مصر بتلاعب تركيا في ليبيا .. مين يكسب؟

أنا عارف إن متابعة تطورات الوضع في ليبيا دلوقتي بقي موضوع صعب لإن الوقت بيمر و الأحداث أمر و أمر علي رأي (رؤوف خليف) بس في السناكس دي حنحاول نخليك Up-to-date أو متابع لأخر حاجة حصلت .. مبدأياً أنا مش ناوي أحكي مشكلة ليبيا من الأول .. إحنا فتحنا سيرة الموضوع ده قبل كده .. النهاردة عايزين نوصل بإني أفهمك الزتونة و ده حيخليني أرصلك شوية أحداث حصلت ورا بعض و منها حتفهم هي الدنيا رايحة علي فين:

• بداية من إبريل 2019 و قوات الجيش الوطني الليبي بقيادة (خليفة حفتر) شنت هجومها علي الجزء الغربي من ليبيا و اللي تحت قيادة (فايز السراج) و فعلياً هم فضلوا محاصرين العاصمة طرابلس حوالي سنة كاملة .. يوم 18 مايو 2020 وقعت قاعدة الوطية الجوية في إيد القوات اللي تبع (فايز السراج) المدعوم من تركيا و اللي بعتتله أنظمة دفاع جوي ضد الطيارات اللي بتطير علي إرتفاع منخفض و بعتوله طيارات بدون طيار تركي الصنع اسمها Bayraktar TB2 و حتي بعتوله مسلحين من سوريا .. سقوط قاعدة الوطية خلي فعلياً قوات (فايز السراج) تعمل الريمونتادا بإنهم بعد ما كانوا متحاصرين بقوا هم اللي بيهاجموا.

• يوم 29 مايو 2020 و بعد ما قاعدة الوطية الجوية وقعت في إيد قوات فايز السراج تقوم روسيا و اللي بتدعم القوات بتاعة (خليفة حفتر) بعتت سرب طيارات ميج-29 فولكروم MiG-29 Fulcrum و سرب طيارات سوخوي-24 فينسر Su-24 Fencer لقاعدة الجفرة الجوية .. مش ده الغريب .. الغريب إن صور الأقمار الصناعية اللي إتسربت علي السوشيال ميديا موضحة أوي إن الطيارات مش عليها شعار سلاح الجو الروسي و لما الروس إتسألوا ليه بعتوا الطيارات دي ليبيا كان ردهم إن عليا الطلاق ما بعتنا حاجة .. ده معناه إن لو بكره الصبح القوات بتاعة (فايز السراج) سيطرت علي قاعدة الجفرة و الطيارات دي إتدمرت فغالباً روسيا حتعمل من بنها.

• يوم 5 يونيو 2020 طلعت تويتة من مكتب الرئيس التركي (رجب طيب أردوغان) قالت الهدف اللي قدام القوات بتاعة (فايز السراج) دلوقتي هي إنها تاخد قاعدة الجفرة الجوية و اللي زي ما حضرتك ممكن تكون توقعت تبقي تحت سيطرة القوات بتاعة (خليفة حفتر) .. إيه السيكسي أوي في قاعدة الجفرة الجوية دي اللي مخليها حلوة في عيون اللي بيحاربوا بعض في ليبيا؟ .. دي تبقي أكبر قاعدة جوية في ليبيا و الأهم إنها هي بوابة السيطرة علي مدينة سرت و اللي تعتبر واحدة من أهم المدن الليبية بعد طرابلس العاصمة و بني غازي و اللي برده زي ما أكيد إستنتجت هي تحت إيد (خليفة حفتر).

• يوم 12 يونيو 2020 مقاتلات F-16 تركية عبرت البحر المتوسط و طارت 2,000 كيلومتر رايح جاي من تركيا لحد سواحل ليبيا و رجعت و نفذت مناورات جوية إستمرت 8 ساعات لمجرد إنهم يوروا الأطراف اللي ليها مصالح في ليبيا إن سلاح الجو التركي يقدر يوصل لحد ليبيا.

• يوم 20 يونيو 2020 حلقة جديدة من مسلسل مين اللي ميحبش الجفرة لما طلع الرئيس المصري (عبدالفتاح السيسي) قال إن قاعدة الجفرة الجوية و بالتالي مدينة سرت خط أحمر.

• يوم 2 يوليو 2020 بيزور ليبيا وزير الدفاع التركي (خلوصي أكار) و رئيس هيئة الأركان المشتركة (ياسر جولار) و قعدوا مع (فايز السراج) و طبعاً أكدوا إن تركيا حتفضل واقفة وراه لحد النهاية.

• يوم 4 يوليو 2020 طيارات مقاتلة محدش عارف هي مين نفذت غارة جوية علي قاعدة الوطية الجوية اللي دلوقتي تحت إيد (فايز السراج) و دمرت بطاريات صواريخ دفاع جوي تركية إسمها  MIM-23 Hawk .. إتقال والله أعلم إن ده صح ولا غلط إن اللي نفذ الغارة دي تبقي طيارات رافال Rafale من تصنيع شركة داسولت Dasault الفرنسية و لو الكلام ده صحيح فإحتمال كبير تكون الطيارات دي تابعة لسلاح الجو المصري .. تاني .. مفيش أي دليل يؤكد أو ينفي إن إحنا اللي قصفنا الوطية عشان بس أبقي واضح .. الفكرة إن طيارات رافال اللي مصر إشترتها من فرنسا جت معاها صواريخ جو- أرض مداها فشيخ إسمها Storm Shadow بعيدة المدي .. ده معناه إن الطيارين المصريين كانوا بسهولة يقدروا يضربوا قاعدة الوطية من غير ما رادارات الدفاع الجوي التركية تكون تقدر تلقطها.

ده معناه إيه؟ .. إن لو حصل و مصر و تركيا رفعوا سلاح علي بعض في ليبيا فغالباً النتيجة مش حتبقي في مصلحة تركيا و مصر هي اللي حتكسب المواجهة دي .. فكك من إن في أغلب التقييمات العسكرية مصر بتتصنف إنها تاسع أقوي قوات مسلحة في العالم و تركيا في المركز ال11 .. في رأيي التقييمات دي هراء و كلام فاضي .. الوضع علي الأرض هو اللي بيدي مصر أفضلية و ده الحقيقة راجع لكذا سبب:

السبب الأول: سلاح الجو .. عارف إن تركيا نظرياً تقدر تبعت طيارات F-16 بتاعتها لليبيا و عارف إن تركيا عندها طيارات تزويد بالوقود في الجو بحيث الطيارات التركية تقدر تطير لمسافات طويلة و لفترات طويلة .. نظرياً ده ينفع بس هي المشكلة إن ده حيتعمل إزاي و بتكلفة قد إيه .. تنظيم الطلعات الجوية لطيارات التزود بالوقود و طيارات F-16 حيبقي صداع في دماغ الأتراك حين إن بسهولة أوي طيارات F-16 برده بس المصرية تقدر تطلع من مطارات جوه مصر و تغطي أي حتة في ليبيا .. فيه حل تاني .. ليه لا تركيا تبعت سرب طيارات F-16 لقاعدة الوطية؟ .. هو الحل ده حيحل مشكلة بس حيخلق مشكلة تانية .. حيحل مشكلة التزود بالوقود بس في نفس الوقت إفرض لو مصر حبت تضرب قاعدة الوطية؟ .. ساعتها تركيا حتخسر طياراتها و في نفس الوقت تركيا مش حتعرف ترد بإنها تضرب المطارات العسكرية المصرية .. فيه حد حيقولي بس خلي بالك طيارات F-16 التركية فيها صواريخ جو- جو فشيخة إسمها AIM-120 AMRAAM مش موجودة في طيارات F-16 المصرية .. عندك حق .. بس طيارات الرافال اللي تحت إيد مصر أقوي بكتير من طيارات F-16 التركي .. حتي الطيارات الهليكوبتر .. مصر عندها طيارات AH-64 Apache بس تركيا عندها الموديل الأقدم منها AH-1W Cobra.

السبب الثاني: المدرعات .. العمود الفقري لسلاح الدبابات التركي هو دبابات Leopard II الألماني ودبابات M60 Paton الأمريكاني القديمة و دول بغض النظر عن محاولة الإجابة عن سؤال الأتراك حيبعتوهم إزاي ليبيا فمش حيقدروا يقفوا قصاد أسطول دبابات M1A1 Abrams اللي تحت إيد مصر .. السببين دول مع بعض بيخلوني أقول إن أي مواجهة عسكرية مفتوحة بين مصر و تركيا في ليبيا غالباً حتنتهي بنصر القوات المصرية لإن ليها الأفضلية الجغرافية و التسليحية علي الأقل.

المصدر:

مقالة بعنوان Will the Egyptian and Turkish militaries clash in Libya? نشرت في مجلة Forbes و ده لينك المقالة الأصلية:
https://www.forbes.com/sites/pauliddon/2020/07/09/will-the-egyptian-and-turkish-militaries-clash-in-libya/#3f9237732ea4