الفترة اللي فاتت كانت زي الزفت علي وطنا العربي .. سوريا إتبهدلت .. داعش فشخت العراق .. السعوديين والإماراتيين مسابوش حتة سليمة في اليمن .. كم الدم والدموع والدمار اللي وطنا العربي شافه ممكن الشعراء يكتبوا فيه قصايد شعر تقطع القلب بس وسط كل الخراب ده كله كان فيه إمتحان بيتعمل لواحدة من أهم الأسلحة المستخدمة في الحروب الحديثة اللي هي الدبابات .. سواء كنت بتتكلم عن اليمن أو العراق أو سوريا ففي كل جبهات القتال دي أُستخدمت دبابات كتير من أنواع مختلفة وده كان إختبار حقيقي لكل موديل دبابات .. طبعاً فيه منكوا دلوقتي نفسه يعرف نتيجه الإمتحان ده كانت إيه؟ .. مين سقط ومين نجح؟ .. عشان أنا مش بيهون عليا إني أخلي ناس متعلقة في جو من الساسبينس فخليني أقولك النتيجة دلوقتي ولو حبيت ممكن تكمل معايا لأخر المقالة عشان تعرف هو إيه اللي حصل؟ وحصل كده ليه؟ وإزاي؟
لو إنت من الناس اللي واقفه في المدرجات اللي بتشجع الدبابات الغربية فأحب أقولك إن دبابات M1A1 Abrams الأميريكية اللي كانت تحت إيد العراقيين مش بس فشلت في إنها تمنع داعش من السيطرة علي مدينة الموصل تاني أكبر مدن العراق في 2014 ده كمان عناصر داعش أستولوا علي عدد كبير منها اللي كان تحت إيد القوات العراقية وأستخدموها ضد أصحاب الدبابات اللي دفعوا فلوسها .. لو لسه عندك أمل في Abrams فخر الصناعه العسكرية الأميريكية فالإخوة السعوديين إتعاملوا معاها زي ما تدي عيل صغير مفاتيح عربية فيراري ومعرفوش يستخدموها والمتمردين الحوثيين أثبتوا إنها مش دبابة فشيخة ولا حاجة .. يا راجل ده حتي الأتراك اللي في بداية حربهم مع الأكراد في سوريا والكلام ده مش من اليومين اللي فاتوا إنما من 2015 إستخدموا دبابات M60 Patton الأميريكية القديمة شوية واللي إتفشخت علي إيد الصواريخ المضادة للدبابات اللي المتمردين الأكراد إستخدموها .. الأتراك سحبوا الدبابات دي وإستخدموا بدالها دبابات أميريكية أحدث شوية اللي هي M60 Sabra وإكتشفوا إن ما أنيل من سيدي إلا ستي .. ملقوش حل غير إنهم يستخدموا دبابات Leopard 2A4 الألمانية واللي في أول إسبوع ليها في ميدان القتال في شمال سوريا ضد عناصر داعش إتدمرت ما بين 8 ل10 دبابات تركية منها .. بإختصار النتيجة بتاعة الدبابات الغربية الصنع علي رأي الفنان (حجاج عبدالعظيم) في فيلم الناظر صلاح الدين صفر صفر صفر.
الناجح الوحيد في إختبار الدبابات اللي إتعمل هو الدبابة الروسية T-90A أكتر دبابة محدش كان عاملها إعتبار .. عارف الإعلان بتاع EG Bank بتاع أوفه اللي ملوش إعتبار .. أهي T-90A تبقي أوفه بتاع الدبابات .. الروس بيسموها فلاديمير Vladimir ولو إنت كنت فاكر إنهم سموها كده عشان تبقي متسميه علي إسم الرئيس الروسي (فلاديمير بوتين) تبقي ظالم ومفتري ونيتك مش صافية .. هي متسميه كده علي إسم اللي صممها (فلاديمير إيفانوفيتش بوتكين Vladimir Ivanovich Butkin) ودي دبابة الروس نفسهم اللي صنعوها معندهمش ثقة فيها لدرجة إنهم مصنعوش منها إلا 550 دبابة بس وإتقال إن دول حيخدموا في سلاح المدرعات الروسي لحد ما الدبابة الأحدث منها T-14 Armata تدخل الخدمة .. الدبابة دي أقرب تشبيه ليها هي إنها الإسبرينة المسكنة للألم اللي الروس بلعوها لحد ما T-14 Armata تشتغل .. كل اللي الروس عملوه إنهم جابوا الشاسيه بتاع دبابة قديمة شوية اللي هي T-72 وركبوا عليها المدفع بتاع دبابه أحدث سيكة منها اللي هي T-80 .. علي الورق هي دبابة مضافتش جديد ومفيهاش Options فشيخة بس إنت تقدر تقول عليها (أحمد حسن) بتاعه لاعيبه الكورة .. هو لا لاعيب مهاري فشخ ولا لاعيب سريع زي الطيارة المحروقة .. لا هو بيعرف يرقص ولا بيعرف يقطع الكورة أوي .. هو الوسط في كل شيء .. تقدر تعتمد عليه بس متستناش منه إنه يبقي (محمد أبوتريكه) .. هي دي T-90 بإختصار.
عادة طاقم الدبابة بيكون 4 عساكر بس الدبابة دي إتحط فيها نظام تعمير أوتوماتيك للمدفع وبالتالي فيه واحد من الطاقم معادش له لازمة فإنت بتتكلم عن طاقم من 3 عساكر .. دبابة أخف بكتير من Abrams ومن Leopard في الوزن .. سنة 2015 لما روسيا بدأت تتدخل عسكرياً في سوريا كان من أول الخطوات اللي هم عملوها كانت إنهم بعتوا 30 دبابة T-90A عشان تخدم في سلاح المدرعات السوري جنب دبابات تانية طرازات T-62 و T-72 ودي كانت مساعدات جاية في وقتها للقوات الحكومية السورية .. من 2011 اللي هي بداية الثورة السورية لحد 2015 و هم خسروا أكتر من 2000 مركبة سواء كنت بتتكلم عن دبابات أو مدرعات وخساير القوات السورية في المدرعات بالذات نطت فشخ بداية من 2014 لما الثوار السوريين جاتلهم صواريخ TOW-2A المضادة للدبابات من المخابرات الأميريكية .. المهم .. السوريين خدوا ال30 دبابة T-90A وزعوهم علي 3 حتت .. الفرقه الرابعة مدرعات .. فيلق صقور الصحراء ودي عبارة عن مليشيات من ضباط سابقين في القوات المسلحة السورية لما قامت الحرب الأهلية رجعوا تاني يخدموا في القوات الحكومية بتاعة الرئيس السوري (بشار الأسد) .. كتيبة قوة النمر ودي تقدر تقول كده وحدة مدرعة خاصة من القوات المسلحة السورية .. مش بهزر لو قلتلك إن الدبابات دي قلبت ميزان المعارك خالص علي الأرض.
في فبراير 2016 إتنشر علي الإنترنت فيديو مشهور أوي لواحد من الثوار السوريين بيضرب صاروخ TOW علي دبابة T-90A تابعة للقوات الحكومية السورية ضمن المعارك بتاعة الدفاع عن مدينة حلب لو تفتكر .. في الفيديو إنت بتشوف الصاروخ وهو بيفرقع في الدبابة بس لما الدخان بيطير بتكتشف إن الدبابة زي الأسد واقفه ولا كان حصلها حاجة .. صحيح إن الفيديو بيوريك إزاي طاقم الدبابة السورية بيجيله حالة خوف وهلع لدرجة إنهم بيفتحوا الHatch بتاع الدبابة عشان ينطوا منها لإنهم تخيلوا إنها إتدمرت بس مش مهم .. اللي حصل إن دبابات T-90 بينزل معاها دروع بيتركب فيها متفجرات إسمها Kontakt-5 ودي متفجرات بتحس بالصاروخ المضاد للدبابات وهو جاي وبتنفجر فيه قبل ما هو يخبط جسم الدبابة .. هل ده السبب الوحيد في إن الدبابة دي نجحت في إختبار الدبابات بتاع الشرق الأوسط لمجرد إن محطوطلها دروع من اللي بتتسمي Reactive Armor؟ .. الحقيقة لا .. إمكانيات T-90A أعلي من كده بشوية .. خليني أسأل السؤال من ناحية تانية .. إزاي T-90A بتدافع عن نفسها؟
السر كله في حاجة إسمها Shtora-1 Active Protection System وده يبقي (فيرجيل فان دايك Virgil van Dyke) بتاع الدبابة .. ده المسئول عن حمايتها وعشان تفهم هو شغال إزاي خليك معايا في الكام نقطة الجايين:
- شايف البرج بتاع الدبابة؟ .. حتلاقي في البرج من قدام حاجة شبه العيون الجريئة في عربيات مرسيدس كده زي ما تكون الدبابة ليها عنين بتبصلك بيهم وعلي فكرة العينين دول أسهل طريقة إنك تميز بيهم الدبابة T-90A عن الدبابة T-72 اللي يعتبروا توأم من بعض بإستثناء العينين دول اللي موجودين في T-90A ومش موجودين في T-72 .. العينيين دول إنت محتاج تشوفهم بليل لما بينوروا أحمر وساعتها الدبابة دي فعلاً حتوريك العين الحمرا .. العينين دول بيتسموا Infrared Dazzlers أو مشوشات أشعة تحت حمراء .. اللي بيحصل إن لو أنا معايا صاروخ TOW مثلاً بنشن بيه علي الدبابة دي فأنا ببص عليها وبنشن عليها بشعاع ليزر عشان الصاروخ يمشي ورا شعاع الليزر لحد ما يخبط في جسم الدبابة .. العينين دول بتحس لو فيه شعاع ليزر إتنشن علي الدبابة وبتبدأ تشوش عليه عشان لو أنا ضربت الصاروخ علي الدبابة ففي نص السكة مش حيلاقي شعاع الليزر اللي هو ماشي عليه موجود وحيلاقيه إختفي فجأة.
- لو حصل والعينين دي لقطت شعاع ليزر إتنشن علي الدبابة فهي بتبدأ تضرب قنابل دخان بحيث إن الدخان ده أساساً مش دخان ملون عادي إنما ده بيبقي مادة إسمها Aerosol الناس بتوع مكافحة الحريق عارفينها كويس ودي مادة غير إنها بتطفي الحرايق إنما كمان بتعطل شغل الأشعة تحت الحمراء اللي كتير من الصواريخ المضادة للدبابات بتعتمد عليها عشان تنشن علي الدبابات المعادية.
- بمجرد ما Shtora-1 بيحس إن فيه صاروخ إتضرب علي الدبابة عن طريق شبكة حساسات Sensors متوزعة علي جسم الدبابة بتدي للكومبيوتر بتاع Shtora-1 رؤية 360 درجة فShtora-1 بيرمي حاجة إسمها Countermeasures ودي عبارة عن ألواح معدن بتترمي في الجو قصاد الصاروخ وهو جاي في السكة عشان يخبط فيها ويفرقع بعيد عن جسم الدبابة .. مش بس كده .. Shtora-1 لوحده بيبدأ يتحكم في البرج عشان ينشن المدفع بتاعه أوتوماتيك ناحية المكان اللي الصاروخ المُعادي إتضرب منه .. كل اللي المطلوب من قائد الدبابة إنه يتك علي زرار ضرب دانة المدفع.
- طب إفرض كل ده فشل .. إفرض إن العينيين دي معرفتش تشوش علي الصاروخ وهو جاي وإفرض إن Countermeasures يا ملحقتش يا مقدرتش تدمر الصاروخ وهو جاي .. ساعتها اللي بيحمي الدبابة هو الReactive Armor من متفجرات Kontakt-5 اللي متوزعة علي جسم الدبابة بحيث إنها تفرقع بدري قبل ما الصاروخ المضاد للدبابات يوصل لجسم الدبابة.
فيه ناس حتقول إن والله الكلام اللي إنت بتقوله ده عامل زي اللي بيردد الأية الكريمة ولا تقربوا الصلاة وبيسيب الأية ميكملهاش ويقولك أهو ربنا قال متصلوش .. فيه ناس حتقولي كمل الأية لحد الأخر وإنت حتكتشف إن الدبابات الغربية وخصوصاً M1A1 Abrams فشلت في الإختبارات اللي هي إتعرضت ليها سواء في اليمن أو العراق لأسباب ملهاش دعوة بقدرات الدبابة قد ما ليها علاقة بإنعدام كفاءة الأطقم اللي إشتغلت علي الدبابات دي .. معلش هل تقدر تقول إن كفاءة طاقم دبابة Abrams في قوات المدرعات العراقية دلوقتي في نفس قوة وتدريب طاقم نفس الدبابة في سلاح المدرعات المصري حتي مش حقولك الأميريكي أو الإسرائيلي؟ .. مش حتفرق إذا كانت نسخ دبابات Abrams اللي السعوديين استخدموها في اليمن متركبلها أنظمة دفاعية متطورة أو محطوطلها دروع إضافية أو لا .. إنت بتتعامل مع مقاتلين من الحوثيين بقالهم سنين بيحاربوا ضد قوات النظام اليمني .. ناس عارفه إزاي تستخبي في الجبل وتنصب كمين ميخرش المياه للدبابات المعادية وتضرب صواريخ RPG في المكان الصح يطير برج الدبابة من مكانه .. قصاد عساكر واكلين كبسة لما إتعموا .. تفتكر مين حيسكب التاني؟
هل خلاصة كلامي إن الدبابة T-90A دي فلة شمعة منورة مفيهاش غلطة؟ .. الإجابة قطعاً لا .. فاكر لما قلتلك إن سنة 2015 روسيا بعتت 30 دبابة منها لسوريا؟ ورقة وقلم وإكتبي ورايا يا ست الكل:
- في يونيو 2016 صور إتاخدت من طيارة بدون طيار أثبتت إن ثوار تبع تنظيم إسمه جبهة الشام إستخدم صاروخ TOW-2 عشان يدمر دبابة T-90 والصورة موضحة الدخان وهو طالع من الفتحة Hatch اللي في برج الدبابة.
- في 14 يونيو 2016 إتصور فيديو تاني ضمن المعارك اللي دارت في مدينة حلب بيوريك دبابة T-90 بتجري وبتاخد ملف بسرعة عالية أوي عشان تستخبي ورا مبني لإن غالباً نظام Shotra-1 لقط صاروخ TOW جاي عليها بس الصاروخ ضرب الدبابة قبل ما تلحق تستخبي والفيديو بيوريك الدبابة لسه فيها الروح وشغالة بعد ما الصاروخ ضربها.
- طلعت تقارير إن فيه دبابة كمان T-90 إتضربت بصاروخ روسي مضاد للدبابات AT-14 Kornet في حتة إسمها خان نصر والصاروخ إتسبب في مقتل المدفعجي بتاع الدبابة .. والصاروخ ده بالذات لما إتضرب عمل حريقة في الدبابة .. الفكرة إن لسبب ما محدش قادر يفهمه التصميمات بتاعة الدبابات الروسي رأسها وألف سيف تحط الدولاب اللي بتترص فيها دانات المدفع الرئيسي جنب طاقم الدبابة ومش في أوضة معزولة زي التصميمات الأميريكية اللي في دبابات Abrams مثلاً.
- الثوار السوريين إتقال إنهم مسكوا دبابتين T-90 وخبوهم في مصنع طوب في محافظة إدلب .. في إبريل 2017 الثوار السوريين استخدموا الدبابتين دول في معاركهم في حلب لحد ما واحد من الدبابتين رجعت تاني لإيد الحكومة والتانية إتدمرت بقذيفة من دبابة T-72 تابعة للحكومة السورية.
- في أكتوبر 2017 عناصر داعش مسكوا دبابة T-90 تابعة للفرقة الرابعة مدرعات في منطقة الميادين شرق سوريا بعد ما الدبابة دي الطاقم بتاعها تاه في الصحراء في عاصفة رملية.
- يوم 16 نوفمبر 2017 عناصر داعش عملوا كمين لطابور تابع لكتيبة قوة النمر ومن ضحايا الكمين ده دبابة T-90 إتضربت بصاروخ مضاد للدبابات طير برجها وخلي الدبابة تتقلب في الصحراء والطاقم بتاعها مات في لحظتها.
كده إنت بتتكلم عن 7 دبابات راحوا في داهية في سوريا .. 7 دبابات من أصل 30 دبابة فهل دي تعتبر نسبة كويسة؟ 76% نسبة نجاح دي كفيلة تديلك إمتياز في الكلية وحط في إعتبارك برده إن يوم 28 يوليو 2016 دبابة T-90 إتضربت بصاروخين TOW ورا بعض ومتدمرتش .. أظن بعد كل الهري ده إنت بتسأل نفسك طب أنا استفدت إيه؟ .. إيه الدروس اللي أنا محتاج أعرفها؟ .. هل مثلاً لو حبيت بعد كده أشتري دبابات فمروحش أشتري Abrams وأروح لT-90 أو حتي T-14 Armata لما تنزل السوق إن شاء الله؟
الحقيقة إننا إتعلمنا كذا درس .. مبدأياً كده عرفنا إن أهم ميزة في دبابة T-90 هي أنظمة التوجيه والرؤية بتاعتها واللي أساساً هي مش روسي هم شاريينها من شركة فرنساوي إسمها Catherine FC فلو حبيت بعد كده تجيب الأنظمة دي وتركبها علي أسطول دبابات Abrams اللي عندنا في مصر فإنت كده اللي كسبان بس الله أعلم العقد اللي إحنا ماضيينه مع الأمريكان حيسمحلنا نعمل ده أو لا .. إنت متقدرش تحكم علي قوة دروع لا T-90 ولا غيرها طالما إنت مستخدمهاش في ميدان معركة قصاد ناس شايلة صواريخ من عيلة ATGM واللي زيها يعني مثلاً عندك صواريخ TOW-2B و Javelin ودي صواريخ بتطير لفوق وتنزل فوق دماغ الدبابة تجيب أجلها .. يا مؤمن دي حتي الدبابة T-90 مدخلتش في مواجهة مفتوحة قصاد دبابات تانية عشان أحكم عليها .. نقطة كمان وهي مش حتفرق إذا إتقالك إن الدبابة الفلانية فيها نظام حماية فشيخ .. كل دي شكليات .. طالما نظام الحماية بتاع الدبابة كل اللي بيعمله إنه يرمي حديد قصاد الصاروخ وهو جاي علي أمل يعني إن حتة الحديدة دي تخبط في الصاروخ وتفجره بعيد ولحد دلوقتي معندكش نظام حماية لما يشوف صاروخ جاي عليه يضربه يا إما بمدفع رشاش سريع فإنت حتتفشخ يعني حتتفشخ .. لو دبابة T-90 أو غيرها مشيت في شارع ولقت 5 بني أدمين كل واحد فيهم شايل RPG ضربوا الدبابة في وقت واحد فأكيد فيه واحد فيهم حيضرب صاروخ بزاوية صح يخبط الدبابة في الفرا غ الرفيع اللي بين البرج وبين جسم الدبابة ويطير البرج خالص .. مفيش حاجة إسمها دبابة فشيخة وبمجرد ما تقتنع بده صدقني حترتاح.
أنا بس حابب أختم المقالة اللي عارف إنها طولت زيادة عن اللزوم بإني أجيب سيرة خبر إتقال إن والله مصر مضت عقد مع شركة يورال فاجون-زافود UralVagonZavod وإختصاراً بتتسمي UVZ ودي الشركة الروسي اللي بتصنع T-90 عشان تعمل خط إنتاج لتجميع الدبابة دي في مصر بس فيه نقطة .. اللي إحنا حنستلمه حاجة إسمها T-90S أو T-90SK مش T-90A اللي هي النسخة اللي بتخدم في القوات المسلحة الروسية واللي حاربت في سوريا .. النسخه T-90S دي تبقي النسخة اللي بتتصدر منها .. مش حتي T-90MS أو T-90SM مش حتفرق ودي تبقي نسخة زي ما تقول كده تصدير بس مخصوص شوية للحبايب اللي معاهم فلوس كاش .. فاللي إحنا حنعمله إننا حنعمل مصنع لتجميع T-90S .. إتفقنا .. الحقيقة إننا مش لوحدنا اللي شفنا أداء T-90 في سوريا فقلنا للروس أنا عايزه من ده يا حزمبل .. شركة UVZ إستلمت سنة 2016 طلب من الحكومة العراقية إنها تشتري 73 دبابة T-90S وطلب من الحكومة الفيتنامية عشان يشتروا 64 دبابة .. بس عشان الكوايتة معاهم فلوس كاش جاهزة فهم خلصوا صفقة إنهم يشتروا 146 دبابة T-90MS .. مع إن فيه كلام إن والله أنتوا فاهمين غلط وإن المصنع اللي حيتعمل حيجمع ما بين 400 ل500 دبابة T-90MS اللي مبتطلعش إلا للحبايب بس زي طاقم الصيني اللي في النيش كده.
أنا كان ممكن أختم بكده بس الشيطان شاطر وفيه في نفسي كلمتين بس محشورين في زوري .. دلوقتي سلاح المدرعات المصري معتمد بشكل شبه كلي علي الدبابات الأمريكاني لإن إحنا عندنا 4 فرق مدرعات منهم 3 فرق تسليحهم بالكامل دبابات M1 Abrams والفرقة الرابعة ودي اللي متوزعة علي حدود ليبيا قايمة علي دبابات M60A1/3 Patton ودي دبابات قديمة شوية فإنت بتتكلم عن سلاح مدرعات تحت إيده 1,100 دبابة M1 Abrams .. حلو .. وسنة 2011 إحنا دفعنا 395 مليون دولار لشركة General Dynamics اللي بتصنع دبابات Abrams عشان تدينا 125 دبابةM1A1 اللي هي Upgrade بتاع الدبابة .. حلو فشخ .. وكمان عندنا مصنع بانياه General Dynamics في مصر عشان يجمع دبابات M1A1 .. ليه بقي إحنا رايحين نبني خط إنتاج عشان نجمع دبابات T-90؟ لو عرفتوا تجاوبوا علي السؤال ده يبقي أنتوا الصراحة أذكي مني لإني مش شايف أي سبب منطقي .. عشان أكون منصف وأنقل وجهتين النظر .. فيه ناس شايفه إن والله سلاح المدرعات بتاعنا فيه 8 فرق مشاة ميكانيكي فيهم دبابات T-55 و T-62 ودي دبابات مكانها المتحف فممكن نكون بنفكر إننا نعمل زي الإعلان اللي بيقول تخلص من حمامك القديم.
المصادر:
- مقالة بعنوان Russia thought its tanks were unstoppable (and then Syria happened) نشرت في مجلة The National Interest وده لينك المقالة الأصلية:
https://nationalinterest.org/blog/buzz/russia-thought-its-tanks-were-unstoppable-and-then-syria-happened-94481 - مقالة بعنوان Egypt looking to domestically produce T-90 tanks نشرت في موقع Defence Web وده لينك المقالة الأصلية:
s://www.defenceweb.co.za/land/land-land/egypt-looking-to-domestically-produce-t-90-tanks/ - مقالة بعنوان Egyptian army to be first to operate hundreds of upgraded T-90 tanks نشرت في موقع Jewish Press وده لينك المقالة الأصلية:
https://www.jewishpress.com/news/middle-east/egypt/egyptian-army-to-be-first-to-operate-hundreds-of-upgraded-t-90-tanks/2019/10/15/
