لينك التسجيل الصوتي للمقالة علي Sound Cloud:
https://soundcloud.com/user-112011687-312727988/edlwt10dhnen
أهم مبدأ في السياسة وده تقريباً المبدأ اللي كل السياسيين القدام في الكار عارفينه هو اللي بيعبر عنه المثل الشعبي اللي بيقول يابا علمني أبقي مهم قاله يا إبني تعالي في الهايفة وإتصدر .. أي بلد في الدنيا فيها مشاكل بس هي الفكرة هل الحاكم بيصحي الصبح يفكر هو إزاي يحل المشاكل دي؟ ولا بمجرد ما يقوم الصبح يقول يا فتاح يا عليم يا رزاق يا كريم إبعتلي يا رب خناقة تافهة أرميها للشعب يتلهي فيها عشان ينسوا يفكروا في المشاكل بتاعة البلد اللي أنا مش عارف أحلها؟ .. السياسيين اللي بقالهم سنين في الكراسي عارفين المبدأ ده كويس .. حكامنا بيستخدموه حلو أوي .. (دونالد ترامب Donald Trump) بيستخدمه .. ده مبدأ أساسي حتلاقيه في شنطة العدة بتاعة أي سياسي ومفيش سياسي متودك وفاهم ودماغه تعرف الإنتخابات بتتكسب إزاي أكتر من (رجب طيب اردوغان).
أنا مبدأياً أهو ومن دلوقتي وعلي بلاطة أنا مش جاي أقول هو (اردوغان) حلو ولا وحش .. دي حاجة تخص الأتراك وأنا مش معايا باسبور تركي عشان أطلع أقول للأتراك ينتخبوا (أردوغان) أو يمشوه .. لكن .. أنا النهاردة جاي أوريك إزاي سياسي تقيل زي (أردوغان) بيلعب مع شعبه بالمبدأ بتاع تعالي في الهايفة وإتصدر .. الهايفة اللي (أردوغان) متصدر فيها دلوقتي هي الخناقة حول مسجد أية صوفيا.
فيه شوية ناس أتراك راحوا لمجلس الدولة في تركيا يرفعوا قضية عشان يرجعوا مسجد أية صوفيا يشتغل تاني كمسجد بعد ما بقاله سنين شغال كمتحف .. مهم تبقي فاهم إن الأتراك اللي رفعوا القضية دي هم من نفس العينة اللي إحنا عارفينهم في مصر وعايشين معانا اللي بتلاقيهم راحوا قدموا بلاغ للنائب العام ضد أي حاجة تافهة تطلع علي سوشيال ميديا عشان اليوم السابع تطلع تقول عليهم خبر صفحة أولي والناس تتريق عليه .. بس في تركيا موضوع تحويل أية صوفيا من متحف لمسجد دي خناقة كبيرة بقالها سنين ولازم بغض النظر عن جو التريقة علي كل حاجة اللي بنشوفه علي سوشيال ميديا إنك تفهم كويس هي المشكلة أصلها إيه؟ وبعد كده تفهم ليه أنا بقول علي المشكلة دي إنها الهايفة اللي (أردوغان) رماها لشعبه عشان ينسيهم مشاكلهم.
الموضوع بدأ سنة 360 لما الإمبراطور البيزنطي (كونستانيوس الثاني) كان عايز يبني كنيسة كبيرة شوية ولإن وقتها متفهمش الرجل كان بخيل ولا الميزانية كانت علي قدها فالسقف بتاع الكنيسة إتبني من الخشب .. يدوبك الكنيسة إتبنت حصلت ثورة في البلد والكنيسة إتحرقت .. سنة 415 الإمبراطور (ثيوديسيوس الثاني) جرب حظه تاني وقالك بدل ما حنبني الكنيسة من الخشب حنبنيها من الرخام وبرده ولإن الفقر عارف صحابه علي رأي خالتي ربنا يديها الصحة سنة 532 حصلت ثورة تانية والكنيسة إتهدت .. وعشان التالتة تابتة لما جت سنة 532 إتبني المبني اللي إنت عارفه دلوقتي بإسم أية صوفيا.
سنة 532 الإمبراطور البيزنطي (جاستينيان) أمر ببناء كاتدرائية ضخمة علي ضفاف مضيق البوسفور عشان تبقي مقر للكنيسة المسيحية الأرثوذوكسية .. الكنيسة إتسمت هاجيا صوفيا Hagia Sophia ودي كلمة يوناني معناها الحكمة الإلهية .. للناس برده اللي مش مجمعة أوي ده معناه إيه .. زمان كان فيه حاجة إسمها الإمبرطورية الرومانية ودي كانت دولة وثنية بتعبد كوكتيل ديانات ملوش علاقة ببعضه ومعاهم الديانة اليهودية أول ديانة سماوية .. شوية والمسيحية ظهرت وبدأت الحرب الأهلية اللي فضلت تكبر و تكبر لحد ما في الأخر الإمبراطورية الكبيرة دي إتقسمت نصين .. النص الشرقي اللي هو الإمبراطورية البيزنطية أو الروم زي ما العرب كانوا بيسموها وعاصمتها القسطنطينية اللي هي إسطنبول دلوقتي في تركيا .. النص الغربي اللي هو الإمبراطورية الرومانية الغربية وفضلت عاصمتها روما.
شوية والإنقسام مبقاش بس حدود بين دولتين .. ده بقي حدود بين ديانتين .. الإمبراطورية البيزنطية بقت ديانتها الرسمية هي المسيحية الأرثوذوكسية .. الإمبراطورية الرومانية الغربية اللي بعد كده بقت الإمبراطورية الرومانية المقدسة ديانتها كانت المسيحية الكاثوليكية .. نفس عميق ونرجع تاني للإمبراطور (جاستنيان) .. المهندسين البيزنطيين خلصوا بناء الكاتدرائية سنة 537 اللي عشان برده تبقي مستوعب فحاول تتخيل إن المبني ده بالنسبة للبيزنطيين كان زي الأزهر الشريف بالنسبة لينا كمسلمين في مصر.
المهم إن لأكتر من 900 سنة والكاتدرائية بتاعة أية صوفيا هي مقر الكنيسة الأرثوذوكسية يمكن بإستثناء الكام سنة اللي خلال الحملة الصليبية الرابعة لما المسيحيين الكاثوليكيين دخلوا القسطنطينية وإحتلوها وحولوا أية صوفيا بدل ما هي كاتدرائية أرثوذوكسية خلوها كاثوليكية .. بس ما علينا مش ده موضوعنا .. بداية إن الموضوع يهمنا حيبقي سنة 1453 لما السلطان العثماني (محمد الثاني) أو (محمد الفاتح) دخل القسطنطينية وأنهي وجود الإمبراطورية البيزنطية وكان من أوائل القرارات اللي هو خدها تحويل كاتدرائية أية صوفيا لمسجد .. ده كان معناه إن المهندسين العثمانيين أضافوا الأربع مأذن للمسجد اللي مكانوش موجودين قبل كده .. كمان المهندسين العثمانيين حطوا المحراب ووجهوا القبلة بإتجاه مكة المكرمة .. كمان غيروا كتير من الديكور الداخلي للمسجد بحيث كل الصور واللوح المسيحية إتشالت أو إتحط فوقيها أيات قرانية .. اللوح والرسومات المسيحية اللي فضلت السلطان أمر بإنها تتغطي بالجبس زي ما إنت كده الحيطة بتاعة شقتك يبقي فيها شرخ وتروح تشتري شوية سمنتوا أبيض وتداري الشرخ اللي في الحيطة.
أول صلاة جمعة تيجي بعد ما العثمانيين فتحوا القسطنطينية إتصلت في مسجد أية صوفيا وفضل المسجد ده هو المسجد الأساسي في العاصمة لحد سنة 1616 لما إتبني المسجد الأزرق أو مسجد السلطان (أحمد) واللي لو شفته تحسه نسخة من مسجد أية صوفيا .. المسجد الأزرق هو هو تقريباً مسجد أية صوفيا وبتميزهم عن بعض إن أية صوفيا له 4 مأذن بس المسجد الأزرق له 6 مأذن .. غير كده مفيش فرق .. تقريباً كل المعمار العثماني الخاص بالمساجد إتبني علي نفس التصميم بتاع مسجد أية صوفيا.
جت الحرب العالمية الأولي سنة 1914 وخلصت بعدها بأربع سنين وخلصت معاها الدولة العثمانية عشان يجي للحكم (مصطفي كمال أتاتورك) وتبدأ تركيا جزء جديد من تاريخها عشان تبقي جمهورية علمانية .. سنة 1931 فيه واحد إسمه (توماس ويتمور Thomas Whittemore) وده يبقي مؤسس حاجة إسمها المعهد البيزنطي الأميريكي Byzantine Institute of America سافر أسطنبول وقابل (مصطفي كمال أتاتورك) وأقنعه بإنه يسمحله إنه أولاً يشيل الجبس الأبيض اللي كان محطوط علي اللوح المسيحية في أية صوفيا .. ثانياً إنه يشرف علي تحويل أية صوفيا من مسجد لمتحف .. سنة 1972 (توماس ويتمور) كتب كتاب حكي فيه قصة أية صوفيا وإزاي هو قدر يحول المسجد لمتحف والكتاب ده إسمه Hagia Sophia: A history of Constantinople وفي الكتاب هو قايل نصاً الجملة دي .. “لحد ما قابلت (أتاتورك) أية صوفيا كان مسجد وتاني يوم بعد ما قابلته لما رحت هناك لقيت ورقة متعلقة علي باب المسجد مكتوبة بخط إيد (أتاتورك) شخصياً إن المسجد مغلق للتجديدات”.
علي فكرة .. فيه مؤرخين أتراك بيقولوا إن الرجل (توماس ويتمور) ده مش كداب بس بلاش نقول عليه كده خلينا نقول إنه بينسب لنفسه حاجات هو معملهاش لإن الناس دي بتقول إن (أتاتورك) كان عايز يحول مسجد أية صوفيا لمتحف من سنة 1923 ودي السنة اللي أُعلن فيها ميلاد الجمهورية التركية بس لأسباب كتير هو إستني عشان يطلع قرار بتحويل أية صوفيا من مسجد لمتحف وبموجب قانون طلع سنة 1934 مبقاش ينفع إن تقام الصلاة في أي حتة جوه المسجد .. سنة 1935 المسجد إتفتح للزوار عشان يبقي أكبر مزار سياحي في تركيا.
كده إنت فهمت التاريخ ورا المسجد ولو بشكل مختصر ودلوقتي جه الوقت تفهم ليه أنا قلت إن أية صوفيا هو الهايفة اللي (أردوغان) إتصدر فيها؟ .. سنة 2019 وقت الانتخابات بتاعة المحليات (أردوغان) في واحدة من المؤتمرات الجماهيرية قال إن قرار تحويل أية صوفيا من مسجد لمتحف كان غلطة وإنه حيحاول يرجعه تاني لمسجد وهي دي المشكلة .. أنا أقدر أتفهم لو الحكومة التركية هي اللي رفعت قضية للمحكمة الدستورية العليا عشان تلغي قانون سنة 1934 .. أنا أقدر أتفهم إن بما إن (أردوغان) سياسي بيتحسب علي إنه جزء من الحاجة اللي بتتسمي الإسلام السياسي إنه يفضل يقول الإسلام هو الحل ولازم أية صوفيا نروح نصلي فيه علي أساس يعني إن مساجد تركيا مش مكفية إن الأتراك يروحوا يصلوا بس المشكلة إن مش ده السبب .. اللي راح رفع القضية مواطنين أتراك عاديين والقضية إترفعت قدام مجلس الدولة .. حتي النيابة التركية قالت لمجلس الدولة إن الكلام ده إحنا مش موافقين عليه .. يعني النيابة نفسها قالت مش عايزين أية صوفيا يبقي مسجد تاني .. (أردوغان) فضل بعيد عن الصورة لا يمكن المحكمة ترفض القضية وساعتها شكله هو حيبقي وحش وعشان كده أنا بقول إن (أردوغان) مش عايز يقول للناس أنا حعيد مجد (محمد الفاتح) .. هو بيقول للناس بصوا العصفورة.
الغريب إن الناس كلها صدقت ووقعت في الفخ سواء بره أو جوه تركيا .. هو إنت تفتكر (أردوغان) حيزعل لما بطريرك الكنيسة الأرثوذوكسية يطلع ينتقد الخطوة ويقول إن مينفعش أية صوفيا يرجع يبقي مسجد؟ .. دي علي قلبه زي العسل .. هو إنت تفتكر إن لما تطلع وزارة الخارجية اليونانية تنتقد الخطوة إن (أردوغان) حيزعل؟ .. ده يبقي يوم المني لما يعمل حاجة تنكد علي اليونانيين عيشتهم .. ده حتي وزير الخارجية الأميريكي (مايك بومبيو Mike Pompeo) طلع قال إن الكلام ده مينفعش .. هل تفتكر إن (أردوغان) حيزعل؟ .. بالعكس .. كل ده معناه إن شعبيته وسط أهله وعشيرته بتزيد .. مش بقولك الرجل ده سياسي صايع وفاهم ومتودك.
زي ما قلت تركيا بلد زيها زي أي بلد في الدنيا عندها مشاكل .. مش عيب .. العيب إنك بدل ما كل شوية تسأل نفسك طب حنكمل في رحلة تعافي العملة بتاعتنا اللي هي الليرة من أزمتها إزاي؟ أو إنك تسأل نفسك حنعمل إيه في خناقتنا مع الإتحاد الأوروبي؟ أو حنحل مصيبة تدخلنا في سوريا وليبيا إزاي؟ إنك ترمي لشعبك خناقة ملهاش أي ستين لازمة ولا حتفرق مع المواطن التركي في أي حاجة وتقوله روح إشغل وقتك وطاقتك في الهايفة دي.
مسجد أية صوفيا إتحط ضمن التراث العالمي وبناء عليه منظمة اليونيسكو هي اللي مسئولة عن حمايته فلازم أعضاء اليونيسكو بالإجماع يوافقوا علي إن أية صوفيا يرجع تاني مسجد .. وده صعب يحصل .. نقطة كمان وهي إن أية صوفيا كان أكتر مزار سياحي بيدخل فلوس لتركيا .. سنة 2019 لوحدها زاره 3.8 مليون سايح وده السبب اللي خلي الحكومة التركية بعد قرار المحكمة تقول إن يا جماعة أية صوفيا حيفضل متحف زي ما هو السياح تزوره بس حيبقي مسجد برده .. ده يخليني أسأل طب وكان ليه وجع القلب؟ .. فيه ناس بتقول إن ده تريند كان ماشي في تركيا بقاله فترة .. علي فكرة مجلس الدولة في 2019 حكم إن فيه كنيسة إسمها خورا أو تشورا اللي برده إتحولت لمسجد بعد فتح القسطنطينية وبعد كده إتحولت لمتحف وقت حكم (أتاتورك) إنها ترجع تاني تبقي مسجد .. لكن .. أية صوفيا حالة خاصة .. تحويل أية صوفيا من متحف لجامع علي قلبي زي العسل كمسلم .. أنا فعلياً مش فارق معايا .. لا أنا تركي .. ولا بزور إسطنبول وحتي لو زرت إسطنبول فالمسجد حيفضل مفتوح لأي حد يحب يزوره .. ولا حشغل بالي بمكان الركنة لو رحت أصلي الجمعة هناك .. اللي بقوله إن بيبان أوي لو قضية حساسة زي دي القرار اللي حيتاخد فيها معمول عشان خاطر مصلحة الناس ولا معمول عشان مصلحة الحاكم.
أنا بس حابب أختم بإني أقول برافو ل(اردوغان) .. سياسياً دي ضربة معلم .. أي سياسي نفسه يحكم لازم يتعلم من الرجل ده سواء بتحبه أو بتكرهه .. إنت بتحكم بلد فيها أزمة اقتصادية وبتعاني زي بقية الخلق من تداعيات أزمة فيروس كورونا وليك قوات في سوريا وبتتدخل عسكرياً في ليبيا ومتخانق مع اليونان وأميركا والإتحاد الأوروبي .. ووسط كل ده بخطوة واحدة تخلي شعبيتك وسط الناس تضرب في السما .. لو إنت شايف إن القرار ده صح مبروك .. لو إنت شايفه غلط معلش .. لو إنت من سكان إسطنبول ربنا يكون في عونك وقت صلاة الجمعة عشان مش حتلاقي ركنة .. من حقك تبص للقرار ده زي ما إنت عايز .. لكن أنا شايفه من أحلي المناورات السياسية اللي شفتها في حياتي في السنين اللي فاتت.
المصادر:
- مقالة بعنوان Hagia Sophia: Turkey delays decision on turning site into mosque نشرت في موقع هيئة الإذاعة البريطانية BBC وده لينك المقالة الأصلية:
https://www.bbc.com/news/world-europe-53232110 - مقالة بعنوان Museum or mosque? Turkey debates future of iconic Hagia Sophia نشرت في جريدة Los Angeles Times وده لينك المقالة الأصلية:
https://www.latimes.com/world-nation/story/2020-07-02/turkey-debates-iconic-hagia-sophia-status-istanbul - مقالة بعنوان Ayasofya: The mosque-turned-museum at the heart of an ideological battle نشرت في جريدة The Guardian وده لينك المقالة الأصلية:
https://www.theguardian.com/world/2020/jun/30/ayasofya-the-mosque-turned-museum-at-the-heart-of-an-ideological-battle#:~:text=Turkey-,Ayasofya%3A%20the%20mosque%2Dturned%2Dmuseum%20at%20the,heart%20of%20an%20ideological%20battle&text=Today%2C%20the%20Ayasofya%20is%20still,nationalists%20and%20Islamists%20for%20decades. - فيديو بعنوان Hagia Sophia: Through the Ages نشر علي قناة TNT World وده لينك الفيديو علي YouTube:
https://www.youtube.com/watch?v=rqa0eXnDey4
