تحلية مياه البحر .. تكنولوجيا مفيدة بس بثمن غالي.

لينك التسجيل الصوتي للمقالة علي Sound Cloud:
https://soundcloud.com/user-112011687-312727988/otfpe9rbtut9

دلوقتي إحنا عندنا مشكلة إننا عددنا كتير ومعندناش مياه شرب تكفي للبني أدمين دول كلهم .. بس إذا كان ربنا خلق مصادر مياه عذبة إلي حد ما محدودة فهو مالي الأرض بحار ومحيطات فيها كمية مياه ضخمة تكفي كل احتياجات البشر لسنين وسنين قدام .. المشكلة زي ما أي طفل في ابتدائي حيقولك إن مياه البحر مالحة وإحنا بنشرب مياه عذبة .. بسيطة .. هات مياه البحر يا تغليها لحد ما تتبخر وجمع انت بخار المياه بتاعها ده تلاقيه مياه عذبة .. أو هات مياه البحر عديها علي فلتر زي فلتر المياه اللي عندكوا في البيت وهوبا بقي عندك مياه عذبة .. شفت سهلة إزاي .. الحقيقة إن الموضوع مش سهل أوي زي ما انت متخيل لإن التفاصيل معقدة حبتين .. تحلية مياه البحر أو Desalination زي ما بتتقال بالإنجليزي واختصاراً ناس بتسميها ديسال Desal له مشكلتين:

• أول مشكلة إنك عشان تبخر مياه البحر فانت محتاج تحرق بنزين زي ما انت عشان تغلي مياه تعملك كوباية شاي يا بتسخن الكاتل يعني بتستهلك كهرباء يا إما انت ابن ناس وبتجيب براد وتحط فيه مياه وتحطه علي النار وساعتها انت كده بتحرق غاز طبيعي .. في تحلية مياه البحر إحنا بنحرق كمية بنزين رهيبة وبنطلع كمية عوادم انت لا تتخيلها .. يعني هو انت عايز تخلي الناس تشرب تقوم تجيبلهم ربو؟
• ثاني مشكلة وهي هو حضرتك حتودي الملح فين؟ .. دلوقتي انت كان عندك مياه بحر شلت منها انت الملح الخام وبقي عندك شوية مياه فيهم نسبة ملح فشيخة واللي بيتسمي Brine و لقيت نفسك مش عارف توديه فين .. حد قالك هو إحنا مش جبنا المياه دي من البحر طب ما ترمي الملح ده كمان في البحر .. اكتشفنا إننا بكده بنزود من نسبة الملوحة في المياه فده بيكون له أضرار كارثية علي الحياة البحرية.

مشكلة نودي الملح فين دي هي اللي مودية فكرة تحلية مياه البحر في ستين داهية .. حالياً علي مستوي العالم فيه أكتر من 16,000 محطة تحلية مياه بحر شغالين بقالهم سنين وإحنا مش عارفين هم بالصلاة علي النبي بيرموا قد إيه ملح في البحر .. فيه تقديرات بتقول إن كمية الملح اللي إحنا كنا متخيلين إننا بنرميها في البحر مش هي دي الحقيقية إنما الحقيقة هي إننا بنرمي 141.5 مليون متر مكعب ملح يومياً في مياه البحر وده رقم كبير جداً أوي خالص يعني .. قارن الرقم ده بإن ال16,000 محطة تحلية مياه بحر دول بينتجوا كلهم مع بعض شاكب راكب 95 مليون متر مكعب مياه عذبة تلاقي نفسك قدام حقيقة إن بيئياً علي الأقل تحلية مياه البحر كفكرة واقفة علينا بخسارة .. فيه منكوا دلوقتي بيقول ياختاااااااااااي يعني مفيش أمل .. وفيه منكوا مستغرب واللي مستغربين دول غالباً ناس شغالة في مجال تحلية مياه البحر .. لحد دلوقتي انا حكيت نص القصة .. لسه النص التاني.

تحلية مياه البحر كفكرة بتتعمل بطريقتين:

• أول طريقة بيسموها Thermal Desalination ودي بمنتهي البساطة إنك تغلي مياه البحر بحيث تجمع بخار المياه اللي طالع وده بيبقي مياه عذبة والملح اللي بيفضل تاخده وترميه تاني في البحر .. دي المدرسة القديمة .. دي الطريقة اللي كانت بتتعمل في الثمانينات أيام ما (عمرو دياب) كان بيغني أيس كريم في ديسمبر وكانت (سيمون) هي نجمة شاشة السينما الأولي .. طبعاً انت مش عارف مين هي (سيمون) دي أصلاً وده يوريك قد إيه الطريقة دي قديمة.
• ثاني طريقة بيسموها الفلترة Membrane Desalination ودي انك بتجيب مياه البحر تضخها بضغط عالي أوي لسلسلة فلاتر بحيث إن الفلاتر دي هي اللي تنقيلك مياه البحر من الملح والشوائب .. أهم اسم لازم يكون عدي عليك حاجة اسمها Reverse Osmosis و اختصاراً أمة سيدنا (محمد) عليه الصلاة والسلام كلها بتقول عليها RO .. أكتر من 69% من إجمالي محطات تحلية مياه البحر اللي في الدنيا دلوقتي شغالة بتكنولوجيا RO والسبب في كده هو الفلوس .. انا ارخصلي أجيب محطة RO ومع التطور اللي بيحصل كل يوم في تكنولوجيا الفلاتر فانا الضغط اللي بقيت بحتاجه عمل يقل وبالتالي الفلوس اللي انا محتاج أدفعها هي كمان بتقل .. زود علي كده إن RO مش بتطلع نفس كمية Brine زي Thermal Desalination .. إذا كان في Thermal Desalination حوالي 75% من المياه اللي انت بتدخلها للمحطة إحتمال كبير تطلع تاني علي شكل ملح .. في RO النسبة بتقل وتبقي 50% بس.

طب إذا كانت RO دي أجمل اختراع حصل بعد الأيس كريم ميجا فانيليا طب ليه الناس كلها متروحش ليها وتسيبها خالص بقي من طريقة Thermal Desalination دي؟ .. الحقيقة إن ده سؤال محترم جداً والإجابة عنه مش سبب واحد إنما أسباب كتير.

طريقة RO مش بتنفع في كل وقت وكل مكان .. كل ما نسبة الملوحة في المياه بتزيد فكفاءة الطريقة دي بتقل .. النقطة دي مهمة لإن صحيح إحنا اتعودنا علي إننا نسمي Desalination إن معناها تحلية مياه البحر بس الحقيقة إن RO مش بس بتستخدم لتحلية مياه البحر قد ما بتستخدم لتحلية المياه العكرة اللي بتتسمي Brackish .. دي مياه مش نظيفة بس في نفس الوقت نسبة الملوحة فيها مش عالية وبالتالي لما تيجي تستخدم معاها RO بتلاقي إن الكفاءة بتنط معاك نطة حلوة أوي.

طيب تعالي ناخد دولة زي السعودية مثلاً .. دي دولة مفيهاش أنهار وعايش فيها تعداد سكان عمال يزيد كل يوم والأسوأ من كده إنهم بيتعاملوا مع المياه بسفه .. هل بلد زي دي لما تيجي تقول إنها حتروح لسكة تحلية مياه البحر حتلاقيها بتمسك في تكنولوجيا RO اللي كفاءتها في الحضيض لو حتنقي بيها مياه بحر؟ هم محتاجين حاجة في الإنجاز .. محتاجين طريقة تطلع مياه عذبة كتير بغض النظر عن التكاليف .. بص الإحصائية دي .. فيه علي مستوي العالم 173 دولة ومنطقة بتستخدم تكنولوجيا تحلية مياه البحر بس من وسطهم فيه 4 دول بس اللي هم السعودية والإمارات والكويت وقطر مسئولين عن 55% من إجمالي الملح Brine اللي بيترمي تاني في البحر .. ليه؟ .. عشان الدول مش بتستخدم RO ولا عمرهم حيفكروا يستخدموها .. هم شغالين بطريقة Thermal Desalination وبانيين محطات صارفين عليها دم قلبهم وبيحرقوا فيها بنزين وبتطلع كمية ملح بتخرب بيت البيئة بس كل ده مش مهم .. هم عايزين مياه عذبة بكميات عمر ما RO حتقدر توفرها.

تبقي مشكلة تحلية مياه البحر في Brine .. دي مياه فيها نسبة ملح فوق الطبيعي وأكتر بكتير من كمية الملح اللي ربنا خلقها في مياه البحر .. لما محطة تحلية ترمي Brine ده تاني في البحر فلإن فيه نسبة ملح عالية يعني أتقل من مياه البحر العادية فتلاقيه بيقع لحد قاع البحر وبيقلب الدنيا للكائنات البحرية .. فجأة الكائنات دي بتلاقي نفسها عايزة كمية أكسجين أكبر بس مش بتلاقيها .. هل فيه حلول لBrine ده؟ .. اه و المصحف الشريف له بس الفكرة إن كل حل فيهم مكلف والمحطات مش بتحب تصرف زيادة بحجة قال إيه ليه نحمي البيئة؟ .. الحلول دي ممكن تكون واحدة من دول:

• من ضمن الحلول إنك قبل ما ترمي Brine ده في البحر اسحب شوية مياه بحر ودوب فيهم Brine ده مع التقليب بحيث لما تيجي ترميه تاني في البحر ميغطسش للقاع .. كمان حاول تختار الأيام اللي ترمي فيها Brine في البحر بحيث تبقي أيام تيار المياه فيها يبقي عالي .. يطلعلك الناس بتوع المحطات يقولك انت عايزني أجيب مواتير عشان تقلب وأصرف عليها لا وكمان أستني أيام محددة عشان أرمي فيها الملح .. لا يا عم إرمي زي ما هو كده وخلاص.
• اكتشفوا إن Brine ده مش مجرد مياه فيها ملح كتير إنما فيها معادن من ضمنها اليورانيوم .. طبعاً دول الخليج تسمع سيرة اليورانيوم يركبهم عفريت ويقولولك لا يا عم الله الغني مع إن بشوية تفتيح مخ صغيرين ممكن يبقي عندهم بيزنس يجيبلهم فلوس أكتر بكتير من بيع النفط.

تحلية مياه البحر كBusiness مستقبلها حلو أوي .. ده بيزنس بيكبر يوم عن يوم وأقل التقديرات بتقول إنه حيفضل ينمو بنسبة 9% سنوياً علي الأقل خلال الأربع سنين الجايين فلو انت شغال في البيزنس ده فبلاش تسيبه ولو معروض عليك شغلانة فيه مترفضش لإن مستقبله مضمون .. مثال بسيط علي قد إيه البيزنس ده بيكبر هو اللي حصل في عاصمة جنوب أفريقيا كيبتاون لما الحكومة اضطرت إنها تشتري محطات RO وتشغلها عشان توفر مياه للشرب للسكان بعد ما المدينة اتعرضت لموجة جفاف رهيبة .. مع كل مشاكله وكل عيوبه وكل كمية الطاقة اللي هو بيستهلكها فتحلية مياه البحر بيزنس مكمل معانا شوية.

المصدر:

• مقالة بعنوان Desalination is Booming. But What About All That Toxic Brine? .. نشرت في موقع Wired.com وده لينك المقالة الأصلية:
  https://www.wired.com/story/desalination-is-booming-but-what-about-all-that-toxic-brine/