لينك التسجيل الصوتي علي ساوند كلاود:
https://on.soundcloud.com/qfv48
مشكلتنا مع الأفلام عموماً إننا مش بنشوف غير الممثلين .. الممثل ده مجرد واجهة و وراه فيه فريق طويل عريض من المهندسين و الفنيين اللي شغلتهم هي إنك لما تشوف مشهد معين تنبهر به .. ورا عبقرية أداء (هيث ليدجر Heath Ledger) الله يرحمه في دور الجوكر في فيلم The Dark Knight حتلاقي ناس بتوع مكياج و ناس تانية بتوع Costume Design اللي بينقولوله هدومه اللي حيلبسها عشان تمشي مع الشخصية .. ورا أي مشهد أكشن من اللي بتشوفهم في سلسلة Mission Impossible فيه فرق شغلتها إنها تضمن أولاً سلامة الممثلين و أهمهم (توم كروز Tom Cruise) و ثانياً يضمنوا إن المصور السينمائي أو Cinematographer ياخد اللقطة المناسبة اللي تخليك و إنت قاعد في السينما مبهور باللي بيحصل.
كلامي النهاردة حيبقي حول كذا قصة توريك 3 حاجات مهمة أوي في أي فيلم كويس .. أول حاجة هي Cinematography أو التصوير السينمائي وده الرجل اللي ماسك الكاميرا بيصور الفيلم و دوره إنه يصور اللقطة اللي تخليك و إنت قاعد في السينما تقول لنفسك اوووووه ماااااي جااااااااد إزاي إتصور المشهد ده .. ثاني حاجة إسمها Production Design وده يبقي المهندس المعماري اللي بيصمم المباني و الديكور خصوصاً لو بتتكلم عن فيلم تاريخي أو فيلم خيال علمي لإن ده الشخص اللي دوره إنه يعيشك جوه الأحداث و ينقلك عشان تعيش جوه تفاصيل الفيلم .. ثالث حاجة هي Costume Design أو الناس بتوع الهدوم و دول اللي بيساعدوا الممثل إنه يلبس اللبس اللي يخليك إنت كمشاهد متكيف من المشهد .. عشان مطولش عليك أكتر من كده خليني أخشلك في القصص اللي حنحكيها سوا.
في فيلم First Man المخرج قال مفيش حاجة إسمها جرافيك:
أنا عارف كويس أوي إن فيلم First Man معلقش مع ناس كتير .. ناس كتير و أنا منهم لما شفته حسيته فيلم ممل .. يمكن لإن بشكل لا إرادي فضلت أقارنه بأفلام تانية بتتكلم عن الفضاء كانت رائعة زي Interstellar أو حتي Armageddon للناس القديمة شوية في الأفلام .. للي منكوا مشافش فيلم First Man فده ببساطة أوي بيحكي قصة المهمة أبولو 11 أو Apollo 11 و دي المهمة اللي بعتتها وكالة الفضاء و الطيران القومية الأميريكية NASA للقمر و كان من ضمن أعضاءها رائد الفضاء (نيل أرمسترونج Neil Armstrong) أول بني أدم يمشي علي القمر .. مبدأياً كده ده فيلم علمي تاريخي مبني علي أحداث حصلت بحق و حقيقي و بيحكي قصة فعلاً تستحق إنها تتحكي و يمكن عشان كده اللي أخرج الفيلم ده كان مخرج تقيل أوي رغم إن سنه صغير إسمه (داميان تشازيل Damian Chazelle) وده نفس المخرج اللي قدملنا Lala Land و Whiplash و أيوه سامعك يا اللي بتقول إزاي مخرج عمل فيلمين كلهم رقص و غنا يعمل فيلم تقيل زي ده ويمكن عشان كده الفيلم فشل .. الله أعلم ودي مش قصتي دلوقتي .. قصتي إن فيه مشاهد كتير في الفيلم هي عبارة عن الممثل (رايان جوزلينج Ryan Gosling) و اللي بيجسد شخصية (نيل ارمسترونج) مبيعملش حاجة غير إنه قاعد جوه مركبة فضاء و بيطير بيها .. أي مخرج حيقول لنفسه أنا كل اللي أنا محتاجه أعمل ماكيت لمركبة الفضاء أقعد فيها الممثل و أجيب شاشات خضرا و أخلي الممثل يتخيل هو بيطير وسط إيه و بعد ما التصوير يخلص الناس بتوع الجرافيك و Visual Effects يملولي الدنيا باللي أنا عايزه بحيث أخليك و إنت بتتفرج في السينما مبلم .. بس (داميان تشازيل) معملش كده.
اللي عمله (داميان تشازيل) إنه جاب شاشة تليفيزيون L.E.D. عملاقة زي بتاعة بيتكوا بس شاشة بسم الله ما شاء الله 10.5 متر في 18 متر و علي الشاشة دي بيتحط Screen Saver زي اللي إنت بتحطها علي شاشة الكومبيوتر بتاعك عليها صور سماء و النجوم و أي حاجة المخرج عايزها بحيث ال Screen Savers دي عاملها الفريق بتاع الVisual Effects بقيادة واحد إسمه (بول لامبيرت Paul Lambert) وعلي فكرة الرجل ده واخد أوسكار أحسن Visual Effects قبل كده عن شغله في فيلم Blade Runner 2049 .. الشاشة دي بتتني علي شكل منحني و بتحط إنت الماكيت بتاع مركبة الفضاء قدامها .. ده بيخلي المصور السينمائي (لاينوس ساندجرين Linus Sandgren) اللي المخرج كان شغال معاه يبقي عامل زي ما يكون بيصور حد قاعد جوه عربية وبدل ما هو سايق فعلاً في الطريق هم جايبين Screen Saver عليها الطريق وهو بقي ينقي اللقطة اللي هو عايزها براحته .. الفرق إن مركبة الفضاء اللي الممثل (رايان جوزلينج) كان قاعد فيها كانت متركبة علي مواتير و سوست و مساعدين بحيث تتحرك فعلاً بنفس الطريقة اللي بتطير بيها مركبة الفضاء بحق و حقيقي.
فيه منكوا إحتمال يكون بيسأل نفسه طب و إيه الفكرة؟ .. طب ما كان (داميان تشازيل) يشتغل بشاشة خضراء زي بقيت مخرجين ربنا .. هو يعني الناس اللي عملوا Avengers دول ناقصين إيد ولا رجل .. الفكرة بمنتهي البساطة إنك ليه تحجم نفسك بإنك تصور مشهد يدوبك 5 ثواني لمركبة فضاء طايرة في السما لإن ده أخرك في شغل الجرافيك عشان الوقت و الفلوس بدل ما إنت تقدر تعمل مركبة الفضاء و بشاشة تليفيزيون كبيرة تخلق إنت ظروف الطيران بتاعتها و تصور باللقطات اللي إنت عايزها بالمدد الزمنية اللي إنت عايزها .. التصوير كان واقعي لدرجة إن أحيانا بعد ما المخرج يقول كااااات بتلاقي (رايان جوزلينج) طالع من مركبة الفضاء دايخ و عايز يرجع زي ما يكون كان طاير فعلاً جوه مركبة فضاء.
في فيلم Black Panther المخرج ساب مصممة الديكور تعيش حياتها أوي:
لو إنت مهندس ديكور أو مهندس معماري فإنت بيتقالك إن كل مبني بتصممه له شخصية و زي أي شخصية لازم يبقي ليها تاريخ .. تصميم المبني عامل بالضبط زي ما السيناريست أو الروائي بيخلق شخصية بكل ملامحها و تعقيداتها و أسرارها و تاريخها .. لما جت مهندسة الديكور (هانا بيتشلر Hannah Beachler) تشتغل علي تصميم مباني مملكة واكاندا Wakanda الإسطورية في فيلم Black Panther هي ضربت غطس جوه تفاصيل المدينة لدرجة إنها كتبت كتاب من 500 صفحة بيحكي تاريخ و قصة كل مبني هي صممته .. اللي خد منها شغل فعلاً كان تصميم المدينة الذهبية Golden City و اللي المفروض إنها تبقي عاصمة واكاندا.
عادة لما مخرج سينما يلاقي مصمم الديكور مهتم أوي بالتفاصيل كده بيقوله يا حبيبي دي فلوس المنتج بلاش الأفوره عشان نعرف نشتغل .. الغريب إن إذا كانت (هانا بيتشلر) موسوسة قيراط فالمخرج (رايان كوجلر Ryan Coogler) موسوس أربعة و عشرين قيراط .. الإتنين إشتغلوا مع بعض قبل كده في فيلم Creed فكانوا فاهمين دماغ بعض .. الإتنين سافروا دول زي أثيوبيا و جنوب أفريقيا و الكونغو الديموقراطية لمجرد إنهم يشوفوا دماغ الأفارقة في المعمار و الديكور عامله إزاي .. اللي منكوا شاف فيلم Black Panther فانتوا غالباً عارفين إن سر قوة المملكة دي هي معدن إسمه فايبراينيوم Vibranium و المفروض إن المعدن ده داخل في كل حاجة في تصميم المدينة .. (هانا بيتشلر) مبدأتش تصميم في المباني بتاعة واكاندا إلا لما خدت كورس مكثف في هندسة المعادن لمجرد إنها تفهم هو لو المعدن ده موجود بحق و حقيقي فحتبقي مواصفاته إيه؟ و يقدر مهندس المعماري و المدني يبني به مباني إزاي؟
بلاش دي .. فاكر لما قلتلك إن المهندس المعماري الشاطر بيسأل نفسه إيه هي قصة المبني و إيه شخصيته وهو عايز يقول إيه؟ .. (هانا بيتشلر) لما بدأت شغلها علي وسط البلد بتاعة واكاندا ودي حتة إسمها حي مثلث الشمال North Triangle District فده المفروض علي حسب السيناريو هو أقدم حتة في المدينة فكانت عايزة وهي بتصممه إنها تحط فوقه قبة زجاجية .. حاجة شبه المتحف .. هي كانت متخيلة إن أهل واكاندا طريقة تفكيرهم حتخليهم يقولوا لنفسهم إن الحتة دي لازم نحميها زي ما إحنا بنحمي قناع (توت عنخ أمون) كده لما بنحطه في المتحف بس (رايان كوجلر) معبجبتوش الفكرة .. هو كان شايف إن أهل واكاندا لازم يكونوا بيفكروا غيرنا .. بالنسبة ليهم مفيش حاجة إسمها تاريخ .. تاريخهم هو مستقبلهم .. شغل (هانا بيتشلر) مش بس تصميم المباني .. تصميم الديكور الداخلي لطيارة زي Royal Talon Fighter اللي هي الطيارة اللي بتخدم في سلاح الجو بتاع واكاندا هي اللي عاملاها .. الطيارة إتبني منها ماكيت وهي و الفريق بتاعها عملوا الديكور الداخلي بإيديهم .. هي اللي صممت الديكور بتاع شلالات المحارب .. هي و الفريق بتاعها عملوا شلال بعرض 12 متر و بإرتفاع 36 متر وهي اللي كانت مُطالبة إنها بقدرة قادر تجيب 150,000 لتر مياه تضخهم بمضخات عشان تخلق شلال صناعي عشان يتصور فيه مشهدين .. هي اللي عملت الديكور بتاع مشهد الكازينو واللي لما دخلت التصوير بتاعه عيطت .. فكر فيها كده .. هي مهندسة ديكور من أصل أفريقي بس وصلت لحد ما بقت بتعمل ديكور فيلم متكلف أكتر من 200 مليون دولار .. لو أي حد مكانها غالباً حيعيط هو كمان.
في فيلم A Star is Born المخرج سرق المسرح بتاع حفلات مغنيين عشان يصور المشاهد بتاعته:
لنفترض إن أنا مخرج سينما وعملت فيلم عن حياة (عمرو دياب) مثلاً وكان في الفيلم كذا مشهد ل(عمرو) وهو علي المسرح في حفلة من حفلاته .. هنا أنا كمخرج عندي حل من إتنين .. يا إما أعمل مسرح و أجيب ناس كتير تعيش كأنها في حفلة ل(عمرو) وبشوية جرافيك أقدر أكّبر عدد الحضور بحيث و إنت بتتفرج تحس إنك قدام 50 ألف بني أدم فعلاً بيغنوا تملي معاك ورا (عمرو) .. أو إني أنا كمخرج أعرف إن مثلاً (تامر حسني) عامل حفلة في حتة معينة فأكلمه إني حستلف منه المسرح 10 دقايق بس أصور المشهد اللي أنا عايز أصوره و الجمهور فعلياً موجود قدامي أنا مش حجيبه من بيتنا.
الحل الثاني ده هو اللي لجأ ليه المخرج (برادلي كوبر Bradley Cooper) في فيلمه A Star is Born اللي هو كمان قام ببطولته قصاد الممثلة و المغنية (ليدي جاجا Lady Gaga) .. اللي عمله هو إنه راح صور مشاهد الحفلات في الفيلم بتاعه علي المسرح بتاع مهرجانات غنائية بتتعمل بره زي جلاستونبيري Glastonbury و ستايج-كوتش Stagecoach بحيث إن في الفاصل بين كل مغني و الثاني يطلع علي المسرح هو و الفريق بتاعه يصور المشهد كأنها حفلة بيعملها الشخصية اللي بيقدمها (برادلي كوبر) في الفيلم.
اللعب كله حيبقي في إيد المصور السينمائي Cinematographer .. ده الأوسطي اللي المفروض إنه يلاقي طريقة يستغل بيها ال10 دقايق المتاحة قدامه إنه يصور المشهد المثالي عشان يتحط في الفيلم و علي فكرة هو قدامه فرصة واحدة لإن مش كل يوم بيتعمل مهرجان موسيقي زي ده .. المصور السينمائي اللي إشتغل علي ده إسمه (ماثيو ليباتيك Mathew Libatique) وده نفس المصور السينمائي اللي إشتغل علي أفلام زي Black Swan و Iron Man 2 .. الرجل ده كان شغال علي فيلم إسمه Mother مثلت فيه (جينيفر لورينس Jennifer Lowrence) واللي لما عرفت إن (برادلي كوبر) حيخرج فيلم A Star is Born اللي يبقي أول تجربة إخراجية له قالته لازم يجيب (ماثيو ليباتيك) عشان يشتغل معاه .. يمكن كانت وجهة نظرها إن مخرج أول مرة يخرج لازم يبقي شغال معاه مصور سينمائي تقيل في الشغلانة بس لما الإتنين إشتغلوا مع بعض إكتشف (ماثيو ليباتيك) إن (برادلي كوبر) زي ما تقول كده فيه شيء لله .. أي مخرج بيفضّل إنه يصور المشهد من كذا كاميرا بكذا زاوية بحيث إن في الأخر في مرحلة المونتاج يبدأ يختار مين أحسن زاوية ودي اللي يحطها في الفيلم .. (برادلي كوبر) كان بيصور بكاميرا واحدة بس و بإحساسه الداخلي بيبقي عارف إن الزاوية اللي هو إختارها هي الزاوية الصح و فعلاً لما (ماثيو ليباتيك) بيصور بيكتشف إن المشهد مينفعش يتصور إلا كده .. يمكن لإن بداية (برادلي كوبر) كممثل كانت مع مخرجين عتاوله زي (كلينت إيستوود Clint Eastwood) و (ديفيد أو راسل David O. Russell) و منهم إتعلم صنعة الإخراج السينمائي؟ .. الله أعلم.
في فيلم Mary Queen of Scots الأزياء إتعملت من الجينز:
مفيش مصممة أزياء بتعرف تعمل فساتين للأفلام التاريخية أحسن من (أليكساندرا بايرن Alexandra Byrne) .. هي دي اللي صممت الأزياء لفيلم Elizabeth اللي إتعرض سنة 1998 و للجزء الثاني بتاعه Elizabeth: The Golden Age اللي إتعرض سنة 2007 وخدت عنه أوكسار أحسن تصميم أزياء .. عايزك تخش علي Google و متع عينك بصور الفساتين اللي لبستها الممثلة (كيت بلانشيت Kate Blanchett) في الفيلمين دول .. هي برده نفس مصممة الأزياء اللي إشتغلت علي فيلم Doctor Strange .. الطقم اللي يجنن اللي كان بيلبسه (بينيدكت كامبرباتش Benedict Cumberbatch) في الفيلم هي اللي صممته .. لما إتعرض عليها إنها هي اللي تعمل الأزياء لفيلم Mary Queen of Scots و اللي تقريباً بيتكلم عن نفس الفترة الزمنية بتاعة أحداث فيلم Elizabeth فكان عندها حل إنها تطلع الفساتين اللي هي صممتها في الفيلمين القدام و تنظفهم و يعاد لبسهم تاني في الفيلم الجديد .. المشكلة إن عدي أكثر من 10 سنين علي الفساتين دي و هي في المخزن وده اللي خلاها محتاجه تعمل الفساتين دي من أول و جديد تاني .. طلعت مشكلة تانية و هي إن ميزانية الفيلم صغيرة أوي ومش حتكفي .. الحل اللي (أليكساندرا بايرن) لجأت له إنها تشتغل علي فساتين من قماشة البناطيل الجينز.
في الأول الفساتين اللي هي عملتها كانت وحشة لدرجة إنها قطعتهم كلهم .. بس شوية بشوية بدأت تفهم سر الصنعة .. أغلب فساتين و اللبس اللي إستخدمه الممثلين في فيلم Mary Queen of Scots تقريباً مصنوع من قماشة الجينز يمكن بإستثناء 5 مشاهد من ضمنهم مشهد إعدام الملكة (ماري Mary) و اللي فيه الممثلة (سيرشي رونان Soairse Ronan) لبست فستان أحمر أبهر ناس كتير من اللي شغالين في مجال الأزياء إزاي إتعمل خصوصاً إن في المشهد (سيرشي رونان Soairse Ronan) كانت لابسه فوقه روب أسود تقيل و قلعته عشان يبان الفستان.
في فيلم A Quiet Place المخرج إختار المصور السينمائي قبل حتي ما السيناريو يتكتب:
ناس كتير من اللي شافت فيلم A Quiet Place و إنبهرت به متعرفش إن الممثل البطل بتاعه (جون كرازنسكي John Krasinski) يبقي هو المخرج و اللي كتب السيناريو و كمان المنتج .. اه نسيت أقولك .. عارف الممثلة اللي عملت دور مراته في الفيلم؟ .. أهي دي تبقي (إيميلي بلانت Emily Blunt) و اللي تبقي مراة (جون كرازنسكي) بحق و حقيقي .. من وفكرة فيلم A Quiet Place لسه بتلعب في راسه ومن قبل ما حتي يخلص كتابة السيناريو كان (جون كرازنسكي) إختار المصور السينمائي بتاعه .. اللي حصل إن (إيميلي بلانت) كانت بتعمل فيلم إسمه The Girl on the Train و في الفيلم ده هي إتعرفت علي المصورة السينمائية الدانمركية (شارلوت بروس كريستانسين Charlotte Bruus Christensen) و إتصاحبوا علي بعض .. ولسه (جون كرازنسكي) بيكتب في السيناريو مراته عرفته علي (شارلوت بروس كريستانسين) و نصحته بإنها تبقي هي المصورة السينمائية بتاعته في أول تجربة إخراجية له .. فكرة إن المصور السينمائي بقي مع المخرج ولسه السيناريو بيتكتب إداها فرصة إنها تفهم دماغه و يبقي ليها رأي حتي في السيناريو وهو لسه بيتكتب .. يمكن عشان كده الفيلم نجح بالشكل الخرافي ده و علي فكرة (جون كرازنسكي) شغال علي الجزء الثاني من الفيلم حالياً.
المصدر:
مقالة بعنوان How Craftspeople brought Wakanda, the Moon, and Lady Gaga to Life .. نشرت في مجلة Vanity Fair وده لينك المقالة الأصلية:
https://www.vanityfair.com/hollywood/2019/01/how-craftspeople-brought-wakanda-the-moon-and-lady-gaga-to-life?verso=true
