لينك التسجيل الصوتي للمقالة علي Sound Cloud:
https://soundcloud.com/user-112011687-312727988/m4-carbine
لو جيت سألتك إيه هي البندقية الألية اللي كل جنود و ضباط الجيش المصري بيتدربوا علي ضرب النار عليها حتكون الإجابة هي البندقية كلاشينكوف أو AK-47 الروسية الصنع اللي إنت بتشوفها مع كل عساكر الجيش و الشرطة .. زي ما إنت أكيد عارف الحرب اللي الجيش المصري بيخوضها حالياً هي في شبه جزيرة سيناء و دي بيئة صحراوية فإنت محتاج بندقية ألية الطلقات مبتتحشرش فيها يعني مبيحصلهاش Jamming و عايز بندقية ألية سهلة في تنظيفها و طلقاتها عيارها كبير عشان لما الجندي المصري يضرب طلقة علي الإرهابي فيكون متؤكد إن حتي لو الإرهابي لابس درع واقي من الرصاص فالطلقة حتجيبه وده اللي عيار الطلقة 7.62 مليمتر بتوفرهولك في البندقية AK-47 .. إذن ده سلاح مناسب للبيئة اللي الجيش المصري بيخدم فيها .. المشكلة بتظهر لو إنت بتتكلم عن قوات مسلحة منتشرة في كل حتة في العالم زي القوات المسلحة الأميريكية .. الناس دي ليها جنود في الصحراء و في الغابات و في الثلج و في المدن .. البيئة اللي سلاح معين يبقي مثالي فيها ممكن ميبقاش نافع أوي في بيئة تانية وهي دي المشكلة .. إزاي تلاقي سلاح رسمي للقوات البرية الأميريكية في الوقت اللي هم شغالين فيه في كل حتة في العالم وكل حتة مختلفة في طبيعتها عن التانية؟
عشان كده أنا مش ببالغ لو قلت إن البندقية M4 Carbine هي بندقية ألية عبقرية .. دي البندقية الألية الرسمية للقوات البرية الأميريكية ودي بندقية بتشتغل في أي حتة وفي أي وضع و مبتقولش لا .. شكلها حلو و سهلة في الإستخدام و خفيفة و دقيقة .. اه فيها عيوب زي أي سلاح في الدنيا بس تظل البندقية الألية دي من أحسن البنادق الألية اللي البشر إخترعوها و اللي قصتها تستحق إنها تتحكي يمكن نتعلم منها حاجة.
البداية خالص كانت في الستينات لما أميركا كانت غرقانة لشوشتها في حرب فيتنام .. فكر فيها شوية .. الأمريكان لقوا نفسهم في حرب في دولة كلها غابات و مستنقعات لا و كمان بلد إستوائية .. يعني بلد كلها غابات و درجة الحرارة فيها زيها زي الخليج بس بتشتي بشكل مستمر زيها زي أوروبا و الرطوبة فيها بتخليك تعرق علي طول .. وقتها كان السلاح الرسمي اللي في إيد القوات البرية الأميريكية كان بندقية أستغفر الله العظيم يعني إسمها M14 ودي بندقية تقيلة و خزنتها صغيرة بشكل مستفز فالأمريكان كانوا محتاجين يرموا الM14 في الزبالة و يجيبوا مكانها بندقية أخف في الوزن .. الحل في البداية خالص كان بندقيتين واحدة إسمها AR15 ودي إختصار Armalite Rifle-15 والثانية إسمها M16 و الإتنين كانوا بنادق ألية خفيفة و صغيرة و بتستخدم طلقات عيار 5.56 مليمتر .. ده كان معناه إن أنا لو عسكري رحت فيتنام و أنا شايل بندقية AR15 أو M16 فلإنهم خفاف فأنا ممكن أشيل ضعف الذخيرة اللي ممكن أشيلها لو كان معايا بندقية M14 .. ده غير إن لما وزارة الدفاع الأميريكية عملت دراسة علي التوزيع السكاني للعساكر اللي حيحخدموا في فيتنام إكتشفوا إن أغلبهم جايين من مدن و عمرهم ما شافوا سلاح في حياتهم فكان أسهل إنك تدربهم علي AR15 أو M16 لإن الإتنين سهلين جداً في إستخدامهم و تقريباً و إنت بتضرب نار مبتحسش بأي رد فعل أو Recoil في كتفك.
مع الإستخدام بدأت مشاكل M16 تظهر .. لسبب ما أنا الحقيقة مش فاهمه حد أقنع العساكر الأمريكان إن البنادق الألية دي مش بتحتاج تتنظف وده خلي مع كتر الإستخدام و قلة التنظيف البنادق بقي بيحصلها Jamming أو إن الطلقات تتحشر فيها كتير .. الحل كان إنهم نزلوا نسخة معدلة سموها M16A1 بدأت تدخل الخدمة سنة 1967 بس كانت خلاص السمعة اللي بنادق M16 خدتها بين العساكر إنها سلاح لا يعتمد عليه .. في الثمانينات نزل تعديل جديد سموه M16A2 خلوا فيه سمك الماسورة أكبر شوية و علموا فيها إختراع لطيف إن إنت عندك في أي بندقية ألية فيه Modes أو أنظمة إطلاق نار اللي هو نظام الأمان إنك لو ضغطت علي الزناد البندقية متضربش .. و نظام الطلقة طلقة أو Semi-Automatic إن مع كل ضغطة علي الزناد البندقية تضرب طلقة .. النظام الثالث هو الألي Automatic إنك طالما ضاغط علي الزناد البندقية بتضرب نار .. مشكلة الAutomatic Mode إنه بيضرب نار كتير بس مش دقيق و بيخلي البندقية تترج منك جامد و فعلياً مبتعرفش تنشن خالص .. الحل إنهم خلوا الAutomatic Mode ده يضرب 3 طلقات في 3 طلقات .. ده حل كويس إنك تضرب طلقات بشكل شبه مستمر بس بمعدل تقدر تنشن به بسهولة.
في التسعينات نزلت البندقية M4 بس في الأول قيادة القوات البرية الأميريكية إشترت عدد محدود منها .. أول ناس لما شافت الM4 إنبهرت بيها كانت القوات الخاصة الأميريكية و بصراحة سهل تفهم إيه السبب إنهم وقعوا في غرامها بالسهولة و السرعة دي:
- هم لقوا بندقية ألية الكعب بتاعها بيتطبق ومش ثابت في مكانه زي M16 أو حتي شبه AK-47.
- كمان الماسورة بتاعتها طولها 36 سنتيمتر وده أقصر بكتير من M16 اللي طول الماسورة بتاعتها كان 50 سنتيمتر .. ده معناه إن لو أنا ضابط قوات خاصة بطلع سلم في عمارة و أنا شايل M4 فأنا حتحرك بسهولة في الأماكن الضيقة أو لو أنا مثلاً راكب طيارة هليكوبتر أو قاعد جوه مدرعة في مكان ضيق البندقية بتاعتي مش حتعملي صداع في دماغي اللي هو ياتري حشيلها إزاي في مكان ضيق أوي زي ده.
- فوق ده كله الM4 شغالة بنفس عيار الطلقة 5.56 مليمتر زيها زي M16 و الخزنة بتاعتها بتشيل 30 طلقة.
- البندقية كمان خفيفة أوي وزنها علي بعضها 3.3 كيلوجرام لو زودت عليها الإكسسوارات اللي بتتركب زي عدسة التنشين و العدسة المكبرة و المقبض و التوجيه بالليزر و قاذف القنابل فالوزن الإجمالي ممكن يوصل 4 كيلوجرام وده برده أقل من الوزن بتاع بندقية M14 اللي كان وزنها 5 كيلوجرام ومينفعش يتركب عليها ولا حاجة من الإكسسوارات دي كلها.
حربي العراق و أفغانستان سرعوا أوي من إستخدام M4 في القوات البرية الأميريكية بس في نفس الوقت خلت ناس تقول إن ليها عيوب كتير والحقيقة هم بيتكلموا عن عيبين أساسيين:
- العيب الأول إن M4 زيها زي M16 بيتقال عليهم Gas Powered Rifles يعني بنادق ألية شغالة بالغاز و ده معناه إن تصميمها بيخليها تستخدم غازات الإحتراق الناتجة عن إحتراق البارود في إنها تروح تمشي في مسارات جوه البندقية عشان ترفع الطلقات ورا بعضها من الخزنة لحد الماسورة .. ده معناه إنك بتمشي العادم جوه البندقية و ده معناه إنك زي ما بنقول في الهندسة بتهببب المواسير و بتزود من إحتمالية إن مع الإستخدام يحصلها Jamming.
- العيب الثاني هو إن فيه ناس شايفه إن عيار 5.56 مليمتر اللي هو العيار الStandard للطلقات بتاعة حلف شمال الأطلسي NATO ضعيف مش زي طلقات عيار 7.62 مليمتر المستخدم في بنادق AK-47 .. بإختصار شديد لو أنا معايا بندقية M4 و زميلي معاه بندقية AK-47 بنضرب علي واحد مستخبي ورا مثلاً باب عربية فلو زميلي ضرب عليه طلقة واحدة حيعرف يموته بس أنا ححتاج علي الأقل 3 طلقات لإن القدرة التدميرية للطلقات بتاعتي أضعف من بتاعته .. صحيح طلقتي أسرع و دقتها أعلي .. يعني لو إحنا الإتنين بننشن علي هدف بعيد عننا فإحتمالية إني أعرف أصطاده أعلي بكتير من زميلي.
بس حتي العيوب دي مخلتش سمعة M4 تتهز بين الجنود الأمريكان .. سنة 2006 شركة CNA نشرت تقرير عن رأي الجنود الأمريكان في العراق و أفغانستان في البندقية وكان رأي 89% منهم إن الM4 سلاح يعتمد عليه و 19% بس حصل معاهم مشاكل في المعارك و 80% عبروا عن ثقتهم فيها .. ده في الوقت اللي وزارة الدفاع الأميريكية شغالة علي علاج المشاكل بتاعة الM4:
- الطلقات زمان كانت مصممة بحيث تقدر تخترق الدروع الروسية الصنع فالمهندسين وهم بيصمموها مكانوش مركزين أوي علي إنهم يعملوا طلقة بتقتل قد ما كان همهم إنهم يعملوا طلقة خارقة للدروع .. دلوقتي نزلت طلقات جديدة إسمها M855A1 ودي طلقة مصممة بحيث تقتل بسرعة.
- هم دلوقتي شغالين إنهم يبدلوا بنادق M4 Carbine ببنادق أحدث هي M4A1 بحيث إنهم حيشيلوا نظام ضرب النار بتاع 3 طلقات في 3 طلقات و حيخلوه نظام ألي Automatic ده غير إن ماسورة البندقية حتتعدل عشان متسخنش أوي مع ضرب النار المستمر.
مفيش بندقية ألي تنفع لكل حاجة .. زي ما كده مفيش حاجة إسمها عربية تنفع لكل حاجة .. عندك مثلاً الBMW M3 عربية ممتازة بس مينفعش تمشي فيها في الصحراء زي ما بالضبط Jeep عربية ممتازة لحد لما حتحتاج تسابق حد و تيجي تاخد U-Tern بسرعة عالية تلاقي نفسك إتقلبت بيها .. الAK-47 سلاح ممتاز بس تقيل و طلقته كبيرة .. صحيح بتقتل من أول طلقة بس إنت كعسكري لما بتشيل AK-47 بتلاقيك بتشيل عدد خزن ذخيرة أقل من واحد شايل بندقية M4 Carbine .. الM16 كانت بندقية الماسورة بتاعتها طويلة وده بيخليها تجيب أهداف من مسافات بعيدة أوي بس لو حبيت تستخدمها في إقتحام بيت مثلاً مستخبي فيه إرهابيين فإنت كده لبست في الحيط لإنك مش حتعرف تمشي بيها في ممرات البيت بين الأوض .. ده بيخلينا قدام حقيقة إن الM4 Carbine واحدة من أحسن البنادق الألية اللي البشر إخترعوها علي الإطلاق.
المصدر:
مقالة بعنوان M4: The Gun The Army Loves to Go to War With نشرت في مجلة The National Interest وده لينك المقالة الأصلية:
/nationalinterest.org/blog/the-buzz/m4-the-gun-the-army-loves-go-war-24890
