مصنع فولكس فاجن .. إيه ده كله إيه ده كله.

لينك التسجيل الصوتي للمقالة علي Sound Cloud:
https://soundcloud.com/user-112011687-312727988/i7atkfbljxsn

اللي عايز أتكلم عنه النهاردة هو معجزة هندسية بكل المقاييس .. إبداع هندسي يحسسك بإنك فخور إنك لو إنت مهندس تبقي واحد من الشرفاء اللي في الشغلانة دي .. اللي عايز أتكلم عنه النهاردة هو مصنع شركة فولكس فاجن Volkswagen الألمانية في مدينة وولفيسبورج Wolfsburg و اللي يبقي أكبر مصنع سيارات في العالم .. المصنع ده كبييييير .. كبيييير أوووووووي .. خاااااالص .. ده مصنع مبني علي مساحة تعتبر ضعفين مساحة جزيرة الزمالك .. مصنع فيه فندق و إستاد كرة قدم بتاع فرقة وولفسبورج اللي بتلعب في الدوري الممتاز الألماني .. و في نفس الوقت ده مصنع في منتهي الكفاءة اللي خلقها ربنا .. المصنع ده بيخرج منه 800,000 عربية في السنة .. يعني 3,600 عربية في اليوم .. يعني عربية كل 16 ثانية .. يعني في الوقت اللي إنت بتقرأ فيه الكام كلمة دول المصنع ده أنتج عربية جديدة .. ده اللي أنا عايز أتكلم عنه النهاردة .. إزاي مصنع بالضخامة دي يبقي برده بالكفاءة دي؟

أنا ححاول أشرح بالتفصيل إزاي ده بيحصل بس إنت محتاج تفهم حاجة .. المصنع ده متعملش من يوم و ليلة .. المصنع ده إتعمل سنة 1938 و لحد اللحظة اللي إنت بتقرأ فيها كلامي أنتج أكتر من 64 مليون عربية .. من أول العربية البيتلز أو الخنفسة لحد العربية باسات موديل 2020 .. سنين و سنين من التعب و الإبتكار و التفكير و التطوير .. و ده أهم درس لازم تبقي حاطه في دماغك من دلوقتي لحد ما نخلص إن مفيش حاجة بتتبني في يوم و ليلة .. في المقالة دي حنحاول نقسم الموضوع لنصين .. الضخامة و الكفاءة .. الأول إنت محتاج تفهم إزاي المصنع ده كبير؟ .. كبير خاااالص .. و في نفس الوقت تفهم هو إزاي بالكفاءة دي؟ .. في النص حنشرح شوية أفكار هندسية هي اللي خلت المصنع ده معجزة هندسية حقيقية محتاجين نقف قدامها و نتعلم منها.

هو يعني المصنع ده كبير قد إيه معلش يعني؟

خلينا نبدأ بالأساسيات .. لنفترض إنك صحيت الصبح رايح شغلك في المصنع .. وصلت عند البوابة و بتمضي إنك دخلت .. بمجرد ما بتخش من بوابة المصنع حتلاقي محطة أوتوبيسات .. أيوه .. المصنع فيه موقف أوتوبيسات زي موقف رمسيس كده و الموقف ده فيه أوتوبيسات بتوصل العمال للمبني اللي هم شغالين فيه .. المصنع فيه مباني كبيرة و كتيرة .. فيه مبني جواه طوله 3.6 كيلومتر .. المصنع كله إتبني علي مساحه 6.5 مليون متر مربع .. طرق الأسفلت اللي بتربط المصنع ببعضه و اللي أوتوبيسات العاملين بتمشي فيها لو جيت حسبت طولها حتلاقيها 70 كيلومتر .. عشان أحطك في الصورة .. الطرق جوه المصنع قد المسافة من أكتوبر لحد التجمع الخامس .. جوه المصنع فيه 6000 عجلة متاحين لعمال المصنع عشان ينتقلوا بيهم براحتهم .. لإن تاني .. المصنع كبيييير أوووووي .. ده مصنع شغال فيه 63,000 بني أدم و الناس لازم تتغدي .. ده مصنع العربيات الوحيد في العالم اللي جواه مصنع سدق .. و اه إسمه سدق مش سجق يا قاهروية .. لك أن تتخيل إن المصنع ده .. بتاع السدق مش بتاع العربيات .. بدأ يشتغل سنة 1973 لما الشركة إكتشفت إن أرخصلها إنها تصنع السدق بنفسها ولا إنها تشتريه من بره عشان يتعمل في الكانتين بتاع المصنع .. سنة 2018 لوحدها هم أنتجوا 8 مليون حتة سدق و علي فكرة السدق ده بيتباع في12 دولة علي مستوي العالم و علي حسب كلام الشركة ففيه 2.6 مليون سدقاية بيتاكلوا سنوياً طالعين من مصنع السدق بتاع فولكس فاجن.

بلاش السدق .. المصنع ده بينتج في اليوم 3,600 عربية و العربيات دي لازم تطلع بره المصنع عشان تروح تتباع .. فيه طريقتين عشان العربيات تطلع بره المصنع .. الطريقة الأولانية إنها تروح بالقطر و الطريقة الثانية إنها تروح لأجانص العربيات الملحق جوه المصنع .. أيوه إنت قريت صح .. فيه في المصنع محطة قطر زي محطة مصر كده اللي في رمسيس و فيه عندهم أكبر أجانص عربيات في العالم و الحقيقة إن الإتنين سواء محطة القطر أو الأجانص جايين بمشاكلهم لإن السؤال المنطقي اللي المفروض تسأله لنفسك .. هو أنا إزاي أعمل محطة قطر جوه مصنع؟ .. و أنهي أجانص عربيات ده اللي حيساع 1800 عربية في اليوم؟

مصنع فولكس فاجن في وولفيزبورج عنده أكبر محطة سكة حديد قطاع خاص في أوروبا و تحت إيدهم خط سكة حديد طوله 60 كيلومتر .. ده لوحده صداع في راس أي حد بيفكر في البنية التحتية للمصنع بس أنا محتاج أخليك تشغل مخك معايا شوية .. إزاي تحمل كل عدد العربيات ده علي قطر؟ ..  الحل المنطقي إن القطر يخش بظهره .. عربيات الحمولة تخش المحطة الأول و العفريتة هي اللي تبقي قدام خالص .. يعني العربيات الجديدة اللي طالعه من المصنع حتسوقها إنت لحد ما تملي العربيات و القطر يتحرك .. لكن .. إنت بتتكلم عن قطر بضاعة كبير .. كبير أوي .. كبير لدرجة إن فيه 20 عربية فده حياخد وقت .. طب و الحل؟ .. إحنا حنعمل محطة قطر بس بالعرض .. حنرص عربيات قطر بالعرض جنب بعض و العربيات دي حنحطها علي سير ضخم شوية بحيث إن العربية اللي طالعه من المصنع بدل ما كانت تمشي مسافة طول عربيات القطر كله بقت بتمشي يدوبك مسافة عربية قطر واحدة .. الطريقة دي فعالة أوي و سريعة أوي .. صحيح هي خلتك تدفع كتير كInitial Cost بس بتخلي المصنع يقدر يطلع كل يوم 10 قطارات متحملين 1800 عربية يومياً.

نيجي لمشكلة الأجانص .. الحقيقة هم مشكلتين .. أول مشكلة إن مكان الأجانص بره المصنع فإنت إزاي تنقل عربية لسه جديده لانج من جوه المصنع لحد الأجانص و تاني مشكلة حتركن العربيات دي كلها فين؟ .. إنت محتاج تتعامل مع العربية علي إنها أكلة إنت طلبتها و إنت قاعد في مطعم .. عايز الأكل يجيلك علي صينية متزوقة و من غير ما يكون حد قبلك لمسها .. العربية بتتحط علي سير أوتوماتيك و بتروح من المصنع لحد الأجانص علي السير خلال 7 دقايق .. نيجي بقي للركنة .. الأجانص عبارة عن برجين كل برج فيه 20 دور و كل برج بيشيل 800 عربية و فيه نظام أوتوماتيك إنه يجيبلك عربيتك من مكان ركنتها لحد عندك خلال 40 ثانية .. و بعد ما أديتك مثالين علي إزاي المصنع ده كبير فجه دلوقتي دور إننا نفهم الكفاءة .. إزاي مصنع بالحجم ده بيشتغل؟

مرحلة رقم واحد .. تشكيل شاسيه العربية:

لأكتر من 80 سنة و عملية إن المصنع يجيله ألواح صلب و تتشكل لشاسيه كانت و حتفضل تتم جوه المصنع .. مصنع فولكس فاجن يمكن أكبر ورشة فيه و أهم ورشة فيه هي ورشة المكابس الهيدروليك .. المكبس الواحد لما بينزل علي لوح الصلب عشان يشكله بينزل و معاه قوة ضغط 8000 طن .. عشان بس تستوعب الرقم تخيل إن كل المعدن و كل الصلب اللي اللي برج إيفل في باريس إتصنع منه بينزل فوق دماغك .. عشان كده مهندسين الإنشائي و هم بيبنوا المصنع عملوا أساسات الورشة دي مختلفة شوية عن أساسات المصنع عشان تقدر تمتص Vibrations بتاعة المكابس لإن لو كانوا معملوش كده كان كل المصنع مع كل هبدة من هبدات المكبس حتلاقيه بيترج .. الورشة فيها 6 مكابس بحيث إن لوح الصلب بيخش أول مكبس و يطلع من المكبس السادس عبارة عن شاسيه عربية متشكل جاهز.

تاني المعجزة في الحجم .. لك أن تتخيل إن المصنع فيه 6 مكابس شغالين علي طول بس المصنع فيه 20 مكبس بحيث 6 شغالين و الباقي إحتياطي أو Standby .. الورشة دي بتطلع 500,000 شاسيه عربية في اليوم و طبعاً المصنع أو خلينا نقول شركة فولكس فاجن مش بتصنع موديل واحد بس من العربيات .. ده إنت عندك البيتلز و الجولف و البولو و الباسات و الجيتا و ليلة كبيرة أوي سعادتك .. كل موديل عربية له شاسيه مختلف .. كل شاسيه وله باب و غطاء كبوب مختلف .. عشان كده المكابس دي القوالب بتاعتها بتتغير 6 مرات في اليوم .. القالب الواحد وزنه ما بين 20-30 طن .. أرجع و أقولك المعجزة في الحجم .. القوالب لما بتتغير فهي بتتغير للست مكابس في وقت واحد .. كل قالب بيتركب علي قاعدة ليها مجري .. لما بيجي وقت التغيير الباب اليمين للأوضة اللي المكابس محطوطة فيها بيتفتح و القواعد اللي موجودة بتتحرك في وقت واحد ناحية الباب و بعد كده الباب اللي علي الشمال بيتفتح عشان القوالب الجديدة علي القواعد بتاعتها تخش الأوضة .. عملية تغيير القوالب كلها علي بعضها شاكب راكب بتحتاج 7 دقايق.

بس خلي بالك .. مينفعش إنك تستني لا قدر الله يعني إن مكبس من المكابس دي يعطل عشان تصلحه .. إنت محتاج تبقي عارف إنه حيبوظ من قبل ما يحصله حاجة .. حاول تتخيل إن المكبس ده عربيتك .. لنفترض إنك و إنت سايق سمعت صوت غريب كل ما تيجي تنقل غيارات الفتيس .. إنت ممكن تطنش ولا كأنك سمعت حاجة و ساعتها حتلاقي العربية عطلت بيك فجأة وسط الطريق و إحتست .. بس لو إنت بمجرد ما سمعت الصوت جريت بيها علي الميكانيكي فإنت ممكن تلحق العطل من أوله .. أهو ده اللي بيحصل في ورشة المكابس .. هم حاطين حاجة تفضل طول ما المكابس شغالة تسمع صوتهم و لو سمعت صوت غريب فهي مش بس بتقول للمهندسين بتوع المكابس إن فيه مشكلة دي كمان بتحدد هي المشكلة فين .. الحاجة دي اسمها Acoustic  Camera System .. البتاعة دي عبارة عن حلقة متركب عليها 48 ميكرفون ليهم درجة حساسية عالية اللي هو عشان أبسطهالك يقدروا يسمعوا صوت حركة جناح الدبانة و هي بتزن في ودنك و معاهم كاميرا .. الميكروفونات دي بتلقط الموجة الصوتية للمكابس و هي نازلة علي القالب و بتصور الحركة دي .. حاول تتخيل إنها عامله زي ما إنت تبقي سايق و تسمع صوت غلط في الفتيس أو الموتور و تقدر إنت من مجرد سماع الصوت إنك تميز هي المشكلة فين .. لو المشكلة مثلاً في البوجيهات فإنت تقدر تحدد أنهي بوجيه اللي بايظ من مجرد صوت الموتور.

أي مكنة في الدنيا سواء موتور عربية أو مكبس هيدروليك و هي شغاله الله ينور من غير أي مشاكل بيبقي ليها بصمة صوتية أو Acoustic Fingerprint و البتاعة دي اللي اسمها Acoustic Camera System بتقدر تميز أي إنحراف أو حاجة غلط في البصمة الصوتية للمكنة في مرحلة بدري أوي قبل ما المكنة تبوظ و توقف خط الإنتاج.

مرحلة رقم اتنين .. تقفيل الشاسيه:

تصنيع العربيات شبه عمايل السندونشات بالضبط .. حضرتك قمت الصبح جعان و عايز تاكل .. فتحت التلاجة لقيت عيش و لقيت جبنة براميلي و شوية خيار و طماطم و خس .. علي طرابيزة المطبخ فيه كرتونة بيض .. حضرتك بتقول لنفسك أنا عايز أسلق بيض و أعمل سندوتش جبنة براميلي عليه شرايح طماطم و خيار و بيض مسلوق .. إنت بتحط لنفسك خطوات .. الأول حسلق البيض .. بعد كده حبرده بمياه الحنفية عشان أقشره .. بعد كده حقطع البيض شرايح .. كمان حقطع الطماطم و الخيار .. سندوتش زي ده بياخد منك لو إنت شاطر أوي 5 دقايق وقفة في المطبخ .. تخيل بقي إن مطلوب منك تعمل 10 سندوتشات في الخمس دقايق دول .. طب تخيل لو عليك ضغطة تسليمات و إتطلب منك 100 سندوتش .. أكيد حتغلط .. أكيد فيه سندونش حيبوظ منك .. في إنتاج العربيات ده مينفعش .. إنت ممكن و إنت واقف في محل فول و فلافل تنسي تحط الطحينة .. بس في مصنع عربيات مينفعش تنسي تركب الشكمان .. و لإن الأخطاء مش مسموح بيها فشوية بشوية و شركات العربيات في العالم بقت بتروح في سكة Robotics أو الانسان الألي .. بداية إن فولكس فاجن تبدأ تدخل Robotics في خط الإنتاج و التصنيع بتاع عربياتها كان سنة 1983 .. في مصنع فولكس فاجن ده هم تحت إيدهم 4,100 روبوت .. إنت متخيل؟ .. ده يفسرلك إزاي مصنع زي ده بيطلع عربية جاهزة كل 16 ثانية .. الأداء و الكفاءة دي مينفعش تطلع من غير ما تبقي معتمد علي جيش من الروبوت .. و في نفس الوقت تبقي معتمد علي جيش من المهندسين و الفنيين اللي دورهم إنهم ياخدوا بالهم من الروبوت عشان ميعطلوش لإن لو واحد عطل فالمصنع كله حيعطل.

مرحلة رقم ثلاثة .. وش الدهان:

أحب أقولك إن ورشة الدهانات بتاعة المصنع ده تعتبر أكبر ورشة دهانات في أوروبا كلها .. ورشة إتبنت علي مساحة 8 أدوار .. ورشة دهانات تقريباً قد محطة مترو الشهداء كده .. جوه الورشة فيه سير لو جيت حسبت طوله حتلاقيه 18 كيلومتر .. العربيات بتتحط علي السير و جيش من Robots بيكون دوره إنه يرش الدهان عليهم  .. كل عربية بدرجة لون مختلفة .. مش حتلاقي مثلاً إن النهاردة من الساعة 2 للساعة 4 حيبقي معمول لدهان العربيات باللون النبيتي .. لا خالص .. كل ساعة فيه 360 عربية بتتدهن و بتترش و Robots كإنهم في حصة رسم .. كل Robot متركب في طرفه رشاش أو Nozzle بيلف زي المسدس الساقية بحيث كل لفة بتبقي بدرجة لون مختلف .. بس الحقيقة إن الإبهار مش بس إن يبقي عندك ورشة دهان فيها Robots .. ده الجزء السهل علي فكرة .. الجزء الصعب إنك تحاول تسأل نفسك هو إزاي أضمن إني لما أرش العربية بلون فتوزيع اللون علي جسم العربية يبقي متوازن بحيث مفيش حتة تبقي أغمق من حتة؟

المشكلة دي إنت بتواجهها لو صادف إنك كنت قاعد مع الصنايعي بتاع الدهان اللي بيشطبلك شقتك .. إنت ممكن تلاقي الحيطة بتاعتك مبقعة شوية و البقعة دي بتبان تحت إضاءة قوية شوية بس بتبان .. الحل هو إنك تلعب شوية بالكهرباء الإستاتيكية .. عارف في الشتاء لما بتحس إن اللحاف بتاعك بيكهرب؟ .. هي دي .. حضرتك كل اللي بتعمله إنك بتشحن جسم العربية بشحنة موجبة و ده عن طريق إنك بتجيب شاسيه العربية بعد ما إتجمع و إتلحم في بعضه في المرحلة الثانية عن طريق Robots و تغطسه في حمام سباحة بحيث إن حمام السباحة ده بيجري فيه فولت جامد شوية بشحنة موجبة .. و في نفس الوقت بتشحن اللون شحنة سالبة بحيث إن كل قطرة من قطرات الدهان تجري علي سطح علي المعدن بتاع شاسيه العربية عشان تلزق فيه.

مرحلة رقم أربعة .. مرحلة خط التجميع Assembly Line:

دي مرحلة إن بعد ما الشاسيه إتلحم في بعضه و بقي عربية متقفلة بأبواب و بعد ما العربية خدت اللون بتاعها نيجي بقي نركبلها إكسسواراتها .. خط التجميع أو Assembly Line ده شغال فيه 20,000 بني أدم لوحده .. الخط ده طوله 19 كيلومتر .. عليه ناس بتركب كل حاجة في العربية .. الفوانيس .. العجل .. الموتور .. الفتيس .. كل مجموعة وظيفتها إنهم يركبوا حاجة معينة بيبقي قدامهم 60 ثانية بس عشان يركبوا الحاجة دي .. عشان كده Assembly Line بتاع مصنع فولكس فاجن بيقدر يقفل 800,000 عربية كل سنة من أربع موديلات مختلفة .. مرحلة Assembly Line دي مفيهاش Robots .. دي كل اللي بيقوم بيها مهندسين و فنيين .. لكن .. أكبر و أهم مشكلة لازم تكون إنت لوحدك وصلتلها هي قطع الغيار .. لو خط الإنتاج ده بيقفل 800,000 عربية في السنة فهل معني كده إن المصنع فيه مخزن يساع إنك تحط فيه كل قطع الغيار بتاعة 800,000 عربية؟ .. هل دي حاجة منطقية؟ .. هل ده بيحصل أصلاً؟

خد العربيه Volkswagen Golf مثلاً .. الصلب اللي الشاسيه إتعمل منه بيجي من بلجيكا .. الدريكسيون بيجي من رومانيا .. الفوانيس الأمامية بتيجي من جمهورية التشيك و الخلفية بتيجي من بولندا .. الجنوط بتيجي من كوريا الجنوبية بس الكاوتش بيجي من تركيا .. كابلات الكهرباء و الأجهزة الكهربية كلها بتيجي من اليابان و و ماليزيا و الصين .. عربية واحدة من موديل واحد بيتركب فيها 10,000 قطعة غيار بيجيوا من 2,600 مصنع بره ألمانيا و المفروض يعني لو إفترضنا إن المصنع مبيطلعش غير عربيات Golf فإنت كده في السنة محتاج تخزن 8 ترليون قطعة غيار .. تاني .. هل ده منطقي؟ .. بالتأكيد لا .. أومال إيه اللي بيحصل؟

المصنع ده شغال بطريقة تانية إسمها Just in Time و دي فكرتها بمنتهي البساطة إن قطع الغيار بتيجي للمخازن و منها بتروح لخط التجميع في نفس اللحظة اللي المهندس أو الفني بيحتاجها .. مصنع فولكس فاجن فيه حتة إسمها السوبر ماركت و ده مستودع قطع الغيار بتفضل تجيله 24 ساعة كل يوم .. قطعة الغيار اللي بتيجي السوبرماركت بتفضل قاعدة ما بين 1-6 ساعات و بعد كده بتتاخد عشان تتركب لعربية و بيحل محلها قطعة غيار تانية جاية من المصنع بتاع Supplier أو المورد .. فكرة Just in Time دي واقفة علي شعرة .. هامش أمان حوالي 6 ساعات .. بس قصاد Risk دي فده نظام في منتهي الكفاءة .. بس إنت عشان توصل للكفاءة القصوي اللي المصنع ده شغال بيها لازم تسأل نفسك هو أنا إزاي حفضل مراقب المولد ده كله؟ .. إزاي حبقي واخد بالي هو المهندس اللي واقف في خط التجميع ده لما بيحتاج قطعة غيار إزاي أنا أوصهاله من السوبرماركت لحد عنده؟ .. و إزاي اضمن إني بديله قطعة الغيار اللي هو محتاجها و ملخبطهاش مكان قطعة غيار تانية؟

الحل في بتاعة صغيرة و فكرتها تافهة إسمها RFID Tag .. حاول تتخيلها إني عطيت لكل عربية بتطلع من المصنع بصمة أو رقم قومي .. و مش بس كده .. أنا كتبت ورقة عليها كل قطع الغيار اللي العربية دي حتحتاجها .. كتبت عليها كمان اللون اللي العربية حتتدهن بيه .. بعد كده حطيت كل المعلومات دي بالرقم القومي بتاع العربية علي فلاشة .. في كل مرحلة من مراحل تصنيع العربية سواء البني أدم أو Robot بيعرف يقرأ المعلومات اللي علي الفلاشة دي أو RFID Tag .. من بعد أول مرحلة يعني من بعد ما ألواح الصلب إتكبست عشان تتشكل علي هيئة شاسيه و العربية بيتحطلها RFID Tag .. المهندسين بتوع المصنع بيسموا اللحظة دي التعميد أو Baptism و دي في الديانة المسيحية هي اللحظة اللي الطفل الصغير بيتعمد في الكنيسة و زي ما تقول كده مجازاً إنه بياخد ختم النسر إنه خلاص بقي طفل مسيحي .. أهو في مصنع فولكس فاجن بمجرد ما العربية إتحطلها RFID Tag فهي خلاص خدت ختم النسر إنها حتبقي عربية خارجة من مصنع فولكس فاجن.

فولكس فاجن شركة جامدة زحليقة و أنا مش قصدي حاجة وحشة .. الناس دي مش كفاية عليهم إن عندهم مصنع يكفي إن كلية هندسة جامعة إسكندرية تبني المنهج بتاع كل الأقسام اللي فيها عليه عشان يدرسوه و صدقوني حيطلعوا دفعه مهندسين شاطرين جداً إنما كمان جوه المصنع عاملين إدارة بحث و تطوير أو زي ما بتتسمي Research & Development أو R&D للناس اللي بتحب الإختصارات بتخليهم سابقين شركات عربيات كتير .. الناس دي مش بس بتفكر إزاي تطور من الفرامل أو أنظمة الأمان أو كفاءة الموتور لعربياتها .. الناس دي شغالة علي أفكار ممكن تشقلب صناعة العربيات زي الذكاء الصناعي AI و العربيات اللي بتسوق نفسها Self-Driving .. يمكن درة التاج بتاع إدارة البحث و التطوير لشركة فولكس فاجن هو Wind Tunnel بتاعهم اللي المروحة بتاعته لوحدها قطرها 8 متر و بتحتاج كهرباء 3 ميجاوات لوحدها و بيقدر يولد ريح بسرعة 256 كيلومتر في الساعة .. مش بس كده .. الWind Tunnel ده يقدر يحاكي إن العربيه تسوق في المطر و الثلج و الصحراء .. قسم البحث و التطوير في فولكس فاجن شغال فيه 10,000 بني أدم .. ده معناه إن المهندس يقدر يقترح فكرة جديدة و تتطبق و تختبر و تتعدل جوه المصنع ولو أثبتت نجاحها بتتنفذ فورا.

كل تفصيلة من تفاصيل المصنع ده إتبنت عشان يحقق أعلي كفاءة ممكنة عشان تطلع أقصي إمكانيات مصنع بالضخامة دي .. المصنع ده معجزة هندسية .. مصنع تقدر تقضي ساعات و أيام وانت بتدرس إزاي إتعمل؟ و ليه إتعمل بالطريقة دي؟ بس أهم درس تحطه في دماغك زي ما قلت إن المصنع ده مبقاش كده من يوم وليلة .. 80 سنة وهو بيتطور و بيكبر .. المصنع ده زيه زيك بالضبط .. انت دلوقتي غير ما انت كنت من عشر سنين و أكيد حيبقي غيرك كمان عشر سنين .. مع كل سنة المصنع بيتعلم و بيغلط و بيتعلم من غلطته و بيغلط تاني .. لحد ما وصل للمستوي ده و لسه فيه أحسن.

المصدر:
حلقة من برنامج Richard Hammond’s Big: World’s Biggest Car Factory وده لينك الحلقة علي YouTube:
ps://www.youtube.com/watch?v=WlSxy_5GGh0&list=PLpp6pYY-9DKj0EVhKoJGmlTo6K7-ZPrkc