لينك التسجيل الصوتي للمقالة:
https://soundcloud.com/user-112011687-312727988/fangwtquwrat
لو تسألني إيه أهم سلاح ممكن أي بلد تشتريه حقولك البندقية الألية اللي بتبقي في إيد العسكري .. انا بحترم جداً رأيك لو كنت من الناس اللي شايفه إن سلاح الجو هو أهم فرع من الأفرع الرئيسية للقوات المسلحة لأي بلد بما فيها مصر .. انا مش بقولك إنك غلطان .. انا بقول إن أهم سلاح أي بلد لازم تهتم أوي وهي بتوفره لقواتها المسلحة هي البندقية اللي بتبقي في إيد العسكري .. لو العسكري معندوش ثقة في إن البندقة بتاعته مش حتسعفه وقت ما يحتاجها يبقي العسكري ده خسر الحرب من قبل ما يضرب أول طلقة .. الأمريكان جربوا الإحساس البايخ ده لما نزلوا البندقية الأسطورية بتاعتهم M-16 لعساكرهم في حرب فيتنام لأول مرة .. عشان كده انا حابب أتكلم عن المدفع الرشاش الخفيف MP5 من تصنيع شركة هيكلر أند كوخ Heckler & Koch الألمانية.
دكتور (مصطفي محمود) الله يرحمه كان عنده نظرية كان دايماً يقولها إنك لو جيت كشطت المارك الألماني اللي هو كان عملة ألمانيا قبل اليورو فكنت حتلاقي تحته ماركات 3 شركات اللي هم Mercedes Benz و BMW و Volkswagen ودي كانت طريقته إنه يشرح إزاي المعجزة الإقتصادية الألمانية بعد الحرب العالمية الثانية كانت قايمة علي إبداع شركات العربيات الألماني .. الحقيقة إنك لما تيجي تبص علي شركة Heckler & Koch فهي لازم تبقي الشركة الرابعة اللي تنضم للشركات الثلاثة لإن تبقي غلطان لو إفتكرت إن المعجزة الإقتصادية الألمانية اللي كلنا منبهرين بيها قامت بس علي هندسة السيارات .. شركة Heckler & Koch إتأسست سنة 1949 وكانت شركة تصنيع عدد و مكن خياطة و عجل .. هي أساساً مكنش ليها علاقة بالسلاح .. بس في نفس الوقت هي شركة هندسية و المهندسين بالنسبة ليهم مفيش فرق بين إنك تصنع بندقية وإنك تصنع مكنة خياطة .. سنة 1956 الشركة أثبتت رأيي ده لما قدمت لوزارة الدفاع تصميم البندقية الألية G3 .. اللي حصل في السنة دي إن حكومة ألمانيا الغربية أعلنت عن مناقصة لأحسن تصميم لبندقية أليه عشان تبقي هي السلاح الرسمي للقوات المسلحة الألمانية بونديزفير Bundeswehr .. الشركة قدمت تصميم البندقية G3 واللي بقت واحدة من أكتر البنادق الألية اللي إتباعت في التاريخ .. زي ما قلتلك بالنسبة لينا كمهندسين الفكرة هي إنك تصمم صح وبناء عليها مفيش فرق بين إنك تصنع بندقية وإنك تصنع عجلة .. الشركة شعارها كان مفيش تنازلات أو Keine Kompromisse .. إحنا بنعمل تصميمات متخرش المياه.
خلينا نرجع تاني نكمل كلامنا عن المدفع الرشاش الخفيف MP5 .. معلومة ليك ممكن ميكونش ليها أي لازمة إن MP دي إختصار الكلمة الألمانية Mashinenpistole .. شركة Heckler & Koch نزلت البندقية دي السوق سنة 1969 و ده مدفع رشاش لو شفته حتعرفه علي طول .. انت مش بس شفته في الأفلام الأجنبي انت كمان شفته مع ضباط جيش و شرطة في مصر .. شفته مع الحرس الخاص اللي بيحموا الشخصيات المهمة .. هو سلاح خفيف و فعال و يعتمد عليه بس هو فيه مشكلة كبيرة شوية وهي عيار الطلقات اللي بيستخدمها .. المدفع الرشاش ده بيستخدم طلقات عيار 9 مليمتر اللي هي نفس طلقات المسدسات وده بيخليه سلاح ملوش أي ستين لازمة لو انت مثلاً ضابط قوات خاصة إتطلب منك تقتحم مكان مسيطر عليه إرهابيين لابسين دروع واقية ضد الرصاص .. سنة 1989 حلف شمال الأطلسي NATO لإنه شاف إن كتير من الدول الأعضاء فيه بقت بتستخدم المدفع الرشاش ده إنه لازم المشكلة دي تتحل .. في السنة دي قيادة الحلف طلعت لستة طلبات أو Requirements لفئة جديدة من البنادق الألية سموها Personal Defense Weapon أو PDW إختصاراً .. لما إتسألوا هو يطلع إيه البتاع ده؟ إتقالهم والله إحنا مش عارفين هو الإسم عجبنا بس اللي إحنا عايزينه هو إن يبقي عندنا بندقية شبه MP5 بس من غير مشاكل و عيوب MP5 .. إتصرفوا أنتوا بقي .. المشكلة كانت أكبر من إن شركة Heckler & Koch تقول بسيطة حنخلي البندقية تضرب طلقات أقوي .. المشكلة إن لازم البندقية نفسها تصميمها يتعدل .. الحل كان المعجزة الهندسية اللي اسمها H&K MP7.
تصميم السلاح عامل زي عمايل القهوة .. لازم تبقي علي نار هادية .. البندقية دي شركة Heckler & Koch فضلت تشتغل عليها 10 سنين لحد ما في سنة 2000 بدأت تنتجها .. بندقية إتعملت بروقان .. البندقية مش متصنعة من البلاستيك إنما متصنعة من البوليمرات بنسبة 15% متصنعه من Fiberglass فده معناه إنها خفيفة بس في نفس الوقت قوية ومش بتصدي .. هي بتستخدم عيار طلقات مخصوص ليها ومش حينفع تستخدمه مع أي بندقية تانية أبعاده 4.6×30 مليمتر ودي طلقة خارقة للدروع .. عايزك تعرف لو انت لابس درع واقي من الرصاص و خليني أقولك انا عايزك تلبس أحسن درع واقي من الرصاص متاح في السوق اللي هو CRISAT ودي إختصار Collaborative Research in Small Arms Technology وفكك من اسمه المهم إن الدرع ده بيتكون من لوح تيتانيوم بسمك 1.6 مليمتر و فوقه 20 طبقة من مادة كيفلار Kevlar فعايز أقولك إن طلقة من بندقية MP7 تقدر تموتك حتي لو ضربتها فيك من علي بعد 200 متر .. إنبهرت ولا لسه؟
اللي منكوا بيركزوا شوية في الأرقام حيقف و يقول لا إستني شوية .. انت قلت إن المدفع الرشاش MP5 بيستخدم طلقات 9 مليمتر ودي كانت مشكلته إنها كانت طلقة ضعيفة تقوم تقولي إن البندقية الجديدة MP7 بتستخدم طلقات 4.6 مليمتر؟ لا وجاي تقولي كمان إنها خارقة للدروع؟ .. الحقيقة اه وانت محتاج تفهم ليه؟ .. فيه مدرستين عكس بعض في الطلقات .. المدرسة الأولانية إن الصح يبقي معايا طلقة عيارها كبير و تقيلة عشان تسبب أكبر أذي ممكن للي عايز أضربه بيها .. المدرسة الثانية بتقول لا إحنا محتاجين طلقات صغيرة و تبقي سريعة ودي المدرسة اللي ماشية عليها شركة Heckler & Koch لما جت تعمل MP7 .. الطلقة عيار 4.6 مليمتر بتطلع من البندقيه MP7 بسرعة بتوصل 738 متر في الثانية .. علي فكرة عشان أبقي صريح معاك شركة Heckler & Koch جربت تمشي في المدرسة الثانية لما عملت البندقية UMP45 ودي تبقي بنت عم MP5 و بتستخدم عيار طلقات 11 مليمتر بس دي لما بتخرج من البندقية بتطلع بسرعة 256 متر في الثانية .. شايف الفرق في السرعات سيدي الرئيس؟ .. فرق السرعات ده هو اللي بيخلي الطلقات الصغيرة السريعة هي اللي تقدر تخترق الدروع الواقية ضد الرصاص.
عشان البندقية تعرف تضرب طلقات بالقوة دي مع إن زي ما انت شايف هي بندقية محندقة في نفسها شوية فهي إعتمدت علي شوية تريكات في تصميمها .. هي فعلاً بندقية صغيرة .. طول ماسورتها 180 مليمتر .. وزنها أقل من 2 كيلوجرام .. انت لو رحت السوق تشتري شوية خيار و طماطم حتشيل وزن أكتر من كده .. فيه نقطتين اللي تصميم البندقية إعتمد عليهم عشان يبقي بالعبقرية دي:
النقطة الأولانية حاجة اسمها Firing Mechanism أو الطريقة اللي الطلقة بتطلع بيها من الماسورة و اللي المظروف بتاعها بيتطرد بيها وإزاي الطلقة اللي وراها في الخزنة بتحل محلها .. بنادق MP5 كانت معتمد علي طريقة اسمها Delayed Blowback System ودي فكرتها من غير ما أدخلك في حوارات إن بيبقي عندك ميكانيزم ميكانيكي بسوسته بيبقي دوره إن حضرتك لما تدوس الزناد فهو بيسحب المظروف لورا و يفتحله سكة عشان ضغط البارود هو اللي يطرد المظروف بره البندقية .. زي ما انت شايف إن كلمات زي ميكانيزم ميكانيكي و سوسته و يزق فده معناه بالضرورة إن يستحسن يعني لو تكون بتستخدم طلقة خفيفة زي 9 مليمتر .. في حالة MP7 فالنظام ده كله إتشال و حل محله نفس النظام اللي شركة Heckler & Koch بتستخدمه في البنادق الألية بتاعتها HK415 وهي إن غازات العادم بتاعة الطلقة بتلف في مسارات داخلية جوه البندقية عشان مش بس تطلع الطلقة من الماسورة إنما كمان تطرد المظروف و تسحب الطلقة اللي وراها من الخزنة .. ده السبب إن البندقية MP7 مش بس بتستخدم عيار طلقات صغير إنما كمان بتقدر تضرب 950 طلقة في الدقيقة .. من ضمن الأوبشنز اللطيفة في البندقية دي إن خزنة الذخيرة بتتركب في المقبض زيها زي المدفع الرشاش العوزي Uzi الإسرائيلي .. طب انا إستفدت إيه؟ .. ده خلي إن الزرار اللي بيتحكم في معدل ضرب النار أو Fire Selector اللي بيتحكم في انت مخلي البندقية متضربش أصلاً ولا تضرب طلقة طلقة ولا تضرب أوتوماتيك بقي سهل عليك تستخدمه سواء كنت ماسك المقبض بإيدك الشمال أو اليمين.
النقطة الثانية وهي عيار الطلقة نفسه .. تاني .. البندقية MP7 بتستخدم طلقات عيار 4.6 مليمتر ودي طلقات صغيرة و بالتالي رد فعل البندقية مش بس مش كبير ده يمكن متحسش بيه .. يكفي إني أقولك إن Recoil أو رد فعل البندقية MP7 يعتبر أقل بحوالي 50% من رد فعل البندقية MP5 لمجرد إنها بتستخدم طلقات عيار 9 مليمتر .. فكرة كمان إن كعب البندقية بيتني فانت تقدر تفرده و تسند الكعب علي كتفك وانت بتضرب فده لوحده بيزود دقة التصويب بشكل كبير .. نقطة عيار الطلقات دي كمان فرقت في حجم خزنة الذخيرة .. إذا كانت خزنة الذخيرة بتاعة MP5 بتشيل 30 طلقة فالخزنة بتاعة MP7 بتشيل 40 طلقة لمجرد إن عيار الطلقة قل النص تقريباً.
البندقية دي بدأت شركة Heckler & Koch تنتجها بشكل موسع سنة 2000 .. سنة 2001 حصلت هجمات 11 سبتمبر ومن بعدها و كتير من عناصر القوات الخاصة الأميريكية بقت بتعتمد عليها .. يقال إن عساكر من وحدة SEAL Team 6 اللي نفذوا عملية إغتيال (أسامة بن لادن) الله يرحمه سنة 2011 كانوا مستخدمين البندقية دي .. زي ما قلتلك إحنا دايماً بيجي في دماغنا إن الصناعة الألمانية رايحة في سكة المكن و العربيات بس صدقني لو قلتلك إن شركة Heckler & Koch فعلياً من أهم شركات السلاح في العالم و الإقتصاد الألماني إعتمد عليها بشكل كبير من ساعة ما بدأت تمشي في السكة دي .. الشركة أساساً مكانتش شغالة في السلاح بس الهندسة مفيهاش حاجة اسمها دي شغلتي ولا مش شغلتي .. السلاح هو مكنة .. بمجرد ما تعرف بتتشغل إزاي حتعرف تصمم زيها و أحسن منها كمان.
المصادر:
مقالة بعنوان Heckler & Koch MP7 is a cross between a submachine gun and a carbine نشرت في مجله The National Interest وده لينك المقالة الأصلية:
http://tionalinterest.org/blog/buzz/heckler-koch-mp7-cross-between-submachine-gun-and-carbine-141712
مقالة بعنوان Targeting the perfect bullet نشرت علي موقع Machine Design وده لينك المقالة الأصلية:
ps://www.machinedesign.com/archive/article/21815544/targeting-the-perfect-bullet
مقالة بعنوان Here’s what makes the MP7 so deadly in the hands of America’s special operators نشرت علي موقع Military وده لينك المقالة الأصلية:
https://www.military.com/off-duty/2020/03/23/heres-what-makes-mp7-so-deadly-hands-americas-special-operators.html
مقالة بعنوان MP-7: A SEAL team 6 favorite weapon نشرت علي موقع SOFREP وده لينك المقالة الأصلية:
/sofrep.com/news/mp-7-a-seal-team-6-favorite/
