. اللي ممكن يرفع شوية من روحهم المعنوية إن فكرة إنك تجيب عجلة عربية تركب عليها حساسات Sensors اللي هي RFID مش صعبة و بتتنفذ حالياً في الإطارات اللي بتصنعها شركة ميشلان مخصوص لشركة بورشه Porsche .. فإنت علي فرض إنك بقدرة قادر عرفت تصنع إطارات Vision فإنت حتعرف تركب عليها الحساسات دي اللي حالياً مستخدمة عشان تقيس درجة حرارة و ضغط العجلات.
خلاصة الكلام إننا داخين علي مرحلة جديدة .. العربيات الكهرباء زي Tesla اللي لحد دلوقتي مدخلتش مصر مع إنها منتشرة في كل حتة في أميركا و أوروبا مش هي نهاية المطاف في تطور صناعة السيارات .. إحنا داخلين علي عصر عبل إن شاء الله ما يدخلنا نكون بدأنا نتفق هو بنزينات وطنية هي اللي حتستحوذ علي كل محطات شحن بطاريات الكهرباء بتاعة العربيات ولا حيسيبوا الشركات التانية تاخد حتة من التورتة.
المصدر:
مقالة بعنوان Michelin wants to reinvent the wheel for the driverless age نشرت في Website إسمه The Verge و ده لينك المقالة الأصلية:
https://www.theverge.com/2017/9/24/16126356/michelin-3d-printing-reinvent-the-wheel-driverless-age
