موضوعنا النهاردة اللي حنتكلم عنه هو البلاستيك .. (رياض باشا المنفلوطي) بتاع الصناعة اللي هو حيطلعلك من كل حتة حتي في بنطلونك .. و في المقالة دي حنحاول نجاوب علي سؤال واحد اللي هو هل التعرض للبلاستيك مضر لصحتك؟ .. هو يبان سؤال سخيف لإن فعلياً البلاستيك موجود في كل حاجة في حياتنا .. من أول كياس الشيبسي و البسكوت لحد أزايز المياه و الحاجة الساقعة و حتي الموبايلات و الكومبيوترات .. البلاستيك حوليك سواء إنت شايفه أو مش شايفه و معانا بقاله سنين فهل ينفع دلوقتي أجي أسألك هو البلاستيك مضر ولا مفيد؟ .. سبب إننا بنسأل السؤال ده من الأساس هو إن فيه دراسة علمية إتعملت قالت إن فيه مركب عضوي إسمه بيسفينول إيه Bisphenol A و إختصاراً بيتسمي BPA لقوا إنه موجود بنسب مختلفة جوه أجسام أكثر من 80% من المراهقين اللي إتعملت عليهم الدراسة و ده لينك الدراسة عشان لو حبيت تقرأها بنفسك .. أنا عارف إن نسبة 80% في دي تخض شوية فخلينا نبدأ نفسرلك الموضوع براحة.
مبدأياً مادة BPA هي مادة بتضاف للبلاستيك عشان نعمل منه حاجة خاصة شوية إسمها بولي كاربونيت بلاستيك Polycarbonate Plastic و ده يبقي النسخة النضيفة من البلاستيك و ده اللي بيستخدم في صناعات كتير أوي حولينا من أول كياس الشيبسي و أزايز الحاجة الساقعة لحد المعدات الطبية و إسطوانات الDVD .. الPBA ده إتصنع لأول مرة سنة 1891 و بدأ يدخل في الصناعة بالشكل اللي إحنا شايفينه دلوقتي بداية من الخمسينات و حالياً هو أكثر مادة كيماوية بتتصنع في العالم و سنوياً البشر بينتجوا منه 3.6 مليار طن .. المشكلة إن الPBA بيخش جسمك من التلامس الخارجي للجلد .. بمعني .. لو حضرتك جبت كيس شيبسي و فتحته فعشان تحمي نفسك من الBPA ده محتاج تكون لابس جوانتي طبي .. بسبب إن زي ما قلتلك الPBA داخل في حاجات كتير حولينا فخلال العشرين سنة اللي فاتت فيه دراسات كتير إتعملت عشان تقدر تعرف هل فعلاً PBA مُضر علي صحتنا أو لا .. الحقيقة هي المشكلة مش فيك لإن إنت شحط كبير بتاكل فلافل مقلية في زيت عربيات فمعادش بيأثر فيك حاجة .. المشكلة في الأجنة و الأطفال الصغيرين اللي لسه أجسامهم أضعف من إنها تكون مضادات تحميها من المواد الكيماوية الضارة .. ده معناه إننا قدام حقيقة إن كل ما عمر الطفل قل كل ما مخاطر تعرضه لPBA بتزيد.
إنت مهم تكون فاهم هو BPA ده بيعمل إيه بالضبط .. بمجرد ما بيدخل جسمك فهو بيبدأ يقلد شغل هرمون إسمه الأويستروجين Oestrogen بمعني إنه بيبدأ يعطل شغل الغدد الصماء .. الغدد الصماء دي عبارة عن شوية كور بتفرز هرمونات هي اللي بتنظم عملية النمو و معدلات الحرق و النوم و الرغبة الجنسية عندك .. فيه دراسات إتعملت إنهم جابوا فئران تجارب و حقنوها بنسبة كبيرة من الBPA و إكتشفوا إن ده عمل مشاكل لوظائف الكبد و المثانة و الغدد الثديية.. صحيح إن النسب اللي الفئران دي إتحقنت بيها أعلي بكتير من النسب اللي إحنا كبشر بالغين ممكن نتعرضلها بس زي ما قلتلك إحنا خلاص بقينا شحطة كبيرة مبيأثرش فينا حاجة و المشكلة كلها في الأطفال اللي لسه بيرضعوا و اللي لسه الجهاز المناعي بتاعهم مش جاهز إنه يتعامل مع كل ده.
بسبب كده فيه جهة إسمها FDA في أميركا و دي الجهة المسئولة عن أكل و أدوية الأمريكان و الناس دول طلعوا قرار بإن حيتم منع إستخدام PBA في ببرونات و بزازات الأطفال بس بسبب إن محدش عارف يحدد بالضبط وجود مادة زي BPA في جسم البالغين أضراره إيه فمش حتلاقي قرار رسمي يطلع بمنع إستخدامها .. ده بيفتح باب الفتي شوية .. فيه ناس بتقول إن إرتفاع نسبة BPA في جسمك بيقلل من رقم الحيوانات المنوية في الرجل و بالتالي ممكن يزود مخاطر إصابتك بالعقم و ده اللي بتقوله الدراسة دي .. ناس تانية مقتنعة بإن إرتفاع نسبة BPA في جسمك ممكن يسببلك أمراض مزمنة زي مرض السكر مثلاً من النوع الثاني و ده اللي بتقوله الدراسة دي .. و ناس تالتة بتقول إنه بيعرضك لخطر الإصابة بمرض إنسداد الشرايين و الإخوه اللي بيفتوا الفتي ده قالوه في الدراسة دي .. ناس رابعة فتت بإن إرتفاع نسبة BPA في الجسم ممكن يزود من فرصة الإصابة بسرطان الثدي و الكلام ده حتلاقيه في الدراسة دي .
المشكلة إن زي ما قلتلك كل ده فتي و أحياناً بيوصل لدرجة الهبد .. مفيش حد في إيده دليل إدانة قوي ضد PBA و ده سببه إن العلماء ميقدروش يعملوا تجارب علمية علي البشر فهم بيعملوها علي الفئران و بعد كده بيقيسوا بالتقريب النتيجة اللي طلعت علي الفئران ممكن تبقي عامله إزاي علي البشر .. و وسط كل الفتي و الهري فيه جهات قررت إنها تمشي بمبدأ حرّص ولا تخون .. هيئة أمان الأغذية الأوروبية مثلاً طلعت قرار بإن حيتم تقليل نسبة BPA المسموح وجودها في كل ما له علاقة بتعبئة الأكل و الشرب .. فرنسا قررت إنها حتلغي إستخدام BPA في كل حاجة ليها علاقة بتعئبة الأكل و الشرب .. بس حتي لو إنت بتقول يا سلام شايفين الحكومات اللي بتخاف علي صحة المواطنين بتوعها فإنت مهم تكون فاهم إن إحتمال كبير كل القرارات دي ولا يبقي ليها أي ستين لازمة بسبب إن BPA فعلياً موجود في كل حاجة حولينا .. إزازة المياه المعدنية داخل في تصنيعها BPA .. علبة التونة أو برطمانات المربي داخل في تصنيعها BPA .. حتي الحبر اللي بيتكتب به الباركود في أي حاجة بتشتريها في السوبرماركت داخل فيها BPA .. حتي لو إحنا بقدرة قادر لغينا الBPA خالص من الصناعات الغذائية فإحنا خلال السنين اللي فاتت أنتجنا مليارات الأطنان منه و حطيناها في مدافن الزبالة و الزبالة دي إتحللت و إتسربت لباطن الأرض و رجعتلنا تاني في المحاصيل الزراعية اللي إحنا بناكلها.
صحيح فيه حاجات ممكن نعملها عشان نقلل تعرضنا لBPA زي مثلاً:
- نحاول علي قد ما نقدر إن الأطفال يرضعوا رضاعة طبيعية ولو الأم حتستخدم ببرونة تحاول تتأكد إنها مفيهاش نسبة BPA عالية.
- فكرة إنك تروحي السوبرماركت عشان تشتري خضار و فاكهة طازة بس معلبين في كياس دي غلط لإن أكياس البلاستيك اللي بتتحفظ فيها الخضار و الفاكهة بتبقي فيها نسبة BPA عالية.
- حتي الأكل المُصنع زي علب البولوبيف نحاول نقلل منها مش بس لإن الأغذية المصنعة دي أساساً مٌضرة إنما كمان التعبئة بتاعتها بتبقي معتمدة علي بلاستيك مصنوع من الBPA.
- بلاش نسخن أكل في المايكروييف و إحنا حاطينه في علب بلاستيك مصنوعة من ال Polycarbonate Plastic.
المصدر:
مقالة بعنوان Are we poisoning our children with plastic? نشرت في جريدة The Guardian و ده لينك المقالة الأصلية:
https://www.theguardian.com/lifeandstyle/2018/feb/19/are-we-poisoning-our-children-with-plastic
